Mangin Malipayon nga mga Mangangani!

“Ang alanyon bugana, apang pila lamang ang mga mamumugon. Busa, pakitluoy kamo sa Agalon sang alanyon agod magpadala sia sing mga mamumugon sa iya alanyon.”​—⁠MATEO 9:​37, 38.

1. Ano ang nagabulig sa aton agod magpadayon sa paghimo sang kabubut-on sang Dios?

KON panumdumon naton ang adlaw sang aton bawtismo subong isa sang mga alagad ni Jehova, ayhan sang pila lamang ukon madamo na nga tuig ang nakaligad, daw subong nga kahapon lamang ini natabo. Ang pagdayaw kay Jehova nangin ang pinakaimportante nga bahin sang aton dedikado nga pagkabuhi. Samtang ginabakal naton ang nagakaigo nga tion sa pagbulig sa iban nga makabati kag ayhan makabaton sang mensahe sang Ginharian, ang malipayon nga pag-alagad kay Jehova amo gid ang aton ginakabalak-an. (Efeso 5:​15, 16) Tubtob karon, nasapwan naton nga ang tion daw madasig nga nagaligad kon kita masako, “nga madamo pirme sing ginahimo sa hilikuton sang Ginuo.” (1 Corinto 15:58) Bisan pa makasumalang kita sing mga problema, ang aton kalipay sa paghimo sang kabubut-on ni Jehova nagapahulag sa aton sa paghimo sing padayon sang hilikuton sang Ginuo.​—⁠Nehemias 8:10.

2. Ano ang nagabulig sa aton nga matigayon ang kalipay sa malaragwayon nga hilikuton sa pagpangani?

2 Subong mga Cristiano, masako kita sa malaragwayon nga hilikuton sa pagpangani. Ginpaanggid ni Jesucristo ang pagtipon sa mga indibiduwal para sa kabuhi nga dayon sa ani. (Juan 4:35-38) Sanglit nagapakigbahin kita sa sining hilikuton sa pagpangani, makapalig-on nga usisaon ang kalipay sang unang Cristianong mga mangangani. Repasuhon naton ang tatlo ka butang nga nagabulig sa aton nga matigayon ang kalipay sa hilikuton nga pagpangani sa karon. Ini amo (1) ang aton mensahe sang paglaum, (2) ang kadalag-an sang aton pagpangita, kag (3) ang aton mahidaiton nga panimuot subong mga mangangani.

Ginpadala Subong mga Mangangani

3. May kaangtanan sa ano nga ang unang mga sumulunod ni Jesus nagbatyag sing kalipay?

3 Nagbag-o gid sing daku ang kabuhi sang unang mga mangangani​—⁠ilabi na sang 11 ka matutom nga apostoles ni Jesus​—⁠sang adlaw sang 33 C.⁠E. sang nagtaklad sila sa isa ka bukid sa Galilea agod makigkita sa ginbanhaw nga si Cristo! (Mateo 28:16) “Kapin sa lima ka gatos ka kauturan” ang mahimo nga yadto didto sadto nga okasyon. (1 Corinto 15:6) Ang sugo nga ginhatag ni Jesus padayon nga nagpahanumdom sa ila. Ginsugo niya sila: “Lakat kamo kag maghimo sing mga disipulo sa mga tawo sa tanan nga kapungsuran, nagabawtismo sa ila sa ngalan sang Amay kag sang Anak kag sang balaan nga espiritu, nagatudlo sa ila nga tumanon ang tanan nga butang nga ginsugo ko sa inyo.” (Mateo 28:​19, 20) Walay sapayan sang mapait nga paghingabot, nagkalipay sila sing daku sa hilikuton nga pagpangani kay nakita nila nga natukod sa nagkalainlain nga duog ang mga kongregasyon sang mga sumulunod ni Cristo. Sang ulihi, ‘ang maayong balita ginbantala sa tanan nga tinuga sa idalom sang langit.’​—⁠Colosas 1:23; Binuhatan 1:⁠8; 16:5.

4. Sa idalom sang anong mga kahimtangan nga ang mga disipulo ni Cristo ginpalakat?

 4 Sa mas nauna pa nga bahin sang iya ministeryo sa Galilea, ginpatawag ni Jesus ang 12 ka apostoles kag ginpalakat sila ilabi na sa pagpahayag: “Ang ginharian sang mga langit malapit na.” (Mateo 10:1-7) Sia mismo “naglibot sa tanan nga siudad kag mga minuro [sa Galilea], nga nagapanudlo sa ila mga sinagoga kag nagabantala sing maayong balita sang ginharian kag nagapang-ayo sing tanan nga sahi sang balatian kag sing tanan nga sahi sang masakit.” Naluoy si Jesus sa kadam-an “kay ginpanitan sila kag nag-alaplaag kaangay sang mga karnero nga wala sing manugbantay.” (Mateo 9:​35, 36) Natandog sing tudok, nian ginsilingan niya ang iya mga disipulo: “Huo, ang alanyon bugana, apang pila lamang ang mga mamumugon. Busa, pakitluoy kamo sa Agalon sang alanyon [si Jehova nga Dios] agod magpadala sia sing mga mamumugon sa iya alanyon.” (Mateo 9:​37, 38) Ang pagbanabana ni Jesus nga kinahanglan ang mga mangangani kaanggid man sa Judea sang anom ka bulan na lamang sang iya ministeryo sa duta ang nabilin. (Lucas 10:2) Sa duha ka okasyon, ginpadala niya ang iya mga sumulunod subong mga mangangani.​—⁠Mateo 10:⁠5; Lucas 10:3.

Ang Aton Mensahe Sang Paglaum

5. Ano nga sahi sang mensahe ang aton ginabantala?

5 Subong mga alagad ni Jehova karon, malipayon kita nga nagasabat sa panawagan para sa mga mangangani. Ang isa ka butang nga nagapahalipay sa aton sing daku amo nga ginadala naton ang mensahe sang paglaum sa mga ginasubuan kag ginapung-awan. Kaangay sang mga disipulo ni Jesus sang unang siglo, isa gid ka daku nga pribilehiyo naton nga ibantala ang maayong balita​—⁠ang matuod nga mensahe sang paglaum​—⁠sa mga ‘ginpanitan kag nag-alaplaag kaangay sang mga karnero nga wala sing manugbantay’!

6. Sa anong hilikuton nangin masako ang mga apostoles sang unang siglo?

6 Sang tunga-tunga sang nahaunang siglo, si apostol Pablo masako sa pagbantala sing maayong balita. Kag ang iya hilikuton sa pagpangani epektibo gid, kay sa pagsulat sa mga Cristiano sa Corinto sang mga 55 C.⁠E., nagsiling sia: “Ginasugid ko sa inyo, mga kauturan, ang maayong balita nga ginpahayag ko sa inyo, nga ginbaton man ninyo, nga ginpanindugan man ninyo.” (1 Corinto 15:1) Ang mga apostoles kag ang iban pa nga unang mga Cristiano mapisan anay nga mga mangangani. Bisan pa wala ginasugid sa aton sang Biblia kon pila ka apostoles ang nakalampuwas sa importante nga mga hitabo nga natapos sang ginlaglag ang Jerusalem sang 70 C.⁠E., nakahibalo kita nga si apostol Juan nagbantala sing mga 25 ka tuig pa sang ulihi.​—⁠Bugna 1:9.

7, 8. Ano nga mensahe sang paglaum ang ginabantala sang mga alagad ni Jehova sing mas hilingagawon karon?

7 Nian nag-abot ang mga siglo sang paggahom sang mga klerigo sang Cristiandad, ang apostata nga “tawo nga malinapason.” (2 Tesalonica 2:3) Apang, sang talipuspusan sang ika-19 nga siglo, ang mga nagpanikasog nga magkabuhi suno sa mga panudlo sang unang Cristianismo nagbantala sang mensahe sang paglaum, nga nagapahibalo sang Ginharian. Sa katunayan, sugod sa nahauna nga guwa sini (Hulyo 1879), ang titulo sini nga magasin naglakip sang mga tinaga nga “Nagapahibalo Sang Presensia ni Cristo,” “Nagapahibalo Sang Ginharian ni Cristo,” ukon “Nagabantala Sang Ginharian ni Jehova.”

8 Ang langitnon nga Ginharian sang Dios gintukod sa mga kamot ni Jesucristo sang 1914, kag ginabantala naton karon ang mensahe sang paglaum sing mas hilingagawon sangsa nagligad. Ngaa? Bangod lakip sa mga kabulahanan nga himuon sang paggahom sang Ginharian amo ang malapit na nga katapusan sang karon nga malauton nga sistema. (Daniel 2:44) May maayo pa bala nga mensahe? Kag may daku pa bala nga kalipay sangsa makigbahin sa pagbantala sang Ginharian sa wala pa mag-abot ang “dakung kapipit-an”?​—⁠Mateo 24:21; Marcos 13:10.

Madinalag-on nga Pagpangita

9. Ano nga instruksion ang ginhatag ni Jesus sa iya mga disipulo, kag ano ang reaksion sang mga tawo sa mensahe sang Ginharian?

9 Ang isa pa ka butang nga nagabulig sa aton nga matigayon ang kalipay subong mga mangangani amo ang kadalag-an sang aton pagpangita para sa mangin mga disipulo kag magbuylog sa aton sa hilikuton nga pagpangani. Sadto anay sang 31-32 C.⁠E., ginsugo ni Jesus ang iya mga disipulo: “Bisan diin nga siudad ukon minuro nga inyo sudlan, pangitaa ninyo kon sin-o didto ang takus.” (Mateo 10:11) Indi tanan nga indibiduwal takus, subong sang ginapakita sang ila reaksion sa mensahe sang Ginharian. Walay sapayan sina, ang mga disipulo ni Jesus makugi nga nagbantala sing maayong balita bisan diin man nga may mga tawo.

10. Paano ginhimo ni Pablo ang iya pagpangita sa mga takus?

 10 Sang napatay kag ginbanhaw si Jesus, ang pagpangita sa mga takus nagpadayon sing mapagsik. Si Pablo nangatarungan sa mga Judiyo sa ila sinagoga kag sa mga tawo sa tiendahan sa Atenas. Sang nagpanaksi sia sa Areopago sa sadtong Griego nga siudad, “ang iban nga mga tawo nagbuylog sa iya kag nangin mga tumuluo, nga lakip man sa ila amo si Dionisio, nga isa ka hukom sa hukmanan sang Areopago, kag ang isa ka babayi nga nagahingalan kay Damaris, kag ang iban pa magluwas sa ila.” Diin man nagkadto si Pablo, huwaran sia sa pagbantala “sa dayag kag sa pamalaybalay.”​—⁠Binuhatan 17:​17, 34; 20:20.

11. Ano nga mga paagi sa paghimo sang ministeryo ang gingamit sang nagligad nga mga tuig?

11 Sa katapusan nga pila ka dekada sang ika-19 nga siglo, ang hinaplas nga mga Cristiano masidla nga nangin masako sa pagpangita sa mga takus. Sa isa ka artikulo nga natig-uluhan “Ginhaplas sa Pagbantala,” ang Zion’s Watch Tower sang Hulyo/Agosto 1881 nagsiling: “Ang pagbantala sing maayong balita . . . ginahimo ‘sa mga mahagop’​—⁠sa mga handa kag sarang mamati, agod matigayon sa tunga nila ang lawas ni Cristo, ang mga masigkamanunubli.” Ang mga mangangani sang Dios masami nga nagapakigsugilanon sa mga tawo halin sa ila mga serbisyo sa simbahan kag nagahatag sa ila sing mga tract nga may Makasulatanhon nga mensahe nga gindesinyo agod pukawon ang paborable nga reaksion sa mga takus. Sa tapos mabinagbinag sing maayo ang pagkaepektibo sini nga paagi sang pagpanaksi, ang Watch Tower sang Mayo 15, 1903, nagpalig-on sa mga mangangani sa pagpanagtag sing mga tract “sa pamalaybalay, sa Domingo sang aga.”

12. Paano naton napauswag ang pagkaepektibo sang aton hilikuton sa pagbantala? Iilustrar.

12 Sining ulihi nga tinuig, ginpasangkad naton ang aton ministeryo paagi sa pagpakig-angot sa mga tawo magluwas sa ila puluy-an. Epektibo gid ini sa mga kadutaan diin ang mga tawo wala sa ila puluy-an sa mga oras nga kinaandan kita nga nagaduaw bangod sang kahimtangan sa pangabuhi kag sang paglingawlingaw. Sang napanilagan sang isa ka Saksi sa Inglaterra kag sang iya kaupod ang regular nga paglakat sang mga bisita sakay sa bus pagkatapos makapaligad sing isa ka adlaw sa baybay, nangisog sila sa pagsakay sa bus kag sa pagtanyag sing mga kopya sang Ang Lalantawan kag Magmata! sa mga pasahero. Sa isa ka bulan, nakapanagtag sila sing 229 ka kopya. Nagreport sila: “Wala kami nahadlok sa pagpanaksi sa baybay, sa mga lugar sang negosyo, ukon sa bisan ano man nga hangkat nga maatubang namon bangod nahibaluan namon nga si Jehova pirme namon kaupod.” Nakatukod sila sing ruta sa magasin, nakasugod sing pagtuon sa Biblia, kag sila nga duha nag-auxiliary payunir.

13. Ano nga pagpasibu sa aton ministeryo ang kinahanglan karon sa pila ka lugar?

13 Samtang ang pagpangita sa mga takus nagapadayon, ang maayo nga pagbinagbinag sang aton ministeryo mahimo nga kinahanglan sa iban nga mga lugar. Bisan pa madamo nga Saksi ang kinabatasan na nga nagabantala sa mga pamalay kon Domingo sang aga, natukiban nila nga sa pila ka lugar indi tanto ka epektibo ang pagduaw sa puluy-an sang mga tawo sing aga pa kaayo bangod ang pumuluyo nagakatulog pa. Paagi sa pagpasibu sang ila iskedyul, ginahimo karon sang madamo nga Saksi ang pagpangita sa mga uluudto na, ayhan pagkatapos sang Cristianong mga miting. Kag ini  nga pagpangita napamatud-an gid nga mabungahon. Sang nagligad nga tuig, ang kadamuon sang mga manugbantala sang Ginharian sa bug-os nga kalibutan nag-uswag sing mga 2.3 porsiento. Nagapadungog ini sa Agalon sang ani kag nagapahalipay sa aton tagipusuon.

Hupti ang Paghidait sa Hilikuton nga Pagpangani

14. Sa ano nga panimuot nga ginabantala naton ang aton mensahe, kag ngaa?

14 Ang isa pa ka rason sang aton kalipay may yara kaangtanan sa mahidaiton nga panimuot nga ginapakita naton sa hilikuton nga pagpangani. “Kon nagasulod kamo sa balay,” siling ni Jesus, “tamyawa ninyo ang tagbalay; kag kon ang balay takus, ang inyo paghidait magdangat sa sini.” (Mateo 10:​12, 13) Ang Hebreo nga panamyaw kag ang katumbas nga Griego nga termino sa Biblia lunsay nagapaalinton sang panghunahuna nga ‘Kabay nga magmaayo sa imo.’ Ini nga panimuot nagatuytoy sang aton pagpalapit sa mga tawo kon nagabantala sing maayong balita. Nagalaum kita nga magapamati sila sa mensahe sang Ginharian. Para sa mga nagapamati, may paglaum nga makapasag-uli sa Dios samtang ginahinulsulan nila ang ila mga kasal-anan, nagaliso, kag nagahimo sang iya kabubut-on. Nian, ang paghidait sa Dios nagadul-ong sa kabuhi nga walay katapusan.​—⁠Juan 17:⁠3; Binuhatan 3:19; 13:​38, 48; 2 Corinto 5:18-20.

15. Paano naton mahuptan ang mahidaiton nga panimuot kon makasumalang kita sing indi paborable nga reaksion sa aton hilikuton nga pagbantala?

15 Paano naton mahuptan ang aton paghidait kon makasumalang kita sing indi paborable nga reaksion? Si Jesus nagsugo: “Kon [ang balay] indi takus, pabalika sa inyo ang inyo paghidait.” (Mateo 10:13) Ang rekord ni Lucas tuhoy sa pagpalakat sa 70 ka disipulo nagalakip sang ginsiling ni Jesus: “Kon may abyan sang paghidait didto, ang inyo paghidait magapabilin sa iya. Apang kon wala, magabalik ini sa inyo.” (Lucas 10:6) Kon nagapalapit kita sa mga tawo nga dala ang maayong balita, nagakaigo nga ginahimo naton ini nga may manayanaya nga panimuot kag sa mahidaiton nga paagi. Ang indi pagsapak, pagreklamo, ukon indi maayo nga komento sang tagbalay nagatuga lamang sing isa ka kahimtangan nga nagatugot agod ‘magbalik sa aton’ ang aton mahidaiton nga mensahe. Apang wala sing isa sini ang nagakuha sa aton sang paghidait, nga isa ka bunga sang balaan nga espiritu ni Jehova.​—⁠Galacia 5:​22, 23.

Maayo nga Tulumuron Para sa mga Mangangani

16, 17. (a) Ano ang aton tulumuron kon nagahimo sing mga pagduaw liwat? (b) Paano naton buligan ang mga may pamangkot sa Biblia?

16 Subong mga mangangani nalipay kita nga nagapakigbahin kita sa pagtipon sa mga tawo para sa kabuhi nga walay katapusan. Kag daw ano nga kalipay ang mabatyagan naton kon ang tawo  nga ginabantalaan naton nagapamati sing paborable, maluyag sa pagtuon sing dugang pa, kag nagapamatuod nga “abyan sang paghidait”! Ayhan may yara sia madamo nga pamangkot sa Biblia kag indi naton ini tanan masabat sa isa ka pagduaw lamang. Sanglit ang pagdugay sa nahauna nga pagduaw mahimo nga indi nagakaigo, ano ang himuon? Himuon naton nga tulumuron ang ginpanugda sang nagligad nga mga 60 ka tuig.

17 “Ang tanan nga Saksi ni Jehova dapat handa sa pagdumala sing modelo nga mga pagtuon sa Biblia.” Ina nga dinalan makita sa ikatlo sang serye sang Model Study nga instruksion nga mga bukleta nga ginbalhag halin sang 1937 tubtob 1941. Nagsiling pa ini: “Ang tanan nga manugbantala [sang Ginharian] dapat nga makugi sa pagbulig sa tanan nga paagi sa mga tawo nga may maayong kabubut-on nga nagapakita sing interes sa mensahe sang Ginharian. Ang mga back-call [mga pagduaw liwat] dapat himuon sa sining mga tawo, nga ginasabat ang nagkalainlain nga pamangkot . . . , kag nian ginasugdan ang isa ka modelo nga pagtuon . . . sa gilayon kon masarangan mo.” Huo, ang aton tulumuron sa mga pagduaw liwat amo ang pagsugod sing isa ka pagtuon sa Biblia sa puluy-an kag sa paghimo sini sing tayuyon.⁠ * Ang mainabyanon nga panimuot kag mahigugmaon nga pag-ulikid para sa interesado nagapahulag sa aton nga handaan sing maayo kag dumalahan ang pagtuon sing epektibo.

18. Paano naton buligan ang mga bag-uhan nga mangin mga disipulo ni Jesucristo?

18 Sa bulig sang libro nga Ang Ihibalo nga Nagadul-ong sa Kabuhi nga Walay Katapusan kag sang mga brosyur subong sang Ano ang Ginapatuman Sang Dios sa Aton?, makadumala kita sing epektibo nga mga pagtuon sa Biblia sa puluy-an kag sa amo makapakigbahin sa pagbulig sa bag-ong mga interesado nga mangin mga disipulo. Samtang ginatinguhaan naton nga ilugon ang Dakung Manunudlo, si Jesucristo, ayhan ining mga estudyante sang Biblia makatuon man gikan sa aton mahidaiton kag malipayon nga paagi, sa aton sinseridad, kag sa aton pagtahod sa mga talaksan kag mga giya ni Jehova. Kon ginabuligan naton ang mga bag-uhan sa pagsabat sa ila mga pamangkot, himuon man naton ang aton masarangan nga tudluan sila kon paano nila sabton ang mga nagapamangkot sa ila. (2 Timoteo 2:​1, 2; 1 Pedro 2:21) Subong malaragwayon nga mga mangangani, pat-od gid nga nalipay kita nga, sining nagligad nga tuig sang pag-alagad, may promedyo nga 4,766,631 ka pagtuon sa Biblia nga gindumalahan sa bug-os nga kalibutan. Kag ilabi na gid nga malipay kita kon nalakip kita mismo sa mga mangangani nga nagapakigbahin sa hilikuton nga pagtuon sing Biblia sa puluy-an.

Padayon nga Magkasadya sa Ani

19. Ngaa may nagakaigo nga mga rason sa pagkalipay sa ani sang panahon sang ministeryo ni Jesus kag wala madugay pagkatapos sini?

19 May nagakaigo gid nga mga rason agod magkalipay sa ani sang panahon sang ministeryo ni Jesus kag wala madugay pagkatapos sini. Madamo sadto ang nagpamati sing paborable sa maayong balita. Daku gid ang kasadya ilabi na sang Pentecostes 33 C.⁠E., kay mga 3,000 sadto ang nagbaton sang panuytoy ni Pedro, nagbaton sang balaan nga espiritu ni Jehova, kag nangin bahin sang pungsod sang Dios sang espirituwal nga Israel. Sa pagkamatuod, ang ila kadamuon padayon nga nagdamo, kag ang kasadya nagbugana samtang “padayon nga gindugang sa ila ni Jehova adlaw-adlaw ang mga nagakalaluwas.”​—⁠Binuhatan 2:37-41, 46, 47; Galacia 6:16; 1 Pedro 2:9.

20. Ano ang nagahatag sa aton sing bugana nga kalipay sa aton hilikuton nga pagpangani?

20 Sadto nga tion, ang tagna ni Isaias natuman: “Ginpadamo mo [Jehova] ang mga tawo sa pungsod; para sa sini ginpadaku mo ang pagkasadya. Nagkasadya sila sa atubangan mo subong sang  pagkasadya sa tion sang tig-alani, subong sang mga nagakalipay kon ginabahinbahin ang inagaw.” (Isaias 9:3) Bisan pa nakita naton karon nga inang ‘madamo nga pungsod’ sang mga hinaplas nakompleto na, ang aton kalipay nagabugana kay nakita naton nga nagadamo ang iban pa nga mga mangangani tuig-tuig.​—⁠Salmo 4:⁠7; Zacarias 8:23; Juan 10:16.

21. Ano ang binagbinagon naton sa masunod nga artikulo?

21 May yara gid kita nagakaigo nga rason agod padayon nga magkasadya sa hilikuton sa pagpangani. Ang aton mensahe sang paglaum, ang aton pagpangita sa mga takus, kag ang aton mahidaiton nga panimuot​—⁠ini tanan nga butang nagapahalipay sa aton subong mga mangangani. Apang, madamo ang wala nagapakita sing maayo nga reaksion sa sini. Naagihan ini ni apostol Juan. Ginbilanggo sia sa pulo sang Patmos “bangod sa paghambal tuhoy sa Dios kag sa pagpanaksi tuhoy kay Jesus.” (Bugna 1:9) Paano, nian, naton mahuptan ang aton kalipay kon makasumalang kita sing paghingabot kag pagpamatok? Ano ang magabulig sa aton nga mabatas ang matig-a nga panimuot sang madamo nga ginabantalaan naton karon? Ang aton masunod nga artikulo nagahatag sing Makasulatanhon nga bulig sa pagsabat sini nga mga pamangkot.

[Nota]

^ par. 17 Ang mga pagtuon gin-organisar primero sa mga lugar diin makatipon ang mga grupo sang mga interesado. Apang, sang ulihi, ang mga pagtuon ginhimo man sa mga indibiduwal kag mga pamilya.​—⁠Tan-awa ang Jehovah’s Witnesses​—⁠Proclaimers of God’s Kingdom, pahina 574, nga ginbalhag sang mga Saksi ni Jehova.

Paano Mo Sabton?

• Ano ang malaragwayon nga hilikuton sa pagpangani?

• Ano nga sahi sang mensahe ang ginabantala naton?

• Ngaa ang pagpangita naton sing mga disipulo madinalag-on?

• Paano naton mahuptan ang paghidait sa hilikuton sa pagpangani?

• Ngaa padayon kita nga nagakasadya sa ani?

[Mga Pamangkot sa Pagtinuon]

[Mga retrato sa pahina 12]

Pagbantala sang nahauna kag ika-20 nga siglo

[Mga retrato sa pahina 13]

Kaangay ni Pablo, ginatinguhaan sang mga mangangani karon nga mapakig-angutan ang mga tawo bisan diin

[Retrato sa pahina 13]

Ibantala ang maayong balita nga may maayo nga panimuot