Magdiretso sa kaundan

Magdiretso sa listahan sang kaundan

Mga Pamangkot Gikan sa mga Bumalasa

Mga Pamangkot Gikan sa mga Bumalasa

 Mga Pamangkot Gikan sa mga Bumalasa

Ano ang panuytoy sang Kasulatan tuhoy sa paghanas sa bata kon ang isa ka ginikanan Saksi ni Jehova kag ang isa indi?

Duha ka importante nga prinsipio sa Kasulatan tuhoy sa paghanas sa bata ang makatuytoy sa Saksi nga ginikanan nga may di-Saksi nga tiayon. Ang isa: “Dapat [naton] tumanon ang Dios subong manuggahom sa baylo sang mga tawo.” (Binuhatan 5:29) Kag ang isa: “Ang bana amo ang ulo sang iya asawa subong nga si Cristo man amo ang ulo sang kongregasyon.” (Efeso 5:23) Ang naulihi indi lamang naaplikar sa mga asawa nga may mga bana nga Saksi kundi pati man sa mga asawa nga may mga bana nga di-Saksi. (1 Pedro 3:1) Paano mabalanse sang Saksi nga ginikanan ining mga prinsipio kon nagatudlo sa iya kabataan?

Kon ang bana isa ka Saksi ni Jehova, responsabilidad niya nga amanan sing espirituwal kag materyal nga mga kinahanglanon ang iya pamilya. (1 Timoteo 5:8) Bisan pa madamo nga tion ang mahinguyang sang di-tumuluo nga iloy upod sa ila kabataan, dapat tudluan sang Saksi nga amay ang iya kabataan paagi sa paghatag sa ila sing espirituwal nga paghanas sa puluy-an kag sa pagdala sa ila sa Cristianong mga miting, diin makabenepisyo sila sa panudlo sa moral kag sa makapalig-on nga pagpakig-upod.

Paano kon mamilit ang di-tumuluo nga asawa nga updon ang iya kabataan sa iya simbahan ukon tudluan niya sila sang iya pagtuluuhan? Mahimo tugutan sia sang kasuguan sang pungsod sa paghimo sini. Kon bala maganyat ang kabataan sa pagsimba sa sina nga simbahan ukon indi nagadepende sing daku sa kalidad sang espirituwal nga pagtudlo sang amay. Samtang nagadaku ang kabataan, ang Makasulatanhon nga panudlo sang ila amay dapat magbulig sa ila sa pagsunod sa kamatuoran sang Pulong sang Dios. Mangin malipayon gid ang tumuluo nga bana kon ang iya kabataan magdesisyon nga magdampig sa kamatuoran!

Kon ang iloy isa ka Saksi ni Jehova, dapat niya tahuron ang prinsipio sang pagkaulo samtang nagakabalaka man sa dayon nga kaayuhan sang iya kabataan. (1 Corinto 11:3) Sa madamong kaso, ang iya di-tumuluo nga bana wala nagasapak kon tudluan sang iya Saksi nga asawa ang ila mga anak sa moral kag espirituwal, kag ang bulig para sa sini matigayon sa mga miting sang katawhan ni Jehova. Mabuligan sang iloy ang iya di-tumuluo nga bana nga makita ang mga benepisyo sang makapalig-on nga panudlo nga ginabaton sang ila kabataan paagi sa organisasyon ni Jehova. Mahimo niya ipaathag sing mataktikanhon ang kapuslanan sang pagpatudok sang moral nga mga prinsipio sang Biblia sa ila kabataan, samtang ginaatubang nila ang malain sing moral nga kalibutan.

Apang, mahimo mamilit ang di-tumuluo nga bana nga sundon sang iya kabataan ang iya relihion, dalhon sila sa iya simbahan kag tudluan sila sang iya kaugalingon nga pagtuluuhan. Ukon mahimo pamatukan sang bana ang tanan nga relihion kag mamilit nga indi dapat tudluan ang iya kabataan sang bisan ano nga relihion. Bilang ulo sang pamilya, sia ang may panguna nga salabton sa sining desisyon.⁠ *

Samtang ginatahod ang pagkaulo sang iya bana, subong isa ka dedikado nga Cristiano, dapat dumdumon sang Saksi nga asawa ang panimuot nanday apostol Pedro kag Juan, nga nagsiling: “Para sa amon, indi kami mahimo nga mag-untat sa paghambal nahanungod sa mga butang nga amon nakita kag nabatian.” (Binuhatan 4:​19, 20) Subong  pagkabalaka sa espirituwal nga kaayuhan sang kabataan, dapat mangita sing kahigayunan ang Saksi nga iloy nga amanan sila sing moral nga panuytoy. May katungdanan sia kay Jehova nga tudluan ang iban tuhoy sa nahibaluan niya nga matuod, kag indi dapat mangin eksepsion ang iya kabataan. (Hulubaton 1:⁠8; Mateo 28:​19, 20) Paano atubangon sang Saksi nga iloy ining mabudlay nga problema?

Binagbinaga subong halimbawa ang pagtuluuhan sa Dios. Mahimo nga indi makahiwat sing pormal nga pagtuon sa Biblia ang Saksi nga iloy sa iya kabataan bangod sang pagdumili sang iya bana. Rason bala ini nga dapat niya likawan ang pagtudlo sa iya kabataan sing bisan ano tuhoy kay Jehova? Indi. Ang iya mga pinamulong kag mga buhat kinaugali nga magpabanaag sang iya pagtuo sa Manunuga. Walay duhaduha nga mamangkot gid ang iya kabataan tuhoy sa sini. Dapat batyagon niya nga hilway sia sa pagbuhat sang iya relihion paagi sa pagpahayag sang iya pagtuo sa Manunuga, lakip sa iya kabataan. Bisan pa mahimo nga indi sia makadumala sing pagtuon sa Biblia upod sa iya kabataan ukon madala sila sing regular sa mga miting, sarang niya matudlo sa ila ang ihibalo tuhoy kay Jehova nga Dios.​​—⁠Deuteronomio 6:7.

Tuhoy sa kaangtanan sa ulot sang isa ka Saksi kag sa iya di-tumuluo nga tiayon, si apostol Pablo nagsulat: “Ang di-tumuluo nga bana ginapakabalaan may kaangtanan sa iya asawa, kag ang di-tumuluo nga asawa ginapakabalaan may kaangtanan sa utod nga lalaki; kundi, ang inyo mga anak mangin mahigko gid, apang sa karon mga balaan sila.” (1 Corinto 7:14) Ginatamod ni Jehova ang pag-asawahay nga balaan bangod sa tumuluo nga tiayon, kag ang kabataan ginakabig nga balaan sa mga mata ni Jehova. Dapat himuon sang Saksi nga asawa ang iya masarangan nga buligan ang iya kabataan nga mahangpan ang kamatuoran, kag itugyan kay Jehova kon ano ang mangin resulta.

Samtang nagadaku ang kabataan, kinahanglan nila magdesisyon kon diin sila magdampig pasad sa mga gintudlo sa ila sang ila mga ginikanan. Mahimo sila magdesisyon nahisuno sa pinamulong ni Jesus: “Sia nga nagahigugma sa amay ukon iloy sing labi pa sa akon indi takus sa akon.” (Mateo 10:37) Ginsugo man sila: “Mga kabataan, magmatinumanon kamo sa inyo mga ginikanan nga nahiusa sa Ginuo.” (Efeso 6:1) Madamong pamatan-on ang nagdesisyon nga “tumanon ang Dios subong manuggahom” sa baylo sang di-Saksi nga ginikanan, walay sapayan sang pag-antos sang kabudlayan gikan sa sinang ginikanan. Daw ano ka makapaladya para sa Saksi nga ginikanan nga makita ang kabataan nga magdesisyon nga alagaron si Jehova walay sapayan sang pagpamatok!

[Nota]

^ par. 7 Ang legal nga kahilwayan sang asawa sa relihion nagalakip sang iya kinamatarong sa pagtambong sa Cristianong mga miting. Sa pila ka kaso, indi luyag atipanon sang bana ang ila magagmay pa nga kabataan sa tion sini nga mga miting, sa amo obligado ang mahigugmaon nga iloy nga updon sila sa pagtambong.