Report sang mga Manugbantala sang Ginharian

“Luyag Ko Alagdon ang Dios”

“GUWA ka sa iya, katawhan ko.” Isa yadto ka panawagan sang isa ka anghel nga nabatian ni apostol Juan sang unang siglo C.E. Sa aton adlaw minilyon ka bunayag-sing-tagipusuon ang namati kag nagpalagyo gikan sa “Babilonia nga Daku,” ang emperyo sang butig nga relihion. (Bugna 18:1-4) Ang isa sa ila amo si Wilner nga taga-Haiti, nga nagasaysay sang iya eksperiensia.

“Natawo ako sang 1956 sa isa ka debotado nga Katoliko nga pamilya sa magamay nga banwa sang St. Marc, Haiti. Handurawa lamang ang kalipay sang akon pamilya sang napilian ako, upod sa duha pa sa amon banwa, nga mag-eskwela sa seminaryo sa St. Michel de l’Atalaye, Haiti. Nian sang 1980, ginpadala kami sa Stavelot, Belgium, para sa dugang nga paghanas. Nag-eskwela man kami didto sa isa ka unibersidad sang mga Katoliko.

“Sang primero, nalangkag gid ako nga magpari. Isa ka adlaw sa hulot-palanyagahan, ginpangabay ako sang pari nga nagadumala sa amon nga magpabilin sing makadali kay may ihambal kuno sia sa akon. Nakibot gid ako sang ginprangka niya ako nga naluyag sia sa akon! Wala ko ginsapak ang iya tuyo sa akon apang ginlas-ayan gid ako. Ginsulatan ko ang akon pamilya tuhoy sa hitabo kag naghalin sa seminaryo pagligad sang pila ka bulan, bisan pa indi nila ini luyag. Nakakita ako sing ilistaran sa minuro kag nagpadayon sa pagtuon sa tuhay nga propesyon.

“Sang nagbalik ako sa St. Marc, wala na ako sing pagsalig sa Katoliko nga Simbahan. Luyag ko gihapon alagdon ang Dios, apang indi ko mahibaluan kon ano ang himuon. Nagsimba ako sa Adbentista, sa Ebenezer, kag sa Mormon. Nagdalangdalang ako sa espirituwal.

“Nian nadumduman ko nga sang nag-eskwela pa ako sa seminaryo sa Belgium, pirme ko ginabasa ang Crampon nga Biblia. Nadiskobrehan ko sa sini nga ang Dios may ngalan. Gani ginagamit ang iya ngalan nangamuyo ako sing hanuot sa Dios nga buligan niya ako nga masapwan ang matuod nga relihion.

“Wala magdugay pagkatapos sadto, duha ka Saksi ni Jehova ang nagsaylo sa amon duog. Mahipos sila, matinahuron, kag talahuron. Nagdayaw gid ako sa ila paagi sang pagkabuhi. Isa ka adlaw, gin-agda ako sang isa sa ila nga magtambong sa tuigan nga Memoryal sang kamatayon ni Cristo. Naluyagan ko gid ang pagtinipon kag nagpasugot nga magtuon sing regular sa Biblia upod sa mga Saksi. Sa sulod sang mga anom ka bulan, nangin kumbinsido ako nga nasapwan ko ang husto nga paagi sa pag-alagad sa Dios. Gindedikar ko ang akon kabuhi kay Jehova kag nagpabawtismo sang Nobiembre 20, 1988.”

Sang ulihi, nagsulod si Wilner sa bug-os tion nga pag-alagad. Nagaalagad sia karon subong isa ka gulang sa kongregasyon. Sila sang iya asawa, upod sa ila duha ka kabataan, malipayon nga nagaalagad sa kongregasyon.

[Retrato sa pahina 9]

Paagi sa pagbasa sa Biblia, nadiskobrehan ni Wilner nga ang ngalan sang Dios amo si Jehova