Ginahimo Namon ang Amon Bug-os nga Masarangan!

“HIMUA ang imo bug-os nga masarangan.” Ginhatag anay sang isa ka katapo sang Nagadumala nga Hubon sang mga Saksi ni Jehova ining praktikal nga laygay sa isa ka misyonero. Apang ngaa dapat pa ihatag ining sadsaran nga laygay sa isa ka eksperiensiado nga ministro? Indi bala nga ang kalabanan nga mga misyonero maisog nga mga tawo nga nagabatas adlaw-adlaw sang mga bagsat, man-ug, init, balatian, kag lainlain nga mga kabudlayan?

Ang matuod, ang mga misyonero sang mga Saksi ni Jehova ordinaryo nga mga lalaki kag babayi, mga Cristiano nga bangod sang ila daku nga gugma kay Jehova kag sa ila isigkatawo, nagaalagad sila sa iban nga mga pungsod. Nagapanikasog sila nga alagdon si Jehova tubtob sa ila bug-os nga masarangan, nagasalig sa iya para sa kabakod.​—⁠Efeso 6:10.

Agod mahibal-an ang dugang pa tuhoy sa misyonero nga hilikuton, handurawon naton nga nagahinguyang kita sing isa ka adlaw sa pagduaw sa isa ka kinaandan nga puluy-an sang mga misyonero sa Katundan nga Aprika.

Isa ka Adlaw sa Misyonero nga Hilikuton

Halos alas 7:​00 na sang aga. Nag-abot kita sa puluy-an sang mga misyonero nga iguigo lang agod magbuylog sa pagbinagbinag sang teksto sa Kasulatan para sa adlaw. Mainit kita nga gin-abiabi sang napulo ka misyonero kag ginhatagan sing lugar sa lamesa nga palamahawan. Samtang nagakilal-anay kita, ang isa sang mga misyonero, nga madamong tinuig na sa iya asaynment, nagsugod sa pag-istorya sang isa niya ka makahalam-ot nga eksperiensia sa ministeryo. Apang nauntat ang paghambalanay sang ginpahanumdom sang tsirman sadto nga adlaw ang malipayon nga grupo nga tion na agod binagbinagon ang teksto. Ang pagbinagbinag himuon sa Pranses. Bisan pa wala kita nagahambal sini nga lenguahe, maathag gid sa kon paano nila ginapabutyag ang ila kaugalingon nga ang pangayaw nga mga misyonero sampaton na sa lenguahe.

Pagkatapos sang pagbinagbinag sang Kasulatan, ginbungat ang tinagipusuon nga pangamuyo, kag pagkatapos sini tion na sa pagpamahaw. Samtang ginakaon naton ang madamodamo nga cereal, nagsiling ang tupad naton nga misyonero nga butangan naton ini sang kinihad nga saging. Ginpaathag naton nga indi kita mahuyugon sa saging, apang nagsiling sia nga magabag-o ang aton hunahuna kon matilawan naton ang mga saging nga gintanom sa amo nga lugar. Gani ginbutangan naton sing pila ka kinihad nga saging ang aton cereal. Husto gid sia! Manamit ini nga mga saging​—⁠subong katam-is sa sorbete! Kag ginapat-od sa aton nga ang French bread nga ginserbe kaina lang sang kaagahon ginluto sa isa ka diutay nga panaderya sa tabok-dalan sang puluy-an sang mga misyonero.

Pagkatapos sang pamahaw, ihinguyang naton ang adlaw upod sa misyonero nga mag-asawa, nga tawgon naton nga si Ben kag si Karen. Nabatian naton ang tuhoy sa mabungahon nga teritoryo sa sining pungsod sa Katundan nga Aprika, kag nalangkag kita nga pamatud-an ang mga report.

Sang mag-abot kita sa paradahan sang bus,  madamo na nga tawo ang nagahulat. Wala pa lang madugay kag ang aton kaupod nga mga misyonero nagapakigsugilanon na sing malipayon sa isa ka mag-iloy tuhoy sa isa ka topiko sa Biblia. Bangod indi kita makahibalo mag-Pranses, nagtindog na lamang kita nga nagayuhum! Hustuhan lang nga sang ginbaton sang babayi ang mga kopya sang Ang Lalantawan kag Magmata!, nag-abot ang bus, kag nian nag-unahay ang tanan sa pagsakay sa sini! Samtang nagapanagil-ot kita nga makasakay, ginaduso kita sang madamo nga tawo sa likod naton. Daw matumba kita samtang nagapakadto kita sa likuran nga bahin sang bus. Sang magpadalagan na ang drayber, nagpanguyapot gid kita sing hugot bangod sang iya madasig kag wala nagahalong nga pagpadalagan. Sa tion kag tion, nagadulog ang bus, kag madamo pa nga tawo ang nagadinasok. Ginyuhuman naton ang kaupod naton nga mga pasahero, kag nagyuhum man sila sa aton. Luyag gid tani naton makigsugilanon sa ila!

Samtang nagadalagan ang aton bus, nagtamwa kita sa bintana kag nakita ang kasakuon sa dalan. Duha ka babayi ang dungan nga nagalakat nga may mabug-at nga ginatus-on sa ila ulo. Ang isa sa ila nagabalanse sing isa ka daku nga batiya sang tubig. Isa ka bolantero ang naghumlad sing habol sa higad-dalan kag nagbutang sa ibabaw sini sing pila ka magagmay apang matahom kag baratuhon nga mga alahas ukon pamuni nga ginalauman niya nga mabakal. Bisan diin may mga tawo nga nagapamakal ukon nagapamaligya sang bisan ano lang nga butang nga mabakal ukon mabaligya.

Sa hinali lang nabatyagan ni Ben, nga nagatindog sa tupad ko, nga may nagatusik sa iya batiis. Ano ayhan ini? Gutok ang bus, apang may nagapanusik gihapon. Nagduko sia. Sa isa ka bag sa tiilan niya may buhi nga pato nga nagapaguwa sang iya ulo kon kaisa kag nagatusik sa iya! Ginpaathag ni Ben nga mahimo nga dalhon sang tag-iya ang pato sa tiendahan agod ibaligya.

Sa pag-abot naton sa aton teritoryo, nalipay kita nga mahibaluan nga magaduaw kita sa isa ka kinaandan nga kasilingan sa Aprika. Sang nagpalapit sa una nga balay, matunog nga nagpalakpak si Ben agod tawgon ang tagbalay. Amo sina kon paano “manuktok sa ganhaan” ang mga tawo sa sini nga bahin sang kalibutan. Isa ka pamatan-on nga lalaki ang nagguwa kag nagpaathag nga masako sia apang nangabay nga magbalik kita sa mga uluudto na.

Sa masunod nga ganhaan, nasumalang naton ang isa ka babayi nga nagahambal sing isa ka dialekto nga indi mahangpan ni Ben. Gintawag sang babayi ang iya anak nga lalaki kag ginpangabay sia nga badbaron ang inughambal ni Ben. Sang makatapos si Ben, ginbaton sang babayi ang isa ka brosyur tuhoy sa mga topiko sa Biblia, kag nangako ang iya anak nga ipaathag niya ini sa iya iloy. Sa ikatlo nga balay, may pila ka pamatan-on nga nagapungko sa ugsaran sa atubang-balay. Duha sa ila ang nagtindog sa gilayon agod makapungko ang mga bisita. Nagsunod ang isa ka makawiwili nga paghambalanay tuhoy sa paggamit sang krus sa pagsimba. Naghimo sing kahimusan nga padayunon ang paghambalanay sa masunod nga semana. Tion na agod duawon liwat ang masako nga pamatan-on nga aton nasugilanon sa una nga balay. Sa bisan paano nabatian na niya ang aton pagpakighambal sa mga pamatan-on sa unhan sang dalan. Madamo sia sing pamangkot sa Biblia kag nagpangabay sia sing isa ka pagtuon sa Biblia. Sa tapos matan-aw ang iya iskedyul, nagsugot si Ben nga magbalik sa amo man nga oras sa masunod nga semana. Samtang nagapauli kita sa puluy-an sang mga misyonero agod magpanyaga, ginpaathag ni Ben kag ni Karen nga kinahanglan nila planuhon gid sing maayo ang ila ginahiwat nga mga pagtuon sa Biblia bangod madali lang sila makaumpisa sing mga pagtuon sa Biblia apang indi nila ini matatapan.

Gindayaw naton sila sa ila pagkatalunsay sa Pranses. Ginpaathag ni Ben nga sila ni Karen nag-alagad na subong mga misyonero sa sulod sang anom ka tuig, kag sunado na nila ang Pranses nga lenguahe. Ang pagtuon sing bag-o nga lenguahe indi mahapos, siling nila, apang ang pagkamapinadayunon may mga resulta.

Sa alas 12:⁠30 s.h., ang tanan nga misyonero nagtipon sa lamesa agod magpanyaga. Ginsugiran kita nga kada adlaw, lainlain nga misyonero ang ginatangdo sa paghanda sang pamahaw  kag panyaga kag sa paghimos sang kinan-an. Karon nga adlaw, naghanda ang isa sang mga misyonera sing manamit nga pinirito nga manok kag french fries, upod ang tomato salad​—⁠ang iya paborito nga lutuon!

Ano ang mga plano ni Ben kag ni Karen para sa hapon? Ginpaathag nila nga ang tanan nagalikaw sa init sang adlaw halin ala 1:00 s.h. tubtob alas 3:00 s.h., gani masami nga ginagamit sang mga misyonero ini nga tion sa pagtuon ukon sa pagpahuwayhuway. Wala kita makibot sang ginsugiran kita ni Karen nga madali lang maanad sa sini nga kinabatasan ang bag-o nga mga misyonero!

Pagkatapos sang pahuway, nagbalik kita sa ministeryo sa latagon. Ang isa ka interesado nga tawo nga makapila na nga gintinguhaan ni Ben nga masugilanon wala gihapon sa iya puluy-an, apang duha ka pamatan-on nga lalaki ang nagguwa sa ganhaan sang nagpalakpak si Ben. Nagsiling sila nga ginsambit sang tagbalay ang mga pagduaw ni Ben kag nagrekomendar gid nga magkuha sila sing isa ka bulig sa pagtuon sa Biblia nga Ang Ihibalo nga Nagadul-ong sa Kabuhi nga Walay Katapusan. Nalipay kita nga bilinan sila sing isa ka kopya sini nga libro. Masunod, nagsakay kita sa bus nga magadul-ong sa aton sa duog diin magahiwat si Karen sing pagtuon sa Biblia sa isa ka interesado nga babayi.

Samtang nagalabay sa gutok nga mga dalan, ginsugid ni Karen nga nasugilanon niya ang babayi sang isa ka adlaw samtang nagasakay sila sa taksi kaupod sang iban pa nga mga pasahero. Ginhatagan ni Karen ang babayi sing isa ka tract nga basahon samtang nagabiyahe. Ginbasa ini sang babayi kag nagpangabay sing lain naman. Ginbasa niya ini nga may daku pa nga interes. Sa katapusan sang biyahe, naghimo sing kahimusan si Karen nga duawon ang babayi sa iya puluy-an kag nasugdan ang isa ka mabungahon nga pagtuon sa Biblia sa brosyur nga Ano ang Ginapatuman Sang Dios sa Aton? Tuptupan karon ni Karen ang ikalima nga leksion sa sini nga brosyur.

Nasadyahan gid kita sa aton adlaw sa pag-alagad sa latagon, apang may mga pamangkot pa kita tuhoy sa misyonero nga hilikuton. Ginpasalig kita sang nag-amuma sa aton nga sa aton pagpauli, magahanda sila sing pamahaw para sa aton kag sabton ang aton mga pamangkot.

Kon Paano Sila Nagapasibu

Samtang nagakaon sing pinirito nga itlog, French bread, kag keso, madamo pa ang nahibal-an naton tuhoy sa misyonero nga hilikuton. Ang Lunes masami nga amo ang adlaw nga ang mga misyonero nagapahuway ukon nagaatipan sang personal nga mga butang. Ang kalabanan nga misyonero nagagamit sang pila ka tion sina nga adlaw sa pagsulat sa ila pamilya kag mga abyan. Importante gid sa ila ang balita halin sa ila puluy-an, kag nalipay ang mga misyonero sa pagpadala kag sa pagbaton sing mga sulat.

Bangod nagakabuhi kag nagapanghikot ang mga misyonero nga pirme magkaupod, kinahanglan nga huptan nila ang maayo nga komunikasyon paagi sa sosyal nga pagpakig-upod sa mga masigkamisyonero kag paagi sa pagbinagbinag sang espirituwal nga mga butang. Bangod sini, wala labot sa paghupot sing regular nga iskedyul sang personal nga pagtuon sa Biblia, kada Lunes sang gab-i ang mga misyonero nagatuon sing Biblia upod sang magasin nga Lalantawan. Ginpatalupangod ni Ben nga kon mag-inupdanay ang mga misyonero nga may lainlain nga ginhalinan, indi malikawan ang diutay nga mga di-pag-ugyunay sing opinyon, apang ang espirituwal nga aman nga pagtuon sang pamilya nagabulig sa ila nga mahuptan ang mahidaiton kag nahiusa nga kahimtangan.  Ginpadaku niya nga makabulig man kon indi pagtamdon sang isa ang iya kaugalingon nga tuman ka importante.

Kinahanglanon man ang pagpaubos. Ginpadala ang mga misyonero, indi agod alagdon, kundi agod mag-alagad. Nakita sang aton mga abyan nga misyonero nga isa sang labing mabudlay nga ihambal sa bisan ano nga lenguahe amo ang “Pasensiaha ako,” ilabi na kon ang isa nagapangayo sing pasaylo tungod sa isa ka butang nga iya nasiling ukon nahimo sing di-hungod. Ginpahanumdom kita ni Ben sang halimbawa ni Abigail sa Biblia, nga nagpangayo sing pasaylo bangod sang malaut nga ginhimo sang iya bana kag busa nahusay ang isa ka sitwasyon nga nagdul-ong kuntani sa kapahamakan. (1 Samuel 25:23-​28) Ang ikasarang nga “magkabuhi sing mahidaiton” isa ka importante nga kinaiya sang maayo nga misyonero.​—⁠2 Corinto 13:11.

Makaisa kada bulan nagamiting ang mga misyonero agod hambalan ang mga bagay nga nagaapektar sa pamilya, subong man ang mga pagbag-o sa mga iskedyul. Pagkatapos sini, isa ka espesyal nga panam-is ang ginakaon sang tanan. Daw isa ini ka praktikal gid​—⁠kag manamit⁠​—⁠​nga kahimusan para sa aton.

Pagkatapos sang panihapon, naglagaw kita sing makadali sa puluy-an sang mga misyonero. Natalupangdan naton nga, bisan simple lang ang puluy-an, nagabuligay ang mga misyonero agod huptan gid ini nga matinlo. May refrigerator, washing machine, kag kalan. Nagsiling si Karen nga sa mga pungsod sa tropiko, kaangay sining sa Katundan nga Aprika, mahimo man matigayon ang air-conditioning. Ang maayo nga ilistaran, masustansia nga pagkaon, kag simple nga mga paghalong sa lawas nagabulig sa mga misyonero nga magpabilin nga mapagros kag mabungahon.

Magkonsentrar sa Positibo nga mga Butang

Nagdayaw gid kita sa tanan nga nakita naton. Mahimo bala nga para sa aton ang misyonero nga hilikuton? Paano naton mapat-od? Ang nag-amuma sa aton naghatag sing pila ka butang nga dapat hunahunaon.

Una, siling nila, ang Cristianong mga misyonero wala nagaguwa agod magpasimpalad. Nagapangita sila sang bunayag sing tagipusuon nga mga tawo nga luyag makahibalo sang matahom nga mga saad sang Dios. Nagahinguyang ang mga misyonero sing di-magkubos sa 140 ka oras kada bulan sa pag-alagad sa latagon, gani importante gid ang gugma sa ministeryo.

‘Apang,’ pamangkot naton, ‘kamusta naman ang mga man-ug, halo, kag bagsat?’ Samtang makita ini sa madamong asaynment sang mga misyonero, siling ni Ben, maandan na lang ini sang mga misyonero. Nagsiling pa sia nga ang tagsa ka asaynment sang misyonero may kaugalingon pinasahi nga katahom, kag sa ulihi, magakonsentrar ang mga misyonero sa positibo nga mga bahin sang ila asaynment. Ang mga kahimtangan nga sa primero mahimo gintamod nga “tuhay” sa ulihi mangin kinaandan, kag sa iban nga kaso makawiwili pa gani. Isa ka misyonero nga nag-alagad sa Katundan nga Aprika sa sulod sang madamong tinuig antes sia napilitan nga magpauli bangod sang personal nga mga obligasyon ang nagsiling nga mas mabudlay para sa iya ang pagbiya sa iya asaynment sangsa pagbiya sa iya kaugalingon nga pungsod sang nagligad nga madamo nga tinuig. Ang iya asaynment bilang misyonero nangin iya na puluy-an.

Handa Ka Bala?

Madamo gid ang ginpahunahuna sa aton ni Ben kag ni Karen. Kamusta ka? Nahunahuna mo na bala nga mag-alagad subong isa ka misyonero sa iban nga pungsod? Kon amo, mahimo nga mas madali mo na lang malab-ot ina nga tulumuron sangsa ginahunahuna mo. Ang isa sang panguna nga mga butang nga kinahanglan amo ang gugma sa bug-os tion nga ministeryo kag ang kalipay sa hilikuton nga pagbulig sa mga tawo. Dumduma, ang mga misyonero indi tumalagsahon nga mga tawo kundi ordinaryo lamang nga mga lalaki kag babayi. Ginahimo nila ang ila bug-os nga masarangan sa pagtuman sang isa ka importante gid nga hilikuton.

[Mga retrato sa pahina 27]

Ang tagsa ka adlaw ginasugdan sang pagbinagbinag sing isa ka teksto sa Biblia

[Mga retrato sa pahina 28, 29]

Mga talan-awon sa Aprika

[Retrato sa pahina 29]

Ang kabuhi bilang misyonero mahimo mangin makaalayaw gid