Magdiretso sa kaundan

Magdiretso sa listahan sang kaundan

Ginapakita sa Aton ni Jehova Kon Paano ang Pag-isip sang Aton mga Adlaw

Ginapakita sa Aton ni Jehova Kon Paano ang Pag-isip sang Aton mga Adlaw

 Ginapakita sa Aton ni Jehova Kon Paano ang Pag-isip sang Aton mga Adlaw

“Ipakita sa amon kon paano ang pag-isip sang amon mga adlaw agod nga makaagom kami sing tagipusuon nga may kaalam.”​—⁠SALMO 90:12.

1. Ngaa nagakaigo nga pangabayon si Jehova nga ipakita sa aton kon paano ang ‘pag-isip sang aton mga adlaw’?

SI Jehova nga Dios amo ang aton Manunuga kag Manughatag-Kabuhi. (Salmo 36:⁠9; Bugna 4:11) Gani wala na sing iban pa nga makapakita sa aton sing mas maayo kon paano gamiton ang mga tuig sang aton kabuhi sing maalamon. Kon amo, nagakaigo ang pangabay sang salmista sa Dios: “Ipakita sa amon kon paano ang pag-isip sang amon mga adlaw agod nga makaagom kami sing tagipusuon nga may kaalam.” (Salmo 90:12) Ang ika-90 nga Salmo, diin mabasa naton ina nga pangabay, takus gid nga binagbinagon naton sing maayo. Apang, sumaryuhon anay naton sa malip-ot ining inspirado sang Dios nga ambahanon.

2. (a) Sin-o ang ginhingalanan nga nagkomposo sang Salmo 90, kag san-o ini mahimo ginsulat? (b) Ano dapat ang epekto sang ika-90 nga Salmo sa aton pagtamod sa kabuhi?

2 Ang superskripsion sang Salmo 90 nagtawag sini nga “pangamuyo ni Moises, ang tawo sang matuod nga Dios.” Bangod ginapadaku sini nga salmo ang kalip-uton sang kabuhi sang tawo, mahimo nga ginkomposo ini sa tapos maluwas ang mga Israelinhon gikan sa pagkaulipon sa Egipto kag sa tion sang ila 40-ka-tuig nga paglakbay sa kahanayakan, sang linibo ang nagkalamatay, sa amo napapas ang walay pagtuo nga kaliwatan. (Numeros 32:9-13) Diin man sa sini, ginapakita sang Salmo 90 nga ang kabuhi sang di-himpit nga mga tawo malip-ot. Gani, maathag nga dapat naton gamiton ang aton hamili nga mga adlaw sing maalamon.

3. Ano ang sadsaran nga kaundan sang Salmo 90?

3 Sa Salmo 90, ginapakilala sang bersikulo 1 tubtob 6 si Jehova subong aton dayon nga puluy-an. Ginapakita sang bersikulo 7 tubtob 12 kon ano ang kinahanglan naton agod magamit ang madasig magligad nga mga tuig sang aton kabuhi sa paagi nga makapahamuot sa iya. Kag subong sang ginapabutyag  sa bersikulo 13 tubtob 17, luyag gid naton nga mabaton ang mahigugmaon nga kaayo kag pagpakamaayo ni Jehova. Sa pagkamatuod, wala ginapatuhuyan sing direkta sini nga salmo ang aton personal nga mga eksperiensia subong mga alagad ni Jehova. Apang, dapat naton talupangdon kag ilugon ang mapinangamuyuon nga balatyagon sini nga salmo. Gani hangpon naton sing maayo ang Salmo 90 suno sa paghangop sang mga dedikado sa Dios.

Si Jehova​​—⁠Ang Aton “Matuod nga Puluy-an”

4-6. Paano si Jehova aton “matuod nga puluy-an”?

4 Nagaumpisa ang salmista paagi sa mga pulong: “O Jehova, ikaw nangin matuod nga puluy-an namon sa tanan nga kaliwatan. Sa wala pa ang mga bukid mabun-ag, ukon antes mo ginbun-ag ang duta kag ang mapatubason nga duta nga daw may kasakit sang pagpanganak, bisan kutob sa tion nga walay latid tubtob sa tion nga walay latid ikaw ang Dios.”​—⁠Salmo 90:​1, 2.

5 Para sa aton ang “walay katapusan nga Dios,” si Jehova, amo ang “matuod nga puluy-an”​—⁠isa ka espirituwal nga dalangpan. (Roma 16:26) Nagabatyag kita sing kalig-unan, bangod yara sia pirme sa pagbulig sa aton subong ang “Nagapamati sa pangamuyo.” (Salmo 65:⁠2) Bangod ginahaboy naton ang aton mga kabalaka sa aton langitnon nga Amay paagi sa iya hinigugma nga Anak, ‘ang paghidait sang Dios nga nagalabaw sa tanan nga panghunahuna nagabantay sang aton tagipusuon kag ikasarang sa paghunahuna.’​—⁠Filipos 4:​6, 7; Mateo 6:⁠9; Juan 14:​6, 14.

6 Nagaagom kita sing espirituwal nga kalig-unan bangod, sa malaragwayon nga hambal, si Jehova aton “matuod nga puluy-an.” Nagaaman man sia sing “mga hulot”​—⁠mahimo may kaangtanan gid sa mga kongregasyon sang iya katawhan⁠​—⁠​subong espirituwal nga mga dalangpan, diin ang mahigugmaon nga mga manugbantay nagabulig sing daku agod magbatyag kita sing kalig-unan. (Isaias 26:20; 32:​1, 2; Binuhatan 20:​28, 29) Dugang pa, ang iban sa aton mga katapo sang mga pamilya nga madugay na nga nagaalagad sa Dios kag napamatud-an naton mismo nga sia ‘matuod nga puluy-an sa tanan nga kaliwatan.’

7. Sa ano nga kahulugan nga ‘ginbun-ag’ ang mga bukid kag ang duta nga daw may “kasakit sang pagpanganak”?

7 Nagluntad na si Jehova sa wala pa “mabun-ag” ang mga bukid ukon ang duta nga daw may “kasakit sang pagpanganak.” Sa pagtamod sang tawo, ang paghimo sa sini nga duta lakip ang tanan nga kinaiya sini, kemika, kag komplikado nga mga mekanismo nagkinahanglan sing daku gid nga panikasog. Kag paagi sa pagsiling nga ‘ginbun-ag’ ang mga bukid kag ang duta nga daw may “kasakit sang pagpanganak,” ginapakita sang salmista ang daku nga pagtahod sa kadakuon sang hilikuton nga nadalahig sang gintuga ni Jehova ini nga mga butang. Indi bala dapat may amo man kita sini nga pagtahod kag pagpasalamat sa binuhatan sang Manunuga?

Si Jehova Pirme Handa sa Pagbulig sa Aton

8. Ano ang kahulugan sang pinamulong nga si Jehova ang Dios “kutob sa tion nga walay latid tubtob sa tion nga walay latid”?

8 “Bisan kutob sa tion nga walay latid tubtob sa tion nga walay latid ikaw ang Dios,” amba sang salmista. Ang orihinal nga tinaga nga ginbadbad “tion nga walay latid” mahimo magpatuhoy sa mga butang nga may katapusan apang ang kalawigon sini indi pat-od. (Exodo 31:​16, 17; Hebreo 9:15) Apang, sa Salmo 90:⁠2 kag sa iban pa nga pagsambit sini sa Hebreong Kasulatan, nagakahulugan ini sing walay katubtuban, subong ginapakita sang pagbadbad. (Manugwali 1:⁠4) Indi mahangpan sang aton hunahuna kon paano nga ang Dios nagaluntad na gid anay. Apang, si Jehova wala sing ginsuguran kag wala sing katapusan. (Habacuc 1:12) Padayon sia nga magakabuhi kag handa sa pagbulig sa aton.

9. Sa ano ginpaanggid sang salmista ang isa ka libo ka tuig nga pagluntad sang tawo?

9 Gin-inspirar ang salmista nga ipaanggid ang isa ka libo ka tuig nga pagluntad sang tawo sa tuman kalip-ot nga tion sa eksperiensia sang dayon nga Manunuga. Ginapatuhuyan ang Dios, sia nagsulat: “Ginapabalik mo ang mamalatyon nga tawo sa nadugmok nga butang, kag nagasiling ka: ‘Balik, kamo nga mga anak sang mga tawo.’ Kay ang isa ka libo ka tuig sa imo itululok subong lamang sang kahapon kon magligad, kag subong sang isa ka hugna sang pagbantay sa kagab-ihon.”​—⁠Salmo 90:​3, 4.

10. Paano ginapabalik sang Dios ang tawo sa “nadugmok nga butang”?

10 Ang tawo mamalatyon, kag ginapabalik sia sang Dios sa “nadugmok nga butang.” Buot silingon, ang tawo nagabalik “sa yab-ok,” subong nadugmok,  ukon napudpod, nga duta. Daw subong bala nga nagasiling si Jehova: ‘Balik ka sa yab-ok sang duta nga gikan sa sini ginhimo ka.’ (Genesis 2:⁠7; 3:19) Naaplikar ini sa tanan​—⁠mabakod man ukon maluya, manggaranon man ukon imol⁠​—⁠​kay wala sing di-himpit nga tawo nga ‘sarang nga mas-a makatubos sang iya utod, ukon makahatag sa Dios sing gawad sa iya, agod nga magkabuhi sia sing dayon.’ (Salmo 49:​6-9) Apang malipayon gid kita nga ‘ginhatag sang Dios ang iya bugtong nga Anak, agod nga ang bisan sin-o nga magtuo sa iya may kabuhi nga walay katapusan’!​—⁠Juan 3:16; Roma 6:23.

11. Ngaa masiling naton nga ang malawig nga tion para sa aton tuman gid kalip-ot sa Dios?

11 Sa pagtamod ni Jehova, bisan ang 969-anyos nga si Metusela nagkabuhi sing kubos sa isa ka adlaw. (Genesis 5:27) Para sa Dios ang isa ka libo ka tuig subong lamang sang kahapon​—⁠24-oras lamang kalawig⁠​—⁠​kon magligad. Ginsambit man sang salmista nga para sa Dios ang isa ka libo ka tuig kaangay sang apat ka oras nga pagbantay sang isa ka manugbantay sa kampamento sa kagab-ihon. (Hukom 7:19) Gani, maathag nga ang malawig nga tion para sa aton tuman kalip-ot sa dayon nga Dios, si Jehova.

12. Paano “ginadaldal” sang Dios ang mga tawo?

12 Kon ipaanggid sa dayon nga pagluntad sang Dios, malip-ot gid man ang kabuhi sang tawo karon. Ang salmista nagsiling: “Ginadaldal mo sila; subong lamang sila sang katulugon; sa kaagahon kaangay lamang sila sang berde nga hilamon nga nagabag-o. Sa kaagahon nagapamulak ini kag nagabag-o; sa gab-i nagakalayong ini kag nagakalaya gid.” (Salmo 90:​5, 6) Nakita ni Moises ang linibo ka Israelinhon nga nagkalamatay sa kahanayakan, ‘gindaldal’ sang Dios kaangay sang baha. Ini nga bahin sang salmo ginbadbad: “Ginadaldal mo ang mga tawo sa pagtulog sa kamatayon.” (New International Version) Sa pihak nga bahin, ang kabuhi sang di-himpit nga mga tawo ‘isa lamang ka katulugon’ nga malip-ot​—⁠kaangay sang isa lamang ka gab-i nga pagtulog.

13. Sa anong paagi nga kaangay lamang kita “sang berde nga hilamon,” kag ano dapat ang epekto sini sa aton panghunahuna?

13 Kaangay lamang kita ‘sang berde nga hilamon nga nagapamulak sa kaagahon’ apang laya na sa gab-i bangod sang masingkal nga init sang adlaw. Huo, ang aton kabuhi subong ka umalagi sa hilamon nga nagakalayong sa isa ka adlaw. Gani, indi naton pag-usikan ini nga bahandi. Sa baylo, magpatuytoy kita sa Dios kon paano naton dapat gamiton ang aton nabilin nga mga tuig sa sini nga sistema sang mga butang.

Ginabuligan Kita ni Jehova sa ‘Pag-isip sang Aton mga Adlaw’

14, 15. Paano natuman ang Salmo 90:​7-9 sa mga Israelinhon?

14 Tuhoy sa Dios, nagsiling pa ang salmista: “Nagakapapas kami sa imo kaakig, kag bangod sang imo kasingkal natublag kami. Ginpahamtang mo ang amon mga sayop sa imo mismo atubangan, ang amon tinago nga mga butang sa atubangan sang imo masanag nga nawong. Kay ang tanan namon nga adlaw nagataliwan sa imo kaalipungot; ginatapos namon ang amon mga tuig subong lamang sang hutik.”​—⁠Salmo 90:​7-9.

15 Ang walay pagtuo nga mga Israelinhon ‘napapas sa kaakig sang Dios.’ ‘Natublag sila bangod sang iya kasingkal,’ ukon ‘hinadlukan bangod sang iya kaakig.’ (New International Version) Ang iban ‘napukan sa kamingawan’ subong resulta sang mga paghukom sang Dios. (1 Corinto 10:⁠5) ‘Ginpahamtang ni Jehova ang ila mga sayop sa iya mismo atubangan.’ Ginpapanabat niya sila bangod sang ila dayag nga paghimo sing sala, apang bisan ang ila “tinago nga mga butang,” ukon tago nga mga sala, yara sa ‘atubangan sang iya masanag nga nawong.’ (Hulubaton 15:⁠3) Bangod sang kaalipungot sang Dios, ang di-mahinulsulon nga mga Israelinhon ‘nagtapos sang ila mga tuig subong lamang sang hutik.’  Gani, ang aton malip-ot nga kabuhi kaangay sang isa ka pagginhawa nga nagaagi sa aton mga bibig subong lamang sang hutik.

16. Kon tago nga nagabuhat sing sala ang iban, ano ang dapat nila himuon?

16 Kon ang bisan sin-o sa aton tago nga magbuhat sing sala, mahimo naton matago ini nga buhat sa aton mga isigkatawo sa pila ka tion. Apang ang tago nga paghimo naton sing sala mangin sa ‘atubangan sang masanag nga nawong ni Jehova,’ kag ang aton mga buhat magahalit sang aton kaangtanan sa iya. Agod mangin suod liwat kay Jehova, dapat kita mangamuyo nga patawaron niya, magbiya sa aton mga paglapas, kag mapinasalamaton nga magbaton sang espirituwal nga bulig sang Cristianong mga gulang. (Hulubaton 28:13; Santiago 5:​14, 15) Mas maayo gid ina sangsa ayhan ‘tapuson ang aton mga tuig subong lamang sang hutik,’ nga yara sa katalagman ang aton paglaum nga kabuhi nga walay katapusan!

17. Daw ano kalawig ang kabuhi sang kalabanan nga tawo, kag puno sang ano ang aton mga tuig?

17 Tuhoy sa kabuhi sang di-himpit nga mga tawo, ang salmista nagasiling: “Ang mga adlaw sang amon mga tuig kapituan ka tuig; kag kon bangod sang pinasahi nga kabaskog ini kawaluan ka tuig, apang ang ila kabakod yara sa mabudlay kag makahalalit nga mga butang; kay maabtik ini nga nagalipas, kag nagalupad kami.” (Salmo 90:10) Ang kabuhi nga nagalawig sing 70 ka tuig kinaandan sa mga tawo, kag sa edad nga 85, ginpatuhuyan ni Caleb ang iya di-kinaandan nga kabaskog. Wala malakip sa sini ang subong nanday Aaron (123), Moises (120), kag Josue (110). (Numeros 33:39; Deuteronomio 34:⁠7; Josue 14:​6, 10, 11; 24:29) Apang sa walay pagtuo nga kaliwatan nga nagguwa sa Egipto, ang mga rehistrado halin sa 20 anyos pasaka napatay sa sulod sang 40 ka tuig. (Numeros 14:29-34) Sa madamong pungsod karon ang kalawigon sang kabuhi sang kalabanan nga tawo pareho gihapon sa ginsiling sang salmista. Ang aton mga tuig puno sing “mabudlay kag makahalalit nga mga butang.” Maabtik ini nga nagalipas, ‘kag nagalupad kita.’​—⁠Job 14:​1, 2.

18, 19. (a) Ano ang kahulugan sang ‘pag-isip sang aton mga adlaw agod nga makaagom kita sing tagipusuon nga may kaalam’? (b) Ang pagpakita naton sing kaalam magapahulag sa aton nga himuon ang ano?

18 Ang salmista masunod nga nag-amba: “Sin-o bala ang nakahibalo sang gahom sang imo kaakig kag sang imo kaalipungot suno sa pagkahadlok sa imo? Ipakita sa amon kon paano ang pag-isip sang amon mga adlaw agod nga makaagom kami sing tagipusuon nga may kaalam.” (Salmo 90:​11, 12) Wala sing isa sa aton ang bug-os nga nakahibalo sang gahom sang kaakig sang Dios ukon sang kasangkaron sang iya kaalipungot, kag dapat sini pabaskugon ang aton matinahuron nga kahadlok kay Jehova. Sa pagkamatuod, dapat ini magpahulag sa aton nga magpatudlo sa iya ‘kon paano ang pag-isip sang aton mga adlaw agod nga makaagom kita sing tagipusuon nga may kaalam.’

19 Ang pinamulong sang salmista isa ka pangamuyo kay Jehova nga tudluan niya ang iya katawhan kon paano mangin maalamon sa pagpabalor kag paggamit sa ila nabilin nga mga adlaw sa paagi nga ginakahamut-an sang Dios. Ang pagkabuhi sing 70 ka tuig nagapasalig sing 25,500 ka adlaw. Apang, pila man ang aton edad, ‘wala kita makahibalo kon ano ang mangin kabuhi naton buwas, kay kita isa ka usbong nga nagapakita sa diutay nga tion kag dayon nagakawala.’ (Santiago 4:13-15) ‘Bangod ang tion kag wala ginapaabot nga hitabo nagakahanabo sa aton tanan,’ indi naton masiling kon daw ano pa kita kalawig mabuhi. Gani ipangamuyo naton ang kaalam sa pag-atubang sa mga pagtilaw, sa pagpakig-angot sa iban sing nagakaigo, kag sa paghimo sang bug-os naton nga masarangan sa pag-alagad kay Jehova karon​—⁠karon gid nga adlaw! (Manugwali 9:11; Santiago 1:​5-8) Si Jehova nagatuytoy sa aton paagi sa iya Pulong, espiritu, kag organisasyon. (Mateo 24:45-47; 1 Corinto 2:10; 2 Timoteo 3:​16, 17) Ang pagpakita sing kaalam nagapahulag sa aton nga ‘pangitaon anay ang Ginharian sang Dios’ kag gamiton ang aton mga adlaw sa paagi nga nagahimaya kay Jehova kag nagapahalipay sang iya tagipusuon. (Mateo 6:25-33; Hulubaton 27:11) Siempre pa, ang pagsimba sa iya sing bug-os tagipusuon indi magadula sang tanan naton nga problema, apang pat-od nga magadul-ong ini sa daku nga kalipay.

Ang Pagpakamaayo ni Jehova Nagapahalipay sa Aton

20. (a) Sa ano nga paagi nga ang Dios ‘nagakasubo’? (b) Paano kita pakig-angutan ni Jehova kon nakahimo kita sing serioso nga sala apang nagapakita sing matuod nga paghinulsol?

20 Tuman gid kaayo kon mahimo kita malipay sa bug-os naton nga kabuhi! Tuhoy sa sini, nagpakitluoy si Moises: “Balik ka, O Jehova! Tubtob bala san-o? Kag magkasubo ka tungod sa imo mga alagad. Busga kami sa kaagahon sang imo mahigugmaon nga kaayo [ukon, “mainunungon nga gugma”],  agod nga magkalipay kami kag magkasadya sa tanan namon nga adlaw.” (Salmo 90:​13, 14; footnote) Ang Dios wala nagasala. Apang, ‘nagakasubo’ sia kag ‘nagaliso’ gikan sa iya kaakig kag sa paghatag sing silot kon ang iya paandam sa paghimo sini nagpabag-o sang panimuot kag pagginawi sang mahinulsulon nga mga nakasala. (Deuteronomio 13:17) Gani bisan kon makahimo kita sing serioso nga sala apang magpakita sing matuod nga paghinulsol, si Jehova ‘magabusog sa aton sang iya mahigugmaon nga kaayo,’ kag makatigayon kita sing rason sa ‘pagkalipay.’ (Salmo 32:​1-5) Kag paagi sa pagkabuhi sing matarong, mabatyagan naton ang mainunungon nga gugma sang Dios sa aton kag ‘magakasadya kita sa tanan naton nga adlaw’​—⁠huo, sa bug-os naton nga kabuhi.

21. Sa pinamulong nga nasulat sa Salmo 90:​15, 16, ano mahimo ang ginapangabay ni Moises?

21 Nangamuyo sing sinsero ang salmista: “Pasadyaha kami suno sa mga adlaw nga ginpapiutan mo kami, sa mga tuig nga nakakita kami sing malaut. Kabay nga makita sang imo mga alagad ang imo buhat kag ang imo himaya sa ila mga anak.” (Salmo 90:​15, 16) Mahimo nga ginapangabay ni Moises ang Dios nga pakamaayuhon ang Israel sing pagkasadya nga subong kalawig sang mga adlaw nga ginpiutan sila kag sang mga tuig nga nag-antos sila sing malaut. Ginpangabay niya nga ang “buhat” sang Dios sa pagpakamaayo sa mga Israelinhon mangin dayag sa Iya mga alagad kag ang Iya himaya mangin dayag sa ila mga anak. Nagakaigo lang nga ipangamuyo naton nga pakamaayuhon ang matinumanon nga katawhan sa bag-ong kalibutan nga ginsaad sang Dios.​—⁠2 Pedro 3:13.

22. Suno sa Salmo 90:​17, ano ang nagakaigo nga ipangamuyo naton?

22 Ang Salmo 90 nagahingapos paagi sa sini nga pangabay: “Kabay nga ang kahamuot ni Jehova nga amon Dios mangin sa amon, kag lig-unon mo sa amon ang buhat sang amon mga kamot. Huo, ang  buhat sang amon mga kamot lig-unon mo.” (Salmo 90:17) Ginapakita sining pinamulong nga nagakaigo lang nga ipangamuyo naton nga pakamaayuhon sang Dios ang aton mga panikasog sa pag-alagad sa iya. Subong hinaplas nga mga Cristiano ukon ila mga kaupdanan, ang “iban nga mga karnero,” nagakasadya kita nga “ang kahamuot ni Jehova” nagapabilin sa aton. (Juan 10:16) Malipayon gid kita nga ang Dios ‘naglig-on sang buhat sang aton mga kamot’ subong mga manugbantala sang Ginharian kag sa iban pa nga paagi!

Magpadayon Kita sa Pag-isip sang Aton mga Adlaw

23, 24. Paano kita makabenepisyo sa pagpamalandong sa ika-90 nga Salmo?

23 Ang pagpamalandong sa ika-90 nga Salmo dapat magpadaku sang aton pagsalig kay Jehova, ang aton “matuod nga puluy-an.” Paagi sa paghunahuna sang pinamulong sini tuhoy sa kalip-uton sang kabuhi, dapat naton marealisar sing labi pa nga kinahanglan naton ang pagtuytoy sang Dios sa pag-isip sang aton mga adlaw. Kag kon magpadayon kita sa pagpangita kag pagpakita sing diosnon nga kaalam, pat-od nga mabaton naton ang mahigugmaon nga kaayo kag pagpakamaayo ni Jehova.

24 Padayon nga ipakita sa aton ni Jehova kon paano ang pag-isip sang aton mga adlaw. Kag kon sundon naton ang iya panudlo, mapadayon naton ang pag-isip sang aton mga adlaw sa walay katubtuban. (Juan 17:⁠3) Kon luyag gid naton ang kabuhi nga walay katapusan, nian dapat mangin dalangpan naton si Jehova. (Judas 20, 21) Subong sang makita naton sa masunod nga artikulo, ini nga punto kapin nga gin-athag sa makapalig-on nga pinamulong sang ika-91 nga Salmo.

Ano ang Imo Sabat?

• Paano si Jehova aton “matuod nga puluy-an”?

• Ngaa makasiling kita nga si Jehova pirme handa sa pagbulig sa aton?

• Paano kita ginabuligan ni Jehova sa ‘pag-isip sang aton mga adlaw’?

• Ano ang ‘magapasadya sa aton sa tanan naton nga adlaw’?

[Mga Pamangkot sa Pagtinuon]

[Retrato sa pahina 11]

Si Jehova ang Dios “sa wala pa ang mga bukid mabun-ag”

[Retrato sa pahina 12]

Sa pagtamod ni Jehova, ang 969-anyos nga si Metusela nagkabuhi sing kubos sa isa ka adlaw

[Mga retrato sa pahina 14]

Si Jehova ‘naglig-on sang buhat sang aton mga kamot’