Makigbahin sa Kalipay sang Paghatag!

“Mas daku ang kalipay sa paghatag sangsa pagbaton.”​—⁠BINUHATAN 20:35.

1. Paano ginapakita ni Jehova ang kalipay sa paghatag?

ANG kalipay nga mahibaluan ang kamatuoran kag ang mga pagpakamaayo nga resulta sini hamili nga mga dulot halin sa Dios. Ang mga nakakilala kay Jehova may yara madamo nga rason agod magkalipay. Apang, bisan pa makalilipay nga makabaton sing dulot, makalilipay man nga maghatag sini. Si Jehova amo ang Manughatag sang “tagsa ka maayong dulot kag tagsa ka himpit nga regalo,” kag sia “malipayon nga Dios.” (Santiago 1:17; 1 Timoteo 1:11) Ginapaambit niya ang mapuslanon nga mga panudlo sa tanan nga magapamati, kag nalipay sia kon ang mga ginatudluan niya mangin matinumanon, subong nga ang mga ginikanan nagakalipay kon ang ila mga anak nagasunod sa mahigugmaon nga panudlo.​—⁠Hulubaton 27:11.

2. (a) Ano ang ginsiling ni Jesus tuhoy sa paghatag? (b) Ano nga kalipay ang mabaton naton kon ginatudluan naton ang iban sang kamatuoran sang Biblia?

2 Sing kaanggid, sang si Jesus yari sa duta, nalipay sia nga makita ang mga tawo nga nagapamati sa iya panudlo. Ginbalikwat ni apostol Pablo si Jesus nga nagasiling: “Mas daku ang kalipay sa paghatag sangsa pagbaton.” (Binuhatan 20:35) Ang kalipay nga aton mabatyagan kon ginatudluan naton ang iban sang kamatuoran sang Biblia indi lamang ang kaayawan nga may isa nga nagaugyon sa aton relihioso nga pagtuluuhan. Labaw pa sa sina, ini amo ang kalipay sa paghibalo nga nagahatag kita sing isa ka butang nga matuod kag may mapinadayunon nga balor. Paagi sa paghatag sa iban sing butang nga may espirituwal nga balor, mabuligan naton ang mga tawo nga makabenepisyo sa karon kag sa walay katubtuban.​—⁠1 Timoteo 4:8.

Ang Paghatag Nagahatag Sing Kalipay

3. (a) Paano ginpabutyag nanday apostol Pablo kag Juan ang ila kalipay sa pagbulig sa iban sa espirituwal? (b) Ngaa ang pagsugid sang kamatuoran sang Biblia sa aton mga anak isa ka pagpakita sing gugma?

3 Huo, subong nga si Jehova kag si Jesus nalipay sa paghatag sing espirituwal nga mga dulot, ang mga Cristiano amo man. Si apostol Pablo nalipay sa paghibalo nga nakabulig sia sa iban nga matun-an ang kamatuoran sang Pulong sang Dios. Sa  kongregasyon sa Tesalonica, sia nagsulat: “Ano ang amon paglaum ukon kalipay ukon purongpurong sang kasadya​—⁠aba, indi bala nga sa kamatuoran kamo?​—⁠sa atubangan sang aton Ginuong Jesus sa iya presensia? Kamo gid ang amon himaya kag kalipay.” (1 Tesalonica 2:​19, 20) Sa amo man nga paagi si apostol Juan, nagapatuhoy sa iya espirituwal nga mga anak, nagsulat: “Wala na ako sing daku pa nga rason sa pagpasalamat sangsa sining mga butang, sa pagpamati nga ang akon mga anak padayon nga nagalakat sa kamatuoran.” (3 Juan 4) Hunahunaa man ang kalipay nga mabuligan ang aton mismo mga anak nga mangin aton espirituwal nga mga anak! Ang pagpadaku sa mga anak “sa disiplina kag sa nagatadlong nga panghunahuna ni Jehova” isa ka pagpakita sing gugma sa bahin sang mga ginikanan. (Efeso 6:4) Paagi sa sini ginapakita sang mga ginikanan nga nabalaka gid sila sa dayon nga kaayuhan sang ila mga anak. Kon magahulag sila sa sini, ang mga ginikanan nagabatyag sing daku nga kalipay kag kaayawan.

4. Ano nga eksperiensia ang nagapakita sang kalipay sang espirituwal nga paghatag?

4 Si Dell isa ka bug-os tion nga payunir nga ministro kag iloy sang lima ka anak. Sia nagsiling: “Nahangpan ko gid ang balatyagon sa likod sang mga pulong ni apostol Juan bangod nagapasalamat gid ako nga apat sa akon mga anak ang ‘nagalakat sa kamatuoran.’ Nahibaluan ko nga nagahatag sing dungog kag himaya kay Jehova kon ang mga pamilya nahiusa sa matuod nga pagsimba, gani nagabatyag ako sing daku gid nga kalipay nga makita ang iya pagpakamaayo sa akon mga panikasog agod mapatudok ang kamatuoran sa akon mga anak. Ang matahom nga paglaum nga magkabuhi sing dayon sa Paraiso upod sa akon pamilya nagahatag sa akon sing paglaum kag nagapahulag sa akon nga magbatas walay sapayan sang mga kabudlayan kag mga sablag.” Sing makapasubo, ang isa sang mga anak nga babayi ni Dell gin-disfellowship gikan sa kongregasyon bangod sang paglakat sa di-cristiano nga dalanon. Walay sapayan sini, si Dell nagapangabudlay sing lakas agod mahuptan ang positibo nga panimuot. “Nagalaum ako nga sa pila ka adlaw ang akon anak mapainubuson kag sinsero nga magapanumbalik kay Jehova,” siling niya. “Apang nagapasalamat ako sa Dios nga ang kalabanan sang akon mga anak padayon nga nagaalagad sa iya sing matutom. Ang kalipay nga  akon nabatyagan isa gid ka ginhalinan sang kusog sa akon.”​—⁠Nehemias 8:10.

Makig-abyan sa Walay Katapusan nga mga Abyan

5. Samtang nagapakigbahin kita sa hilikuton nga paghimo sing mga disipulo, ano nga ihibalo ang nagahatag sa aton sing kalipay?

5 Ginsugo ni Jesus ang iya mga sumulunod sa paghimo sing Cristianong mga disipulo kag sa pagtudlo sa ila tuhoy kay Jehova kag sa iya mga ginapatuman. (Mateo 28:​19, 20) Di-mahamkunon nga ginbuligan ni Jehova kag ni Jesus ang mga tawo nga makatuon sang dalan sang kamatuoran. Gani samtang ginagamit naton ang aton kaugalingon sa hilikuton nga paghimo sing mga disipulo, nalipay kita nga mahibaluan nga ginailog naton ang halimbawa ni Jehova kag ni Jesus, kaangay sang ginhimo sang mga Cristiano sang una. (1 Corinto 11:1) Busa kon nagakooperar kita sa Labing Gamhanan nga Dios kag sa iya hinigugma nga Anak, ang aton kabuhi may yara matuod nga kabilinggan. Daw ano nga kabulahanan nga isipon upod sa “mga masigkamanugpangabudlay” sang Dios! (1 Corinto 3:9) Kag indi bala makalilipay nga bisan ang mga anghel nagapakigbahin sa sining hilikuton nga pagbantala sing maayong balita?​—⁠Bugna 14:​6, 7.

6. Samtang nagapakigbahin kita sa espirituwal nga paghatag, sin-o ang mangin mga abyan naton?

6 Sa katunayan, paagi sa pagpakigbahin sa sining hilikuton sang espirituwal nga paghatag, indi lamang kita mangin mga masigkamanugpangabudlay sang Dios​—⁠mangin abyan naton sia sa walay katapusan. Bangod sang iya pagtuo, si Abraham gintawag nga abyan ni Jehova. (Santiago 2:23) Samtang nagapanikasog kita sa paghimo sang kabubut-on sang Dios, kita man mangin mga abyan sang Dios. Kon himuon naton ina, kita man mangin mga abyan ni Jesus. Nagsiling sia sa iya mga disipulo: “Ginatawag ko kamo nga mga abyan, bangod ang tanan nga butang nga nabatian ko sa akon Amay ginasugid ko sa inyo.” (Juan 15:15) Madamo ang nalipay nga kabigon nga mga abyan sang impluwensiado nga mga tawo ukon sang mataas nga mga opisyales, apang mahimo kita kabigon nga abyan sang duha ka pinakadaku nga personalidad sa bug-os nga uniberso!

7. (a) Paano ang isa ka babayi nakatigayon sing matuod nga abyan? (b) May amo ka man bala sini nga eksperiensia?

7 Dugang pa, kon ginabuligan naton ang mga tawo nga makilala ang Dios, mangin abyan man naton sila, nga nagahatag sa aton sing pinasahi nga kalipay. Si Joan, nga taga-Estados Unidos, nagtuon sing Biblia kay Thelma. Bisan pa ginpamatukan sang pamilya ni Thelma ang iya pagtuon, nagpadayon sia kag nabawtismuhan pagligad sang isa ka tuig. Si Joan nagsulat: “Ang amon pag-updanay wala mag-untat didto; sa baylo, nangin mag-abyan kami sa sulod sang 35 ka tuig na karon. Masami kami nagaupdanay sa ministeryo kag sa mga kombension. Sang ulihi, nagsaylo ako sa bag-o nga balay nga mga 800 kilometros ang kalayuon. Apang, si Thelma padayon nga nagapadala sa akon sing labing mahigugmaon kag makalilipay nga mga sulat, nagasugid sa akon nga pirme niya ako ginapanumdom kag nagapasalamat sia sa akon nga nangin abyan kag halimbawa niya ako kag gintudluan ko sia sang kamatuoran gikan sa Biblia. Ang makatigayon sing amo sini kahirop kag pinalangga nga abyan isa ka makalilipay nga padya sa panikasog nga ginhimo ko agod buligan sia nga makatuon tuhoy kay Jehova.”

8. Anong positibo nga panimuot ang magabulig sa aton sa ministeryo?

8 Ang posibilidad nga makita ang isa nga maluyag sa pagtuon sang kamatuoran makabulig sa aton nga magbatas bisan pa madamo sang mga masugilanon naton ang nagapakita sing diutay lamang ukon wala gid nagapakita sing interes sa Pulong ni Jehova. Ini nga di-pagsapak nagahangkat sa aton pagtuo kag pagbatas. Apang, ang positibo nga panimuot magabulig sa aton. Si Fausto, nga taga-Guatemala, nagsiling: “Kon magpanaksi ako sa iban, ginahunahuna ko kon daw ano ka makalilipay kon ang tawo nga ginasugilanon ko mangin espirituwal nga utod. Ginahunahuna ko nga bisan isa lang ka tawo nga akon masugilanon ang mahimo magbaton sa ulihi sang kamatuoran sang Pulong sang Dios. Nagabulig ina sa akon nga magpadayon sa pagpanaksi kag nagahatag ini sa akon sing matuod nga kalipay.”

Pagtipon Sing mga Bahandi sa Langit

9. Ano ang ginsiling ni Jesus nahanungod sa mga bahandi sa langit, kag ano ang matun-an naton gikan sa sini?

9 Ang paghimo sing mga disipulo, mga anak man naton sila ukon iban nga mga indibiduwal, indi pirme mahapos. Ayhan nagakinahanglan ini sing tion, pailob, kag pagkamapinadayunon. Apang, dumduma nga madamo ang handa sa pagpangabudlay sing lakas agod makatipon sing bugana nga materyal nga mga butang, mga butang nga sa masami wala nagahatag sa ila sing kalipay  kag wala nagadugay sing dayon. Ginsilingan ni Jesus ang iya tagpalamati nga mas maayo nga magpangabudlay agod matigayon ang espirituwal nga mga butang. Sia nagsiling: “Mag-untat kamo sa pagtipon para sa inyo kaugalingon sing mga bahandi sa duta, diin ginaut-ot sang sapatsapat kag sang tuktok, kag diin ginakuha kag ginakawat sang mga kawatan. Sa baylo, magtipon kamo para sa inyo kaugalingon sing mga bahandi sa langit, diin indi maut-ot sang sapatsapat kag sang tuktok, kag indi makuha kag makawat sang mga kawatan.” (Mateo 6:​19, 20) Paagi sa paghimud-os sing espirituwal nga mga tulumuron​—⁠nga nagalakip sang pagpakigbahin sa importante nga hilikuton nga paghimo sing disipulo​—⁠nalipay kita nga mahibaluan nga ginahimo naton ang kabubut-on sang Dios kag padyaan niya kita. Si apostol Pablo nagsulat: “Ang Dios indi di-matarong nga malimot sang inyo binuhatan kag sang gugma nga ginpakita ninyo tungod sa iya ngalan.”​—⁠Hebreo 6:10.

10. (a) Ngaa may espirituwal nga mga bahandi si Jesus? (b) Paano ginhatag ni Jesus ang iya kaugalingon, kag ano ang daku nga benepisyo sini sa iban?

10 Kon magpangabudlay kita sing lakas sa paghimo sing mga disipulo, nagatipon kita para sa aton kaugalingon sing “mga bahandi sa langit,” suno sa ginsiling ni Jesus. Nagahatag ini sa aton sing kalipay sa pagbaton. Kon maghatag kita sing di-mahamkunon, ginapahalipay naton ang aton kaugalingon. Si Jesus mismo nag-alagad sing matutom kay Jehova sa sulod sang binilyon ka tinuig. Hunahunaa lamang ang mga bahandi nga natipon niya sa langit! Walay sapayan sina, wala ginpangita ni Jesus ang iya kaugalingon nga mga luyag. Si apostol Pablo nagsulat: “Ginhatag [ni Jesus] ang iya kaugalingon tungod sa aton mga sala agod maluwas niya kita gikan sa karon nga malaut nga sistema sang mga butang suno sa kabubut-on sang aton Dios kag Amay.” (Galacia 1:4) Wala lamang gingamit ni Jesus sing di-mahamkunon ang iya kaugalingon sa iya ministeryo kundi ginhatag niya ang iya mismo kabuhi subong gawad agod nga ang iban may kahigayunan nga makatipon sing mga bahandi sa langit.

11. Ngaa ang espirituwal nga mga dulot mas maayo sangsa materyal nga mga dulot?

11 Paagi sa pagtudlo sa mga tawo tuhoy sa Dios, ginabuligan naton sila nga mahangpan kon paano man sila makatipon sing wala nagakadunot nga espirituwal nga mga bahandi. Anong daku pa nga dulot ang imo mapaambit? Kon hatagan mo ang isa ka abyan sing malahalon nga relo, salakyan, ukon balay pa gani, mahimo gid nga magapasalamat kag malipay ina nga abyan, kag maagom mo ang kalipay sang paghatag. Apang ano ang kahimtangan sina nga dulot pagligad sang 20 ka tuig? Sang 200 ka tuig? Sang 2,000 ka tuig? Sa pihak nga bahin, kon buligan mo sia nga alagaron si Jehova, makabenepisyo sia gikan sa sina nga dulot sing dayon.

Pagpangita sa mga Maluyag Sang Kamatuoran

12. Ano ang ginahimo sang madamo agod buligan ang iban sa espirituwal?

12 Agod makapakigbahin sa kalipay sang espirituwal nga paghatag, ang katawhan ni Jehova nagkadto tubtob sa mga ukbong sang duta. Linibo ang nagbiya sang puluy-an kag pamilya agod magmisyonero sa mga pungsod diin dapat sila makigbagay sa bag-ong mga hambal kag mga kultura. Ang iban nagsaylo sa mga lugar sa ila mismo pungsod diin mas daku ang kinahanglanon para sa mga manugbantala sang Ginharian. Ang iban naman nagtuon sing lenguahe sang iban nga pungsod, kag nagbukas sang bag-ong mga kahigayunan nga mabantalaan sa ila mismo lugar ang mga nagsaylo halin sa iban nga pungsod. Halimbawa, sa tapos mapadaku ang duha ka anak nga nagaalagad na karon sa bug-os kalibutan nga ulong-talatapan sang mga Saksi ni Jehova, isa ka mag-asawa sa New Jersey, E.⁠U.⁠A., ang nagpayunir kag nagtuon sing Inintsik. Sa sulod sang tatlo ka tuig, nagdumala sila sing mga pagtuon sa Biblia sa 74-ka-nagahambal sing Intsik nga mga tawo nga nagaeskwela sa malapit  nga kolehiyo. Mapasangkad mo bala ang imo ministeryo sa pila ka paagi agod mangin labi pa nga malipayon sa hilikuton nga paghimo sing disipulo?

13. Ano ang imo mahimo himuon kon luyag mo nga mangin mas mabungahon ang imo ministeryo?

13 Ayhan nalangkag ka sa pagdumala sing pagtuon sa Biblia apang wala mo pa ini mahimo. Sa pila ka pungsod mabudlay makakita sing mga interesado. Ayhan ang mga tawo nga imo nasugilanon indi interesado sa Biblia. Kon amo sina, ayhan masambit mo sa pangamuyo ang imo handum sing mas masunson, nakahibalo nga si Jehova kag si Jesucristo interesado gid sa hilikuton kag mahimo nga tuytuyan ka nila pakadto sa isa ka tulad-karnero nga tawo. Mangayo sing mga panugda gikan sa mga mas eksperiensiado sa inyo kongregasyon ukon sa mga mas mabungahon ang ministeryo. Himusli ang paghanas kag mga panugda nga ginahatag sa Cristianong mga miting. Manginpulos gikan sa laygay sang mga nagalakbay nga manugtatap kag sang ila mga asawa. Labaw sa tanan, indi gid mag-ampo. Ang maalam nga tawo nagsulat: “Sa kaagahon isab-ug ang imo binhi kag tubtob sa gab-i dili pagpapahuwaya ang imo kamot; kay wala ka makahibalo kon diin ini magauswag.” (Manugwali 11:6) Samtang, dumduma ang matutom nga mga tawo subong nanday Noe kag Jeremias. Bisan pa diutay lamang ang namati sa ila pagbantala, ang ila ministeryo nangin madinalag-on. Labaw sa tanan, nagapahamuot ini kay Jehova.

Paghimo Sang Imo Bug-os nga Masarangan

14. Paano ginatamod ni Jehova ang mga nagtigulang nga nagaalagad sa iya?

14 Ayhan wala ginatugot sang imo mga kahimtangan nga imo mahimo ang mas madamo nga luyag mo himuon sa ministeryo. Halimbawa, ang katigulangon mahimo nga nagalimite sang imo sarang himuon sa pag-alagad kay Jehova. Apang, dumduma ang ginsulat sang maalam nga tawo: “Ang ubanon nga ulo amo ang purongpurong sang katahom kon makita ini sa dalanon sang pagkamatarong.” (Hulubaton 16:31) Para kay Jehova, ang kabuhi nga ginhinguyang sa pag-alagad sa iya kalahamut-an sa iya. Dugang pa, ang Kasulatan nagasiling: “Bisan tubtob sa katigulangon sang isa ako [si Jehova] amo gihapon inang Isa; kag tubtob sa pagkaubanon sang isa padayon ako nga magapas-an. Magapanghikot gid ako, agod ako makadala kag agod ako makapas-an kag makahatag sang pagpalagyo.” (Isaias 46:4) Ang aton mahigugmaon nga langitnon nga Amay nagasaad nga sakdagon kag suportahan ang mga matutom sa iya.

15. Nagapati ka bala nga nahangpan ni Jehova ang imo mga kahimtangan? Ngaa?

15 Ayhan nagaantos ka sing balatian, pagpamatok sang di-tumuluo nga tiayon, mabug-at nga mga salabton sa pamilya, ukon iban pa mabudlay nga problema. Nakahibalo si Jehova sang aton mga limitasyon kag mga sirkunstansia, kag ginahigugma niya kita tungod sang aton hanuot nga mga panikasog agod maalagad sia. Matuod ina bisan pa nga ang ginahimo naton mahimo nga kubos sangsa ginahimo sang iban. (Galacia 6:4) Nakahibalo si Jehova nga kita di-himpit, kag realistiko sia sa kon ano ang ginapaabot niya sa aton. (Salmo 147:11) Kon ginahimo naton ang aton bug-os nga masarangan, makasalig kita nga hamili kita sa itululok  sang Dios kag indi niya kalimtan ang aton mga buhat sang pagtuo.​—⁠Lucas 21:1-4.

16. Sa anong paagi ang bug-os nga kongregasyon makapakigbahin sa paghimo sing disipulo?

16 Dumduma, man, nga ang hilikuton nga paghimo sing disipulo isa ka pagpanghikot sang grupo. Wala sing isa ka indibiduwal ang nagahimo sing disipulo, ni ginapatubo sang isa ka tulo sang ulan ang tanom. Matuod, ang isa ka Saksi mahimo nga amo ang makakita sa interesado kag magtuon sing Biblia sa iya. Apang sa tion nga ang bag-uhan nagakadto sa Kingdom Hall, ang bug-os nga kongregasyon nagabulig sa iya nga mahangpan ang kamatuoran. Ang kainit sang paghiliutod nagapakita sang impluwensia sang espiritu sang Dios. (1 Corinto 14:​24, 25) Ang mga kabataan kag mga tin-edyer nagahatag sing makapapagsik nga mga komento, nga nagapakita sa bag-uhan nga ang aton mga pamatan-on tuhay sa mga pamatan-on sang kalibutan. Ginatudluan sang mga masakiton, mga maluya, kag mga tigulang sa kongregasyon ang mga bag-uhan kon ano ang nadalahig sa pagbatas. Ano man ang aton edad ukon mga limitasyon, kita tanan may importante nga bahin sa pagbulig sa mga bag-uhan samtang ang ila gugma sa kamatuoran sang Biblia nagatudok kag nagauswag sila padulong sa bawtismo. Ang tagsa ka oras nga ginahinguyang naton sa ministeryo, ang tagsa ka pagduaw liwat, ang tagsa ka pagpakighambal sa isa ka interesado sa Kingdom Hall, mahimo nga daw indi gid importante kon ini lamang, apang bahin ini sang gamhanan nga hilikuton nga ginahimo ni Jehova.

17, 18. (a) Dugang sa pagpakigbahin sa hilikuton nga paghimo sing disipulo, paano kita makapakigbahin sa kalipay sang paghatag? (b) Paagi sa pagpakigbahin sa kalipay sang paghatag, sin-o ang ginailog naton?

17 Sa pagkamatuod, luwas sa pagpakigbahin sa importante nga hilikuton sang paghimo sing disipulo, kita nga mga Cristiano nagapakigbahin man sa kalipay sang paghatag sa iban nga mga paagi. Mahimo kita magpain sing kuwarta agod iamot sa pagsakdag sa matuod nga pagsimba kag agod buligan ang mga nagakinahanglan. (Lucas 16:⁠9; 1 Corinto 16:​1, 2) Makapangita kita sing mga kahigayunan agod mapakita ang pagkamaabiabihon sa iban. (Roma 12:13) Makapanikasog kita nga ‘magbuhat sing maayo sa tanan, apang ilabi na gid sa mga may labot sa aton sa pagtuo.’ (Galacia 6:10) Kag sa simple apang importante nga mga paagi, makahatag kita sa iban​—⁠sing sulat, tawag sa telepono, regalo, bulig, sing pulong sang pagpalig-on.

18 Paagi sa paghatag, ginapakita naton nga ginailog naton ang aton langitnon nga Amay. Ginapakita man naton ang aton utudnon nga gugma, ang tanda nga nagapakilala sa matuod nga mga Cristiano. (Juan 13:35) Ang pagdumdom sini nga mga butang makabulig sa aton nga makigbahin sa kalipay sang paghatag.

Mapaathag Mo Bala?

• Paano si Jehova kag si Jesus nagpahamtang sing halimbawa sa paghatag sa espirituwal?

• Paano kita makakita sing walay katapusan nga mga abyan?

• Ano nga mga tikang ang mahimo naton himuon agod mangin mas madinalag-on ang aton ministeryo?

• Paano ang tanan sa kongregasyon makapakigbahin sa kalipay sang paghatag?

[Mga Pamangkot sa Pagtinuon]

[Mga retrato sa pahina 13]

Kon ang mga anak nagahulag sa paghanas, ang mga ginikanan nagabatyag sing daku nga kalipay kag kaayawan

[Retratp sa pahina 15]

Sa paghimo sing mga disipulo, makahimo kita sing matuod nga mga abyan

[Retrato sa pahina 16]

Si Jehova nagapas-an sa aton sa katigulangon

[Mga retrato sa pahina 17]

Sa simple apang importante nga mga paagi, nalipay kita sa paghatag