Sugilanon sang Kabuhi

Isa ka Bugana nga Kabuhi sa Pag-alagad kay Jehova

PANUGIRON NI RUSSELL KURZEN

Natawo ako sang Septiembre 22, 1907, pito ka tuig antes sang talalupangdon nga dag-on nga nagsugod sa pagdabdab sang nahaunang bug-os kalibutan nga inaway. Ang amon pamilya manggaranon sa labing importante nga paagi. Sa tapos mo mabatian ang pila ka detalye tuhoy sa amon maragtas, sa banta ko magaugyon ka.

SANG bata pa, si Lola Kurzen nagapangita na sing kamatuoran tuhoy sa Dios. Antes sia magtin-edyer, nakadtuan na niya ang lainlain nga simbahan sa iya matahom nga banwa sa Spiez, Switzerland. Sang 1887, pila ka tuig pagkatapos nga nakapamana sia, ang pamilya Kurzen nagbuylog sa pagdugok sang mga imigrante sa Estados Unidos.

Ang pamilya nagpuyo sa Ohio, diin, sang mga tuig 1900, nasalapuan ni Lola ang madugay na niya ginapangita nga bahandi. Nakita niya ini sa mga pinanid sang libro ni Charles Taze Russell nga The Time Is at Hand, sa Aleman nga lenguahe. Nahantop niya sa gilayon nga ang nabasahan niya didto nagaunod sang kapawa sang kamatuoran sa Biblia. Bisan pa haluson makabasa si Lola sing Ingles, nagsuskriber sia sa Iningles nga Lalantawan nga magasin. Sa amo, nakatuon sia sing dugang pa nga mga kamatuoran sa Biblia kag, sa amo man nga tion, sing Ingles nga lenguahe. Wala gid magpakita si Lolo sang amo man nga interes sa espirituwal nga mga butang subong sang iya asawa.

Sa 11 ka kabataan ni Lola Kurzen, 2 sang iya anak nga lalaki, nga sanday John kag Adolph, ang nagpakita sing apresasyon sa espirituwal nga bahandi nga iya nasapwan. Si John amo ang akon amay, kag ginbawtismuhan sia sadtong 1904 sa kombension sang mga Estudyante sang Biblia, nga amo anay ang pagkakilala sa mga Saksi ni Jehova, sa St. Louis, Missouri. Sanglit ang kalabanan nga Estudyante sang Biblia kasarangan ang pangabuhi, ang kombension gin-iskedyul sing dungan sa World’s Fair sa St. Louis agod mahimuslan nila ang manubo nga plete sa  tren. Sang ulihi, sang 1907, si tiyoy Adolph ginbawtismuhan sa isa ka kombension sa Niagara Falls, New York. Ang akon amay kag tiyo makugi nga nagbantala sang ila natun-an gikan sa Biblia, kag pareho sila sang ulihi nga nangin bug-os tion nga mga ministro (nga ginatawag karon mga payunir).

Busa, sang natawo ako sang 1907, ang akon pamilya manggaranon na, sa espirituwal nga paghambal. (Hulubaton 10:22) Lapsag pa lang ako sang 1908 sang gindala ako sang akon mga ginikanan, nga si John kag si Ida, sa “On to Victory” nga kombension sa Put-in-Bay, Ohio. Si Joseph F. Rutherford, nga isa anay ka nagalakbay nga ministro, amo ang tsirman sang kombension didto. Pila ka semana antes sini, nagkadto sia sa Dalton, Ohio, diin ginduaw niya ang amon puluy-an kag naghatag sing pamulongpulong sa mga Estudyante sang Biblia sa amo nga duog.

Siempre pa, indi ko na madumduman yadto nga mga hitabo, apang indi ko malipatan ang kombension sa Mountain Lake Park, Maryland, sang 1911. Didto nakilala namon sang akon manghod nga si Esther si Charles Taze Russell, nga amo ang nagatatap sang bug-os kalibutan nga pagbantala nga hilikuton sang mga Estudyante sang Biblia.

Sang Hunyo 28, 1914, ang adlaw nga nagsugod ang bug-os kalibutan nga inaway bangod sang pagpatay kay Archduke Ferdinand kag sa iya asawa sa Sarajevo, nagatambong kami sang akon pamilya sa isa ka mahidaiton nga kombension sa Columbus, Ohio. Sugod sadto nga mga tuig, nakatigayon ako sing pribilehiyo nga makatambong sa madamo nga kombension sang katawhan ni Jehova. Ang pila mga pagtinipon lamang sang isa ka gatos ukon kapin pa. Ang iban naman dalagku nga pagtinipon sa pila sang pinakadaku nga mga istadyum sa kalibutan.

Ang Amon Puluy-an sa Isa ka Duog sa Pag-amuma

Kutob sang 1908 tubtob 1918, ang amon puluy-an sa Dalton​​—⁠nga nahamtang sa tungatunga sang Pittsburgh, Pennsylvania, kag Cleveland Ohio​​—⁠ginagamit sa mga miting sang isa ka diutay nga kongregasyon sang mga Estudyante sang Biblia. Ang amon puluy-an nangin isa ka duog diin ginaamuma ang madamo nga nagalakbay nga humalambal. Ginagaid nila ang ila mga kabayo kag mga kalesa sa likod sang amon kamalig kag ginasaysay nila ang makakulunyag nga mga eksperiensia kag ang iban pa nga espirituwal nga mga kamatuoran sa mga nagtipon. Makapalig-on gid yadto nga mga tion!

Si Tatay isa ka maestro, apang ang iya tagipusuon yara sa labing daku nga pagpanudlo nga hilikuton, ang Cristianong pagministeryo. Ginpat-od niya nga tudluan ang iya pamilya tuhoy kay Jehova, kag kada  gab-i nagapangamuyo kami sing tingob subong isa ka pamilya. Sang tigpamulak sang 1919, ginbaligya ni Tatay ang amon kabayo kag kalesa, kag sa bili nga $175 nagbakal sia sing isa ka 1914 nga Ford nga salakyan agod mabantalaan niya ang madamo pa nga tawo. Sang 1919 kag 1922, ang amon pamilya gindala sining salakyan sa talalupangdon nga mga kombension sang mga Estudyante sang Biblia sa Cedar Point, Ohio.

Ang amon bug-os nga pamilya​​—⁠si Nanay; si Tatay; si Esther; ang akon manghod nga si John; kag ako​​—⁠tanan nakigbahin sa publiko nga pagbantala nga hilikuton. Indi ko gid malipatan sang ginpamangkot ako sang isa ka tagbalay sa una nga tion tuhoy sa Biblia. Mga pito ka tuig pa lang ako sadto. “Toto, ano ang Armagedon?” pamangkot sang tawo. Sa diutay nga bulig sang akon amay, nasabat ko sia sa Biblia.

Pagsulod sa Bug-os Tion nga Ministeryo

Sang 1931 ang amon pamilya nagtambong sa Columbus, Ohio, nga kombension, diin nakunyag kami nga makigbahin sa pagbaton sang bag-o nga ngalan, mga Saksi ni Jehova. Nalangkag gid si John amo nga nagpamat-od sia nga magsulod kami sa pagpayunir nga hilikuton.⁠ * Nagpayunir kami, kag subong man si Nanay, si Tatay, kag si Esther. Isa gid ka bahandi ang natigayon namon​​—⁠ang pamilya nga nahiusa sa makalilipay nga hilikuton sang pagbantala sing maayong balita sang Ginharian sang Dios! Wala gid ako nakapoy sa pagpasalamat kay Jehova tungod sini nga pagpakamaayo. Apang, bisan malipayon na kami, daku pa nga kalipay ang nagahulat sa amon.

Sang Pebrero sang 1934, nag-alagad ako sa sanga talatapan sang mga Saksi ni Jehova (ginatawag Bethel) sa Brooklyn, New York. Nagbuylog sa akon si John didto pila ka semana sang ulihi. Magkaupod kami sa kuwarto tubtob sang napangasawa niya ang iya pinalangga nga asawa, si Jessie, sang 1953.

Sang nagkadto kami ni John sa Bethel, ginbaton sang amon mga ginikanan ang mga asaynment sa pagpayunir sa nagkalainlain nga bahin sang pungsod kag nag-upod sa ila si Esther kag ang bana niya, nga si George Read. Nagpadayon sa pagpayunir ang amon mga ginikanan tubtob natapos nila ang ila dutan-on nga pagkabuhi sang 1963. Nagpamilya sanday Esther kag ang iya bana, kag ginpakamaayo ako sang madamo nga hinablos nga babayi kag lalaki, nga ginapalangga ko gid.

Hilikuton kag Kaupdanan sa Bethel

Gingamit ni John ang iya teknikal nga mga ikasarang sa Bethel kag nagtrabaho kaupod sang iban pa nga mga Bethelite sa mga proyekto subong sang paghimo sing mabulubitbit nga mga ponograpo. Gingamit ini sang linibo ka Saksi ni Jehova sa ila pamalaybalay nga ministeryo. Nagbulig man si John sa pagdesinyo kag sa paghimo sing mga makina para sa pagputos kag sa pagbutang sing ngalan sa mga magasin nga ginapadala sa mga suskritor.

Ginsugdan ko ang akon pag-alagad sa Bethel sa bindery sang mga libro. Nagatrabaho sa pabrika sadto nga tion amo ang iban pa nga lamharon nga mga lalaki nga nagaalagad gihapon sing matutom sa Bethel. Nagalakip ini kanday Carey Barber kag Robert Hatzfeld. Ang iban pa sa ila nga indi ko gid malipatan, apang napatay na, amo sanday Nathan Knorr, Karl Klein, Lyman Swingle, Klaus Jensen, Grant Suiter, George Gangas, Orin Hibbard, John Sioras, Robert Payne, Charles Fekel, Benno Burczyk, kag John Perry. Matutom sila nga nagtrabaho sa sulod sang madamo nga tinuig, nga wala gid nagareklamo ukon nagapaabot sing “promosyon.” Apang, para sa pila sining mainunungon kag ginhaplas sang espiritu nga mga Cristiano, mabug-at pa nga mga responsabilidad ang ginhatag sa ila samtang nagauswag ang organisasyon. Ang iban nag-alagad pa gani sa Nagadumala nga Hubon sang mga Saksi ni Jehova.

Ang pagpangabudlay kaupod sining masinakripisyuhon sa kaugalingon nga mga kauturan nagtudlo sa akon sing isa ka importante nga leksion. Ang mga trabahador sa sekular nga mga trabaho ginaswelduhan tungod sa ila pagpangabudlay. Amo ini ang ila padya. Ang pag-alagad sa Bethel nagahatag sing bugana nga espirituwal nga mga pagpakamaayo, kag ang espirituwal nga mga lalaki kag mga babayi lamang ang makaapresyar sini nga mga padya.​​—⁠1 Corinto 2:​6-​16.

Si Nathan Knorr, nga tin-edyer pa lang sang nagkadto sa Bethel sang 1923, amo ang nangin manugtatap sa pabrika sang dekada 1930. Nagalakatlakat sia kada adlaw sa palibot sang pabrika kag ginatamyaw ang tagsa ka trabahador. Kami nga mga  bag-uhan pa lang sa Bethel nagapasalamat gid sa sining personal nga interes. Sang 1936 nakabaton kami sing isa ka bag-o nga imprintahan halin sa Alemanya, kag ang pila sang lamharon nga mga utod nabudlayan gid sa pag-asembol sini. Gani nagsuksok si Utod Knorr sing overall nga bayo kag nagtrabaho upod sa ila sing kapin sa isa ka bulan tubtob mapaandar nila ini.

Si Utod Knorr isa gid ka mapisan nga manugpangabudlay amo nga ang kalabanan sa amon indi gid makatupong sa iya kapisan sa pagtrabaho. Apang nakahibalo man siya kon paano maglingawlingaw. Bisan pagkatapos nga mabaton niya ang pribilehiyo nga dumalahan ang bug-os kalibutan nga pagbantala nga hilikuton sang mga Saksi ni Jehova sang Enero 1942, kon kaisa nagahampang sia sing baseball upod sa mga katapo sang pamilya Bethel kag sa mga estudyante sang eskwelahan sa pagmisyonero sa Gilead sa kampus malapit sa South Lansing, New York.

Sang Abril 1950, ang pamilya Bethel nagsaylo sa bag-ong ginpatindog nga napulo-ka-panalgan nga bahin sang amon residence building nga nahamtang sa 124 Columbia Heights, Brooklyn, New York. Ang bag-o nga hulot-kalan-an makapaigo sa amon tanan sa tion sang pagkaon. Sa sulod sang tatlo ka tuig nga pagpatindog sini nga tinukod, wala kami makahiwat sang amon programa sa pagsimba sa aga. Daw ano ka makalilipay nga tion sang yadto nga programa ginbalik! Gintangdo ako ni Utod Knorr nga magpungko kaupod niya sa lamesa sang tsirman agod nga makabulig ako sa iya sa pagdumdom sang mga ngalan sang bag-o nga mga katapo sang amon pamilya. Sa sulod sang 50 ka tuig isa lang ang akon nangin pulungkuan sa tion sang pagsimba sa aga kag sa pamahaw. Nian, sang Agosto 4, 2000, yadto nga hulot-kalan-an ginsirhan, kag gintangdo ako sa isa sang ginpakay-o nga mga hulot-kalan-an sang anay nga Towers Hotel.

Sa malip-ot nga tion sang dekada 1950, nag-obra ako sa pabrika sang isa ka Linotype nga makina, nga nagahanda sang mga slug kag ginahimo nga mga pahina subong isa ka bahin sang proseso sa paghimo sang mga printing plates. Indi ko luyag ini nga trabaho, apang si William Peterson nga nagadumala sang mga makina, tuman gid kabuot sa akon amo nga sa bisan paano nalipay na ako sa pagtrabaho didto. Nian, sang 1960, nagkinahanglan sang mga boluntaryo sa pagpintura sa bag-ong ginpatindog nga residence building sa 107 Columbia Heights. Nalipay gid ako sa pagboluntaryo sa paghanda sining bag-o nga mga pasilidad para sa nagadaku namon nga pamilya Bethel.

Wala madugay pagkatapos sang pagpintura sa tinukod sa 107 Columbia Heights, nalipay ako bisan pa nga nakibot, nga maasayn sa trabaho nga mag-abiabi sang mga bisita sa Bethel. Ang ulihi nga 40 ka tuig nga pag-alagad ko subong isa ka receptionist makalilipay gid subong sang iban pa nga mga tion nga nahinguyang ko sa Bethel. Mga bisita man ukon bag-ong mga katapo sang pamilya Bethel ang nagaabot, makalilipay nga hunahunaon ang mga resulta sang amon pagbinuligay para sa pagpa-uswag sang Ginharian.

Maukod nga mga Estudyante Sang Biblia

Ang amon pamilya sa Bethel bugana sa espirituwal bangod ang mga katapo sini mahuyugon sa Biblia. Sang una ko nga pag-abot sa Bethel, ginpamangkot ko si Emma Hamilton, nga nagapangabudlay subong isa ka proofreader, kon pila ka beses na niya nabasa ang Biblia. “Treintay-singko ka beses,” sabat niya, “kag nian nag-untat na ako sa pag-isip.” Si Anton Koerber, nga isa pa ka matutom nga Cristiano nga nag-alagad sa Bethel kadungan ni Emma, nagasiling anay: “Ibutang pirme ang Biblia sa lugar nga madali makab-ot.”

Sang mapatay si Utod Russell sang 1916, si Joseph F. Rutherford amo ang nagbulos sa mga responsabilidad sa organisasyon nga gin-abaga anay ni Russell. Si Rutherford isa ka maayo kag lantip nga manugpamulongpulong sa publiko, nga subong isa ka abogado nagpangapin sa mga kaso para sa mga Saksi ni Jehova sa Korte Suprema sang Estados Unidos. Sang mapatay si Rutherford sang 1942, ginbuslan sia ni Utod Knorr sa iya katungdanan kag nagpangabudlay sia sing lakas agod mapauswag ang iya kalantip sa pagpamulongpulong publiko. Bangod lapitay kami sing kuwarto, masami ko sia mabatian nga nagaensayo sang iya pamulongpulong sing sulit-sulit. Sang ulihi, bangod sining maukod nga mga panikasog, nangin isa sia ka maayo nga manugpamulongpulong sa publiko.

Sang Pebrero 1942, nagbulig si Utod Knorr sa pagpatok sing isa ka programa sa pagbulig sa amon tanan nga kauturan nga lalaki sa Bethel nga mapauswag ang amon ikasarang sa pagtudlo kag sa paghambal. Nagkonsentrar ang eskwelahan sa pagpanalawsaw sa Biblia kag sa pamulongpulong publiko. Sang primero, ang kada isa sa amon gin-asayn  sa paghatag sing malip-ot nga pamulongpulong tuhoy sa mga karakter sa Biblia. Ang akon una nga pamulongpulong amo ang tuhoy kay Moises. Sang 1943 ang kaanggid nga eskwelahan ginsugdan sa mga kongregasyon sang mga Saksi ni Jehova, kag nagapadayon ini tubtob karon. Ang pagtigayon sing ihibalo sa Biblia kag ang pagpauswag sang epektibo nga mga metodo sa pagpanudlo amo gihapon ang ginapadaku sa Bethel.

Sang Pebrero 1943 ang una nga klase sa eskwelahan sang pagmisyonero sa Gilead ginsugdan. Sa karon ang ika-111 nga klase sang Gilead bag-o lang naggradwar! Sa kapin sa 58 ka tuig sini nga pagpanghikot, ang eskwelahan nag-aman sing paghanas sa kapin sa 7,000 ka tawo sa pag-alagad subong mga misyonero sa bug-os nga kalibutan. Sing talalupangdon, sang nagsugod ang eskwelahan sang 1943, kapin lamang sa 100,000 ang mga Saksi ni Jehova sa bug-os nga kalibutan. Sa karon, may kapin na sa 6,000,000 ang nagpakigbahin sa pagbantala sing maayong balita sang Ginharian sang Dios!

Nagapasalamat sa Akon Espirituwal nga Palanublion

Antes gid lang gintukod ang Gilead, tatlo kami gikan sa Bethel ang gin-asayn sa pagduaw sa mga kongregasyon sa bug-os nga Estados Unidos. Nagatener kami sing isa ka adlaw, sing pila ka adlaw ukon sing isa ka semana pa gani agod palig-unon ining mga kongregasyon sa espirituwal. Gintawag kami subong mga alagad sa mga kauturan, ang pagtawag nga gin-islan sang ulihi nga alagad sang sirkito, ukon manugtatap sang sirkito. Apang, wala madugay nga ginbuksan ang Eskwelahan sa Gilead, ginpabalik ako kag nagtudlo sing pila ka kurso. Nangin regular nga instruktor ako sang duha tubtob lima nga klase, kag nangin salili man ako para sa isa sang regular nga mga instruktor kag nagtudlo sa ika-14 nga klase. Bangod marepaso ko sa mga estudyante ang talalupangdon nga unang mga hitabo sa modernong-adlaw nga maragtas sa organisasyon ni Jehova​​—⁠madamo sini ang masugid ko pasad sa akon personal nga eksperiensia​​—⁠labi pa nga nagapasalamat ako sa akon bugana espirituwal nga palanublion.

 Ang isa pa ka pribilehiyo nga akon naagom sa sulod sang mga tinuig amo ang pagtambong sa internasyonal nga mga kombension sang katawhan ni Jehova. Sang 1963, naglakbay ako sa bug-os nga kalibutan upod sang kapin sa 500 pa ka delegado sa “Walay Katapusan nga Maayong Balita” nga mga kombension. Ang iban pa nga maragtason nga mga kombension nga akon natambungan amo ang mga ginhiwat sa Warsaw, Poland sang 1989; sa Berlin, Alemanya, sang 1990; kag Moscow, Russia, sang 1993. Sa kada kombension, may kahigayunan ako nga makilala ang pila sang aton hinigugma nga mga kauturan nga nagbatas sing mga dekada nga paghingabot sa idalom sang Nazi nga rehimen, Komunista nga rehimen, ukon sang duha ka rehimen. Isa gid ka nakapabakod-pagtuo nga mga eksperiensia yadto!

Ang akon kabuhi sa pag-alagad kay Jehova bugana gid sa espirituwal! Ang espirituwal nga mga pagpakamaayo wala gid sing katapusan. Kag, indi kaangay sa materyal nga mga manggad, kon labi kita nga nagapakigbahin sa sining hamili nga mga butang, labi pa nga nagadugang ang aton manggad. Kon kaisa mabatian ko nga nagasiling ang iban nga kuntani wala sila ginpadaku nga mga Saksi ni Jehova. Nagasiling sila nga mas naapresyar kuntani nila ang mga kamatuoran sa Biblia kon naeksperiensiahan anay nila ang kabuhi sa guwa sang organisasyon sang Dios.

Nabalaka gid ako pirme kon akon mabatian ang mga pamatan-on nga nagahambal sini nga mga butang bangod sa pagkamatuod nagasiling sila nga mas maayo pa nga wala sila ginpadaku sa ihibalo sang mga dalanon ni Jehova. Apang, hunahunaa lamang ang tanan malain nga mga batasan kag mahigko nga panghunahuna nga dapat bag-uhon sang mga tawo sa ila kabuhi kon masapwan nila ang kamatuoran sang Biblia sa ulihi. Pirme gid ako nagapasalamat nga ginpadaku sang akon mga ginikanan ang ila tatlo ka kabataan sa dalanon sang pagkamatarong. Nagpabilin si John nga isa ka matutom nga alagad ni Jehova tubtob sa iya kamatayon sang Hulyo 1980, kag tubtob karon si Esther nagapabilin nga isa ka matutom nga Saksi.

Nalipay gid ako sa paghinumdom sang madamo nga maayong pag-inabyanay nga akon nabatyagan upod sa matutom Cristianong mga kauturan nga lalaki kag babayi. Kapin na sa 67 ka makakulunyag nga tuig ako karon sa Bethel. Bisan pa wala ako makapangasawa, may yara ako madamong espirituwal nga mga anak nga lalaki kag babayi, subong man espirituwal nga mga kaapuhan. Kag nalipay ako sa paghunahuna sang tanan pinalangga nga bag-ong mga katapo sang aton bug-os kalibutan espirituwal nga pamilya nga makilala ko pa, nga hamili ang tagsatagsa. Daw ano gid ka matuod ang mga pinamulong: “Ang pagpakamaayo ni Jehova​​—⁠amo ina ang nagapamanggad”!​​—⁠Hulubaton 10:22.

[Nota]

^ par. 16 Ginbawtismuhan ako sang Marso 8, 1932. Gani nabawtismuhan na ako sa tapos nagpamat-od nga dapat ako magpayunir.

[Retrato sa pahina 20]

Halin sa wala pa tuo: ang akon amay nga nagasabak sa akon manghod, nga si John, si Esther, ako, kag ang akon iloy

[Mga retrato sa pahina 23]

Nagtudlo sa isa ka klase sa Gilead sang 1945

Naibabaw sa tuo: mga instruktor sa Eskwelahan sa Gilead nga sanday Eduardo Keller, Fred Franz, ako, kag Albert Schroeder

[Kapsion sa pahina 24]

Pagbinagbinag sa bugana ko nga kabuhi sa pag-alagad kay Jehova