Magdiretso sa kaundan

Magdiretso sa listahan sang kaundan

Ang Modernong-Adlaw nga mga Martir Nagapanaksi sa Sweden

Ang Modernong-Adlaw nga mga Martir Nagapanaksi sa Sweden

 Report sang mga Manugbantala sang Ginharian

Ang Modernong-Adlaw nga mga Martir Nagapanaksi sa Sweden

ANG Griegong tinaga para sa “saksi” amo ang martyr, nga gikan sa sini naghalin ang Hiligaynon nga tinaga nga “martir,” buot silingon “isa nga nagapanaksi paagi sa iya kamatayon.” Madamong unang-siglo nga mga Cristiano ang nagpanaksi tuhoy kay Jehova paagi sa kamatayon bangod sang ila pagtuo.

Sing kaanggid, sang ika-20 nga siglo, linibo ka Saksi ang napatay sa mga kamot sang mga sumalakdag ni Hitler bangod ginhuptan nila ang ila neutralidad sa politikal kag pungsudnon nga mga hulusayon. Ining modernong-adlaw nga mga martir naghatag man sing gamhanan nga panaksi. Amo sini ang natabo sa Sweden sining karon lang.

May kaangtanan sa ika-50 nga anibersaryo nga pagtapos sang Bug-os Kalibutan nga Inaway II, ginsugdan sang panguluhan sang Sweden ang edukasyunal nga kampanya tuhoy sa Holocaust sa bug-os nga pungsod. Ang proyekto gintawag nga Buhi nga Maragtas. Gin-agda ang mga Saksi ni Jehova nga makigbahin kag ipaambit ang ila mga eksperiensia.

Nagsabat ang mga Saksi paagi sa pagpaguwa sa publiko sang isa ka eksibit nga natig-uluhan Ang Nalipatan nga mga Biktima sang Holocaust. Ginsugdan ini sa Assembly Hall sang mga Saksi ni Jehova sa Strängnäs. Nagtambong ang nakalampuwas sa Holocaust nga mga Saksi agod isugid ang ila mga eksperiensia sa kapin sa 8,400 ka bisita nga nag-abot sa nahauna nga adlaw! Sang katapusan nga bahin sang 1999, ang eksibit nagguwa sa kapin sa 100 ka museo kag publiko nga mga librarya sa bug-os nga Sweden, kag mga 150,000 ka tawo ang nakakita sini. Lakip sa mga bisita ang pila ka opisyales sang gobierno, nga nagkomento sing maayo sa ila nakita.

Wala pa sing hitabo may kahilabtanan sa mga hilikuton sang mga Saksi ni Jehova sa Sweden ang nangin amo sini ka lapnag sa publiko kag nakabaton sing kaanggid nga maayo nga publisidad. Madamong bisita ang namangkot: “Ngaa wala ninyo kami pagsugiri sang una pa tuhoy sa inyo mga eksperiensia sa Holocaust?”

Pagkatapos mapakita ang eksibit sa ila duog, nagreport ang isa ka kongregasyon sing 30-porsiento nga pag-uswag sa ila mga pagtuon sa Biblia sa puluy-an! Gin-agda sang isa ka Saksi ang isa ka kaupod sa trabaho nga tan-awon ang eksibit. Malipayon ini nga ginbaton sang iya kaupod sa trabaho kag gin-upod ang isa ka abyan. Pagkatapos sini, ang iya abyan nagsiling nga indi niya mahangpan kon paano nakatigayon ang mga tawo sing amo sini nga pagtuo nga pilion pa nila nga patyon sa baylo nga magpirma sang dokumento nga talikdan ang ila pagtuo. Nagdul-ong ini sa dugang pa nga mga paghinun-anon, kag nasugdan ang isa ka pagtuon sa Biblia upod sa iya.

Kaangay sang unang-siglo nga mga Cristiano, ining ika-20 nga siglo nga matutom nga mga martir maisugon nga nagpanaksi nga si Jehova amo ang lamang matuod nga Dios, nga takus sang aton malig-on nga katutom kag pagkamainunungon.—Bugna 4:11.

[Picture Credit Line sa pahina 13]

Camp prisoner: Państwowe Muzeum Oświęcim-Brzezinka, courtesy of the USHMM Photo Archives