Magdiretso sa kaundan

Magdiretso sa listahan sang kaundan

“Ang Pagpakamaayo ni Jehova—Amo Ina ang Nagapamanggad”

“Ang Pagpakamaayo ni Jehova—Amo Ina ang Nagapamanggad”

 “Ang Pagpakamaayo ni Jehova​—⁠Amo Ina ang Nagapamanggad”

LUYAG naton tanan nga pakamaayuhon. Ang The American Heritage College Dictionary nagasiling nga ang mga pagpakamaayo nagapasanyog sang “kalipay, kaayuhan, ukon kabuganaan.” Sanglit si Jehova amo ang Manughatag sang “tagsa ka maayong dulot kag tagsa ka himpit nga regalo,” ang tagsa ka matuod, nagadugay nga pagpakamaayo nagagikan sa aton mahigugmaon nga Manunuga. (Santiago 1:17) Ginapakamaayo niya sing bugana ang tanan nga katawhan, bisan ang mga wala nakakilala sa iya. Si Jesus nagsiling tuhoy sa iya Amay: “Ginapasubang niya ang iya adlaw sa mga tawo nga malauton kag sa maayo kag nagapaulan sa mga tawo nga matarong kag sa mga di-matarong.” (Mateo 5:45) Apang, si Jehova nagakabalaka sing pinasahi sa mga nagahigugma sa iya.​​—⁠Deuteronomio 28:​1-​14; Job 1:⁠1; 42:12.

Ang salmista nagsulat: “Si Jehova indi magdingot sing bisan ano nga maayo sa mga nagalakat sa pagkawalay-kasawayan.” (Salmo 84:11) Huo, yadtong nagaalagad kay Jehova may yara makawiwili kag mapuslanon nga pagkabuhi. Nahantop nila nga “ang pagpakamaayo ni Jehova​—⁠amo ina ang nagapamanggad, kag wala sia nagadugang sing kasakit sa sini.” Ang Biblia nagasiling pa: “Yadtong mga ginpakamaayo [ni Jehova] ang magapanag-iya sang duta.” (Hulubaton 10:22; Salmo 37:​22, 29) Daw ano gid ina nga pagpakamaayo!

Paano kita makabaton sang pagpakamaayo ni Jehova? Una, dapat kita magpalambo sang mga kinaiya nga kalahamut-an sa iya. (Deuteronomio 30:​16, 19, 20; Miqueas 6:8) Mahantop naton ini sa huwaran sang tatlo ka alagad ni Jehova sang dumaan nga tion.

Ginapakamaayo ni Jehova ang Iya mga Alagad

Si Noe isa ka talalupangdon nga alagad sang Dios. Sa Genesis 6:​8, aton mabasa: “Si Noe kalahamut-an sa mga mata ni Jehova.” Ngaa? Bangod matinumanon si Noe. Ang report nagasiling: “Si Noe naglakat upod sa matuod nga Dios.” Ginsunod ni Noe ang matarong nga mga prinsipio ni Jehova kag gintuman ang iya mga sugo. Sadto sang ang kalibutan naglugdang sa kasingki kag kagarukan, “ginhimo ni Noe ang tanan suno sa ginsugo sang Dios sa iya. Amo gid ang ginhimo niya.” (Genesis 6:​9, 22) Subong resulta, ginsugo ni Jehova si Noe sa pagtukod ‘sing arka sa pagluwas sa panimalay ni Noe.’ (Hebreo 11:7) Sa sining paagi, si Noe kag ang iya pamilya​​—⁠kag paagi sa ila ang tawhanon nga rasa​​—⁠nakalampuwas sa paglaglag sadto nga kaliwatan. Kag napatay si Noe nga may paglaum nga banhawon sa kabuhi nga dayon sa paraiso nga duta. Daw ano ka bugana nga pagpakamaayo ang nabaton niya!

Si Abraham may mga kinaiya man nga nagpahamuot kay Jehova. Ang panguna sini amo ang pagtuo. (Hebreo 11:​8-​10) Ginbiyaan ni Abraham ang masulhay nga pagkabuhi sa Ur kag sang ulihi sa Haran bangod may pagtuo sia sa saad ni Jehova nga ang iya binhi magamuad kag mangin isa ka pagpakamaayo para sa tanan nga pungsod. (Genesis 12:​2, 3) Walay sapayan sang madamong tinuig nga pagtilaw, ang iya pagtuo ginpadyaan sang mabun-ag ang iya anak nga si Isaac. Paagi sa iya, nangin katigulangan si Abraham sang pinili nga pungsod sang Dios, ang Israel, kag sang ulihi sang Mesias. (Roma 4:​19-​21) Dugang pa, “amay sia sang tanan nga may pagtuo,” kag gintawag sia nga “abyan ni Jehova.” (Roma 4:11; Santiago 2:23; Galacia 3:​7, 29) Daw ano ka makahulugan ang iya pagkabuhi, kag daw ano ka bugana nga ginpakamaayo sia!

Binagbinaga, man, ang matutom nga tawo nga si Moises. Talalupangdon sa iya mga kinaiya amo ang iya apresasyon sa espirituwal nga mga butang.  Gintalikdan ni Moises ang tanan nga manggad sa Egipto kag ‘nagpabilin nga mabakod subong nga nagatan-aw sa Isa nga di-makita.’ (Hebreo 11:27) Pagkaligad sang 40 ka tuig sa Midian, nagbalik sia sa Egipto subong isa ka tigulang nga tawo kag maisugon nga nag-atubang sa pinakagamhanan nga tawo sadto nga tion, si Paraon, para pangabayon ang kahilwayan sang iya mga kauturan. (Exodo 7: ​1-7) Nasaksihan niya ang napulo ka kalalat-an, ang pagpihak sang Dagat nga Pula, kag ang kalaglagan sang mga hangaway ni Paraon. Gingamit sia ni Jehova sa paghatag sing Kasuguan sa Israel kag sa pagpatunga sa Iya katipan sa bag-o nga pungsod. Sa sulod sang 40 ka tuig, ginpangunahan ni Moises ang pungsod sang Israel sa kahanayakan. Ang iya kabuhi may matuod nga katuyuan, kag naagom niya ang bugana gid nga mga pagpakamaayo sa pag-alagad.

Mga Pagpakamaayo sa Karon nga Adlaw

Ini nga mga kasaysayan nagapakita nga ang kabuhi sang mga nagaalagad sa Dios mapuslanon gid. Samtang ginapalambo sang mga katawhan ni Jehova ang mga kinaiya kaangay sang pagkamatinumanon, pagtuo, kag apresasyon sa espirituwal nga mga butang, ginapakamaayo sila sing bugana.

Paano kita ginapakamaayo? Ti, samtang minilyon sa Cristiandad ang nagaantos bangod sang espirituwal nga pagkagutom, sarang kita “magkalipay bangod sang pagkaayo ni Jehova.” (Jeremias 31:12) Paagi kay Jesucristo kag sa “matutom kag mainandamon nga ulipon,” naghatag si Jehova sing bugana nga suplay sang espirituwal nga pagkaon nga nagabulig sa aton sa pagpabilin sa “dalan  nga nagapadulong sa kabuhi.” (Mateo 7:​13, 14; 24:45; Juan 17:3) Ang pagpakig-upod sa aton Cristianong paghiliutod isa pa ka bugana nga pagpakamaayo. Sa mga miting kag sa iban pa nga mga okasyon, ang pagpakig-upod sa mga masigkasumilimba nga nagapakita sing gugma kag nagapanikasog sing hanuot sa pagsul-ob sang “bag-o nga personalidad” isa ka tuburan sang daku nga kalipay. (Colosas 3:​8-​10; Salmo 133:1) Apang, ang aton pinakadaku nga pagpakamaayo amo ang hamili nga pribilehiyo nga makatigayon kita sing personal nga kaangtanan kay Jehova nga Dios kag masunod ang mga tikang sang iya Anak, si Cristo Jesus.​​—⁠Roma 5:​1, 8; Filipos 3:8.

Sa pagbinagbinag sini nga mga pagpakamaayo, makita naton kon daw ano gid ka bilidhon ang aton pag-alagad sa Dios. Ayhan hunahunaon naton ang parabola ni Jesus tuhoy sa isa ka nagalakbay nga manugpatikang nga nagpangita sing maayo nga mga perlas. Si Jesus nagsiling tuhoy sini nga tawo: “Sang makakita sing isa ka perlas nga may mataas nga bili, naglakat sia kag gilayon nga nagbaligya sang tanan nga butang nga iya ginapanag-iyahan kag ginbakal ini.” (Mateo 13:46) Sigurado nga amo man sini ang aton ginabatyag tuhoy sa aton kaangtanan sa Dios, sa aton hamili nga pribilehiyo nga maalagad sia, sa aton Cristianong pagpakig-upod, sa aton Cristianong paglaum, kag sa tanan iban pa nga mga pagpakamaayo may kaangtanan sa aton pagtuo. Wala na sing butang nga mas hamili pa sa aton kabuhi.

Magbalos kay Jehova

Bangod ginakilala naton si Jehova subong Manughatag sang tagsa ka maayong dulot, napahulag ang aton tagipusuon sa pagpahayag sing pagpasalamat tungod sa mga pagpakamaayo nga aton ginabaton. Paano naton ini mahimo? Ang isa ka paagi amo ang pagbulig sa iban nga maagom ini man nga mga pagpakamaayo. (Mateo 28:19) Sa kapin  sa 230 ka kadutaan, masako ang mga Saksi ni Jehova sa pagduaw sa ila mga kaingod sa paghimo sini. Samtang ginahimo nila ini, ginagamit nila ang ila diutay nga manggad kag ikasarang​​—⁠tion, kusog, kag materyal nga mga pagkabutang​​—⁠sa pagbulig sa iban nga “makadangat sa sibu nga ihibalo sang kamatuoran.”​​—⁠1 Timoteo 2:4.

Talupangda ang mga payunir nga nagapuyo sa Glendale, California, E.⁠U.⁠A. Kada Sabado sang aga, nagalakbay sila sing mga 100 kilometros pakadto-pakari sa pagduaw sa pederal nga prisuhan. Bisan pa diutay lamang nga inoras ang ila mahinguyang sa kada pagduaw sa mga priso, wala sila ginaluyahan sing buot. Siling sang isa sa ila: “Makalilipay gid nga mag-alagad sa sining pinasahi nga teritoryo. Ginahimo namon ini nga may daku nga kalipay. Madamo kami sing nasapwan nga mga interesado amo nga indi kami makaarapal. Sa karon, nagatuon kami sa lima ka tawo, kag apat pa ang nagapangabay sing pagtuon sa Biblia.”

Ang makugi nga Cristianong mga ministro malipayon sa pagtanyag sang ila pag-alagad nga wala sing bayad agod mahimo ining nagaluwas-kabuhi nga hilikuton. Ginapabanaag nila ang panimuot ni Jesus, nga nagsiling: “Ginbaton ninyo nga wala sing bayad, ihatag ninyo nga wala sing bayad.” (Mateo 10:8) Minilyon sa bilog nga kalibutan ang nagapakigbahin sa sini man nga di-makagod nga hilikuton, kag subong resulta, madamong bunayag sing tagipusuon ang nagabaton kag nangin mga disipulo. Sang nagligad nga lima ka tuig lamang, malapit sa 1.7 milyones ang nagdedikar sang ila kabuhi kay Jehova. Ang pagtatap sa mga kinahanglanon sining nagapadayon nga pagpasangkad nagakinahanglan sang pagbalhag sing mga Biblia kag mga pasad-sa-Biblia nga mga publikasyon subong man sang pagtukod sing mga bag-o nga mga Kingdom Hall kag iban pa nga mga duog tilipunan. Diin nagahalin ang kuwarta nga ginagamit sa sini? Sa boluntaryo nga mga donasyon lamang.

Bangod sang kapigaduhon sa iban nga mga bahin sang kalibutan, madamo ang nagahimakas sa pag-aman bisan sang mga kinahanglanon lamang sang ila pamilya. Suno sa magasin nga New Scientist, isa ka bilyon ka tawo ang nagagasto sing di-magkubos sa 70 porsiento sang ila kita sa pagkaon. Madamo sa aton Cristianong mga kauturan ang yara sa amo sini nga kahimtangan. Kon wala ang bulig sang mga masigkatumuluo, indi gani sila makasarang sa pagtigayon sing mga butang kaangay sang Cristianong mga publikasyon ukon nagakaigo nga mga Kingdom Hall.

Matuod, wala ini nagakahulugan nga kontento na lamang sila nga ipapas-an sa iban ang ila lulan. Apang nagakinahanglan sila sing bulig. Sang ginpalig-on ang mga Israelinhon sa paghatag sing materyal nga mga kontribusyon bilang isa ka paagi sang pagpasalamat kay Jehova tungod sa mga pagpakamaayo sa ila, si Moises nagsiling: “Ang dulot sa kamot sang kada isa dapat nga katumbas sang pagpakamaayo nga ginhatag ni Jehova nga imo Dios sa imo.” (Deuteronomio 16:17) Busa, sang nakita ni Jesus ang isa ka balo nga babayi nga nag-amot sing “duha ka gamay nga sensilyo nga diutay gid sing balor” sa templo, gindayaw sia ni Jesus sa iya mga disipulo. Ginhimo niya ang iya masarangan. (Lucas 21:​2, 3) Sing kaanggid, ang mga Cristiano nga mas pigado ang kahimtangan nagahimo sang ila bug-os nga masarangan. Kag kon may yara kakulangan, mahimo ini maaman paagi sa mga amot sang mga masigka-Cristiano nga indi tanto ka imol sa materyal.​​—⁠2 Corinto 8:​13-​15.

Kon nagabalos kita sa Dios sa sining mga paagi, importante gid nga husto ang aton motibo. (2 Corinto 8:12) Si Pablo nagsiling: “Maghimo ang kada isa suno sa ginpamat-od niya sa iya tagipusuon, indi nga may aligutgot ukon sa pagpilit, kay ang Dios nagahigugma sa manughatag nga malipayon.” (2 Corinto 9:7) Paagi sa maalwan nga paghatag sing tinagipusuon, masakdag naton ang teokratiko nga pagpasangkad nga nagakahanabo karon kag labi pa nga magapahalipay sa aton.​​—⁠Binuhatan 20:35.

Ang pagpakigbahin sa pagbantala nga hilikuton kag ang pag-amot sing boluntaryo amo ang duha ka paagi nga makabalos kita kay Jehova tungod sa mga pagpakamaayo nga ginahatag niya sa aton. Kag daw ano ka makapalig-on nga mahibaluan nga luyag ni Jehova nga pakamaayuhon ang madamo pa nga sinsero, nga sa karon mahimo nga wala pa makakilala sa iya! (2 Pedro 3:9) Busa, padayunon naton ang paggamit sang aton manggad kag ikasarang sa pag-alagad sa Dios agod makita naton ang bunayag sing tagipusuon kag mabuligan sila sa pagpalambo sang mga kinaiya kaangay sang pagkamatinumanon, pagtuo, kag apresasyon. Sa sini nga paagi, matigayon naton ang kalipay sa pagbulig sa ila nga ‘tilawan kag tan-awon nga si Jehova maayo.’​​—⁠Salmo 34:8.

[Kahon sa pahina 28, 29]

Mga Paagi nga Ginpili Sang Iban sa Paghatag Sing

MGA AMOT SA BUG-OS KALIBUTAN NGA HILIKUTON

Madamo ang nagapain, ukon nagabadyet, sing kantidad nga ginahulog nila sa mga kahon-alamutan nga may ngalan “Contributions for the Worldwide Work​​—⁠Matthew 24:14.”

Kada bulan ginapadala sang mga kongregasyon ini nga kantidad sa bug-os kalibutan nga ulong-talatapan sang mga Saksi ni Jehova sa Brooklyn, New York, ukon sa lokal nga sanga talatapan. Ang boluntaryo nga mga amot nga kuwarta mahimo man mapadala sing direkta sa Treasurer’s Office, Watch Tower Bible and Tract Society of the Philippines, P.O. Box 2044, 1060 Manila, ukon sa sanga talatapan nga nagapangalagad sa inyo pungsod. Ang mga alahas ukon iban pa nga mga bahandi mahimo man maamot. Ang isa ka malip-ot nga sulat nga nagasiling nga ini isa ka kinabubut-on nga dulot dapat ilakip sa sining mga amot.

KAHIMUSAN SA PAGDONAR NGA MAY KONDISYON

Mahimo idonar ang kuwarta upod ang pinasahi nga kondisyon nga kon kinahanglan ini sang nagdonar, ang donasyon iuli sa iya. Para sa dugang nga impormasyon, makig-angot palihug sa Treasurer’s Office sa direksion nga yara sa ibabaw.

GINPLANO NGA PAGHATAG

Dugang sa direkta nga mga dulot nga kuwarta kag pagdonar sing kuwarta nga may kondisyon, may iban pa nga paagi sa paghatag nga makabulig sa pag-alagad sa Ginharian sa bug-os nga kalibutan. Ini nagalakip sa:

Pasiguro: Ang Watch Tower Society mahimo hingadlan subong benepisyaryo sang isa ka pasiguro sa kabuhi nga polisa ukon sang isa ka plano sang pagretiro ukon pension.

Mga Kuwenta sa Bangko: Ang mga kuwenta sa bangko, mga sertipiko sang deposito, ukon indibiduwal nga kuwenta sa pagretiro mahimo ipatago subong butang nga ginpiyar ukon ibayad sa tion sang kamatayon sa Watch Tower Society, nahisuno sa mga kinahanglanon sang lokal nga bangko.

Stocks kag Bonds: Mahimo idonar ang stocks kag bonds sa Watch Tower Society ayhan subong isa ka direkta nga regalo.

Real Estate: Ang mahimo mabaligya nga real estate mahimo idonar sa Watch Tower Society paagi sa paghimo sing direkta nga regalo ukon paagi sa pagtigana sing bug-os kabuhi nga propiedad sa nagdonar, nga padayon nga makaistar sa sini tubtob buhi sia. Makig-angot sa sanga talatapan sa inyo pungsod antes himuan sing kasulatan ang bisan ano nga real estate.

Testamento kag mga Butang nga Ginapiyar: Ang propiedad ukon kuwarta mahimo ipapanubli sa Watch Tower Society paagi sa legal nga testamento, ukon ang Watch Tower Society mahimo mahingadlan subong benepisyaryo sang isa ka kasugtanan tuhoy sa mga butang nga ginapiyar. Ang pagpiyar sang isa ka butang sa isa ka relihioso nga organisasyon subong amo ang benepisyaryo mahimo nga may yara mga bentaha sa buhis.

Subong ginapahangop sang termino nga “ginplano nga paghatag,” ini nga mga sahi sang pagdonar kinaandan nga nagakinahanglan sang pagplano sa bahin sang nagadonar. Agod buligan ang mga indibiduwal nga luyag magbulig sa bug-os kalibutan nga hilikuton sang mga Saksi ni Jehova paagi sa pila ka porma sang ginplano nga paghatag, ang brosyur nga Charitable Planning to Benefit Kingdom Service Worldwide ginhanda sa Ingles kag Espanyol. Ginsulat ang brosyur bilang sabat sa madamo nga pamangkot nga nabaton tuhoy sa mga regalo, testamento, kag mga butang nga ginpiyar. Nagaunod man ini sing dugang mapuslanon nga impormasyon tuhoy sa estate, pinansial, kag pagplano sa buhis. Kag gindesinyo ini sa pagbulig sa mga indibiduwal sa Estados Unidos nga nagaplano sa paghatag sing espesyal nga regalo karon ukon magbilin sing palanublion sa tion sang kamatayon sa pagpili kon ano ang labing maayo kag mapuslanon nga paagi nga ginabinagbinag ang ila pamilya kag personal nga mga kahimtangan. Ini nga brosyur sarang matigayon paagi sa pagpangabay sing isa ka kopya sing direkta gikan sa Sanga Talatapan Sang mga Saksi ni Jehova.

Sa tapos mabasa ang brosyur kag makapakig-angot sa Sanga Talatapan Sang mga Saksi ni Jehova, madamo ang nakabulig sa mga Saksi ni Jehova sa bug-os nga kalibutan kag sa amo man nga tion, sa paghimo sini natigayon ang daku nga mga benepisyo nga ginatugot sang kahimusan sa buhis. Ang Sanga Talatapan Sang mga Saksi ni Jehova dapat pahibaluon kag hatagan sing kopya sang bisan anong importante nga dokumento tuhoy sining mga kahimusan. Kon interesado ka sa bisan diin sini nga kahimusan sang ginplano nga paghatag, dapat ikaw magpakig-angot sa Sanga Talatapan Sang mga Saksi ni Jehova, paagi sa pagsulat ukon paagi sa telepono, sa direksion nga ginlista sa ubos ukon sa talatapan sang mga Saksi ni Jehova sa inyo pungsod.

SANGA TALATAPAN SANG MGA SAKSI NI JEHOVA

Watch Tower

186 Roosevelt Avenue

San Francisco Del Monte

1105 Quezon City

Telepono: 411- 6090