Report sang mga Manugbantala sang Ginharian

Paglab-ot sa Mabudlay Lab-uton

ANG mga Saksi ni Jehova nagapanikasog nga mapaambit sa tanan nga masarangan nila ang mensahe sang Ginharian. Kon kaisa, kinahanglan ang di-kinaandan nga panikasog agod malab-ot ang talagsa lang masalapuan sa puluy-an. (Marcos 13:10) Sa sining bahin, ang isa ka espesyal payunir nga ministro sa isa ka pungsod sa Nabagatnan nga Amerika nagapanaysayon sining masunod nga eksperiensia.

“Isa ka adlaw nabatian ko nga ang gobernador sang estado magaduaw sa teritoryo nga gin-asayn sa amon nga mag-asawa. Bangod maathag nga isa sia sa talagsa lang masalapuan sa puluy-an, ginsulatan ko sia kag naglakip ako sing pila ka publikasyon, upod ang brosyur nga Ano ang Ginapatuman Sang Dios sa Aton? kag mga libro nga Mankind’s Search for God kag Ihibalo nga Nagadul-ong sa Kabuhi nga Walay Katapusan. Ginpaathag ko sa akon sulat ang katuyuan sang tagsa sining mga publikasyon.

“Bangod luyag ko mahibaluan kon ano ang iya reaksion sa mga literatura, nangabay ako nga makigkita sa iya. Pagligad sang pila ka semana nagpasugot sia nga makigkita, kag nagdala ako sing video nga Jehovah’s Witnesses​—⁠The Organization Behind the Name. Ang amon pagkitaay nagdugay sing mga duha ka oras. Sa tapos matan-aw ang video upod sa gobernador, ginpamangkot ko sia kon ano ang iya masiling. Nagsabat sia: ‘Wala gid sing organisasyon sa duta kaangay sang inyo. Kuntani may mga tinawo ako kaangay ninyo nga magbulig sa akon sa pagtapos sang akon mga proyekto sa gobierno!’ Nian namangkot sia kon nakakadto na ako sa ulong-talatapan sang aton organisasyon. Ginsugiran ko sia nga bisan handum ko ini halin pa sang 14 anyos ako, wala pa ako nakahigayon sa pagduaw sa aton ulong-talatapan sa Brooklyn, New York. Isa ini sang mabudlay lab-uton nga mga tulumuron. Gintulok niya ako sing masusi sa makadali. Nian nagsiling sia nga luyag niya nga matigayon ko ini nga kahigayunan. Ginpalakat niya ang amon kinahanglanon nga mga papeles kag ginhatagan kami sing tiket sa eroplano subong regalo!

“Regular na karon nga nagabaton ang gobernador sing Lalantawan kag Magmata! nga mga magasin. Nagalaum kami nga sa indi madugay makasugod kami sing pagtuon sa Biblia upod sa iya.”