Daw Ano Kasangkad ang Imo Gugma?

“Higugmaa ang imo isigkatawo subong sang imo kaugalingon.”​—⁠MATEO 22:⁠39.

1. Kon ginahigugma naton si Jehova, ngaa dapat man naton higugmaon ang aton isigkatawo?

SANG ginpamangkot si Jesus kon ano ang labing daku nga sugo, nagsabat sia: “Higugmaa si Jehova nga imo Dios sa bug-os mo nga tagipusuon kag sa bug-os mo nga kalag kag sa bug-os mo nga hunahuna.” Nian, ginbalikwat niya ang ikaduha nga sugo nga kaanggid sa nahauna: “Higugmaa ang imo isigkatawo subong sang imo kaugalingon.” (Mateo 22:​37, 39) Huo, ang gugma sa isigkatawo isa ka tanda sang isa ka Cristiano. Sa pagkamatuod, kon ginahigugma naton si Jehova, dapat naton higugmaon ang aton isigkatawo. Ngaa? Bangod ginapakita naton ang aton gugma sa Dios paagi sa pagtuman sa iya Pulong, kag ang iya Pulong nagasugo sa aton nga higugmaon ang aton isigkatawo. Gani, kon wala naton ginahigugma ang aton mga kauturan, ang aton gugma sa Dios indi mahimo mangin matuod.​—⁠Roma 13:​8; 1 Juan 2:​5; 4:​20, 21.

2. Ano nga sahi sang gugma dapat naton higugmaon ang aton isigkatawo?

2 Sang nagsiling si Jesus nga dapat naton higugmaon ang aton isigkatawo, indi lamang pag-abyanay ang ginhambalan niya. Kag ginpatuhuyan niya ang gugma nga tuhay sa kinaugali nga nagaluntad sa sulod sang mga pamilya ukon sa ulot sang lalaki kag babayi. Ginhambalan niya ang tuhoy sa sahi sang gugma ni Jehova sa iya dedikado nga mga alagad kag ang ila gugma sa iya. (Juan 17:​26; 1 Juan 4:​11, 19) Ang Judiyong escriba​—⁠nga, subong sang paghantop ni Jesus, naghambal sing maalamon⁠​—⁠​nag-ugyon kay Jesus nga ang gugma sa Dios dapat nga “sa bug-os nga tagipusuon kag sa bug-os nga paghangop kag sa bug-os nga kusog.” (Marcos 12:​28-34) Husto sia. Ang gugma nga ginapalambo sang isa ka Cristiano para sa Dios kag para sa isigkatawo nagadalahig sang aton mga emosyon kag sang aton hunahuna. Mabatyagan ini sa tagipusuon kag ginatuytuyan sang hunahuna.

3. (a) Paano gintudluan ni Jesus ang “lalaki nga batid sa Kasuguan” nga dapat may masangkad sia nga pagtamod sa kon sin-o ang iya isigkatawo? (b) Paano ang ilustrasyon ni Jesus naaplikar sa mga Cristiano karon?

 3 Subong sang ginreport ni Lucas, sang nagsiling si Jesus nga dapat naton higugmaon ang aton isigkatawo, “ang isa ka lalaki nga batid sa Kasuguan” namangkot: “Sin-o gid bala ang akon isigkatawo?” Si Jesus nagsabat paagi sa isa ka parabola. Ang lalaki ginbakol, ginkawatan, kag ginbilin nga halos patay sa higad-dalan. Naglabay una ang isa ka saserdote kag dayon ang isa ka Levinhon. Ang duha wala magsapak sa iya. Sang ulihi, nag-abot ang isa ka Samaritano, nakita ang pilason nga lalaki, kag nagpanghikot nga may daku nga kaayo sa iya. Sin-o sa tatlo ang isigkatawo sa lalaki nga pilason? Ang sabat maathag. (Lucas 10:​25-37) Ang lalaki nga batid sa Kasuguan mahimo nakibot nga nabatian si Jesus nga nagasiling nga ang isa ka Samaritano mas maayo nga isigkatawo sangsa isa ka saserdote kag isa ka Levinhon. Sing maathag, ginbuligan ni Jesus yadto nga lalaki nga higugmaon ang iya isigkatawo sa mas masangkad pa nga paagi. Ang mga Cristiano nagahigugma man sa sini nga paagi. Binagbinaga ang tanan nga ginapakitaan sang ila gugma.

Gugma sa Sulod Sang Pamilya

4. Diin, una, ginapakita sang isa ka Cristiano ang gugma?

4 Ginahigugma sang mga Cristiano ang mga katapo sang ila pamilya​—⁠ginahigugma sang mga asawa ang mga bana, ginahigugma sang mga bana ang mga asawa, ginahigugma sang mga ginikanan ang mga kabataan. (Manugwali 9:​9; Efeso 5:​33; Tito 2:4) Matuod, ang mga higot sang kinaugali nga gugma nagaluntad sa kalabanan nga mga pamilya. Apang, ang mga balita tuhoy sa nawasdak nga mga pamilya, pag-abuso sang tiayon, kag napatumbayaan ukon naabusuhan nga mga kabataan nagapakita nga ang pamilya ginahul-an sa karon, kag ang kinaugali nga mga balatyagon sa pamilya mahimo nga indi bastante agod hugpungon ini sing tingob. (2 Timoteo 3:​1-3) Agod mangin madinalag-on gid ang kabuhi sang ila pamilya, ang mga Cristiano kinahanglan nga maghimo sang sahi sang gugma nga ginpakita ni Jehova kag ni Jesus.​—⁠Efeso 5:​21-27.

5. Kay sin-o nagapangayo sing bulig ang mga ginikanan sa pagpadaku sa ila mga kabataan, kag ano ang nangin mga resulta para sa madamo?

5 Ginatamod sang Cristianong mga ginikanan ang ila mga kabataan subong isa ka bilidhon nga butang nga gintulin ni Jehova sa ila, kag nagapangayo sila sa iya sing bulig sa pagpadaku sa ila. (Salmo 127:​3-5; Hulubaton 22:6) Sa sining paagi ginapalambo nila ang Cristianong gugma, nga nagabulig sa ila agod bantayan ang ila mga kabataan batok sa nagapalain nga mga impluwensia nga mahimo mahulog ang mga pamatan-on. Subong resulta, madamong Cristianong ginikanan ang nakaagom sing kalipay nga kaanggid sa naagom sang isa ka iloy sa Netherlands. Sa tapos makita ang pagpabawtismo sang iya anak nga lalaki​—⁠isa sang 575 ka indibiduwal nga nabawtismuhan sa Netherlands sang nagligad nga tuig⁠​—⁠​nagsulat sia sang masunod: “Sa sini nga tion, ang akon panikasog sang nagligad nga 20 ka tuig ginpadyaan. Ang tanan nga tion kag kusog​—⁠subong man ang kasakit, panikasog, kag kasubo⁠​—⁠​nalimtan na.” Malipayon gid sia nga ang iya anak, sa iya kaugalingon nga pagbuot, namat-od sa pag-alagad kay Jehova. Ang kataason sang 31,089 ka manugbantala nga nagreport sa Netherlands sang nagligad nga tuig nagalakip sa madamo nga nagtuon gikan sa ila mga ginikanan nga higugmaon si Jehova.

6. Paano ang Cristianong gugma nagabulig sa pagpabakod sang higot sa pag-asawahay?

6 Gintawag ni Pablo ang gugma nga “himpit nga higot sang paghiusa,” kag mahimo sini maamligan ang pag-asawahay bisan sa mabudlay nga mga tion. (Colosas 3:​14, 18, 19; 1 Pedro 3:​1-7) Sang ang isa ka lalaki sa Rurutu, isa ka diutay nga pulo mga 700 kilometros halin sa Tahiti, nagsugod sa pagtuon sa Biblia upod sa mga Saksi ni Jehova, ang iya asawa nagpamatok sing daku. Sang ulihi, gindala sang asawa ang mga kabataan, ginbiyaan ang iya bana, kag nagpuyo sa Tahiti. Apang, ginpakita sang bana ang iya gugma paagi sa regular nga pagpadala sing kuwarta sa iya asawa kag paagi sa pagtelepono sa iya agod hibaluon kon may kinahanglan sila sang mga kabataan. Sa amo ginhimo niya ang iya bug-os nga masarangan agod tumanon ang iya Cristianong mga obligasyon. (1 Timoteo 5:8) Nagpangamuyo sia pirme nga magbalik ang iya pamilya, kag sang ulihi ang iya asawa nagbalik. Sang nagbalik sia, ginpakig-angutan niya sia nga may “gugma, pagbatas, malum-ok sing buot.” (1 Timoteo 6:11) Sang 1998, ang bana ginbawtismuhan kag nalipay gid sia sang ulihi sang ang iya asawa nagpasugot sa pagtuon sa Biblia. Ina nga pagtuon isa sang 1,351 nga ginahimo sa teritoryo sa idalom sang sanga sang Tahiti sang nagligad nga tuig.

7. Suno sa isa ka lalaki sa Alemanya, ano ang nagpabakod sang iya pag-asawahay?

7 Sa Alemanya ang isa ka lalaki nagpamatok sa  interes sang iya asawa sa kamatuoran sang Biblia kag nakumbinsi nga luyag sang mga Saksi ni Jehova nga tiplangon ang iya asawa. Apang, sang ulihi, nagsulat sia sa Saksi nga nahauna nga nakigsugilanon sa iya asawa: “Salamat tungod sa pagpakilala mo sa akon asawa sa mga Saksi ni Jehova. Sang primero, nahangawa ako bangod madamo ako sing malain nga butang nga nabatian tuhoy sa ila. Apang karon, pagkatapos makatambong sa mga miting upod sa akon asawa, narealisar ko nga nagsayop gid gali ako. Nahibaluan ko nga nagapamati ako sa kamatuoran, kag naghimo ini sang amon pag-asawahay nga mas mabakod.” Ang 162,932 ka Saksi ni Jehova sa Alemanya​—⁠kag ang 1,773 sa kapuluan sa idalom sang sanga sang Tahiti⁠​—⁠​nagalakip sa madamong pamilya nga nahiusa sa diosnon nga gugma.

Gugma sa Aton Cristianong mga Kauturan

8, 9. (a) Sin-o ang nagatudlo sa aton nga higugmaon ang aton mga kauturan, kag ano ang ginapahulag sang gugma nga himuon naton? (b) Maghatag sing isa ka halimbawa kon paano ang gugma nagabulig sa mga kauturan nga mangin masinakdagon.

8 Si Pablo nagsiling sa mga Cristiano sa Tesalonica: “Kamo gid natudluan sang Dios nga maghigugmaanay sa isa kag isa.” (1 Tesalonica 4:9) Huo, ang mga “gintudluan ni Jehova” nagahigugmaanay sa isa kag isa. (Isaias 54:13) Ang ila gugma makita sa buhat, subong sang ginpakita ni Pablo sang nagsiling sia: “Paagi sa gugma magpaulipon kita sa isa kag isa.” (Galacia 5:​13; 1 Juan 3:18) Ginahimo nila ini, halimbawa, kon ginaduaw nila ang nagamasakit nga mga kauturan, ginapalig-on ang mga napung-awan, kag ginasakdag ang mga maluya. (1 Tesalonica 5:14) Ang aton matuod nga Cristianong gugma nagaamot sa pagtubo sang aton espirituwal nga paraiso.

9 Sa Ancón Congregation​—⁠isa sang 544 ka kongregasyon sa Ecuador⁠​—⁠​ang mga kauturan nagpakita sang ila gugma sa praktikal nga paagi. Bangod sang krisis sa pinansial, ang mga manugbantala nadulaan sing trabaho ukon kita, gani namat-od sila sa pagpangita sing kuwarta paagi sa pagbaligya sing pagkaon sa lokal nga mga mangingisda kon magpauli sila sa pagpangisda sa gab-i. Ang tanan nagbuligay, lakip ang mga kabataan. Kinahanglan sila magsugod sa ala 1:​00 s.a. agod handa na ang pagkaon sa alas 4:​00 s.a. kon magpauli ang mga mangingisda. Ginpartida sang mga kauturan ang kuwarta nga kinita suno sa ila kinahanglanon. Ginpakita sining pagbinuligay ang matuod nga Cristianong gugma.

10, 11. Paano naton mapakita ang gugma sa mga kauturan nga indi naton kilala sing personal?

10 Apang, ang aton gugma indi lamang limitado  sa mga Cristiano nga kilala naton sing personal. Si apostol Pedro nagsiling: “Higugmaa ang bug-os nga katilingban sang mga kauturan.” (1 Pedro 2:17) Ginahigugma naton ang aton tanan nga kauturan bangod sila tanan masigkasumilimba kay Jehova nga Dios. Ang mga panahon sang krisis mahimo mangin isa ka higayon agod ipakita ini nga gugma. Halimbawa, sadtong 2000 nga tuig sa pag-alagad, ang grabe nga mga baha nagtuga sing daku nga kahalitan sa Mozambique, kag bangod sang padayon nga inaway sibil sa Angola, madamo ang nangin puraot. Ang madamo sang 31,725 ka kauturan sa Mozambique kag 41,222 sa Angola naapektuhan sining mga hitabo. Gani, ang mga Saksi sa kaingod nga Bagatnan nga Aprika nagpadala sing madamo kaayo nga bulig agod pahaganhaganon ang kalisdanan sang ila mga kauturan sa sining mga pungsod. Ang ila kahanda sa pag-amot sang ila “sobra” sa ila nagakinahanglan nga mga kauturan nagpakita sang ila gugma.​—⁠2 Corinto 8:​8, 13-15, 24.

11 Makita man ang gugma kon ang mga kauturan sa madamo nga pungsod mag-amot para sa pagtukod sing mga Kingdom Hall kag mga Assembly Hall sa imol nga mga pungsod. Ang isa ka halimbawa amo ang sa Solomon Islands. Walay sapayan sang daku nga kagamo, ang Solomon Islands may yara 6-porsiento nga pag-uswag sa mga manugbantala sang nagligad nga tuig, nga may kataason nga 1,697. Nagplano sila sa pagpatindog sing Assembly Hall. Walay sapayan nga madamo nga tagapulo ang nagbiya sa pungsod, ang mga boluntaryo nag-abot halin sa Australia agod magbulig sa pagpatindog. Sang ulihi, ang mga boluntaryo kinahanglan magbiya, apang sa tapos lamang nga mahanas nila ang mga kauturan sa sini nga pungsod sa paghuman sang pundasyon. Ang prefabricated steel structure (ginhimo nga daan kag itabidtabid na lang nga balayan nga salsalon) sang tilipunan ginpadala halin sa Australia, kag ang paghuman sa sining matahom nga tinukod para sa pagsimba​—⁠sa tion nga madamo nga ginapatindog ang ginbayaan⁠​—⁠​mangin isa ka maayo nga panaksi sa ngalan ni Jehova kag sa gugma sang mga kauturan.

Kaangay Sang Dios, Ginahigugma Naton ang Kalibutan

12. Paano naton ginailog si Jehova sa aton panimuot sa mga indi pareho sang aton pagtuo?

12 Ang aton bala gugma limitado lamang sa aton pamilya kag sa aton paghiliutod? Indi, kon kita “mga manug-ilog sang Dios.” Si Jesus nagsiling: “Ginhigugma gid sang Dios ang kalibutan sa bagay nga ginhatag niya ang iya bugtong nga Anak, agod nga ang bisan sin-o nga magtuo sa iya indi mawala kundi may kabuhi nga walay katapusan.” (Efeso 5:​1; Juan 3:16) Kaangay ni Jehova nga Dios, nagapanghikot kita sing mahigugmaon sa tanan​—⁠lakip sa mga indi pareho sang aton pagtuo. (Lucas 6:​35, 36; Galacia 6:10) Sa sini nga bahin ilabi na, ginabantala naton ang maayong balita sang Ginharian kag ginasugid sa iban ang mahigugmaon nga dalagku nga buhat sang Dios tungod sa ila. Mahimo ini magresulta sa kaluwasan sang bisan sin-o nga magapamati.​—⁠Marcos 13:​10; 1 Timoteo 4:⁠16.

13, 14. Ano ang pila ka eksperiensia sang mga kauturan nga nagpakita sing gugma sa mga indi Saksi, bisan nga may daku nga di-kasulhayan sa kaugalingon?

13 Binagbinaga ang apat ka espesyal payunir nga mga ministro sa Nepal. Ginpadala sila sa isa ka siudad sa bagatnan-katundan sang pungsod, kag sa nagligad nga lima ka tuig, ginpakita nila ang ila gugma paagi sa mapailubon nga pagpanaksi sa siudad kag sa kaiping nga mga minuro. Agod matuptupan ang ila teritoryo, masunson sila nagalakbay sing madamo nga inoras sakay sa bisikleta sa mga temperatura nga sobra sa 40 degrees Celsius. Bangod sang ila gugma kag “pagbatas sa hilikuton nga maayo,” natigayon ang maayong mga resulta sang naporma ang isa ka grupo sang pagtinuon sa libro sa isa sang mga minuro. (Roma 2:7) Sang Marso 2000, 32 ka tawo ang nagtambong sa pagpamati sa pamulongpulong publiko sang nagaduaw nga manugtatap sa sirkito. Ang Nepal may kataason nga 430 ka manugbantala sang nagligad nga tuig​—⁠9 porsiento nga pag-uswag. Maathag gid nga ginapakamaayo ni Jehova ang kakugi kag gugma sang mga kauturan sa sina nga pungsod.

14 Sa Colombia ang temporaryo nga mga espesyal payunir nagbantala sa mga Wayuu Indian. Agod mahimo ini, dapat sila magtuon sing bag-ong lenguahe, apang ang ila mahigugmaon nga interes ginpadyaan sang 27 ang nagtambong sa pamulongpulong publiko walay sapayan sang mabunok nga ulan. Ang mahigugmaon nga kakugi subong sang ginpakita sining mga payunir nag-amot sa 5-porsiento nga pag-uswag sa Colombia kag sa kataason nga 107,613 ka manugbantala. Sa Denmark luyag gid sang isa ka tigulang nga utod nga babayi nga ibantala ang maayong balita sa iban, apang may sablag sia. Wala maluyahan sing buot, ginpakig-angutan niya ang mga interesado  paagi sa sulat. Sa karon, nagasulat sia sa 42 ka tawo kag nagadumala sing 11 ka pagtuon sa Biblia. Isa sia sa kataason nga 14,885 ka manugbantala nga nagreport sa Denmark sang nagligad nga tuig.

Higugmaa ang Imo mga Kaaway

15, 16. (a) Suno kay Jesus, daw ano kasangkad dapat ang aton gugma? (b) Paano ginpakig-angutan sing mahigugmaon sang responsable nga mga kauturan ang isa ka tawo nga naghimo sing butig nga mga panumbungon batok sa mga Saksi ni Jehova?

15 Si Jesus nagsiling sa lalaki nga batid sa Kasuguan nga ang Samaritano mahimo tamdon subong isa ka isigkatawo. Sa iya Sermon sa Bukid, si Jesus nagsiling pa sing dugang: “Nabatian ninyo nga ginsiling, ‘Higugmaa ang imo isigkatawo kag dumti ang imo kaaway.’ Apang, ginasiling ko sa inyo: Padayon nga higugmaa ang inyo mga kaaway kag ipangamuyo ang mga nagahingabot sa inyo; agod mapamatud-an ninyo ang inyo kaugalingon nga mga anak sang inyo Amay nga yara sa mga langit.” (Mateo 5:​43-45) Bisan pa nga ang isa nagapamatok sa aton, ginatinguhaan naton nga ‘padayon nga daugon ang malaut paagi sa maayo.’ (Roma 12:​19-21) Kon mahimo, ginapaambit naton sa iya ang aton labing bilidhon nga pagkabutang, ang kamatuoran.

16 Sa Ukraine ang isa ka artikulo sa Kremenchuk Herald nga pamantalaan nagsiling nga ang mga Saksi ni Jehova isa ka makatalagam nga sekta. Serioso ini bangod sa Europa amo sini ang ginasiling sang iban tuhoy sa mga Saksi ni Jehova agod buyukon ang mga tawo nga balabagan ukon dumilian ang hilikuton sang mga Saksi. Gani, ang editor ginsugilanon kag ginpangabay sa pagbalhag sing press release nga nagatadlong sa artikulo. Nagpasugot sia, apang upod sa release, nag-imprinta sia sing isa ka pahayag nga ang orihinal nga artikulo napasad sa katunayan. Gani ginsugilanon sia liwat sang responsable nga mga kauturan dala ang dugang pa nga impormasyon. Sang ulihi, narealisar sang editor nga ang orihinal nga artikulo sala gali, kag nagbalhag sia sing isa ka pagbawi sa una nga ginbalhag. Ang pagpakig-angot sa iya sing tampad kag sing mainayuhon amo ang mahigugmaon nga paagi sa paglubad sini nga problema, kag nagdul-ong ini sa maayo nga resulta.

Paano Naton Mapalambo ang Gugma?

17. Ano ang nagapakita nga mahimo nga indi pirme mahapos ang magpanghikot sing mahigugmaon sa iban?

17 Kon ang isa ka lapsag mabun-ag, ginahigugma sia gilayon sang iya mga ginikanan. Ang mahigugmaon nga pagpakig-angot sa mga adulto indi pirme tuman ka duna. Amo ina ang mahimo nga rason kon ngaa ang Biblia sulitsulit nga nagasugo sa aton nga maghigugmaanay sa isa kag isa​—⁠butang ini nga dapat naton palambuon. (1 Pedro 1:​22; 4:​8; 1 Juan 3:11) Nakahibalo si Jesus nga ang aton gugma  pagatilawan sang nagsiling sia nga dapat naton patawaron ang aton utod sing “tubtob sa kapituan kag pito ka beses.” (Mateo 18:​21, 22) Si Pablo naglaygay man sa aton nga “magpinaumuray sa isa kag isa.” (Colosas 3:​12, 13) Indi katingalahan nga ginsilingan kita: “Himud-usi ninyo ang gugma”! (1 Corinto 14:1) Paano naton ini mahimo?

18. Ano ang magabulig sa aton agod mapalambo ang gugma sa iban?

18 Una, mahimo naton pirme dumdumon ang aton gugma kay Jehova nga Dios. Ini nga gugma isa ka mabakod nga pagpalig-on agod higugmaon ang aton isigkatawo. Ngaa? Bangod kon ginahimo naton ini, nagapabanaag ini sing maayo sa aton langitnon nga Amay kag nagadala sing himaya kag kadayawan sa iya. (Juan 15:​8-10; Filipos 1:​9-11) Ikaduha, mahimo naton tinguhaan nga tan-awon ang mga butang suno sa pagtan-aw sa sini ni Jehova. Kada makasala kita, nagapakasala kita batok kay Jehova; apang, sa liwat kag liwat ginapatawad niya kita kag padayon nga ginahigugma kita. (Salmo 86:​5; 103:​2, 3; 1 Juan 1:​9; 4:18) Kon ginapalambo naton ang pagtamod ni Jehova, mahuyog kita nga higugmaon ang iban kag patawaron ang ila kasal-anan batok sa aton. (Mateo 6:12) Ikatlo, mahimo naton pakig-angutan ang iban subong sang luyag naton nga ipakig-angot nila sa aton. (Mateo 7:12) Bangod di-himpit kita, masunson kita nagakinahanglan sing kapatawaran. Halimbawa, kon maghambal kita sing mga butang nga nagasaklaw sa iban, nagalaum kita nga dumdumon nila nga ang tanan nagapakasala paagi sa dila sa tion kag tion. (Santiago 3:2) Kon luyag naton ang iban nga makig-angot sa aton sing mahigugmaon, dapat naton sila pakig-angutan sing mahigugmaon.

19. Paano naton mahimo pangayuon ang bulig sang balaan nga espiritu sa pagpalambo sing gugma?

19 Ikap-at, mahimo naton pangayuon ang bulig sang balaan nga espiritu bangod ang gugma bahin sang bunga sang espiritu. (Galacia 5:​22, 23) Ang mga pag-abyanay, mga balatyagon sa pamilya, kag romantiko nga gugma masunson nga duna. Apang kinahanglan naton ang bulig sang espiritu ni Jehova agod mapalambo ang gugma ni Jehova, ang gugma nga isa ka himpit nga higot sang paghiusa. Mahimo naton pangayuon ang bulig sang balaan nga espiritu paagi sa pagbasa sa inspirado nga Biblia. Halimbawa, kon ginatun-an naton ang kabuhi ni Jesus, makita naton kon paano sia nakig-angot sa mga tawo, kag matun-an naton nga ilugon sia. (Juan 13:​34, 35; 15:12) Dugang pa, mahimo naton pangayuon kay Jehova ang balaan nga espiritu, ilabi na sa mga kahimtangan nga nabudlayan kita sa pagpanghikot sing mahigugmaon. (Lucas 11:13) Sa katapusan, mahimo naton mahimud-usan ang gugma paagi sa pagpabilin nga suod sa Cristianong kongregasyon. Ang pagpakig-upod sa mahigugmaon nga mga kauturan nagabulig sa aton nga mapalambo ang gugma.​—⁠Hulubaton 13:⁠20.

20, 21. Anong tumalagsahon nga pamatuod sang gugma ang ginpakita sang mga Saksi ni Jehova sadtong 2000 nga tuig sa pag-alagad?

20 Sang nagligad nga tuig, may kataason nga 6,035,564 ka manugbantala sing maayong balita sa bug-os nga kalibutan. Ang mga Saksi ni Jehova naghinguyang sing kabug-usan nga 1,171,270,425 ka oras sa pagpangita sa mga indibiduwal agod sugiran sila tuhoy sinang maayong balita. Bangod sang gugma, nabatas nila ang init, ulan, kag tugnaw samtang ginahimo nila ini nga hilikuton. Bangod sang gugma, nasugilanon nila ang mga kabutho kag mga kaupod sa trabaho kag napalapitan ang mga tawo nga indi kilala sa mga dalan kag sa iban pa nga mga duog. Madamo sang ginaduaw sang mga Saksi ang wala nagasapak, ang pila nagapamatok. Apang, ang iban nagpakita sing interes, amo nga 433,454,049 ka pagduaw liwat ang nahimo kag 4,766,631 ka pagtuon sa Biblia ang gindumalahan.⁠ *

21 Isa gid ka pamatuod ini tanan sang gugma sang mga Saksi ni Jehova sa ila Dios kag sa ila isigkatawo! Ina nga gugma indi gid magbugnaw. Nagasalig kita nga sa 2001 nga tuig sa pag-alagad, daku pa nga panaksi ang ihatag sa katawhan. Kabay nga ang pagpakamaayo ni Jehova padayon nga yara sa iya mainunungon kag makugi nga mga sumilimba samtang ‘ginahimo nila ang ila tanan nga hilikuton sa gugma’!​—⁠1 Corinto 16:⁠14.

[Nota]

^ par. 20 Para sa kompleto nga detalye sang Report sa 2000 nga Tuig sa Pag-alagad, tan-awa ang tsart sa pahina 18-21.

Mapaathag Mo Bala?

• Sin-o ang ginailog naton kon ginahigugma naton ang aton isigkatawo?

• Daw ano dapat kasangkad ang aton gugma?

• Ano ang pila ka eksperiensia nga nagapamatuod sang Cristianong gugma?

• Paano naton mapalambo ang Cristianong gugma?

[Mga Pamangkot sa Pagtinuon]

 [Tsart sa pahina 18-21]

2000 NGA REPORT SANG PAG-ALAGAD SANG MGA SAKSI NI JEHOVA SA BUG-OS KALIBUTAN

 (Tan-awa ang bound volume)

[Mga retrato sa pahina 15]

Ang Cristianong gugma mahimo maghugpong sing tingob sang isa ka pamilya

[Mga retrato sa pahina 17]

Ang gugma nagapahulag sa aton nga ipaambit ang aton paglaum sa iban