Magdiretso sa kaundan

Magdiretso sa listahan sang kaundan

Mga Pamangkot Gikan sa mga Bumalasa

Mga Pamangkot Gikan sa mga Bumalasa

 Mga Pamangkot Gikan sa mga Bumalasa

Kon handa gid si Jehova sa pagpatawad sang mga sala pasad sa halad nga gawad, ngaa kinahanglan pa magtu-ad ang mga Cristiano sa mga gulang sa kongregasyon?

Subong sang makita sa natabo kanday David kag Bat-seba, ginpatawad ni Jehova ang sala ni David, walay sapayan nga mabug-at ini, bangod sang hanuot nga paghinulsol ni David. Sang ginsugilanon sia ni manalagna Natan tuhoy sini, nagtu-ad sing dayag si David: “Nakasala ako batok kay Jehova.”​—⁠2 Samuel 12:13.

Apang, wala lamang ginabaton ni Jehova ang sinsero nga pagtu-ad sang isa ka makasasala kag ginapatawad sia kundi mahigugmaon man niya nga ginabuligan ang isa nga nakasala nga makapasag-uli sa espirituwal. Sa kaso ni David, ang bulig ginhatag paagi kay manalagna Natan. Sa karon, sa Cristianong kongregasyon, yara ang hamtong sa espirituwal nga mga gulang. Si disipulo Santiago nagpaathag: “May nagamasakit bala sa inyo [sa espirituwal]? Magpatawag sia sang mga tigulang sang kongregasyon, kag pangamuyuan nila sia, nga haplasan sia sing lana sa ngalan ni Jehova. Kag ang pangamuyo sang pagtuo magaayo sa isa nga nagamasakit, kag si Jehova magabangon sa iya. Subong man, kon nakahimo sia sing mga sala, patawaron ini sa iya.”​—⁠Santiago 5:​14, 15.

Daku ang mabulig sang eksperiensiado nga mga gulang agod mapahaganhagan ang kasakit sang tagipusuon sang mahinulsulon nga makasasala. Ginatinguhaan nila nga ilugon si Jehova kon paano nila pakig-angutan  ang makasasala. Indi gid nila luyag mangin mapintas, bisan pa nga nagakaigo ang matigdas nga pagdisiplina. Sa baylo, mainawaon nila nga ginabinagbinag ang gilayon nga kinahanglanon sang indibiduwal. Mapailubon nga ginapanikasugan nila nga ipasag-uli ang panghunahuna sang isa nga nakasala paagi sa paggamit sa Pulong sang Dios. (Galacia 6:⁠1) Bisan wala ginatu-ad sing kinabubut-on sang isa ka tawo ang iya sala, mahimo mapahulag sia nga maghinulsol kon palapitan sia sang mga gulang, kaangay ni David sang ginpalapitan sia ni Natan. Sa amo, ginabuligan sang mga gulang ang isa nga nakasala nga malikawan ang katalagman nga himuon liwat ang sala kag ang malain nga mga resulta kon mangin kabalan na sia sa paghimo sing sala.​—⁠Hebreo 10:26-31.

Indi gid mahapos nga itu-ad sa iban ang mga buhat nga ginakahuya sang isa kag magpangayo sing kapatawaran. Kinahanglan ang nasulod nga kabakod. Apang, hunahunaa sa makadali ang isa pa nga mahimo matabo. Ang isa nga wala magtu-ad sang iya mabug-at nga sala sa mga gulang sa kongregasyon nagsiling: “Nabatyagan ko ang kasakit sa akon tagipusuon nga indi gid madula. Gindugangan ko ang akon mga panikasog sa pagbantala nga hilikuton, apang yara gihapon ang balatyagon nga nakasala.” Naghunahuna sia nga ang pagtu-ad sa Dios sa pangamuyo bastante na, apang maathag gid nga indi gali, bangod nabatyagan niya ang ginbatyag man ni Hari David. (Salmo 51:​8, 11) Gani daw ano gid kaayo nga batunon ang mahigugmaon nga bulig ni Jehova paagi sa mga gulang!