Pangitaa Ninyo si Jehova sa Wala Pa ang Adlaw sang Iya Kaakig

“Pangitaa ninyo si Jehova . . . Pangitaa ang pagkamatarong, pangitaa ang pagkahagop. Ayhan malipdan kamo sa adlaw sang kaakig ni Jehova.”—⁠SOFONIAS 2:⁠3.

1. Ano ang espirituwal nga kahimtangan sang Juda sang ginsugdan ni Sofonias ang iya hilikuton sa pagpanagna?

GINSUGDAN ni Sofonias ang iya hilikuton sa pagpanagna sa makahalanguyos nga tion sa maragtas sang Juda. Ang espirituwal nga kahimtangan sang pungsod maluya. Sa baylo nga magsalig sila kay Jehova, ang katawhan nagpatuytoy sa pagano nga mga saserdote kag mga astrologo. Ang pagsimba kay Baal, upod ang mga ritwal sini sa pertilidad, lapnag sa pungsod. Ginapigos sang sibilyan nga mga lider​—⁠mga prinsipe, mga dungganon, kag mga hukom⁠​—⁠​ang mga tawo nga dapat nila kuntani amligan. (Sofonias 1:​9; 3:⁠3) Indi katingalahan nga namat-od si Jehova nga ‘untayon ang iya kamot’ batok sa Juda kag sa Jerusalem agod laglagon sila!​—⁠Sofonias 1:⁠4.

2. Ano ang paglaum sang matutom nga mga alagad sang Dios sa Juda?

2 Apang, bisan pa malain sadto ang kahimtangan, may nagaigpat nga paglaum. Ang anak ni Amon nga si Josias nagahari na. Bisan bata pa sia, ginhigugma gid ni Josias si Jehova. Kon ipasag-uli sang bag-o nga hari ang putli nga pagsimba sa Juda, makalilipay gid ini para sa pila nga nag-alagad sing matutom sa Dios! Ang iban mahimo mapahulag nga magbuylog sa ila kag matipigan man sa adlaw sang kaakig ni Jehova.

 Mga Kinahanglanon Agod Matipigan

3, 4. Ano ang tatlo ka sugo nga dapat tumanon sang isa ka indibiduwal agod maluwas sa “adlaw sang kaakig ni Jehova”?

3 Maluwas gid bala ang pila ka indibiduwal sa adlaw sang kaakig ni Jehova? Huo, kon tumanon nila ang tatlo ka kondisyon nga ginbalay sa Sofonias 2:​2, 3. Samtang ginabasa naton ining mga bersikulo, talupangdon naton ilabi na ining mga sugo. Si Sofonias nagsulat: “Sa wala pa ang kasuguan magbun-ag sing bisan ano, sa wala pa ang adlaw magligad subong sang labhang, sa wala pa mag-abot sa inyo ang nagadabdab nga kaakig ni Jehova, sa wala pa mag-abot sa inyo ang adlaw sang kaakig ni Jehova, pangitaa ninyo si Jehova, kamo tanan nga mahagop sang duta, nga nagahimo sang Iya hudisyal nga desisyon. Pangitaa ang pagkamatarong, pangitaa ang pagkahagop. Ayhan malipdan kamo sa adlaw sang kaakig ni Jehova.”

4 Kon amo, agod matipigan, dapat sang isa ka tawo (1) pangitaon si Jehova, (2) pangitaon ang pagkamatarong, kag (3) pangitaon ang pagkahagop. Dapat gid kita karon mangin interesado sa sining mga sugo. Ngaa? Bangod subong nga ang Juda kag Jerusalem nag-atubang sing adlaw sang paghukom sang ikapito nga siglo B.⁠C.⁠E., ang mga pungsod sang Cristiandad​—⁠sa katunayan, ang tanan nga malauton⁠​—⁠​makighusay kay Jehova nga Dios sa nagapakari nga “dakung kapipit-an.” (Mateo 24:21) Ang bisan sin-o nga luyag malipdan sa amo nga tion dapat maghimo sing desidido nga aksion karon. Paano? Paagi sa pagpangita kay Jehova, sa pagpangita sa pagkamatarong, kag sa pagpangita sa pagkahagop antes mangin atrasado ang tanan!

5. Ano ang nalakip sa ‘pagpangita kay Jehova’ sa karon?

5 Ayhan magasiling ka: ‘Isa ako ka dedikado kag bawtismado nga alagad sang Dios, isa sang mga Saksi ni Jehova. Indi bala nga natuman ko na ina nga mga sugo?’ Ang matuod, kapin pa ang nadalahig sangsa pagdedikar sang aton kaugalingon kay Jehova. Ang Israel isa anay ka dedikado nga pungsod, apang sang adlaw ni Sofonias ang mga taga-Juda wala magkabuhi suno sa sina nga dedikasyon. Bangod sini, ang pungsod ginsikway sang ulihi. Ang ‘pagpangita kay Jehova’ karon nagakinahanglan sang pagpalambo kag paghupot sing  isa ka mainit nga personal nga kaangtanan sa iya samtang nagapakig-upod sa iya dutan-on nga organisasyon. Nagakahulugan ini sang paghibalo kon ano ang pagtamod sang Dios sa sini kag pagtalupangod sa iya mga balatyagon. Ginapangita naton si Jehova kon ginatun-an naton sing mahalungon ang iya Pulong, ginapamalandungan ini, kag ginaaplikar ang laygay sini sa kabuhi. Samtang ginapangabay man naton ang panuytoy ni Jehova sa hugot nga pangamuyo kag ginasunod ang pag-ubay sang iya balaan nga espiritu, ang aton kaangtanan sa iya nagatudok kag ginapahulag kita nga alagaron sia ‘upod ang aton bug-os nga tagipusuon, kalag, kag kusog.’​—⁠Deuteronomio 6:⁠5; Galacia 5:​22-25; Filipos 4:​6, 7; Bugna 4:⁠11.

6. Paano naton ‘ginapangita ang pagkamatarong,’ kag ngaa posible ini bisan sa sining kalibutan?

6 Ang ikaduha nga sugo nga ginsambit sa Sofonias 2:⁠3 amo ang ‘pangitaon ang pagkamatarong.’ Ang kalabanan sa aton naghimo sing importante nga mga pagbag-o agod mangin kalipikado kita sa Cristianong bawtismo, apang dapat naton padayon nga sakdagon ang matarong nga mga talaksan sang Dios sa aton bug-os nga kabuhi. Ang iban nga may maayo nga panugod may kaangtanan sini nagtugot sang ila kaugalingon nga madagtaan sang kalibutan. Ang pagpangita sa pagkamatarong indi mahapos, kay ginapalibutan kita sang mga tawo nga nagatamod sang seksuwal nga imoralidad, pagbutig, kag iban pa nga mga kasal-anan subong normal lamang. Apang, sarang madaug sang mabaskog nga handum nga pahamut-an si Jehova ang bisan ano man nga huyog nga tinguhaan nga matigayon ang kahamuot sang kalibutan paagi sa pagtinguha nga magsimpunay ini. Nadula sang Juda ang kahamuot sang Dios paagi sa pag-ilog sa di-diosnon nga kaingod nga mga pungsod sini. Kon amo, sa baylo nga ilugon ang kalibutan, mangin “mga manug-ilog sang Dios” kita, ginapalambo ang “bag-o nga personalidad nga gintuga suno sa kabubut-on sang Dios sa matuod nga pagkamatarong kag pagkamainunungon.”​—⁠Efeso 4:​24; 5:⁠1.

7. Paano naton ‘ginapangita ang pagkahagop’?

7 Ang ikatlo nga punto nga ginhatag sa Sofonias 2:⁠3 amo nga kon luyag naton malipdan sa adlaw sang kaakig ni Jehova, dapat naton ‘pangitaon ang pagkahagop.’ Kada adlaw, nagapakig-angot kita sa mga lalaki, mga babayi, kag mga pamatan-on nga indi mahagop. Para sa ila, ang kalmado nga panghunahuna isa ka diperensia. Ang pagpasakop ginakabig nga isa ka daku nga kaluyahon. Mabudlay sila pahamut-an, makagod, kag matig-a sa ila opinyon, nagapati nga ang ila personal nga “mga kinamatarong” kag mga luyag dapat sundon bisan ano man ang matabo. Daw ano ka makapasubo kon malatnan kita sang pila sini nga mga panimuot! Amo na ini ang tion agod ‘pangitaon ang kahagop.’ Paano? Paagi sa pagpasakop sa Dios, mapainubuson nga nagabaton sang iya disiplina kag nagahimo sang iya kabubut-on.

Ngaa “Ayhan” Malipdan?

8. Ano ang ginapakita sang paggamit sa tinaga nga “ayhan” sa Sofonias 2:​3?

8 Talupangda nga ang Sofonias 2:⁠3 nagasiling: “Ayhan malipdan kamo sa adlaw sang kaakig ni Jehova.” Ngaa gingamit ang tinaga nga “ayhan” sang ginpatuhuyan ang ‘mga mahagop sang duta’? Ti, yadtong mga mahagop nakahimo na sing positibo nga mga tikang, apang indi ini ang tion agod mangin masinaligon sa kaugalingon. Wala pa matapos ang ila matutom nga pagkabuhi. Posible pa nga ang pila sa ila mahimo makasala. Matuod man ini sa aton. Si Jesus nagsiling: “Sia nga nakabatas tubtob sa katapusan amo sia ang maluwas.” (Mateo 24:13) Huo, ang kaluwasan sa adlaw sang kaakig ni Jehova nagadepende sa aton padayon nga paghimo sing husto sa iya mga mata. Amo bala sina ang imo malig-on nga pamat-od?

9. Anong matadlong nga mga tikang ang ginhimo sang lamharon nga si Hari Josias?

9 Ayhan bilang sabat sa mga pulong ni Sofonias, si Hari Josias napahulag nga ‘pangitaon si Jehova.’ Ang Kasulatan nagasiling: “Sang ikawalo nga tuig sang iya paghari, samtang bata pa [mga 16 anyos si Josias], ginsugdan niya nga pangitaon ang Dios ni David nga iya katigulangan.” (2 Cronica 34:⁠3) Si Josias padayon man nga ‘nagpangita sang pagkamatarong,’ kay aton mabasa: “Sang ikanapulo kag duha nga tuig [sang si Josias mga 20 anyos] ginsugdan niya nga tinluan ang Juda kag Jerusalem gikan sa mataas nga mga duog kag sagrado nga mga poste kag mga larawan nga tinigban kag mga estatwa nga tinunaw. Dugang pa, ginguba nila sa atubangan niya ang mga halaran sang mga Baal.” (2 Cronica 34:​3, 4) Si Josias man ‘nagpangita sing pagkahagop,’ mapainubuson nga nagpanghikot  agod pahamut-an si Jehova paagi sa pagtinlo sa pungsod sing idolatriya kag sing iban pa nga mga buhat sang butig nga relihion. Pat-od gid nga nalipay ang iban nga mga mahagop sa sining mga hitabo!

10. Ano ang natabo sa Juda sang 607 B.⁠C.⁠E., apang sin-o ang nakalampuwas?

10 Madamo nga Judiyo ang nagbalik kay Jehova sa tion sang paghari ni Josias. Apang, sang mapatay ang hari, ang kalabanan sa ila nagbalik sa ila daan nga mga pagginawi​—⁠sa mga buhat nga indi gid kalahamut-an sa Dios. Subong sang ginmando ni Jehova, ang Juda nalutos sang mga Babilonianhon kag ginlaglag ang iya kapital nga siudad, ang Jerusalem, sang 607 B.⁠C.⁠E. Apang, ang kahimtangan indi bug-os nga walay paglaum. Si manalagna Jeremias, ang Etiopianhon nga si Ebed-melec, ang mga kaliwatan ni Jonadab, kag ang iban pa nga mga matutom sa Dios ginlipdan sa sadtong adlaw sang kaakig ni Jehova.​—⁠Jeremias 35:​18, 19; 39:​11, 12, 15-18.

Mga Kaaway Sang Dios​​—⁠Talupangda!

11. Ngaa isa ka hangkat ang magpabilin nga matutom sa Dios karon, apang ano ang dapat binagbinagon sang mga kaaway sang katawhan ni Jehova?

11 Samtang ginahulat naton ang adlaw sang kaakig ni Jehova sa sining malauton nga sistema, ‘nagasugata kita sing nanuhaytuhay nga mga pagtilaw.’ (Santiago 1:⁠2) Sa pila ka kadutaan nga nagapangangkon nga ginapabaloran nila ang kahilwayan sa pagsimba, gingamit sang mapadihuton nga mga klerigo ang ila impluwensia sa sekular nga mga awtoridad agod hingabuton sing masingki ang katawhan sang Dios. Ginabutangbutangan sang walay patugsiling nga mga tawo ang mga Saksi ni Jehova, nagatawag sa ila nga “makatalagam nga kulto.” Nahibaluan sang Dios ang ila ginahimo​—⁠kag indi niya ini pagpaligaron nga indi masilutan. Dapat binagbinagon sang iya mga kaaway kon ano anay ang natabo sa dumaan nga mga kaaway sang iya katawhan subong sang mga Filistinhon. Ang tagna nagasiling: “Kon tuhoy sa Gaza, sia mangin isa ka siudad nga binayaan; kag ang Askelon mangin isa ka kahapayan. Kon tuhoy sa Asdod, tabugon nila sia sa kaudtuhon; kag kon tuhoy sa Ekron, pagagabuton sia.” Ang mga siudad sang Gaza, Askelon, Asdod, kag Ekron sa Filistia pagalaglagon.​—⁠Sofonias 2:​4-7.

12. Ano ang natabo sa Filistia, Moab, kag Amon?

12 Ang tagna nagpadayon: “Nabatian ko ang pagpakahuya sang Moab kag ang mapasipalahon nga mga pulong sang mga anak ni Amon, nga ginpakahuya nila sa akon katawhan kag ginpabugal sing daku batok sa ila teritoryo.” (Sofonias 2:⁠8) Matuod, ang Egipto kag Etiopia nag-antos sa kamot sang mga Babilonianhon nga manugsalakay. Apang ano ang paghukom ni Jehova batok sa Moab kag Amon, ang mga pungsod nga kaliwat sang hinablos ni Abraham nga si Lot? Si Jehova nagtagna: “Ang Moab mangin subong gid sang Sodoma, kag ang mga anak ni Amon subong sang Gomorra.” Indi kaangay sang ila mga katigulangan nga babayi​—⁠ang duha ka anak nga babayi ni Lot, nga naluwas sang malaglag ang Sodoma kag Gomorra⁠​—⁠​ang bugalon nga Moab kag ang Amon indi pagalipdan sa mga paghukom sang Dios. (Sofonias 2:​9-12; Genesis 19:​16, 23-26, 36-38) Sa karon, diin na ang Filistia kag diin na ang mga siudad sini? Kamusta naman ang bugalon nga Moab kag Amon? Bisan pangitaon mo pa ini, indi mo na ini makita.

13. Anong arkeolohiko nga tukib ang ginhimo sa Ninive?

13 Sang adlaw ni Sofonias, ang Emperyo sang Asiria yara sa putukputukan sang iya gahom. Sa paglaragway sa isa ka bahin sang palasyo nga iya nakutkutan sa kapital sang Asiria nga Ninive, ang arkeologo nga si Austen Layard nagsulat: “Ang mga kisame . . . ginbahinbahin sing mga kuwadrado, ginpintahan sing mga bulak, ukon sing dagway sang mga sapat. Ang iban gintaklapan sing tiposo, ang tagsa ka bahin may elegante nga mga kilid kag mga moldura. Ang mga biga, subong man ang mga hilit sang hulot, mahimo nga nabalawan, ukon nataklapan pa gani, sing bulawan kag pilak; kag ang labing talagsahon nga kahoy, diin ang sedro amo ang labi na nga talalupangdon, gingamit para sa mga butang nga human sa kahoy.” Apang, subong sa gintagna ni Sofonias, ang Asiria laglagon kag ang kapital nga siudad sini, ang Ninive, ‘hapayon.’​—⁠Sofonias 2:⁠13.

14. Paano natuman ang tagna ni Sofonias sa Ninive?

14 Mga 15 ka tuig lamang pagkatapos mahambal ni Sofonias yadto nga tagna, ang gamhanan nga Ninive ginlaglag, ang palasyo sini nangin kagulub-an. Huo, yadtong bugalon nga siudad ginlaglag sing bug-os. Ang kasangkaron sang paghapay maathag nga gintagna sa sining mga pulong: “Ang pelikano kag ang porcupino magapaligad sing gab-i  sa mga uloulo sang iya [naguba nga] mga haligi. Isa ka tingog ang padayon nga magaamba sa may bintana. Mahanabo ang paghapay sa ganhaan.” (Sofonias 2:​14, 15) Ang mataas nga mga tinukod sang Ninive nagakabagay lamang nga puy-an sang mga porcupino kag mga pelikano. Indi na mabatian sa mga dalan sang siudad ang gahod sang mga negosyante, ang singgit sang mga soldado, ang mga ambahanon sang mga saserdote. Sa masako anay nga mga dalan, isa lamang ka tingog nga nagaamba sing mahagnok sa bintana ang mabatian, ayhan isa ka masubo nga huni sang isa ka pispis ukon mabaskog nga paghuyop sang hangin. Sa kaanggid nga paagi, kabay nga ang tanan nga kaaway sang Dios malaglag!

15. Ano ang matun-an gikan sa natabo sa Filistia, Moab, Amon, kag Asiria?

15 Ano ang matun-an naton sa natabo sa Filistia, Moab, Amon, kag Asiria? Amo ini: Subong mga alagad ni Jehova, indi kita dapat mahadlok sa aton mga kaaway. Makita ni Jehova ang ginahimo sang mga nagapamatok sa iya katawhan. Si Jehova naghikot anay batok sa iya mga kaaway, kag hukman man niya ang bug-os napuy-an nga duta karon. Apang, may mga makalampuwas​—⁠‘isa ka dakung kadam-an gikan sa tanan nga pungsod.’ (Bugna 7:⁠9) Mahimo ikaw malakip sa ila​—⁠apang kon padayon mo lamang nga pangitaon si Jehova, pangitaon ang pagkamatarong, kag pangitaon ang pagkahagop.

Kailo sa Huroshuros nga mga Makasasala!

16. Ano ang ginsiling sang tagna ni Sofonias tuhoy sa mga prinsipe kag relihiosong mga lider sang Juda, kag ngaa ining mga pulong nagakabagay sa Cristiandad?

16 Ang tagna ni Sofonias natuon liwat sa Juda kag Jerusalem. Ang Sofonias 3:​1, 2 nagasiling: “Kailo sa iya nga nagarebelde kag nagadagta sang iya kaugalingon, ang mapiguson nga siudad! Wala sia mamati sa tingog; wala sia magbaton sing disiplina. Wala sia magsalig kay Jehova. Wala sia magpalapit sa iya Dios.” Daw ano kasubo nga ang mga panikasog ni Jehova nga disiplinahon ang iya katawhan wala ginsapak! Makangilil-ad, sa pagkamatuod, ang kapintas sang mga prinsipe, mga  dungganon, kag mga hukom. Ginpakamalaut ni Sofonias ang pagkawalay huya sang relihiosong mga lider, sa pagsiling: “Ang iya mga manalagna mga huroshuros, mga lalaki nga maluib. Ang iya mga saserdote mismo nagpasipala sa butang nga balaan; ginlubag nila ang kasuguan.” (Sofonias 3:​3, 4) Nagakaigo gid ining mga pulong sa kahimtangan sang mga manalagna kag mga saserdote sang Cristiandad karon! Sing huroshuros, gindula nila ang ngalan sang Dios sa ila mga badbad sang Biblia kag nagtudlo sing mga doktrina nga nagamisrepresentar sa Isa nga ginaangkon nila nga ginasimba.

17. Mamati man ukon indi ang mga tawo, ngaa dapat naton padayon nga ibantala ang maayong balita?

17 Mapatugsilingon nga ginpaandaman ni Jehova ang iya dumaan nga katawhan tuhoy sa butang nga pagahimuon niya. Ginpadala niya ang iya mga alagad nga manalagna​—⁠sanday Sofonias kag Jeremias, lakip sa iban pa⁠​—⁠​agod laygayan ang katawhan nga maghinulsol. Huo, ‘si Jehova . . . wala maghimo sing kalautan. Sa tagsa ka aga ginahatag niya ang iya hudisyal nga desisyon. Sa adlaw wala ini magkulang.’ Ano ang reaksion? “Apang ang di-matarong wala makakilala sing kahuya,” siling ni Sofonias. (Sofonias 3:⁠5) Ang kaanggid nga paandam ginapalanog karon. Kon ikaw isa ka manugbantala sing maayong balita, nagapakigbahin ka sa sining hilikuton sa pagpaandam. Padayon nga ibantala ang maayong balita sing walay untat! Mamati man ukon indi ang katawhan, ang imo ministeryo isa ka kadalag-an sa pagtamod sang Dios samtang ginahimo mo ini sing matutom; wala ka sing dapat ikahuya samtang ginahimo mo ang hilikuton sang Dios sing makugihon.

18. Paano matuman ang Sofonias 3:​6?

18 Ang pagpatuman sa paghukom sang Dios indi lamang limitado sa paghapay sa Cristiandad. Ginapasangkad ni Jehova ang iya pagpakamalaut agod ilakip ang tanan nga pungsod: “Ginpapas ko ang mga pungsod; ang ila pamusod nga mga torre nahapay. Ginguba ko ang ila mga dalan, agod nga wala na sing nagaagi. Ang ila mga siudad nalaglag.” (Sofonias 3:⁠6) Masaligan gid ining mga pulong sa bagay nga nagpamulong si Jehova tuhoy sa paglaglag subong nga daw natabo na. Ano ang natabo sa siudad sang Filistia, Moab, kag Amon? Kag kamusta naman ang kapital sang Asiria, ang Ninive? Ang ila kalaglagan isa ka nagapaandam nga halimbawa sa mga pungsod karon. Ang Dios indi dapat tiawtiawan.

Padayon nga Pangitaa si Jehova

19. Anong makapahunahuna nga mga pamangkot ang mahimo naton ipamangkot?

19 Sang panahon ni Sofonias, ang kaakig sang Dios ginpakita sa mga tawo nga malauton nga ‘nagahimo sing malaglagon sang tanan nila nga pakig-angot.’ (Sofonias 3:⁠7) Amo man ang mahanabo sa tion naton. Nakita mo bala ang pamatuod nga ang adlaw sang kaakig ni Jehova malapit na? Padayon mo bala nga ‘ginapangita si Jehova’ paagi sa pagbasa sing regular​—⁠sa adlaw-adlaw⁠​—⁠​sang iya Pulong? Imo bala ‘ginapangita ang pagkamatarong’ paagi sa matinlo-sa-moral nga pagkabuhi nga nahisuno sa mga talaksan sang Dios? Kag imo bala ‘ginapangita ang pagkahagop’ paagi sa pagpakita sing mahagop kag mapinasakupon nga panimuot sa Dios kag sa iya mga kahimusan para sa kaluwasan?

20. Anong mga pamangkot ang binagbinagon naton sa katapusan nga artikulo sining mga serye tuhoy sa tagna ni Sofonias?

20 Kon matutom nga padayunon naton ang pagpangita kay Jehova, sa pagkamatarong, kag sa pagkahagop, makapaabot kita nga maagom naton ang bugana nga pagpakamaayo ni Jehova karon mismo​—⁠huo, bisan sa sining nagatilaw-sing-pagtuo nga “katapusan nga mga adlaw.” (2 Timoteo 3:​1-5; Hulubaton 10:22) Apang mahimo kita mamangkot, ‘Sa anong mga paagi ginapakamaayo kita subong mga alagad ni Jehova sa karon, kag anong mga pagpakamaayo sa palaabuton ang ginapahamtang sang tagna ni Sofonias sa atubangan sang mga pagalipdan sa nagahilapit sing madasig nga adlaw sang kaakig ni Jehova?’

Paano Mo Sabton?

• Paano ‘ginapangita si Jehova’ sang katawhan?

• Ano ang nadalahig sa ‘pagpangita sa pagkamatarong’?

• Paano naton ‘mapangita ang pagkahagop’?

• Ngaa dapat naton padayon nga pangitaon si Jehova, ang pagkamatarong, kag ang pagkahagop?

[Mga Pamangkot sa Pagtinuon]

[Retrato sa pahina 18]

Ginapangita mo bala si Jehova paagi sa pagtuon sa Biblia kag sa hugot nga pangamuyo?

[Retrato sa pahina 21]

Bangod padayon nila nga ginapangita si Jehova, isa ka dakung kadam-an ang makalampuwas sa adlaw sang iya kaakig