Kinahanglan Mo ang Nahanas nga Konsiensia

Isa ka halandumon nga adlaw ang nagahulat para sa mga pasahero kag mga tinawo sang Air New Zealand Flight 901 padulong sa Antarctica. Nahanda na ang mga kamera, kag masadya ang mga pasahero samtang manubo nga nagalupad ang DC-10 palapit sa puti nga kontinente agod ila makita ang matahom nga talan-awon.

ANG kapitan, nga isa ka piloto sa sulod sang 15 ka tuig, nakapalupad na sing eroplano sing kapin sa 11,000 ka oras. Antes maglupad, mahalungon niya nga ginpasulod sa kompyuter sang iya eroplano ang plano sang paglakbay, apang wala niya matalupangdi nga ang ginpasulod niya nga mga coordinate ukon mga numero nga nagapakita sang isa ka posisyon sa mapa sala gali. Nagaagi sa panganod sa kataason nga kubos lamang sa 600 metros, nagbunggo ang DC-10 sa naubos nga banglid sang Mount Erebus, kag napatay ang tanan 257 nga sakay sini.

Subong nga ang mga eroplano karon nagadepende sa mga kompyuter agod tuytuyan ini sa kahawaan, ginhatagan ang mga tawo sing konsiensia agod tuytuyan sila sa kabuhi. Kag ang daku gid nga trahedya sang Flight 901 makatudlo sa aton sang pila ka importante nga leksion tuhoy sa aton konsiensia. Halimbawa, subong nga ang pagsakay sa eroplano nga luwas sa peligro nagadepende sa isa ka sistema sang pagpalupad sing eroplano nga nagapanghikot sing maayo kag sa husto nga mga impormasyon sa pagtuytoy, ang aton espirituwal, moral, kag pisikal pa gani nga kaayuhan nagadepende man sa isa ka maayo nga konsiensia nga ginatuytuyan sing husto sa moral.

Sing makapasubo, sa kalibutan karon, ini nga mga tuytoy madasig nga nagakadula ukon wala ginasapak. “Madamo kita sing mabatian karon nga ang kinaandan nga bata nga nagaeskwela sa Estados Unidos indi makabasa, indi makasulat, kag nabudlayan sa pagpangita sing Pransia sa mapa,” siling sang isa ka Amerikana nga edukador. “Matuod man nga nabudlayan sia sa pagpatuhay sang husto gikan sa sala. Lakip sa indi pagkahibalo sa pagbasa kag sa pagsulat kag sa pag-isip, dapat naton idugang ang daku nga kagumon sa moral sa listahan sang mga problema sa edukasyon.” Ginsambit man niya nga ang “mga pamatan-on karon nagakabuhi nga wala sing maathag nga mga talaksan sa moral. Pamangkuta ang isa sa ila kon may yara bala sing ‘husto kag sala,’ kag sa hinali lang magaatubang ka sa isa ka naligban, indi makatingog, ginakulbaan, kag indi sigurado nga indibiduwal. . . . Ini nga kagumon nagalala sa baylo nga mag-ayo sa tion nga mag-eskwela na sila sa kolehiyo.”

Ang isa ka kabangdanan sini nga kagumon amo ang moral relativism, isa ka lapnag nga pagtamod nga ang mga talaksan nagakalainlain depende sa kaugalingon nga luyag ukon kultura. Handurawa kon ano ang matabo kon magapalupad sing eroplano ang mga piloto, indi paagi sa espesipiko nga mga tuytoy, kundi paagi sa mga sinyales nga nagaduladula kag kon kaisa bug-os na gid nga nagakadula! Ang mga aksidente kaangay sang natabo sa Mount Erebus pat-od gid nga mangin kinaandan na lamang. Sing kaanggid, bangod sang indi na pagsunod sa wala nagabag-obag-o nga mga talaksan sa moral, nagaani ang kalibutan sang daku nga kasubo kag kamatayon samtang nagakaguba ang mga pamilya bangod sang pagluib kag nagaantos ang minilyon bangod sang AIDS ukon sang iban pa nga balatian nga ginaliton paagi sa sekso.

Ang moral relativism daw maalamon pamatian, apang sa kamatuoran ang mga nagasunod sa sini kaangay sang dumaan nga mga taga-Ninive nga wala makahibalo sang ‘ila kamot nga tuo gikan sa ila kamot nga wala.’ Ang mga nagabuhat sang moral relativism kaangay sang apostata nga mga Israelinhon nga nagsiling nga “ang maayo malaut kag ang malaut maayo.”​—⁠Jonas 4:11; Isaias 5:20.

Gani diin kita makadto para sa maathag kag husto nga mga kasuguan kag mga prinsipio nga paagi sini mahanas naton ang aton konsiensia agod mangin isa ka masaligan nga panuytoy? Nakita sang minilyon nga ang Biblia amo gid ang makahatag sini nga  kinahanglanon. Halin sa moralidad pakadto sa maayo nga panimuot sa trabaho kag halin sa paghanas sa kabataan pakadto sa pagsimba sa Dios, wala sing butang nga importante nga nalipatan sang Biblia. (2 Timoteo 3:16) Napamatud-an ini nga masaligan sa sulod sang mga siglo. Bangod ang nagpasad sang mga talaksan sang Biblia sa moral amo ang labing mataas gid nga awtoridad, ang aton Manunuga, mapuslanon ini sa tanan nga tawo. Gani, wala sing rason nga magkabuhi kita nga walay hinalung-ong sa kon ano ang husto kag sala.

Apang sa karon nga panahon, ginasalakay ang imo konsiensia nga wala pa gid anay matabo. Paano ina natabo? Kag paano mo maamligan ang imo konsiensia? Ang maalamon nga dalanon nga himuon amo ang pagkilala sa nagasalakay kag ang paghibalo sang iya mga taktika. Binagbinagon ini sa masunod nga artikulo.