Ang Madugay nga Pagpangita Ginpadyaan

“JEHOVA? Sin-o si Jehova?” Nakita sangotso-anyos nga si Silvia ang ngalan sa isa ka Armenianhon nga Biblia, nga isa ka bahandi sang pamilya nga ginpakita sa iya sang isa pa ka bata nga babayi. Nagpulupamangkot sia, apang wala sing isa sa Yereban, Armenia, nga ginapuy-an niya, ang makasugid sa iya kon ­sin-o si Jehova—ang iya mga ginikanan, ang iya mga manunudlo, bisan ang mga ministro sa simbahan sa ila lugar indi makasugid sa iya.

Nagdaku si Silvia, nakatapos sa pag-eskwela, kag nagtrabaho, apang wala niya gihapon makilala kon ­sin-o si Jehova. Sang nagahuluhamtong na, nagpalagyo sia gikan sa Armenia, kag sang ulihi nagdangat sia sa Poland kag nag-istar sa isa ka diutay nga hulot kaupod sang iban pa nga mga refu­gee. May nagaduaw pirme sa isa niya ka kaupod sa hulot. “Sin-o ang mga bisita mo?” pamangkot ni Silvia. “Mga Saksi ni Jehova sila, kag nagaduaw sila agod tudluan ako sa Biblia,” amo ang sabat.

Nalipay gid si Silvia sang mabatian niya ang ngalan nga Jehova. Sa katapusan, nasugdan gid man niya nga tun-an kon ­sin-o si Jehova kag kon ano sia ka mahigugmaon nga Dios. Apang, wala madugayi kag kinahanglan na sia nga maghalin sa Poland. Nagdangop sia sa Denmark, sa tabok sang Baltic Sea. Diutay lamang nga mga pagkabutang ang gindala niya, apang lakip sa sini amo ang mga literatura sa Biblia nga ginbalhag sang mga Saksi ni Jehova. Sa pahina sa likod sang isa ka publikasyon, nakita ni Silvia ang listahan sang mga direksion sang mga sanga talatapan sang Watch ­Tower So­ciety. Amo yadto ang isa sang iya pinakaimportante nga mga pagkabutang—ang butang nga makabulig sa iya nga makatigayon sing kaangtanan kay Jehova!

Sa Denmark, gindala si Silvia sa isa ka kampo sang mga refu­gee, kag ginpangita niya sa gilayon ang mga Saksi ni Jehova. Gikan sa iya listahan sang mga direksion, nahibaluan niya nga ang sanga talatapan sang Watch ­Tower So­ciety sa Denmark yara sa banwa sang ­Holbæk. Apang diin ayhan ina? Ginsaylo si Silvia sa lain nga kampo sakay sa tren, kag pakadto didto, naglabay ang tren sa ­Holbæk! Sa liwat, nalipay gid sia.

Sang isa ka mainit nga adlaw sa tapos sadto, nagsakay sa tren si Silvia pabalik sa ­Holbæk kag naglakat halin sa estasyon pakadto sa sanga talatapan. Nadumduman niya: “Sang nagsulod ako sa hardin, nagpungko ako sa bangko kag nagmuno, ‘Paraiso ini!’” Mainit sia nga gin-abiabi sa sanga kag sa ulihi nakatigayon sia sang iya kaugalingon nga pagtuon sa Biblia.

Apang nagsunod ang madamo nga pagsaylosaylo. Sa sunodsunod nga mga sentro sang mga refu­gee, ginpangita ni Silvia ang mga Saksi ni Jehova kag sulitsulit nga nagsugod sa pagtuon sa Biblia. Apang, paglipas sang duha ka tuig, madamo na sia sing natun-an agod idedikar ang iya kabuhi kay Jehova. Ginbawtismuhan sia kag wala madugay pagkatapos sadto nagsulod sia sa bug-os tion nga ministeryo. Sang 1998 ang mga awtoridad sang Denmark naghatag sa iya sing ­asylum (proteksion nga ginahatag sang isa ka pungsod sa mga ­refugee).

Beinte-seis anyos na karon si Silvia kag nagaalagad sa duog nga nagpahanumdom sa iya sang paraiso, ang sanga talatapan sang mga Saksi ni Jehova sa Denmark. “Ano pa ang masiling ko?” siling niya karon. “Ginpangita ko si Jehova kutob sang bata pa ako. Karon nakita ko na sia. Handum ko nga gamiton ang akon kabuhi sa pag-alagad sa iya, kag yari ako karon sa ­Bethel. Ginapangamuyo ko nga mangin puluy-an ko ini sa maabot nga tinuig!”