Ngaa Dapat Ka Mangamuyo?

“NAGAPANGAYO kamo, apang wala kamo makabaton, bangod nagapangayo kamo sa malain nga katuyuan . . . Magpalapit kamo sa Dios, kag magapalapit sia sa inyo.” (Santiago 4:3, 8) Ini nga mga pulong sang disipulo ni Jesus nga si Santiago mahimo magpalig-on sa aton nga binagbinagon ang aton mga rason sa pagpangamuyo.

Ang pangamuyo indi lamang isa ka paagi sang pagsugid sa Dios sang aton kinahanglanon. Sa iya bantog nga Sermon sa Bukid, si Jesus nagsiling: “[Ang] inyo Amay nakahibalo kon ano nga mga butang ang kinahanglan ninyo antes pa kamo mangayo sa iya.” Apang, nagsiling man si Jesus: “Padayon sa pagpangayo, kag ihatag ini sa inyo.” (Mateo 6:8; 7:7) Gani luyag ni Jehova nga sugiran naton sia sang aton kinahanglanon. Apang kapin pa sa sina ang pangamuyo.

Ang matuod nga mag-abyanay wala lamang nagasugilanunay kon may kinahanglan sila. Interesado sila sa kada isa, kag labi nga nagabakod ang ila pag-abyanay kon ginapabutyag nila ang ila balatyagon. Sing kaanggid, kapin pa ang katuyuan sang pangamuyo sangsa mangayo lamang sang mga kinahanglanon. Nagahatag ini sing kahigayunan agod mapabakod ang aton kaangtanan kay Jehova paagi sa pagpabutyag sang aton tinagipusuon nga debosyon sa iya.

Huo, ginhatag sang Dios sa aton ang pribilehiyo sang pangamuyo agod makapalapit kita sa iya. Matabo lamang ini kon ipabutyag naton ang aton mismo mga balatyagon sa Dios sa baylo nga  magbungat sing saulado nga mga pangamuyo. Isa gid ka kalipay nga masugilanon si Jehova sa pangamuyo! Dugang pa, ang isa ka hulubaton sa Biblia nagasiling: “Ang pangamuyo sang mga matadlong kalahamut-an sa iya.”—Hulubaton 15:8.

“Para sa akon, ang pagpalapit sa Dios maayo sa akon,” amba ni salmista Asaf. (Salmo 73:28) Apang agod makapalapit sa Dios, indi lang kita dapat mangamuyo. Talupangda kon paano ini ginapakita sang masunod nga kasaysayan:

“Ang isa sang mga disipulo [ni Jesus] nagsiling sa iya: ‘Ginuo, tudlui kami kon paano mangamuyo.’” Bilang sabat nagsiling si Jesus: “Kon magpangamuyo kamo, magsiling, ‘Amay, pakabalaanon ang imo ngalan. Magkari ang imo ginharian.’” (Lucas 11:1, 2) Makapangamuyo bala kita sing may kahulugan kon wala anay naton mahibaluan kon ano ang ngalan sang Dios kag kon paano ini pakabalaanon? Kag makapangamuyo bala kita nahisuno sini nga mga pulong ni Jesus kon wala naton mahangpan kon ano ang Ginharian sang Dios? Mahangpan naton ini nga mga butang kon usisaon naton sing maayo ang Biblia. Ang matigayon nga ihibalo gikan sa sini magabulig sa aton nga makilala ang Dios kag ang iya mga dalanon. Dugang pa, ang personal nga pagkilala kay Jehova nga Dios labi pa nga magapasuod sa aton kag magahimo sa aton nga labi pa ka debotado sa iya. Magabulig naman ini sa aton nga masugilanon sia sa pangamuyo sing mas hilway.

Malubad Sang Pangamuyo ang mga Problema

Ang pagpalambo sing suod nga kaangtanan kay Jehova magabulig sa aton nga malubad ang mga problema. Talupangda kon paano ini nagbulig sa tagsa sang masunod nga mga kahimtangan. Ginapakita sini nga napabakod sang mga nagapangamuyo ang ila kaangtanan kay Jehova.

Sa Brazil nangayo si Maria sing bulig sa Dios paagi sa pangamuyo. Luyag niya magrebelde batok sa ginabaton nga mga talaksan sang pagginawi bangod sang pagkasalimpapaw nga nakita niya sa katilingban. Ginbiyaan pa gani ni Maria ang iya bana, kabataan, kag puluy-an. Nagsugod man sia sa paggamit sing droga. Apang sang wala sia makasapo sing kalipay, ginpabutyag niya sa Dios ang iya balatyagon kag nangamuyo sing bulig.

Wala madugay, duha ka Saksi ni Jehova ang nagduaw kag nagbilin kay Maria sing isa ka guwa sang Ang Lalantawan nga nagabinagbinag sa kabilihanan sang pagbaton sang panuytoy sang Dios. Natandog sini ang iya tagipusuon, kag nagsugod sia sa pagtuon sing Biblia upod sa mga Saksi sadto mismo nga adlaw. Nagdul-ong ini sang ulihi nga mapasag-uli ang iya pamilya. Samtang nagatuon sia tuhoy kay Jehova, luyag niya ipabutyag ang iya gugma para sa iya. “Nag-uswag ang akon pagginawi,” siling ni Maria. “Nagpamatok sang primero ang akon bana kag pamilya sa akon pagtuon sa Biblia. Apang sang nakita nila ang akon mga pag­bag-o, ginpalig-on nila ako.” Sang ulihi, gindedikar ni Maria ang iya kabuhi sa Manugpamati sang pangamuyo agod mag-alagad sa iya.

Bisan pa si José may matahom nga asawa kag matin-ad nga negosyo sa Bo­livia, indi sia malipayon. Bangod sang pagpangerida, ginbiyaan sia sang iya asawa. Nagpahubog sia kag nagbatyag nga wala sing pulos. Si José nagsiling: “Nagpangamuyo gid ako sing hugot, nagapamangkot kon ano ang dapat ko himuon agod mapahamut-an ang Dios. Wala madugay ginduaw sang mga Saksi ni Jehova ang lugar sang akon negosyo kag nagtanyag sing walay bayad nga pagtuon sa Biblia, apang ginpahalin ko sila. Tatlo ka beses nga amo sini ang natabo. Kada mangayo ako sing bulig sa pangamuyo, nagaabot sila. Sang ulihi, namat-od ako nga mamati sa masunod nga tion. Nabasa ko na ang bug-os nga Biblia kag may madamo nga pamangkot, apang pirme sila may mga sabat nga nagapaayaw sa akon. Ang pagtuon tuhoy kay Jehova naghatag sa akon sing ­bag-o nga katuyuan sa kabuhi, kag ang akon mga abyan sa tunga sang mga Saksi makapalig-on gid nga mga halimbawa! Ginbiyaan ko ang akon babayi kag ang akon mga barkada sa pag-inom. Wala magdugay, nagbalik ako sa akon asawa kag kabataan. Ginbawtismuhan ako sang maaga nga bahin sang 1999.”

Sa Italya, may problema ang pag-asawahay nanday Tamara, gani nangamuyo sia sing kaalam. Nangin masingki sia bangod ginsakit kag ginpalayas sia sa pamilya sa edad nga 14. Si Tamara nagsiling: “Nakakita ako sing Biblia kag ginbasa ko ini. Isa ka gab-i, nabasa ko nga ‘ang pagpangita sing kaalam subong sang pagpangita sing bahandi nga natago.’ Ginpangamuyo ko ina nga kaalam. (Hulubaton 2:1-6) Pagkaaga, nagduaw ang mga Saksi ni Jehova. Nagtuon ako sing Biblia upod sa ila,  apang madugay pa nga naaplikar ko ang akon natun-an. Sang ulihi, namat-od ako nga sundon ang Cristianong dalanon sang pagkabuhi kag nabawtismuhan. Sa karon, kaupod sang akon bana, ginabuligan ko ang iban nga makapanginpulos gikan sa kaalam sang Dios.”

Bahin si Beatriz sang alta sosiedad sa Caracas, Vene­zue­la. Apang, diborsiada sia kag ginasit-an. Bangod desperado, isa ka bes nangamuyo sia sing inoras. Sang masunod nga aga, nagtunog ang door­bell. Naugot nga naglili sia sa buho kag nakita niya ang isa ka mag-asawa nga nagabitbit sing bag. Nagpakunokuno sia nga wala sa balay, apang antes maglakat ang mag-asawa, ginsuok nila ang hand­bill sa idalom sang puwertahan. “Hibalua ang Imo Biblia,” mabasa sa sini. May labot ayhan ang ila pagduaw sa iya mga pangamuyo sang nagligad nga ­gab-i? Gintawag niya sila agod magbalik. Wala madugay nagtuon sia sing Biblia, kag sang ulihi ginbawtismuhan sia. Malipayon gid man sang ulihi, ginatudluan karon ni Beatriz ang iban kon paano makasapo sing kalipay.

Ginpangamuyo ni Carmen ang iya sobra nga kaimulon. May napulo sia ka bata kag palahubog nga bana, si Rafael. “Nagapanglabada ako agod makakita sing kuwarta,” siling ni Carmen. Apang naglain pa gid ang pagkapalahubog ni Rafael. “Sang nagtuon lamang kami sing Biblia upod sa mga Saksi ni Jehova nga nagsugod sa pagbag-o ang akon bana. Natun-an namon ang panaad sang Ginharian—nga dulaon sa indi madugay ni Jehova sa kalibutan ang kaimulon kag pagpigos. Nasabat gid man sang ulihi ang akon mga pangamuyo sa Dios!” Ang pagtuon tuhoy sa mga dalanon ni Jehova nagbulig kay Rafael nga untatan ang pag-inom, kag ginsuklob niya ang “bag-o nga personalidad.” (Efeso 4:24) Napauswag nila sang iya pamilya ang ila pagpangabuhi. Si Rafael nagsiling: “Bisan pa indi kami manggaranon, kag wala kami sing kaugalingon nga balay, apang may yara kami sang mga kinahanglanon sa kabuhi, kag malipayon kami.”

Kon ang Tanan nga Pangamuyo Pagasabton

Nakabulig bala ang pagpangamuyo sa sini nga mga tawo? Pat-od gid! Kag natalupangdan mo bala nga sa kalabanan nga kahimtangan nasabat ang ila mga pangamuyo sang may isa gikan sa Cristianong kongregasyon nga nagbulig sa ila sa pagpalapit kay Jehova nga Dios paagi sa pagtuon sing Biblia?—Binuhatan 9:11.

Gani, nian, may maayo kita nga mga rason sa pagpangamuyo. Malapit na karon nga pagasabton ang pangamuyo nga magkari ang Ginharian sang Dios kag matuman ang iya kabubut-on sa duta. (Mateo 6:10) Sa tapos dulaon sang Dios sa duta ang mga nagapamatok sa iya, “ang duta pat-od gid nga matugob sang ihibalo ni Jehova.” (Isaias 11:9) Nian ang tanan nga nagahigugma kay Jehova magaagom sang “mahimayaon nga kahilwayan sang mga anak sang Dios.”—Roma 8:18-21.

[Retrato sa pahina 7]

Nahibaluan mo bala kon ngaa dapat kita mangamuyo?