Si Jehova ang Aton Dalangpan

“Bangod nagsiling ka: ‘Si Jehova ang akon dalangpan,’ . . . wala sing kalamidad nga mahanabo sa imo.”​—⁠SALMO 91:​9, 10.

1. Ngaa makasiling kita nga si Jehova ang aton dalangpan?

SI Jehova isa ka matuod nga dalangpan sang iya katawhan. Kon debotado kita sing bug-os sa iya, mahimo nga ‘ginaipit kita sa tagsa ka paagi, apang wala mapiuti nga indi na makagiho; ginaligban, apang indi nga wala na sing maguwaan; ginahingabot, apang wala ginapatumbayaan; ginapukan, apang wala malaglag.’ Ngaa? Bangod ginahatagan kita ni Jehova sing “gahom nga labaw sa kinaandan.” (2 Corinto 4:​7-9) Huo, ang aton langitnon nga Amay nagabulig sa aton sa pagkabuhi sing diosnon, kag mapalig-on kita sang pinamulong sang salmista: “Bangod nagsiling ka: ‘Si Jehova ang akon dalangpan,’ ginhimo mo ang Labing Mataas nga imo puluy-an; wala sing malaut nga mahanabo sa imo.”​—⁠Salmo 91:​9, 10.

2. Ano ang masiling tuhoy sa Salmo 91 kag ano ang ginasaad sini?

2 Ining pinamulong sa Salmo 91 mahimo nga ginsulat ni Moises. Ginhingalanan sia sa superskripsion subong ang nagkomposo sang ika-90 nga Salmo, kag ginsundan ini sang Salmo 91 nga wala sing ginsal-ot nga ngalan sang lain nga manunulat. Mahimo nga ginaamba  anay ang Salmo 91 sing bulos-bulos; buot silingon, isa ka tawo ang una nga nagaamba (91:​1, 2), kag nagasabat ang isa ka koro (91:​3-8). Mahimo nga isa ka umalamba ang masunod nga mabatian (91:9a) kag ginasabat ini sang isa ka grupo (91:9b-13). Nian mahimo nga ginaamba sang isa ka tawo ang katapusan nga mga pinamulong (91:14-16). Walay sapayan sini, ang ika-91 nga Salmo nagasaad sing espirituwal nga kalig-unan sa hinaplas nga mga Cristiano subong isa ka klase kag nagahatag sing kaanggid nga pasalig para sa ila dedikado nga mga kaupdanan subong isa ka grupo.⁠ * Binagbinagon naton ini nga salmo suno sa pagtamod sining tanan nga alagad ni Jehova.

Malig-on sa ‘Tago nga Duog sang Dios’

3. (a) Ano ang “tago nga duog sang Labing Mataas”? (b) Ano ang maeksperiensiahan naton sa ‘pagdayon sa idalom sang landong sang Labing Gamhanan’?

3 Ang salmista nag-amba: “Ang bisan sin-o nga nagapuyo sa tago nga duog sang Labing Mataas makasapo sang iya dalayunan sa idalom sang landong sang Labing Gamhanan. Magasiling ako kay Jehova: ‘Ikaw ang akon dalangpan kag ang akon kuta, ang akon Dios, nga akon ginasaligan.’ ” (Salmo 91:​1, 2) Ang “tago nga duog sang Labing Mataas” isa ka malaragwayon nga duog agod amligan kita, ilabi na ang mga hinaplas, nga ginapuntariya gid sang Yawa. (Bugna 12:15-17) Malaglag niya kuntani kita tanan kon wala kita ginaamligan subong nagadayon sa Dios bilang espirituwal nga mga bisita. Paagi sa ‘pagdayon sa idalom sang landong sang Labing Gamhanan,’ maeksperiensiahan naton ang nagaamlig nga landong sang Dios. (Salmo 15:​1, 2; 121:⁠5) Wala na sing mas hilway sa katalagman nga dalangpan ukon mas mabudlay salakayon nga kuta sangsa aton Soberanong Ginuo nga si Jehova.​—⁠Hulubaton 18:10.

4. Ano nga mga paagi ang ginagamit sang “manugpamispis” nga si Satanas, kag paano kita makapalagyo?

4 Ang salmista nagdugang: “Sia [si Jehova] magaluwas sa imo sa siod sang manugpamispis, sa kalalat-an nga nagatuga sing kapiutan.” (Salmo 91:⁠3) Ang manugpamispis sa dumaan nga Israel masami nga nagapangdakop sing mga pispis paagi sa paggamit sing mga siod. Lakip sa mga siod sang “manugpamispis” nga si Satanas amo ang iya malaut nga organisasyon kag “malimbungon nga mga buhat.” (Efeso 6:​11, footnote) Ginbutang sa aton dalanon ang natago nga mga siod agod dal-on kita sa kalautan kag espirituwal nga kalaglagan. (Salmo 142:⁠3) Apang, bangod ginsikway naton ang pagkadimatarong, ‘ang aton kalag kaangay sang pispis nga nakapalagyo gikan sa siod.’ (Salmo 124:​7, 8) Mapinasalamaton gid kita nga ginaluwas kita ni Jehova gikan sa malauton nga “manugpamispis”!​—⁠Mateo 6:13.

5, 6. Ano nga “kalalat-an” ang nagtuga sing “kapiutan,” apang ngaa wala magpadala sa sini ang katawhan ni Jehova?

5 Ginsambit sang salmista ang “kalalat-an nga nagatuga sing kapiutan.” Kaangay sang makalalaton kag lapnag nga balatian, may isa ka butang nga nagatuga sing “kapiutan” sa tawhanon nga pamilya kag sa mga nagasakdag sang pagkasoberano ni Jehova. Tuhoy sa sini, ang istoryador nga si Arnold Toynbee nagsulat: “Sugod sang natapos ang Bug-os Kalibutan nga Inaway II, bangod sang nasyonalismo nagdoble ang kadamuon sang independiente nga mga estado . . . Labi nga nabahinbahin ang panimuot sang katawhan karon.”

6 Sa sulod sang mga siglo, ginpabaskog pa gid sang pila ka manuggahom ang nagabahinbahin nga pagpinuyas sa ulot sang mga pungsod. Ginpilit man nila nga tahuron sila ukon ang lainlain nga mga imahen ukon mga simbulo. Apang wala gid magtugot si Jehova nga madala ang iya matutom nga katawhan sa sini nga “kalalat-an.” (Daniel 3:​1, 2, 20-27; 6:7-10, 16-22) Subong internasyonal nga mga mag-ululutod nga nagahigugmaanay, ginahatag naton kay Jehova ang eksklusibo nga debosyon, ginahuptan ang Makasulatanhon nga neutralidad, kag walay pinasulabi nga ginakilala nga “sa tagsa ka pungsod ang tawo nga nagakahadlok sa [Dios] kag nagahimo sing pagkamatarong kalahamut-an sa iya.” (Binuhatan 10:​34, 35; Exodo 20:​4-6; Juan 13:​34, 35; 17:16; 1 Pedro 5:​8, 9) Bisan nagaantos kita sing “kapiutan” sa porma sang paghingabot subong mga Cristiano, malipayon kita kag malig-on sa espirituwal sa “tago nga duog sang Labing Mataas.”

7. Paano kita ginaamligan ni Jehova “paagi sa iya mga kuyos”?

7 Bangod dalangpan naton si Jehova, malipay  kita sa sini nga pinamulong: “Paagi sa iya mga kuyos balabagan niya ang pagpalapit sa imo, kag magadangop ka sa idalom sang iya mga pakpak. Ang iya pagkamaminatud-on mangin daku nga taming kag kuta.” (Salmo 91:⁠4) Ang Dios nagaamlig sa aton, subong sang pispis nga nagalupadlupad sa ibabaw sang iya mga boto sa pag-amlig sa sini. (Isaias 31:⁠5) ‘Paagi sa iya mga kuyos ginabalabagan niya ang pagpalapit sa aton.’ Sa masangkad nga kahulugan, ang mga “kuyos” sang pispis amo ang mga pakpak sini. Paagi sa sini ginatabunan sang pispis ang iya mga boto, nagaamlig sa sini gikan sa mga manunukob. Kaangay sang mga boto, malig-on kita sa idalom sang mga kuyos ni Jehova bangod nagdangop kita sa iya matuod nga Cristianong organisasyon.​—⁠Rut 2:12; Salmo 5:​1, 11.

8. Paano nga ang “pagkamaminatud-on” ni Jehova isa ka daku nga taming kag kuta?

8 Nagasalig kita sa “pagkamaminatud-on,” ukon katutom. Kaangay ini sang daku nga taming sang una nga panahon, masami nga rektanggulo ini kag hustuhan lang ang kadakuon sa pagtabon sang bug-os nga lawas sang isa ka tawo. (Salmo 5:12) Ang pagsalig sa sini nga pag-amlig nagadula sang aton kahadlok. (Genesis 15:⁠1; Salmo 84:11) Kaangay sang aton pagtuo, ang pagkamaminatud-on sang Dios isa ka daku nagaamlig nga taming nga nagasagang sa nagadabadaba nga mga baslay ni Satanas kag sa mga labo sang kaaway. (Efeso 6:16) Isa man ini ka kuta, isa ka mabakod nga depensa nga sa likod sini nagatindog kita sing malig-on.

‘Indi Kita Mahadlok’

9. Ngaa mahimo mangin makahaladlok nga tion ang gab-i, apang ngaa wala kita mahadlok?

9 Tuhoy sa pag-amlig sang Dios, ang salmista nagsiling: “Indi ka mahadlok sa bisan ano nga makakulugmat sa gab-i, ukon sa baslay nga nagalupad sa adlaw, ukon sa kalalat-an nga nagalakat sa kadudulman, ukon sa kalaglagan nga nagapapas sa kaudtuhon.” (Salmo 91:​5, 6) Bangod madamong kalautan ang ginahimo sa kadulom, ang gab-i mahimo mangin makahaladlok nga tion. Sa tunga sang espirituwal nga kadulom nga nagatabon karon sa duta, ang aton mga kaaway masami nga nagagamit sing malimbungon nga mga buhat sa pagtinguha nga gub-on ang aton espirituwalidad kag pauntaton ang aton pagbantala nga hilikuton. Apang ‘wala kita mahadlok sa bisan ano nga makakulugmat sa gab-i’ bangod si Jehova nagabantay sa aton.​—⁠Salmo 64:​1, 2; 121:⁠4; Isaias 60:2.

10. (a) Ano ang daw ginapahangop sang “baslay nga nagalupad sa adlaw,” kag ano ang reaksion naton sa sini? (b) Ano ang “kalalat-an nga nagalakat sa kadudulman,” kag ngaa wala kita mahadlok sa sini?

10 Ang “baslay nga nagalupad sa adlaw” daw nagapahangop sang berbal nga pagsalakay. (Salmo 64:​3-5; 94:20) Samtang padayon naton nga ginapresentar ang matuod nga impormasyon, ining dayag nga pagpamatok sa aton sagrado nga pag-alagad mangin walay pulos. Dugang pa, wala kita mahadlok sa “kalalat-an nga nagalakat sa kadudulman.” Isa ini ka malaragwayon nga kalalat-an sa tunga sang kadudulman sining nagamasakit sa moral kag relihion nga kalibutan nga yara sa gahom ni Satanas. (1 Juan 5:19) Nagapatubas ini sang makamamatay nga kahimtangan sang hunahuna  kag tagipusuon, nga bangod sini ang mga tawo nagapabilin nga ignorante tuhoy kay Jehova, sa iya mga katuyuan, kag sa iya mahigugmaon nga mga aman. (1 Timoteo 6:⁠4) Napalibutan sini nga kadulom, wala kita mahadlok, bangod bugana kita sa espirituwal nga kapawa.​—⁠Salmo 43:3.

11. Ano ang nagakatabo sa makaeksperiensia sing ‘pagpapas sa kaudtuhon’?

11 Ang “kalaglagan nga nagapapas sa kaudtuhon” wala man nagapahadlok sa aton. Ang “kaudtuhon” mahimo magpahangop sang ginatawag sang kalibutan nga kasanagan. Ang mga nagapadala sa materyalistiko nga mga pagtamod sini nagaantos sing espirituwal nga kalaglagan. (1 Timoteo 6:​20, 21) Samtang maisugon naton nga ginabantala ang mensahe sang Ginharian, wala kita mahadlok sa aton mga kaaway, kay si Jehova ang aton Manug-amlig.​—⁠Salmo 64:⁠1; Hulubaton 3:​25, 26.

12. Kay sin-o luyo ‘nagakapukan’ ang linibo, kag sa ano nga paagi?

12 Ang salmista nagpadayon: “Ang isa ka libo mapukan sa imo luyo kag napulo ka libo sa imo tuo nga kamot; indi ini magpalapit sa imo. Tulukon mo lamang sang imo mga mata kag makita ang balos sa mga malauton.” (Salmo 91:​7, 8) Bangod wala sila magdangop kay Jehova, madamo ang ‘napukan’ sa espirituwal nga kamatayon sa aton “luyo.” Daw subong bala nga “napulo ka libo” ang napukan sa “tuo nga kamot” sang espirituwal nga mga Israelinhon karon. (Galacia 6:16) Apang hinaplas man kita  nga mga Cristiano ukon ila dedikado nga mga kaupdanan, malig-on kita sa “tago nga duog” sang Dios. ‘Tulukon lamang naton kag makita ang balos sa mga malauton,’ nga nagaani sing kagamo sa komersial, relihioso, kag iban pa nga paagi.​—⁠Galacia 6:7.

‘Wala sing Kalamidad nga Mahanabo sa Aton’

13. Anong mga kalamidad ang wala nagakahanabo sa aton, kag ngaa?

13 Bisan pa nagahuyang ang kalig-unan sini nga kalibutan, ginauna naton ang Dios kag nagapakaisog bangod sang pinamulong sang salmista: “Bangod nagsiling ka: ‘Si Jehova ang akon dalangpan,’ ginhimo mo ang Labing Mataas nga imo puluy-an; wala sing kalamidad nga mahanabo sa imo, kag bisan isa ka kalalat-an indi magpalapit sa imo tolda.” (Salmo 91:​9, 10) Huo, si Jehova ang aton dalangpan. Apang, ginahimo man naton ang Labing Mataas nga Dios nga ‘aton puluy-an,’ diin makasapo kita sing kalig-unan. Ginadayaw naton si Jehova subong Soberano sang Uniberso, ‘nagapuyo’ sa iya subong Ginahalinan sang aton kalig-unan, kag nagabantala kita sing maayong balita tuhoy sa iya Ginharian. (Mateo 24:14) Gani, ‘wala sing kalamidad nga mahanabo sa aton’​—⁠bisan ano sa mga kalamidad nga ginsambit sa una nga bahin sini nga salmo. Bisan pa, kaangay sang iban, maeksperiensiahan naton ang mga kalamidad subong sang mga linog, bagyo, baha, gutom, kag inaway, indi sini maguba ang aton pagtuo ukon ang aton espirituwal nga kalig-unan.

14. Subong mga alagad ni Jehova, ngaa wala kita malatnan sang makamamatay nga mga kalalat-an?

14 Ang hinaplas nga mga Cristiano kaangay sang mga dumuluong nga nagakabuhi sa mga tolda nga napain gikan sa sining sistema sang mga butang. (1 Pedro 2:11) ‘Bisan isa ka kalalat-an indi magpalapit sa ila tolda.’ Langitnon man ukon dutan-on ang aton paglaum, indi kita bahin sang kalibutan, kag wala kita malatnan sang makamamatay sa espirituwal nga mga kalalat-an subong sang iya sini imoralidad, materyalismo, butig nga relihion, kag pagsimba sa “sapat nga mapintas” kag sa “larawan” sini, ang Nasyones Unidas.​—⁠Bugna 9:​20, 21; 13:​1-18; Juan 17:16.

15. Sa anong mga paagi nga ginabuligan kita sang mga anghel?

15 Tuhoy sa pag-amlig sa aton, ang salmista nagdugang: “Sia [si Jehova] magasugo sa iya mga anghel para sa imo, sa pagbantay sa imo sa tanan mo nga dalanon. Bayawon ka nila sa ila mga kamot, agod indi makasandad ang imo tiil sa bato.” (Salmo 91:​11, 12) Ginhatagan ang mga anghel sing gahom sa pag-amlig sa aton. (2 Hari 6:17; Salmo 34:​7-9; 104:⁠4; Mateo 26:53; Lucas 1:19) Ginabantayan nila kita ‘sa tanan naton nga dalanon.’ (Mateo 18:10) Subong mga manugbantala sang Ginharian ginatuytuyan kita kag ginabantayan sang mga anghel kag wala kita nagakasandad sa espirituwal. (Bugna 14:​6, 7) Bisan ang mga “bato” kaangay sang mga pagdumili sa aton hilikuton wala magpasandad sa aton ukon magdula sang kahamuot sang Dios sa aton.

16. Paano nagakatuhay ang pagsalakay sang “bataon nga leon” kag sang “kobra,” kag ano ang reaksion naton sa sini?

16 Ang salmista nagpadayon: “Magatapak ka sa bataon nga leon kag sa kobra; tasakon mo ang may bungay-bungay nga bataon nga leon kag ang daku nga man-ug.” (Salmo 91:13) Subong nga ang bataon nga leon nagasalakay sing dayag kag direkta, ang iban sang aton mga kaaway nagapamatok sing dayag paagi sa pagpatuman sing mga kasuguan agod pauntaton ang aton hilikuton nga pagbantala. Apang ginasalakay man kita sing di-ginapaabot nga mga pagsalakay kaangay sang kobra halin sa tago nga duog. Kon kaisa patago kita nga ginasalakay sang mga klero paagi sa mga manughimo sang kasuguan, mga huwes, kag iban pa. Apang paagi sa bulig ni Jehova, mahidaiton kita nga nagaapelar sa mga korte, “sa pagpangapin kag sa legal nga pagpalig-on sa maayong balita.”​—⁠Filipos 1:⁠7; Salmo 94:​14, 20-22.

17. Paano naton ginatasak ang “may bungay-bungay nga bataon nga leon”?

17 Ginsambit sang salmista ang pagtasak sa ‘may bungay-bungay nga bataon nga leon kag sa daku nga man-ug.’ Mahimo nga mapintas gid ang may bungay-bungay nga bataon nga leon, kag ang daku nga man-ug mahimo nga daku gid kaayo. (Isaias 31:⁠4) Apang, walay sapayan kon daw ano kapintas ang may bungay-bungay nga bataon nga leon sa pagsalakay sing direkta, ginatasak naton ini sing malaragwayon paagi sa pagtuman sa Dios sa baylo sang tulad-leon nga mga tawo ukon mga organisasyon. (Binuhatan 5:29) Gani ang makatalagam nga “leon” wala nagahalit sa aton sa espirituwal.

18. Sin-o ang mahimo ipahanumdom sa aton sang “daku nga man-ug,” kag ano ang dapat naton himuon kon ginasalakay kita?

 18 Sa Griegong Septuagint, ang “daku nga man-ug” ginatawag nga “dragon.” Nagapahanumdom ini sa aton sa “daku nga dragon, ang orihinal nga man-ug, ang ginatawag nga Yawa kag Satanas.” (Bugna 12:​7-9; Genesis 3:15) Kaangay sia sang makahaladlok nga man-ug nga makasarang sa pagdugmok kag pagtulon sang iya biktima. (Jeremias 51:34) Kon samburan kita ni Satanas, ginadugmok kita paagi sa mga pag-ipit sini nga kalibutan, kag tunlon kita, manginpadlos kita kag tasakon ining “daku nga man-ug.” (1 Pedro 5:⁠8) Dapat ini himuon sang hinaplas nga mga nagkalabilin agod matuman sa ila ang Roma 16:⁠20.

Si Jehova​​—⁠Ang Ginahalinan sang Aton Kaluwasan

19. Ngaa nagadangop kita kay Jehova?

19 Tuhoy sa matuod nga sumilimba, ginarepresentar sang salmista ang Dios sa pagsiling: “Bangod nga ginhigugma niya ako, luwason ko man sia. Amligan ko sia bangod nahibaluan niya ang akon ngalan.” (Salmo 91:14) Sa literal ang prase nga “amligan ko sia” amo ang “ipahamtang ko sia sa hitaas,” buot silingon, indi malab-ot. Nagadangop kita kay Jehova subong iya mga sumilimba ilabi na bangod ‘ginhigugma naton sia.’ (Marcos 12:​29, 30; 1 Juan 4:19) Ang Dios naman ‘nagaluwas sa aton’ gikan sa aton mga kaaway. Indi gid kita malaglag. Sa baylo, luwason kita bangod nahibaluan naton ang ngalan sang Dios kag nagatawag sa sini nga may pagtuo. (Roma 10:11-13) Kag determinado kita sa ‘paglakat sa ngalan ni Jehova sa walay katubtuban.’​—⁠Miqueas 4:⁠5; Isaias 43:10-12.

20. Subong konklusion sang Salmo 91, ano ang ginasaad ni Jehova sa iya matutom nga alagad?

20 Subong konklusion sang Salmo 91, si Jehova nagsiling tuhoy sa iya matutom nga alagad: “Magatawag sia sa akon, kag ako magasabat sa iya. Magaupod ako sa iya sa kalisdanan. Magaluwas ako sa iya kag magahimaya sa iya. Busgon ko sia sa malawig nga kabuhi, kag pakitaan ko sia sang akon pagluwas.” (Salmo 91:​15, 16) Kon nagapangamuyo kita sa Dios suno sa iya kabubut-on, nagasabat sia sa aton. (1 Juan 5:13-15) Daku na nga kalisdanan ang aton naagihan bangod sang kaawayon nga ginsugyot ni Satanas. Apang ang pinamulong nga “magaupod ako sa iya sa kalisdanan” nagahanda sa aton sa mga pagtilaw sa palaabuton kag nagapasalig sa aton nga tipigan kita sang Dios nga buhi kon laglagon ining malauton nga sistema.

21. Paano nga nahimaya na ang mga hinaplas?

21 Walay sapayan sang masingki nga pagpamatok ni Satanas, ang nagkalabilin sang mga hinaplas sa tunga naton pagahimayaon sa langit sa gintalana nga tion ni Jehova​—⁠sa tapos sang “malawig nga kabuhi” sa duta. Apang, ang makatilingala nga mga pagluwas sang Dios naghatag na sing espirituwal nga himaya sa mga hinaplas. Kag kadungganan gid nga nagapanguna sila subong mga Saksi ni Jehova sa duta sa sining katapusan nga mga adlaw! (Isaias 43:10-12) Ang pinakadaku nga pagluwas ni Jehova sa iya katawhan mahanabo sa iya dakung inaway sa Armagedon kon ibindikar niya ang iya pagkasoberano kag pakabalaanon ang iya balaan nga ngalan.​—⁠Salmo 83:18; Ezequiel 38:23; Bugna 16:​14, 16.

22. Sin-o ang ‘makakita sang pagluwas ni Jehova’?

22 Hinaplas man kita nga mga Cristiano ukon ila dedikado nga mga kaupdanan, nagasalig kita sa Dios para sa kaluwasan. Sa “daku kag makakulugmat nga adlaw ni Jehova,” ang matutom nga nagaalagad sa Dios pagaluwason. (Joel 2:30-32) Kita nga mangin bahin sang “dakung kadam-an” sang mga makalampuwas pasulod sa bag-ong kalibutan sang Dios kag magapabilin nga matutom sa katapusan nga pagtilaw ‘busgon niya sa malawig nga kabuhi’​—⁠kabuhi nga walay katapusan. Banhawon man niya ang madamo. (Bugna 7:⁠9; 20:7-15) Malipay gid si Jehova nga ‘pakitaan kita sang pagluwas’ paagi kay Jesucristo. (Salmo 3:⁠8) Bangod sining daku nga paglaum sa unhan naton, padayon kita nga magsalig sa Dios nga buligan kita sa pag-isip sang aton mga adlaw sa iya himaya. Paagi sa aton pulong kag buhat, kabay nga padayon naton nga pamatud-an nga si Jehova ang aton dalangpan.

[Nota]

^ par. 2 Ang mga manunulat sang Cristianong Griegong Kasulatan wala magbinagbinag sang Salmo 91 pasad sa mga tagna tuhoy sa Mesias. Siempre pa, si Jehova nangin dalangpan kag kuta sang tawo nga si Jesucristo, subong nga amo man Sia sa hinaplas nga mga sumulunod ni Jesus kag sa ila dedikado nga mga kaupdanan subong isa ka grupo sa sining “tion sang katapusan.”​—⁠Daniel 12:4.

Ano ang Imo Sabat?

• Ano ang “tago nga duog sang Labing Mataas”?

• Ngaa wala kita mahadlok?

• Paano nga ‘wala sing kalamidad nga mahanabo sa aton’?

• Ngaa makasiling kita nga si Jehova ang ginahalinan sang aton kaluwasan?

[Mga Pamangkot sa Pagtinuon]

[Retrato sa pahina 17]

Nahibaluan mo bala kon paano ang pagkamaminatud-on ni Jehova isa ka daku nga taming para sa aton?

[Mga retrato sa pahina 18]

Ginabuligan ni Jehova ang iya mga alagad sa pagtuman sang ila ministeryo walay sapayan sang wala ginapaabot nga mga pagsalakay kag dayag nga pagpamatok

[Credit Line]

Kobra: A. N. Jagannatha Rao, Trustee, Madras Snake Park Trust