Magdiretso sa kaundan

Magdiretso sa listahan sang kaundan

Mga Pamangkot Gikan sa mga Bumalasa

Mga Pamangkot Gikan sa mga Bumalasa

 Mga Pamangkot Gikan sa mga Bumalasa

Bangod sang mga sugo sang Biblia tuhoy sa nagakaigo nga paggamit sing dugo, paano ginatamod sang mga Saksi ni Jehova ang mga pamaagi sa pagbulong nga nagagamit sang kaugalingon nga dugo?

Sa baylo nga mamat-od pasad lamang sa personal nga luyag sang isa ukon sa pila ka rekomendasyon sang mga doktor, dapat binagbinagon sing serioso sang tagsa ka Cristiano kon ano ang ginasiling sang Biblia. Isa ini ka butang sa tunga nila ni Jehova.

Si Jehova, nga sa iya utang naton ang aton kabuhi, nagsugo nga ang dugo indi dapat pagkaunon. (Genesis 9:3, 4) Sa Kasuguan para sa dumaan nga Israel, ginlimitehan sang Dios ang paggamit sing dugo bangod nagarepresentar ini sang kabuhi. Sia nagsugo: “Ang kalag [ukon kabuhi] sang unod yara sa dugo, kag ginbutang ko mismo ini sa halaran para sa inyo agod mangin katumbas para sa inyo mga kalag.” Ano naman kon mag-ihaw ang isa ka tawo sang sapat agod kaunon? Ang Dios nagsiling: “Dapat niya iula ang dugo sini kag tabunan ini sang yab-ok.” * (Levitico 17:11, 13) Ginsulitsulit ni Jehova ini nga sugo. (Deuteronomio 12:16, 24; 15:23) Ang Judiyong Soncino Chumash nagsiling: “Ang dugo indi dapat taguon kundi kabigon nga indi takus kaunon paagi sa pag-ula sini sa duta.” Wala sing Israelinhon nga magbahinbahin, magtago, kag maggamit sang dugo sang iban nga tinuga, nga ang kabuhi ginapanag-iyahan sang Dios.

Ang obligasyon nga sundon ang Mosaikong Kasuguan natapos sang napatay ang Mesias. Apang, ang pagtamod sang Dios tuhoy sa pagkabalaan sang dugo amo gihapon. Ginpahulag sang balaan nga espiritu sang Dios, ginsugo sang mga apostoles ang mga Cristiano nga ‘maglihi sa dugo.’ Ina nga sugo indi dapat pagpasapayanan. Subong ini ka importante sa paglihi sa seksuwal nga imoralidad ukon idolatriya. (Binuhatan 15:28, 29; 21:25) Sang ang pagdonar kag pagpatayon sing dugo nangin kinaandan sang ika-20 nga siglo, nahangpan sang mga Saksi ni Jehova nga ini nga buhat nagasumpakil sa Pulong sang Dios. *

Sa pulupanag-on, ang doktor magapalig-on sa pasyente nga ipatago ang iya mismo dugo mga senemana antes sang operasyon (preoperative autologous blood donation, ukon PAD) agod nga kon kinahanglanon, matayunan niya ang pasyente sang iya natago nga dugo. Apang, inang pagtipon, pagtago, kag pagtayon sing dugo direkta nga nagasumpakil sa ginasiling sang Levitico kag Deuteronomio. Ang dugo indi dapat taguon; dapat ini iula—ibalik sa Dios, kon sa aton pa. Matuod, ang Mosaikong Kasuguan wala na karon  ginapatuman. Walay sapayan sina, ginatahod sang mga Saksi ni Jehova ang mga prinsipio nga ginlakip sang Dios sa sini, kag determinado sila nga ‘maglihi sa dugo.’ Busa, wala kita nagadonar sing dugo, ni nagapatago para ipatayon ang aton dugo nga dapat “iula.” Ina nga buhat nagasumpakil sa kasuguan sang Dios.

Ang iban pa nga mga pamaagi ukon mga pag-usisa nga nagalakip sa dugo mismo sang isa indi gid maathag nga nagasumpakil sa ginsiling nga mga prinsipio sang Dios. Halimbawa, madamo nga Cristiano ang nagatugot sa pagpakuha sing dugo agod usisaon ukon analisahon, diin pagkatapos sini ginahaboy ang sampol. Ang iban pa mas masibod nga mga pamaagi nga nagalakip sa dugo sang isa mahimo man irekomendar sang mga doktor.

Halimbawa, sa tion sang pila ka operasyon, ang iban nga dugo mahimo ginapalikaw halin sa lawas sa isa ka proseso nga ginatawag hemodilution. Ang dugo nga nabilin sa pasyente ginapalus-aw. Pagkatapos sini, ang iya dugo nga yara sa guwa sang lawas ginapasulod liwat sa iya, sa amo nagapabalik sang kataason sang dugo sa normal nga kahimtangan. Sing kaanggid, ang dugo nga nagailig sa pilas mahimo supton kag salaon agod ang pula nga mga selula sarang mauli sa pasyente; ginatawag ini nga cell salvage (pagsalbar sa selula). Sa tuhay nga proseso, ang dugo mahimo pailigon pakadto sa isa ka makina nga temporaryo nga nagahimo sang kinaandan nga hilikuton sang mga organo sang lawas (halimbawa, tagipusuon, mga baga, ukon mga batobato). Ang dugo gikan sa makina ginauli dayon sa pasyente. Sa iban nga mga pamaagi, ang dugo ginapalikaw sa isa ka separator (centrifuge) agod ang may diperensia ukon depektuso nga mga bahin kuhaon. Ukon ang tulumuron amo ang pagpain sang pila ka elemento sang dugo kag paggamit sini sa iban nga bahin sang lawas. May mga pag-usisa man diin ang pila ka dugo ginakuha agod ngalanan ini ukon isimbog ini sa medisina, kag pagkatapos sini ginabalik sa pasyente.

Ang mga detalye mahimo nagkalainlain, kag ang bag-o nga mga pamaagi, mga pagbulong, kag mga pagtilaw pat-od nga himuon. Indi naton responsabilidad nga analisahon ang tagsa ka kinatuhayan kag maghimo sing desisyon. Ang isa ka Cristiano dapat magdesisyon para sa iya kaugalingon kon paano gamiton ang iya dugo kon ginaoperahan, ginatilawan sa medikal, ukon sa panahon nga ginabulong. Sing abanse, dapat niya hibaluon gikan sa doktor ukon sa teknisyan ang mga katunayan kon ano ang mahimo nga himuon sa iya dugo sa tion sang pagbulong. Nian dapat sia mamat-od suno sa ginatugot sang iya konsiensia. (Tan-awa ang kahon.)

Dapat dumdumon sang mga Cristiano ang ila dedikasyon sa Dios kag obligasyon nga ‘higugmaon sia sa ila bug-os nga tagipusuon, bug-os nga kalag, bug-os nga kusog, kag bug-os nga hunahuna.’ (Lucas 10:27) Indi kaangay sang kalabanan sa kalibutan, ginapakabahandi gid sang mga Saksi ni Jehova ang ila maayong kaangtanan sa Dios. Ang Manughatag-Kabuhi nagapalig-on sa tanan nga magsalig sa ginpatulo nga dugo ni Jesus. Aton mabasa: “Paagi sa iya [Jesucristo] nahilway kita paagi sa gawad paagi sa dugo sinang isa, huo, ang kapatawaran sang aton mga kalapasan.”—Efeso 1:7.

[Nota]

^ par. 4 Si Propesor Frank H. Gorman nagsulat: “Ang pag-ula sang dugo mahangop gid subong buhat sang pagsimba nga nagapakita sang pagtahod sa kabuhi sang sapat kag, busa, sa pagtahod sa Dios, nga nagtuga kag padayon nga nagaatipan sinang kabuhi.”

^ par. 5 Ang The Watchtower sang Hulyo 1, 1951, nagsabat sang panguna nga mga pamangkot tuhoy sini nga butang, nagapakita kon ngaa ang pagpatayon sang gindonar nga dugo indi nagakaigo.

[Kahon/Mga retrato sa pahina 31]

MGA DAPAT IPAMANGKOT SA KAUGALINGON

Kon ang pila sang akon dugo ginapalikaw sa guwa sang akon lawas kag ang pag-ilig mahimo mauntat sing makadali, magatugot bala ang akon konsiensia nga tamdon ining dugo subong akon gihapon bahin, sa amo wala nagakinahanglan nga ini ‘iula sa duta’?

Matublag bala ang akon nahanas-sa-Biblia nga konsiensia kon sa tion sang pagsayasat ukon pamaagi sa pagpabulong ang pila sang akon dugo ginkuha, gin-islan, kag ginbalik (ukon ginpasulod) sa akon lawas?