Magdiretso sa kaundan

Magdiretso sa listahan sang kaundan

Nagapati bala Ikaw sa Indi Mo Makita?

Nagapati bala Ikaw sa Indi Mo Makita?

 Nagapati bala Ikaw sa Indi Mo Makita?

KON ang isa magsiling, ‘Nagapati lamang ako sa akon makita,’ wala sia nagahambal sing literal. Ang matuod, kita tanan nagapati sa mga butang nga indi naton makita.

Halimbawa, mahimo nga naghimo ka sing eksperimento sa eskwelahan agod pamatud-an ang pagluntad sang bato-balani. Ang eksperimento mangin kaangay sini: Isabwag ang pudpod nga mga salsalon sa isa ka panid sang papel. Nian itungtong ang papel sa bato-balani. Kon pitikon ang papel, daw madyik nga nagapungyot sa tunga ang salsalon kag nagaporma suno sa korte sang bato-balani. Kon himuon mo ina, makita  gid bala nimo ang bato-balani? Indi, apang ang epekto sini sa pudpod nga salsalon maathag nga makita, nagahatag sa imo sing makapakumbinsi nga pamatuod nga nagaluntad ang bato-balani.

Ginabaton naton nga wala sing duhaduha ang iban pa nga mga butang nga indi naton makita. Kon nagalantaw kita sa isa ka matahom nga painting ukon natahuman sa isa ka eskultura, wala naton ginaduhaduhaan ang pagluntad sang isa ka pintor ukon isa ka eskultor. Busa kon ginahimutaran naton ang isa ka busay ukon ginatan-aw ang pagtunod sang adlaw, indi bala dapat nga mapahulag kita sa di-magkubos sa pagbinagbinag sang posibilidad nga ini mga binuhatan sang isa ka Bantog nga Dibuhista ukon Eskultor?

Kon Ngaa ang Iban Wala Nagapati

Apang, ang pila ka tawo wala na magtuo sa Dios bangod sang gintudlo sa ila sa simbahan. Amo sini ang natabo sa isa ka tawo nga taga-Norway nga ginsilingan nga ginasunog sang Dios ang malauton sa kalayuhon nga impierno. Indi mahangpan sini nga tawo kon ano nga sahi sang Dios ang magapaantos sang mga tawo sa sina nga paagi, gani nangin atiesta sia.

Apang, sang ulihi, nagsugot ang tawo nga usisaon ang Biblia, sa bulig sang isa sang mga Saksi ni Jehova. Nakibot sia nga mahibaluan nga ang Biblia wala nagatudlo nga ang malauton ginapaantos sa kalayuhon nga impierno. Ang Biblia nagapaanggid sang kamatayon sa pagtulog. Sa lulubngan, wala kita sing mabatyagan nga kasakit; wala kita sing hinalung-ong. (Manugwali 9:​5, 10) Natun-an man niya nga ang mga tawo nga ginahukman sang Dios subong batinggilan nga mga malauton magapabilin sa lulubngan sing dayon. (Mateo 12:​31, 32) Ang nabilin sang mga patay pagabanhawon sa gintalana nga tion sang Dios, nga may paglaum nga makatigayon sing kabuhi nga walay katapusan sa Paraiso. (Juan 5:​28, 29; 17:⁠3) Makatarunganon ini nga paathag. Nagahisanto ini sa ginasiling sang Biblia nga ang “Dios gugma.” (1 Juan 4:⁠8) Ining sinsero nga tawo nagpadayon sang iya pagtuon sa Pulong sang Dios kag, sang ulihi, naghigugma sa Dios sang Biblia.

Ang iban nagasikway sang pagluntad sang mahigugmaon nga Manunuga bangod sang paglapnag sang mga pag-antos kag inhustisya. Nagaugyon sila sa isa ka tawo nga taga-Sweden nga nagtudlo anay sang langit kag namangkot: “Paano nga may isa ka labing gamhanan, maalwan gid nga Dios didto sa ibabaw samtang may madamo kita nga kagarukan kag kalautan diri sa idalom?” Bangod wala sing makasabat sang iya pamangkot, nangin atiesta man sia. Sang ulihi nagtuon sia sing Biblia upod sa mga Saksi ni Jehova. Natun-an niya nga ang Pulong sang Dios nagahatag sing makaalayaw nga sabat sa madugay na  nga pamangkot, Ngaa ginatugutan sang Dios ang kalautan? *

Natun-an sining sinsero nga tawo nga ang pagluntad sang kalautan wala mismo nagapamatuod nga ang Dios wala nagaluntad. Sa pag-ilustrar: Ang isa ka tawo mahimo magdesinyo sang isa ka sundang nga gamiton sa paghiwa sing karne. Mahimo baklon sang isa ka kustomer ang sundang kag gamiton ini, indi agod maghiwa sing karne, kundi agod magpatay. Ang katunayan nga ang sundang wala gingamit sing nagakaigo wala gid nagahimutig sang pagluntad sang naghimo sini. Sing kaanggid, ang katunayan nga ang duta wala gingamit suno sa katuyuan sini wala nagakahulugan nga wala ini sing Manunuga.

Ginatudlo sang Biblia nga ang binuhatan sang Dios himpit. Sa iya “wala sing inhustisya; matarong kag matadlong sia.” (Deuteronomio 32:⁠4) Nagahatag ang Dios sing maayong mga dulot sa tawo, apang ang pila ka mga dulot wala gingamit sing maayo, nga nagresulta sa tuman nga pag-antos. (Santiago 1:17) Apang, tapuson sang Dios ang pag-antos. Pagkatapos sini, “ang mga mahagop magapanubli sang duta, . . . kag magapuyo sila sing dayon sa sini.”​—⁠Salmo 37:​11, 29.

Ang tawo nga taga-Sweden nga ginsambit kaina natandog sang makita niya ang pag-antos sang mga isigkatawo. Sa pagkamatuod, ang iya mapinalanggaon nga pag-ulikid sa iban nagapamatuod sang pagluntad sang Dios. Paano?

Sa kalabanan nga mga tawo, ang lamang nga pililian sa pagpati sa Dios amo ang pagpati sa ebolusyon. Ang mga ebolusyonista nagatudlo sang “mabilin ang mabakod”​—⁠nga ang mga tawo kag mga sapat nagapaindisanay sa ila mismo mga sahi agod mabuhi. Ang mabakod mabuhi; ang labing maluya mapatay. Amo sini ang natural nga kahimusan sang mga butang, siling nila. Apang kon “natural” para sa mga maluya nga mapatay agod hatagan sing lugar ang mabakod, paano naton mapaathag ang kamatuoran nga, kaangay sang taga-Sweden nga tawo, ang pila ka mabaskog nga mga tawo natandog sang makita ang pag-antos sang ila isigkatawo?

Pagkilala sa Dios

Indi naton makita ang Dios bangod wala sia sing tawhanon nga porma. Apang, luyag sang Dios nga makilala naton sia. Ang isa ka paagi nga makilala naton sia amo ang pag-obserbar sa iya di-kinaandan nga mga buhat​—⁠ang mga “painting” kag mga “eskultura” sang pagpanuga. Sa Roma 1:​20, ang Biblia nagasiling: “Ang di-makita nga mga kinaiya [sang Dios] maathag nga makita kutob sang gintuga ang kalibutan, bangod mahantop ini paagi sa mga butang nga ginhimo, bisan ang iya dayon nga gahom kag pagka-Dios.” Huo, subong nga ang pagtuon sa isa ka painting ukon sa isa ka eskultura makabulig sa imo nga mahibaluan ang personalidad sang dibuhista, ang pagpamalandong sa makatilingala nga mga binuhatan sang Dios makabulig sa imo nga mahibaluan sing maayo ang iya mga kinaiya.

Sa pagkamatuod, indi naton masabat ang tanan nga makalilibog nga mga pamangkot tuhoy sa kabuhi paagi lamang sa paglantaw sa mga tinuga sang Dios. Apang makita naton ang mga sabat sa sina nga mga pamangkot paagi sa pag-usisa sa Pulong sang Dios, ang Biblia. Paagi sa pagbasa sa Biblia nga may bukas nga panghunahuna nga ang duha ka tawo nga ginsambit kaina naghinakop nga ang Dios nagaluntad kag nagaulikid sia kon ano ang nagakatabo sa aton.

[Nota]

^ par. 8 Para sa dugang nga impormasyon kon ngaa ginapahanugutan sang Dios ang kalautan, palihug tan-awa ang libro nga Is There a Creator Who Cares About You?, kapitulo 10, nga ginbalhag sang Watchtower Bible and Tract Society of New York, Inc.

[Picture Credit Line sa pahina 28]

J. Hester and P. Scowen (AZ State Univ.), NASA