Paano Naton Dapat Tamdon ang mga Pagtilaw?

MGA pagtilaw! Atubangon ini sang tanan. Mahimo ini maggikan sa mga pagbinangig sang personalidad, kabudlayan sa ekonomiya, mapigaw nga panglawason, mga pagsulay, pag-ipit sang mga kaupdanan nga maghimo sing malain, paghingabot, mga hangkat sa aton panindugan nga walay nadampigan ukon batok sa idolatriya, kag madamo pa nga butang. Ano man nga sahi sang pagtilaw ang aton ginaatubang, masami ini ginatunaan sing tuman nga kabalaka. Paano naton ini atubangon sing madinalag-on? Makabenepisyo bala kita sa sini?

Ang Pinakamaayo nga Bulig

Si Hari David sang una nag-antos sing mga pagtilaw sa iya bug-os nga kabuhi, apang napatay sia nga matutom. Paano sia nakabatas? Ginpatuhuyan niya ang tuburan sang iya kusog sang sia magsiling: “Si Jehova ang akon Manugbantay. Indi ako pagkulangon.” Kag padayon sia nga naghambal: “Bisan pa ako nagalakat sa nalupyakan sang tuman nga kadulom, wala ako sing kahadlukan nga malain, bangod ikaw kaupod ko; ang imo sungkod kag ang imo baston nagapahalipay sa akon.” (Salmo 23:​1, 4) Huo, si Jehova tuburan sing walay latid nga bulig. Gintuytuyan niya si David sa pila ka mabudlay gid nga mga tinion, kag handa sia nga himuon man ini sa aton kon kinahanglanon.

Paano naton maagom ang bulig ni Jehova? Ginatudlo sang Biblia ang paagi sang nagsiling ini: “Tilawi ninyo kag tan-awa nga si Jehova maayo.” (Salmo 34:⁠8) Isa ini ka mainit nga pangagda, apang ano ang buot silingon sini? Pagpalig-on ini nga mag-alagad kay Jehova kag ipasibu sing bug-os ang aton kabuhi sa iya kabubut-on. Ini nga dalanon nagakahulugan sing pagsikway sa pila sang aton kahilwayan, paghimo sang mga sakripisyo. Sa pila ka kahimtangan, nagadul-ong pa gani ini sa mga pagtilaw​​—⁠paghingabot kag pag-antos. Apang, yadtong bug-os tagipusuon nga nagbaton sang pangagda ni Jehova indi gid magahinulsol sa paghimo sini. Si Jehova mangin tuman kaayo sa ila. Magaubay sia kag magaatipan sia sa ila sa espirituwal nga paagi. Buligan niya sila sa tion sang mga pagtilaw paagi sa iya Pulong, sa iya balaan nga espiritu, kag sa Cristianong kongregasyon. Kag sa ulihi magapadya sia sa ila sang kabuhi nga walay katapusan.​​—⁠Salmo 23:⁠6; 25:⁠9; Isaias 30:21; Roma 15:5.

Ang mga nagahimo sing nagapabag-o sa kabuhi nga desisyon sa pag-alagad kay Jehova kag nagasunod sa sina nga desisyon nakasapo nga si Jehova nagatuman sang tanan niya nga saad. Amo ina ang napamatud-an sang mga Israelita nga nagsunod kay Josue pakadto sa Ginsaad nga Duta. Sang nakatabok na sila sa Jordan, may mga pagtilaw nga  dapat batason, mga pagpakig-away nga dapat himuon, kag mapait nga mga leksion nga dapat matun-an. Apang ini nga henerasyon napamatud-an nga mas matutom sangsa ila mga ginikanan, nga nagguwa gikan sa Egipto kag nagkalamatay sa kahanayakan. Gani, si Jehova nagbulig sa mga matutom, kag tuhoy sa ila kahimtangan sang mapatay si Josue, ang rekord sang Biblia nagasugid: “Si Jehova naghatag sa ila sing kapahuwayan sa bug-os nga palibot, nahisuno sa tanan nga butang nga ginpanumpa niya sa ila mga katigulangan . . . Wala sing isa man ka saad ang napaslawan sa tanan nga maayong saad nga ginhimo ni Jehova sa panimalay sang Israel; ang tanan nahanabo.” (Josue 21:​44, 45) Maeksperiensiahan man naton ina kon kita nagasandig sing bug-os kay Jehova samtang yara sa idalom sang pagtilaw kag sa tanan iban pa nga mga tion.

Ano ang mahimo magpaluya sang aton pagsalig kay Jehova? Si Jesus nagpatuhoy sa isa ka butang sang sia nagsiling: “Wala sing bisan sin-o ang mahimo nga makapaulipon sa duha ka agalon . . . Indi kamo mahimo nga makapaulipon sa Dios kag sa Manggad.” (Mateo 6:24) Kon kita nagasalig kay Jehova, indi kita magpangita sing kalig-unan sa ginapangitaan sang kalabanan sa kalibutan, sa materyal nga mga butang. Si Jesus naglaygay sa iya mga sumulunod: “Padayon, nian, nga pangitaa anay ang ginharian kag ang iya pagkamatarong, kag ining tanan iban pa [kinahanglanon nga materyal] nga mga butang idugang sa inyo.” (Mateo 6:33) Ang Cristiano nga nagahupot sing balanse nga pagtamod sa materyal nga mga butang kag nagauna sang Ginharian sang Dios sa iya kabuhi nagahimo sing husto nga pagpili. (Manugwali 7:12) Siempre pa, mahimo nga may kabilihanan ini sa iya. Mahimo magasakripisyo sia sa materyal nga paagi. Apang magaani sia sing madamo nga padya. Kag si Jehova magabulig sa iya.​​—⁠Isaias 48:​17, 18.

Kon Ano ang Matun-an Naton sa mga Pagtilaw

Siempre pa, ang pagpili nga ‘tilawan kag tan-awon nga si Jehova maayo’ wala nagaamlig sa isa gikan sa wala ginapaabot nga mga hitabo sang kabuhi; ukon wala man ini nagaamlig sing bug-os sa aton gikan sa mga pagsalakay ni Satanas kag sang iya tawhanon nga mga ahente. (Manugwali 9:11) Subong resulta, mahimo matilawan ang pagkasinsero kag determinasyon sang isa ka Cristiano. Ngaa ginatugutan ni Jehova ang iya mga sumilimba nga mag-antos sini nga mga pagtilaw? Si apostol Pedro naghatag sang isa ka rason sang sia magsulat: “Sa malip-ot nga tion sa karon, kon indi malikawan, ginapaantos kamo sang sarisari nga mga pagtilaw, agod ang natilawan nga kinaiya sang inyo pagtuo, nga daku pa ang balor sangsa bulawan nga nagakawala walay sapayan nga gintilawan ini sa kalayo, masapwan nga sa kadayawan kag himaya kag kadungganan sa pagpahayag ni Jesucristo.” (1 Pedro 1:​6, 7) Huo, ang mga pagtilaw nagatugot sa aton nga ipakita ang kalidad sang aton pagtuo kag ang aton gugma kay Jehova. Kag nagabulig ini sa pagsabat sa mga yaguta kag mga akusasyon ni Satanas nga Yawa.​​—⁠Hulubaton 27:11; Bugna 12:10.

Ang mga pagtilaw nagabulig man sa aton nga mapalambo ang iban pa Cristiano nga mga kinaiya. Subong halimbawa, binagbinaga ang mga pulong sang salmista: “Nakita [ni Jehova] ang mapainubuson; apang ang matinaastaason kilala lamang niya sa malayo.” (Salmo 138:⁠6) Ang kalabanan sa aton kinaandan nga indi mapainubuson, apang ang mga pagtilaw makabulig sa aton nga mapalambo inang kinahanglanon nga kinaiya. Dumduma ang hitabo sa adlaw ni Moises sang ang pila sa Israel nagbatyag nga makatalaka ang pagkaon sang manna sing sinemana, sing binulan. Maathag nga isa yadto ka pagtilaw sa ila, bisan pa nga ang manna isa ka milagruso nga aman. Ano ang katuyuan sang pagtilaw? Si Moises nagsiling sa ila: “[Si Jehova] nagpakaon sa imo sing manna sa kahanayakan . . . agod paubson ka kag ibutang ka sa pagtilaw.”​​—⁠Deuteronomio 8:⁠16.

Ang aton pagkamapainubuson mahimo man matilawan. Paano? Halimbawa, ano ang aton reaksion sa mga pagbag-o sa organisasyon? (Isaias 60:17) Nagahatag bala kita sing bug-os tagipusuon  nga pagsakdag sa pagbantala kag pagtudlo nga hilikuton? (Mateo 24:14; 28:​19, 20) Handa bala kita magbaton sing mga paathag sa kamatuoran sang Biblia nga ginaaman sang “matutom kag mainandamon nga ulipon”? (Mateo 24:45-​47; Hulubaton 4:18) Ginapakigbatuan bala naton ang pag-ipit nga maangkon ang pinakaulihi nga kagamitan nga daw mapuslanon pero indi man kinahanglan, pinakaulihi nga moda sang panapton, ukon ang pinakabag-o nga modelo sang salakyan? Ang mapainubuson nga tawo magasabat sing huo sa sining mga pamangkot.​​—⁠1 Pedro 1:​14-​16; 2 Pedro 3:⁠11.

Ang mga pagtilaw nagabulig man nga mapalambo naton ang isa pa ka kinahanglanon nga kinaiya​​—⁠ang pagbatas. Ang disipulo nga si Santiago nagsiling: “Kabiga ninyo nga bug-os nga kalipay, mga kauturan ko, kon makasugata kamo sing nanuhaytuhay nga mga pagtilaw, kay nakahibalo kamo nga ining natilawan nga kinaiya sang inyo pagtuo nagahikot sing pagbatas.” (Santiago 1:​2, 3) Ang pagbatas sing madinalag-on sa madamo nga pagtilaw nga may bug-os nga pagsalig kay Jehova nagapalambo sing kabakod, katutom, kag integridad. Nagapabakod ini sa aton nga pamatukan ang palaabuton nga mga pag-atake ni Satanas, ang akig nga dios sining kalibutan.​​—⁠1 Pedro 5:​8-​10; 1 Juan 5:​19; Bugna 12:12.

Maghupot sing Husto nga Pagtamod sa mga Pagtilaw

Ang himpit nga Anak sang Dios, si Jesucristo, nag-atubang sing madamo nga pagtilaw samtang yari sa duta kag nag-ani sing madamo nga benepisyo sa pagbatas sini. Si Pablo nagsulat nga “nakatuon [si Jesus] sang pagkamasinulundon gikan sa mga butang nga gin-antos niya.” (Hebreo 5:⁠8) Ang iya pagkamainunungon tubtob sa kamatayon naghatag sing kadayawan sa ngalan ni Jehova kag nagpaposible kay Jesus nga ihalad ang balor sang iya himpit tawhanon nga kabuhi bilang gawad sa katawhan. Nagbukas ini sing dalan sa mga nagatuo kay Jesus nga maagom ang paglaum nga kabuhi nga walay katapusan. (Juan 3:16) Bangod nagpabilin nga matutom si Jesus sa idalom sang pagtilaw, sia karon ang aton Mataas nga Saserdote kag nagalingkod sa trono nga Hari.​​—⁠Hebreo 7:​26-​28; 12:2.

Kamusta naman kita? Ang aton pagkamainunungon sa atubang sang mga pagtilaw magadala man sing dalagku nga mga pagpakamaayo. Sa mga may langitnon nga paglaum, ang Biblia nagasiling: “Malipayon ang tawo nga padayon nga nagabatas sang pagtilaw, kay bangod nga nahamut-an magabaton sia sing purongpurong sang kabuhi, nga ginsaad ni Jehova sa mga padayon nga nagahigugma sa iya.” (Santiago 1:12) Makasalig ang mga may dutan-on nga paglaum nga kon sila matutom nga magbatas, magapanubli sila sing kabuhi nga walay katapusan sa dutan-on nga paraiso. (Bugna 21:​3-6) Kag ang labi ka importante, ang matutom nila nga pagbatas nagahatag sing kadayawan sa ngalan ni Jehova.

Samtang nagasunod kita sa mga tikang ni Jesus, makasalig kita nga ang tanan nga pagtilaw nga maatubang naton sa sining sistema sang mga butang mahimo naton malandas sing madinalag-on. (1 Corinto 10:13; 1 Pedro 2:21) Paano? Paagi sa aton pagsalig kay Jehova, nga nagahatag sing “gahom labaw sa kinaandan” sa mga nagasandig sa iya. (2 Corinto 4:⁠7) Kabay nga ang aton pagtuo mangin kaangay kay Job, nga bisan nagbatas sing mapait nga mga pagtilaw nagpabutyag sia nga may pagsalig: “Pagkatapos nga tilawan niya ako, magaguwa ako nga kaangay sing bulawan.”​​—⁠Job 23:10.

[Retrato sa pahina 31]

Ang pagkamainunungon ni Jesus sa idalom sang pagtilaw naghatag sing kadayawan sa ngalan ni Jehova. Mangin amo man ang aton pagkamainunungon