Lugpay sa Tion sang Krisis

ANG mga balita sa karon indi gid makalulugpay. Ang isa ka tawo nagsulat: “Ang mga hitabo karon tuman ka makapulung-aw amo nga sa masami indi kita makapamat-od kon bala matan-aw kita sing pang-alas seis nga balita ukon indi.” Ang kalibutan puno sing inaway, terorismo, pag-antos, krimen, kag balatian​—⁠mga kalainan nga sa ulihi mahimo makaapektar sa aton sing direkta, kon indi pa kita karon naapektuhan sini.

Gintagna gid sang Biblia ini nga kahimtangan. Sang ginlaragway ang aton tion, si Jesus nagsiling nga mahanabo ang dalagku nga mga inaway, mga pamiste, kakulang sing pagkaon, kag mga linog. (Lucas 21:​10, 11) Subong man, si apostol Pablo nagsulat tuhoy sa “makahalanguyos nga mga tion nga mabudlay pakigbagayan,” diin ang mga tawo mangin mabangis, mahigugmaon sa kuwarta, kag wala sing gugma sa kaayuhan. Gintawag niya ini nga tion nga “katapusan nga mga adlaw.”​—⁠2 Timoteo 3:1-5.

Gani, sa paglaragway sa mga kahimtangan sa kalibutan, ang mga balita daw kaanggid gid sa ginatagna sang Biblia. Apang diri lang sila magkaanggid. Ang Biblia nagahatag sing pagtamod nga wala ginahatag sang mga balita. Paagi sa inspirado nga Pulong sang Dios, indi lamang naton mahangpan kon ngaa madamo gid ang kalainan kundi kon mangin ano man ang palaabuton.

 Kon Ano ang Pagtamod sang Dios sa Kalautan

Ginapaathag sang Biblia kon ano ang pagtamod sang Dios sa makapasubo nga mga kahimtangan karon. Bisan pa nahibaluan na niya nga daan ang mga kagamo nga mahanabo sa karon, wala sia mahamuot sa sini ukon katuyuan niya nga tugutan ini sing dayon. “Ang Dios gugma,” sulat ni apostol Juan. (1 Juan 4:⁠8) Si Jehova nagaulikid gid sa mga tawo kag ginadumtan niya ang tanan nga kalainan. Nagakaigo gid nga mangayo kita sing lugpay sa Dios, kay sia maayo kag mainawaon kag sarang kag handum niya nga dulaon ang kalainan sa duta. Ang salmista nagsulat: “Luwason [sang gintangdo sang Dios nga langitnon nga Hari] ang imol nga nagapangayo sing bulig, subong man ang nasit-an kag ang bisan sin-o nga wala sing manugtabang. Magakaawa sia sa kubos kag imol, kag luwason niya ang mga kalag sang mga imol. Tubson niya ang ila kalag gikan sa pagpigos kag kasingki, kag ang ila dugo mangin bilidhon sa iya itululok.”​—⁠Salmo 72:12-14.

Naluoy ka bala sa mga nagaantos? Ayhan naluoy ka. Ang empatiya amo ang isa ka kinaiya nga ginsangkap ni Jehova sa aton, kay gintuga kita sa larawan niya. (Genesis 1:​26, 27) Busa, makasalig kita nga si Jehova sensitibo sa pag-antos sang mga tawo. Si Jesus, nga mas nakakilala kay Jehova sangsa kay bisan sin-o, nagtudlo nga si Jehova interesado gid sa aton kag may mapinalanggaon gid sia nga kaawa.​—⁠Mateo 10:​29, 31.

Ang mga tinuga mismo nagapamatuod nga ang Dios nagaulikid sa katawhan. Si Jesus nagsiling nga “ginapasubang [sang Dios] ang iya adlaw sa mga tawo nga malauton kag sa maayo kag nagapaulan sa mga tawo nga matarong kag sa mga di-matarong.” (Mateo 5:45) Para sa mga tawo sa siudad sang Listra, si apostol Pablo nagsiling: “Wala [ang Dios] magpabaya sa iya kaugalingon nga walay saksi nga naghimo sia sing maayo, nga nagahatag sa inyo sing mga ulan gikan sa langit kag sing mapatubason nga mga panag-on, nga ginapuno ang inyo tagipusuon sing pagkaon kag kasadya.”​—⁠Binuhatan 14:17.

Sin-o ang Dapat Basulon?

Talalupangdon nga si Pablo nagsiling man sa mga taga-Listra: “Sa nagligad nga mga kaliwatan gintugutan [sang Dios] ang tanan nga pungsod nga maglakat sa ila mga dalanon.” Sa amo, ang mga pungsod​—⁠ukon ang mga tawo mismo⁠​—⁠amo gid ang mabasol sa ila kahimtangan. Ang Dios indi dapat pagbasulon.​—⁠Binuhatan 14:16.

Ngaa ginpahanugutan ni Jehova nga mahanabo ang malain nga mga butang? May himuon bala sia sa sini? Ang sabat sa sining mga pamangkot masapwan lamang sa Pulong sang Dios. Amo sini bangod ang sabat naangot gid sa isa pa ka espiritu nga persona kag sa hulusayon nga ginpautwas niya sa di-makita nga duog sang mga espiritu.

[Mga retrato sa pahina 4]

Ang mga tawo may empatiya. Indi bala mas sensitibo ang Dios sa pag-antos sang mga tawo?

 [Picture Credit Lines sa pahina 2]

COVER: Tank: UN PHOTO 158181/J. Isaac; earthquake: San Hong R-C Picture Company

[Picture Credit Line sa pahina 3]

Starving child: UN PHOTO 146150 BY O. MONSEN