Report sang mga Manugbantala sang Ginharian

India​​—⁠Ang “Paghiusa sa Tunga sang Pagkananuhaytuhay”

ANG “Paghiusa sa Tunga Sang Pagkananuhaytuhay” isa ka bantog nga islogan nga gingamit sa paglarawan sang pungsudnon nga pagtingob sa India. Ang pagtigayon sang paghiusa sa sining malapad nga pungsod nga may daku nga pagkananuhaytuhay sa kultura, hambal, relihion, ginhalinan nga rasa, pagpanapot, kag pagkaon indi mahapos. Apang, ina nga paghiusa makita sa tagdumalahan nga talatapan sang mga Saksi ni Jehova sa India, bisan pa ang mga boluntaryo nga nagapuyo kag nagatrabaho didto naghalin sa madamo nga estado kag unyon nga mga teritoryo kag nagahambal sing pila ka nagkalainlain nga lenguahe.

• Kilalahon naton si Rajrani​​—⁠isa ka taga-Punjab nga lin-ay, sa pinakapunta sang aminhan-katundan nga bahin sang India. Sang nagaeskwela pa si Rajrani, ang isa sang iya mga kaklase nagtuon sang Biblia sa mga Saksi ni Jehova. Gintinguhaan sining pamatan-on nga babayi nga mangin interesado si Rajrani sa Biblia. Sanglit nabudlayan mag-Iningles ang iya kaklase kag Ang Lalantawan wala pa sadto nabadbad sa Punjabi, nagpabulig man sia kay Rajrani sa pagbadbad sang mga kaundan sang magasin para sa iya. Nabuyok gid si Rajrani sa nabasa niya sa Ang Lalantawan amo nga walay sapayan sang pagpamatok sang iya mga ginikanan, nag-uswag sia tubtob sa punto nga gindedikar niya ang iya kabuhi kay Jehova nga Dios. Nagaalagad na karon sa Bethel sa India, ginahimo man niya ang butang nga nagpamuklat sang iya mga mata sa kamatuoran. Ginabadbad niya ang Cristianong mga publikasyon sa Punjabi!

• Binagbinaga man si Bijoe, nga naghalin sa isa pa ka bahin sang India​​—⁠sa bagatnan-nakatundan nga estado sang Kerala. Ginpahalin si Bijoe sa hayskul bangod sang neutral nga panindugan sa tion sang pungsudnon nga mga seremonya. Pagkatapos sang malawig nga kaso sa korte nga natapos sa isa ka tumalagsahon nga kadalag-an para sa putli nga pagsimba, nagbalik sa pag-eskwela si Bijoe. * Ginpadayon man niya ang pagtuon sa kolehiyo. Apang, bangod natublag ang iya konsiensia sa imoral nga palibot didto, nag-untat sia sa una nga bahin sang tuig sa kolehiyo. Karon pagkatapos sang 10 ka tuig sa Bethel, sa banta niya mas nakabenepisyo sia subong katapo sang nanuhaytuhay apang nahiusa nga pamilya Bethel sangsa kon nagpadayon sia kuntani sa mataas nga edukasyon.

• Sanday Norma kag Lily lunsay nagapangidaron sing kapin sa 70 anyos kag mga balo sa sulod sang madamong tinuig. Ang tagsa nag-alagad sing bug-os tion sa kapin sa 40 ka tuig. Si Lily nagatrabaho sa sanga sing mga 20 ka tuig subong isa ka manugbadbad sa Tamil nga hambal. Si Norma nagkadto sa Bethel sang nagligad nga 13 ka tuig sang napatay ang iya bana. Magluwas nga sila maayo nga mga halimbawa sang maukod kag masaligan nga pagpangabudlay, nangin nagapahiusa sila nga impluwensia sa bug-os nga pamilya Bethel. Maluyagon sila mag-abiabi sa mga bisita, kag nasadyahan sila makig-upod sa batan-on nga mga katapo sang pamilya, nga nagasugid sang mga kalipay sang malawig nga tinuig sang Cristianong pagkabuhi. Kag ginabalusan man sila sining mga pamatan-on paagi sa pag-agda sa ila sa mga kuwarto nila kag sa pagtan-ay sing bulig kon ginakinahanglan. Maayo gid nga mga halimbawa!

Bangod nalandas ang mga kinatuhayan nga ginabangdan sang pagbinangig kag kagamo sa madamo nga duog, ining mga boluntaryo malipayon nga nagatrabaho sing tingob agod mag-alagad sa iban bilang katapo sang nahiusa nga pamilya Bethel sa India.​​—⁠Salmo 133:⁠1.

[Nota]

^ par. 5 Tan-awa Ang Lalantawan, Nobiembre 1, 1987, pahina 21.

[Picture Credit Line sa pahina 8]

Background: Mountain High Maps® Copyright © 1997 Digital Wisdom, Inc.