Padayon nga Makigdungan sa Organisasyon ni Jehova

“Kabay nga ang Dios sang paghidait . . . magsangkap sa inyo sa tagsa ka maayong butang agod himuon ang iya kabubut-on.”​—⁠HEBREO 13:​20, 21.

1. Ano ang populasyon sang kalibutan, kag pila ang ginaisip subong katapo sang pila ka relihion?

SANG tuig 1999, ang populasyon sang duta naglab-ot sa anom ka bilyon! Ginapakita sang The World Almanac nga sa sini nga kadamuon mga 1,165,000,000 ang mga Muslim; 1,030,000,000 ang mga Romano Katoliko; 762,000,000 ang mga Hindu; 354,000,000 ang mga Budhista; 316,000,000 ang mga Protestante; kag 214,000,000 ang mga Ortodokso.

2. Ano ang masiling tuhoy sa kahimtangan sang mga relihion sa karon?

2 Bangod sang kinatuhayan kag kinagumon sa relihion sa karon, mahimo bala makapanghikot ining tanan nga minilyon nahisuno sa kabubut-on sang Dios? Indi, “bangod ang Dios isa ka Dios, indi sang kagamo, kundi sang paghidait.” (1 Corinto 14:33) Sa pihak nga bahin, kamusta naman ang bug-os kalibutan nga paghiliutod sang mga alagad ni Jehova? (1 Pedro 2:17) Ang mahalungon nga pag-usisa nagapamatuod nga ‘ang Dios sang paghidait nagasangkap sa ila sa tagsa ka maayong butang agod himuon ang iya kabubut-on.’​—⁠Hebreo 13:​20, 21.

3. Ano ang natabo sa Jerusalem sang Pentecostes 33 C.⁠E., kag ngaa?

3 Siempre pa, ang kadamuon sang mga nagapakig-upod sa mga Saksi ni Jehova indi ang basihan sa pagpat-od kon bala ginakahamut-an sila sang Dios; ni ang mga estadistika nagapahamuot sa Dios. Wala niya anay ginpili ang mga Israelinhon bangod sila ang ‘pinakamadamo’ sa mga tawo. Sa katunayan, sila ang “pinakadiutay” sa ila. (Deuteronomio 7:⁠7) Apang bangod ang Israel nangin di-matutom, sang Pentecostes 33 C.⁠E., ginliton ni Jehova ang iya kahamuot sa bag-ong kongregasyon nga ginahuman sang mga sumulunod ni Jesucristo. Ginhaplasan sila sing balaan nga espiritu ni Jehova kag makugi sila nga naglakat sa pagbantala sang kamatuoran tuhoy sa Dios kag kay Cristo sa iban.​—⁠Binuhatan 2:​41, 42.

Dalayon nga Nagauswag

4. Ngaa makasiling ka nga ang unang Cristianong kongregasyon dalayon nga nagauswag?

4 Sang unang siglo, ang Cristianong kongregasyon dalayon nga nagauswag, nagabukas sing bag-ong mga teritoryo, nagahimo sing mga disipulo, kag nagakuha sing dugang pa nga paghangop sa mga katuyuan sang Dios. Ang unang mga Cristiano padayon nga nakigdungan sa espirituwal nga kasanagan nga gin-aman paagi sa mga sulat nga inspirado sang Dios. Bangod ginpapagsik sang mga pagduaw sang mga apostoles kag sang iban pa, natuman nila ang ila  ministeryo. Ginapamatud-an gid ini sang rekord sa Cristianong Griegong Kasulatan.​—⁠Binuhatan 10:​21, 22; 13:​46, 47; 2 Timoteo 1:​13; 4:⁠5; Hebreo 6:​1-⁠3; 2 Pedro 3:​17, 18.

5. Ngaa ang organisasyon sang Dios nagauswag karon, kag ngaa dapat kita padayon nga makigdungan sa sini?

5 Kaangay sa unang mga Cristiano, ang mga Saksi ni Jehova sa karon nag-uswag gikan sa diutay nga ginsuguran. (Zacarias 4:​8-10) Sugod sang talipuspusan nga bahin sang ika-19 nga siglo, may maathag gid nga pamatuod nga ang espiritu sang Dios yara sa iya organisasyon. Bangod nagsandig kita, indi sa tawhanon nga gahom, kundi sa pag-ubay sang balaan nga espiritu, padayon nga nag-uswag kita sa aton paghangop sa Kasulatan kag sa paghimo sang kabubut-on sang Dios. (Zacarias 4:⁠6) Karon nga yari na kita sa “katapusan nga mga adlaw,” kinahanglan gid nga padayon kita nga makigdungan sa nagauswag nga organisasyon ni Jehova. (2 Timoteo 3:​1-⁠5) Nagabulig ini sa aton agod huptan nga buhi ang aton paglaum kag agod makigbahin sa pagpanaksi tuhoy sa natukod na nga Ginharian sang Dios antes laglagon ining sistema sang mga butang.​—⁠Mateo 24:​3-14.

6, 7. Anong tatlo ka bahin ang binagbinagon naton diin nag-uswag ang organisasyon ni Jehova?

6 Upod sa aton amo ang mga tawo nga nagsugod sa pagpakig-upod sa organisasyon ni Jehova sang katuigan 1920, 1930, kag 1940. Sadto nga tinuig, sin-o sa aton ang nagsigahom sang talalupangdon nga pagtubo kag sang progresibo nga pag-uswag sang organisasyon tubtob karon? Hunahunaa lamang ang importante nga mga hitabo sa aton modernong-adlaw nga maragtas! Sa pagkamatuod, makalilipay gid sa espirituwal nga binagbinagon ang ginhimo ni Jehova paagi sa iya katawhan nga organisado sing teokratiko.

7 Si David sang una nagdayaw gid sang ginpamalandungan niya ang makatilingala nga mga binuhatan ni Jehova. “Handumon ko man nga magsugid kag maghambal tuhoy sa sini,” siling niya, “mas madamo ini sangsa akon sarang masugid.” (Salmo 40:⁠5) May kaanggid man kita nga limitasyon, subong nga indi naton masarangan nga isugid ang madamong dalagku kag dalayawon nga mga binuhatan ni Jehova sa aton panahon. Walay sapayan sina, binagbinagon naton ang tatlo ka bahin diin ang organisasyon ni Jehova nag-uswag: (1) progresibo nga espirituwal nga kasanagan, (2) ginpauswag kag ginpasangkad nga ministeryo, kag (3) suno-sa-tion nga mga pagbag-o sa mga pamaagi sang organisasyon.

Nagapasalamat Tungod sa Espirituwal nga Kasanagan

8. Nahisuno sa Hulubaton 4:​18, paano ang espirituwal nga kasanagan nagbulig sa aton nga mahantop ang tuhoy sa Ginharian?

8 Tuhoy sa progresibo nga espirituwal nga kasanagan, ang Hulubaton 4:​18 natuman. Ini nagasiling: “Ang banas sang mga matarong kaangay sang masanag nga kapawa nga nagasanag kag nagasanag tubtob sa himpit nga adlaw.” Daku gid ang pagpasalamat naton tungod sa progresibo nga espirituwal nga kasanagan nga naagom naton! Sa kombension sa Cedar Point, Ohio, sang 1919, ang Ginharian sang Dios ginpadaku. Ginagamit ni Jehova ang Ginharian agod pakabalaanon ang iya ngalan kag bindikahon ang iya pagkasoberano. Sa katunayan, ang espirituwal nga kasanagan nagbulig sa aton agod mahantop nga gikan sa Genesis tubtob Bugna, ang Biblia nagapakita sang katuyuan ni Jehova nga pakabalaanon ang iya ngalan paagi sa Ginharian nga ginagamhan sang iya Anak. Nasandig diri ang labing importante nga paglaum sang tanan nga mahigugmaon sang pagkamatarong.​—⁠Mateo 12:​18, 21.

9, 10. Sang katuigan 1920, ano ang natun-an tuhoy sa Ginharian kag tuhoy sa duha ka magkontrahanay nga organisasyon, kag paano ini nakabulig?

9 Sa kombension sa Cedar Point sang 1922, ang  panguna nga humalambal, si J. F. Rutherford, nagpalig-on sa katawhan sang Dios nga “ibantala, ibantala, ibantala, ang Hari kag ang iya ginharian.” Sa artikulo nga “Birth of the Nation,” nga ginbalhag sa Marso 1, 1925, nga The Watch Tower, ginpatalupangod ang espirituwal nga paghantop tuhoy sa mga tagna nga nagatudlo sa pagtukod sa Ginharian sang Dios sang 1914. Nahantop man sang katuigan 1920 nga may yara duha ka magkontrahanay nga organisasyon​—⁠ang kay Jehova kag ang kay Satanas. Ang inaway yara sa tunga nila, kag yara kita sa magadaug nga bahin kon padayon kita nga makigdungan sa organisasyon ni Jehova.

10 Paano ining espirituwal nga kasanagan nakabulig sa aton? Sanglit ang Ginharian sang Dios kag si Hari Jesucristo indi bahin sang kalibutan, indi man kita mahimo nga mangin bahin sini. Paagi sa pagpabilin nga nahamulag sa kalibutan, ginapakita naton nga nagadampig kita sa kamatuoran. (Juan 17:​16; 18:37) Kon makita naton ang mabudlay nga mga problema nga ginaantos sining malauton nga sistema, daw ano gid ang aton pasalamat nga indi kita bahin sang organisasyon ni Satanas! Kag bulahan gid kita bangod sang aton espirituwal nga kalig-unan sa sulod sang organisasyon ni Jehova!

11. Anong Makasulatanhon nga ngalan ang ginbaton sing pormal sang katawhan sang Dios sang 1931?

11 Sa kombension sa Columbus, Ohio, sang 1931, ang Isaias 43:​10-12 ginhatagan sing nagakaigo nga aplikasyon. Ginbaton sing pormal sang mga Estudyante sang Biblia ang pinasahi nga ngalan nga Mga Saksi ni Jehova. Daw ano gid ka daku nga pribilehiyo nga mapakilala ang ngalan sang Dios agod ang iban mahimo nga magtawag sa sini agod maluwas!​—⁠Salmo 83:​18; Roma 10:⁠13.

12. Anong espirituwal nga kasanagan tuhoy sa dakung kadam-an ang ginhatag sang 1935?

12 Antes sang katuigan 1930, madamo sa katawhan sang Dios ang daw indi sigurado tuhoy sa ila paglaum sa palaabuton nga pagkabuhi. Ginhunahuna sang iban ang langitnon nga kabuhi apang interesado man sila sa mga panudlo sang Biblia tuhoy sa paraiso nga duta. Sa kombension sa Washington, D.C., sang 1935, makakulunyag nga mahibaluan nga ang dakung kadam-an sang Bugna kapitulo 7 isa gali ka klase nga may dutan-on nga paglaum. Sugod sadto, ang pagtipon sa dakung kadam-an nag-uswag sing madasig gid. Wala bala kita nagapasalamat nga indi na tanhaga para sa aton kon paano makilala ang dakung kadam-an? Ang katunayan nga ang mga tawo ginatipon sing tigdamo gikan sa mga pungsod, mga tribo, kag mga hambal nagapahulag sa aton sa pagpangabudlay sing lakas samtang padayon kita nga nagapakigdungan sa organisasyon ni Jehova.

13. Anong daku nga hulusayon ang ginpatalupangod sa kombension sa St. Louis sang 1941?

13 Ang daku nga hulusayon nga dapat kabalak-an sang tawhanon nga katilingban ginpatalupangod sa kombension sa St. Louis, Missouri, sang 1941. Ini amo ang bug-os uniberso nga paggahom, ukon pagkasoberano. Amo ini ang hulusayon nga dapat husayon sa dili madugay, kag ang daku kag makahalawhaw nga adlaw sa paghimo sina madasig nga nagahilapit! Ang ginpatalupangod man sang 1941 amo ang may kaangtanan nga hulusayon sang integridad, nga nagatugot sa aton nga ipakita kon diin kita, subong indibiduwal, nagatindog may kaangtanan sa pagkasoberano sang Dios.

14. Sa internasyonal nga kombension sang 1950, ano ang natun-an tuhoy sa mga prinsipe nga ginsambit sa Isaias 32:​1, 2?

14 Sa internasyonal nga kombension sa New York City sang 1950, ang mga prinsipe sang Isaias 32:​1, 2 husto nga ginpakilala. Isa gid ka makahalawathawat nga tion sang nagpamulongpulong si Utod Frederick Franz sa sini nga tema kag ginpaathag niya nga ang mga prinsipe sang bag-ong duta yara sa tunga naton. Sa sadto nga kombension kag sa mga nagsunod pa, may yara madamong espirituwal nga kapawa nga ginpaiwag. (Salmo 97:11) Daku gid ang aton pasalamat nga ang aton banas “kaangay sang masanag nga kapawa nga nagasanag kag nagasanag”!

Pag-uswag sa Aton Ministeryo

15, 16. (a) Paano kita nag-uswag sa aton ministeryo sang katuigan 1920 kag 1930? (b) Anong mga publikasyon ang nagpapagsik sa Cristianong ministeryo sang ulihi nga mga dekada?

15 Ang ikaduha nga paagi nga ang organisasyon ni Jehova nag-uswag amo ang may kaangtanan sa aton panguna nga hilikuton​—⁠ang pagbantala sing Ginharian kag ang paghimo sing disipulo. (Mateo 28:​19, 20; Marcos 13:10) Agod mahimo ini nga hilikuton, padayon nga ginapadaku sang organisasyon sa aton ang pagkaimportante sang pagpasangkad sang aton ministeryo. Sang 1922 ang tanan  nga Cristiano ginpalig-on sa pagpakigbahin sa pagbantala nga hilikuton. Dapat batunon sang tagsa ka Cristiano ang personal nga salabton nga ipaiwag ang iya kapawa kag sa amo makigbahin sa pagpanaksi sa kamatuoran. (Mateo 5:​14-16) Sang 1927 ginhimo ang mga tikang agod itigana ang Domingo subong isa ka adlaw para sa ministeryo sa latagon. Sugod sang Pebrero 1940, kinaandan na nga makita ang mga Saksi sa mga dalan sa mga distrito sang negosyo nga nagatanyag sing Ang Lalantawan kag Consolation (Magmata! karon).

16 Sang tuig 1937, ginsugdan nga gamiton ang polyeto nga Model Study, nga nagapadaku sang pagkakinahanglanon sang mga pagduaw liwat agod tudluan ang iban sang kamatuoran sang Biblia. Sang mga tinuig pagkatapos sini, ang hilikuton sa pagtuon sing Biblia ginpadaku gid. Labi pa nga ginpadaku ini nga bahin sang ministeryo paagi sa pagbalhag sa libro nga “Pakamatuura ang Dios” sang 1946 kag Ang Kamatuoran nga Nagadul-ong sa Kabuhi nga Dayon sang 1968. Sa karon, ginagamit naton ang libro nga Ang Ihibalo nga Nagadul-ong sa Kabuhi nga Walay Katapusan. Ang pagtuptop sa sining materyal nagapasad sing mabakod nga Makasulatanhon nga sadsaran para sa paghimo sing mga disipulo.

Pag-uswag Paagi sa mga Pagbag-o sa mga Pamaagi Sang Organisasyon

17. Nahisanto sa Isaias 60:​17, paano nag-uswag ang organisasyon ni Jehova?

17 Ang ikatlo nga paagi nga ang organisasyon ni Jehova nag-uswag amo ang may kaangtanan sa mga pagbag-o sa mga pamaagi sang organisasyon. Suno sa Isaias 60:​17, si Jehova nagsaad: “Sa baylo sang saway magadala ako sing bulawan, kag sa baylo sang salsalon magadala ako sing pilak, kag sa baylo sang kahoy, saway, kag sa baylo sang mga bato, salsalon; kag itangdo ko ang paghidait subong imo mga manugdumala kag ang pagkamatarong subong imo mga manughatag sing buluhaton.” Nahisanto sa sining tagna, ginhimo ang mga tikang agod pauswagon ang pagdumala sa hilikuton nga pagbantala sing Ginharian kag pagbantay sa panong.

18, 19. Ano ang mga pagbag-o sa mga pamaagi sang organisasyon sa sulod sang mga tinuig?

18 Sang 1919 isa ka direktor sa pag-alagad ang gintangdo sa tagsa ka kongregasyon nga nagapangabay nga organisahon para sa pag-alagad sa latagon. Nagpapagsik ini sang aton pagministeryo sa latagon. Ang pagpili sa mga gulang kag mga deakono gintapos sang 1932, nga nagpatimaan sang pagtaliwan naton sa demokratiko nga mga paagi. Isa pa ka importante nga butang ang natabo sang 1938 sang ang tanan nga alagad sa kongregasyon gintangdo nga labi pa nga nahisanto sa mga kahimusan sang teokratiko nga pagtangdo sa unang Cristianong kongregasyon. (Binuhatan 14:​23; 1 Timoteo 4:14) Sang 1972 ang mga manugtatap kag mga ministeryal nga alagad gintangdo sa pag-alagad, subong sang ginhimo anay sang amo sini nga mga lalaki sa tunga sang unang mga Cristiano. Sa baylo nga isa lamang ka lalaki ang magaalagad subong manugtatap sang kongregasyon, ginapakita sang Filipos 1:⁠1 kag sang iban pa nga mga kasulatan nga yadtong nakasunod sa Makasulatanhon nga mga tulumanon para sa mga manugtatap ginahuman sang isa ka hubon sang mga gulang.​—⁠Binuhatan 20:​28; Efeso 4:​11, 12.

19 Sang 1975 ginpatuman ang kahimusan para dumalahan sang mga komite sang Nagadumala nga Hubon sang mga Saksi ni Jehova ang bug-os kalibutan nga mga hilikuton sang organisasyon sang Dios. Ang mga Komite sang Sanga gintangdo sa pagtatap sa hilikuton sa ila mga teritoryo. Sugod sadto, ginhatagan sing igtalupangod ang pagpasimple sa hilikuton sa mga ulong-talatapan kag sa mga sanga sang Watch Tower Society agod ‘pat-uron ang mas importante nga mga butang.’ (Filipos 1:​9, 10) Ang mga responsabilidad nga ginpaabaga sa mga kabulig nga manugbantay ni Cristo nagalakip sang pagpanguna sa hilikuton sa pag-ebanghelyo, pagtudlo sa kongregasyon, kag pagbantay sing nagakaigo sa panong sang Dios.​—⁠1 Timoteo 4:​16; Hebreo 13:​7, 17; 1 Pedro 5:​2, 3.

Ang Aktibo nga Pagpanguna ni Jesus

20. Ang padayon nga pagpakigdungan sa organisasyon ni Jehova nagakinahanglan nga kilalahon naton ang ano tuhoy sa posisyon ni Jesus?

20 Ang padayon nga pagpakigdungan sa nagauswag nga organisasyon ni Jehova nagakinahanglan nga kilalahon naton ang gintangdo-sang-Dios nga papel ni Jesucristo subong “ulo sang kongregasyon.” (Efeso 5:​22, 23) Talalupangdon, man, amo ang Isaias 55:⁠4, diin ginsilingan kita: “Yari karon! Subong saksi sa pungsudnon nga mga grupo ginhatag  ko [ni Jehova] sia, subong lider kag kumandante sa pungsudnon nga mga grupo.” Si Jesus nakahibalo gid kon paano manguna. Kilala man niya ang iya mga karnero kag nahibaluan ang ila mga binuhatan. Sa katunayan, sang gin-usisa niya ang pito ka kongregasyon sa Asia Minor, nagsiling sia sing lima ka beses: “Nahibaluan ko ang imo mga buhat.” (Bugna 2:​2, 19; 3:​1, 8, 15) Nahibaluan man ni Jesus ang aton mga kinahanglanon, kaangay sang iya Amay, si Jehova. Antes ihatag ang Huwaran nga Pangamuyo, si Jesus nagsiling: “Ang Dios nga inyo Amay nakahibalo kon ano nga mga butang ang kinahanglan ninyo antes pa kamo mangayo sa iya.”​—⁠Mateo 6:​8-13.

21. Paano makita ang pagpanguna ni Jesus sa Cristianong kongregasyon?

21 Paano makita ang pagpanguna ni Jesus? Ang isa amo ang paagi sa Cristianong mga manugtatap, ang “dulot nga mga lalaki.” (Efeso 4:⁠8) Ginalaragway sang Bugna 1:​16 ang hinaplas nga mga manugtatap subong nga yara sa tuo nga kamot ni Cristo, sa idalom sang iya pagdumala. Sa karon, ginatuytuyan ni Jesus ang kahimusan para sa mga gulang, may langitnon man ukon dutan-on nga paglaum ini nga mga lalaki. Subong sang ginpaathag sa nauna nga artikulo, gintangdo sila sang balaan nga espiritu suno sa ginapatuman sang Kasulatan. (1 Timoteo 3:​1-⁠7; Tito 1:​5-⁠9) Sang unang siglo, isa ka grupo sang mga tigulang sa Jerusalem ang nagahuman sang nagadumala nga hubon nga nagatatap sang mga kongregasyon kag sang hilikuton nga pagbantala sing Ginharian sa kabilugan. Amo man sini nga sulundan ang ginasunod sa sulod sang organisasyon ni Jehova sa karon.

Padayon nga Makigdungan!

22. Ano nga bulig ang ginaaman sang Nagadumala nga Hubon?

22 Ang mga intereses sang Ginharian sa duta gintugyan sa “matutom kag mainandamon nga ulipon,” nga ginarepresentar sang Nagadumala nga Hubon sang mga Saksi ni Jehova. (Mateo 24:​45-47) Ang Nagadumala nga Hubon interesado gid sa pag-aman sing espirituwal nga panudlo kag panuytoy sa Cristianong kongregasyon. (Binuhatan 6:​1-⁠6) Apang, kon ang mga masigkasumilimba maapektuhan sang kinaugali nga mga kalamidad, ang Nagadumala nga Hubon nagapangabay sa isa ukon kapin pa nga legal nga ahensia agod maghatag sing bulig kag agod magkay-o ukon magtukod liwat sang naguba nga mga puluy-an kag mga Kingdom Hall. Kon ang pila ka Cristiano ginapakig-angutan sing mapintas ukon ginahingabot, ginahimo ang mga tikang agod pabakuron sila sa espirituwal. Kag sa “magamo nga panahon,” ginahimo ang tanan nga panikasog agod padayon nga mag-uswag ang pagbantala nga hilikuton.​—⁠2 Timoteo 4:​1, 2.

23, 24. Ano man ang matabo sa iya katawhan, ano ang dalayon nga ginaaman ni Jehova, kag ano ang dapat nga determinasyon naton?

23 Ano man ang matabo sa iya katawhan, si Jehova dalayon nga nagaaman sing espirituwal nga pagkaon kag kinahanglanon nga panuytoy. Nagahatag man ang Dios sing paghantop kag paghangop sa masaligan nga mga kauturan nga lalaki agod makahanda para sa dugang pa nga pag-uswag kag pagbag-o sa mga paagi sang teokratikong organisasyon. (Deuteronomio 34:⁠9; Efeso 1:​16, 17) Pat-od gid nga si Jehova nagaaman sang aton kinahanglanon agod mahimo naton ang aton hilikuton nga paghimo sing disipulo kag matuman ang aton ministeryo sa bug-os nga kalibutan.​—⁠2 Timoteo 4:⁠5.

24 Nagasalig kita sing bug-os nga indi pagpabay-an ni Jehova ang iya matutom nga katawhan; luwason niya sila sa nagapakari nga “dakung kapipit-an.” (Bugna 7:​9-14; Salmo 94:​14; 2 Pedro 2:⁠9) May rason gid kita agod huptan ang aton una nga pagsalig tubtob sa katapusan. (Hebreo 3:14) Busa, mangin determinado kita nga padayon nga makigdungan sa organisasyon ni Jehova.

Paano Mo Sabton?

• Ngaa makasiling kita nga ang organisasyon ni Jehova padayon nga nagauswag?

• Ano ang pamatuod nga ang katawhan sang Dios nagaagom sing progresibo nga espirituwal nga kasanagan?

• Ano ang mga pag-uswag sa Cristianong ministeryo?

• Anong suno-sa-tion nga mga pagbag-o ang ginhimo sa mga pamaagi sang organisasyon sa tunga sang mga alagad ni Jehova?

[Mga Pamangkot sa Pagtinuon]

[Retrato sa pahina 17]

Kaangay ni David, indi naton masugid ang tanan nga makatilingala nga binuhatan ni Jehova

[Retrato sa pahina 18]

Ang panong sang Dios nakabenepisyo sa suno-sa-tion nga mga pagbag-o sa mga pamaagi sang organisasyon