Maghalin sa Makatalagam nga Duog!

HILIKUTON sang mga volcanologist nga obserbahan kag tun-an sing maayo ang ebidensia kag dayon magpaandam tuhoy sa nagapakari nga mga paglupok sang bulkan. (Sang naglupok ang Mount Fugen, dapat pahalinon sang mga pulis ang mga tawo sa makatalagam nga duog.) Sing kaanggid, nakita sang mga estudyante sang Biblia ang tanda sang “katapusan sang sistema sang mga butang” kag ginpahanda ang iban sa nagahilapit nga katalagman.​—⁠Mateo 24:⁠3.

Sa kapitulo man sang Biblia nga nagapaandam tuhoy sa nagahilapit nga kapahamakan sa bug-os nga kalibutan, mabasa naton ini nga paglaragway sa una nga mga matabo: “Ang pungsod magatindog batok sa pungsod kag ang ginharian batok sa ginharian, kag may kakulang sa pagkaon kag mga linog sa nagakalainlain nga mga duog. . . . Magalutaw ang madamong butig nga manalagna kag magapatalang sa madamo; kag bangod sang pagbuad sang pagkamalinapason ang gugma sang kalabanan magabugnaw. . . . Kag ining maayong balita sang ginharian ibantala sa bug-os napuy-an nga duta subong panaksi sa tanan nga kapungsuran; kag ugaling magaabot ang katapusan.”​—⁠Mateo 24:​7-14.

Indi na kinahanglan nga mangin mga manug-usisa pa kita sang balita agod mahantop ang karon nga katumanan sini nga tagna. Ilabi na kutob sang 1914, naeksperiensiahan naton ini. Sa sini nga siglo natabo ang duha ka bug-os kalibutan nga inaway, madamo gid nga inaway sibil, lokal nga mga inaway, kag mga inaway bangod sang kinatuhayan sa rasa kag relihion. Ang katawhan nag-antos sing kakulang sa pagkaon bangod sina nga mga inaway, dugang sa kinawala nga gintuga sang kinaugali nga mga kalamidad. Madamo nga kabuhi ang nadula bangod sang mga linog. Nagtuhaw ang mga kulto nga may maduhaduhaan nga mga lider kag panatiko nga mga sumulunod. Wala na nagapakita sing gugma ang mga tawo bangod sang “pagbuad sang pagkamalinapason,” kag indi na talaksan ang pagkamainabyanon sa isigkatawo.

Ang bug-os kalibutan nga hilikuton sa pagbantala, nga isa pa ka bahin sang tanda, pat-od gid nga ginatuman. Tan-awa lamang ang panghapin sini nga magasin, kag matalupangdan mo subong bahin sang tig-ulo ang mga pulong nga “Nagabantala Sang Ginharian ni Jehova.” Ang Lalantawan, nga ginabalhag sa 132 ka hambal kag may sirkulasyon nga kapin sa 22 milyones ka kopya, isa ka  panguna nga kasangkapan para sa mga nagabantala sining “maayong balita sang ginharian” sa bug-os napuy-an nga duta. Inang maayong balita nagalakip sang mensahe nga ang Manunuga sang uniberso, si Jehova nga Dios, nagtukod sing langitnon nga Ginharian nga magalaglag sang malaut nga sistema sang mga butang kag magapaluntad sang paraiso sa duta. Sa pagkamatuod, makita na karon ang tanda nga sa dili madugay magahulag ang Dios, nga nagapakita nga ang kabuhi sang mga tawo sa sini nga sistema sang mga butang yara sa katalagman.​—⁠Ipaanggid ang 2 Timoteo 3:​1-5; 2 Pedro 3:​3, 4; Bugna 6:​1-8.

Ang Makakulugmat nga Adlaw ni Jehova

Ano ang matabo kon tion na para maghukom si Jehova? Pamatii ang iya maathag nga paglaragway sa mahanabo: “Magahatag ako sing mga tanda sa mga langit kag sa duta, dugo kag kalayo kag mga haligi nga aso. Ang adlaw magabaylo sa kadudulman, kag ang bulan sa dugo, sa wala pa mag-abot ang daku kag makakulugmat nga adlaw ni Jehova.”​—⁠Joel 2:​30, 31.

Ina nga adlaw, nga labi pa ka makahaladlok kag malaglagon sangsa bisan ano nga paglupok sang bulkan ukon linog, malapit na. Si manalagna Sofonias nagsiling: “Malapit na ang dakung adlaw ni Jehova. Malapit na ini, kag nagadalidali ini sing tama. . . . Ang bug-os nga duta lamunon sang kalayo sang iya kakugi, kay magahimo sia sing pagtapos, sa pagkamatuod makangilidlis ini, sa tanan nga pumuluyo sang duta.” Walay sapayan nga “bisan ang ila pilak ukon ang ila bulawan indi sarang makaluwas sa ila sa adlaw sang kasingkal ni Jehova,” may paagi agod makalampuwas sa sinang makakulugmat nga adlaw.​—⁠Sofonias 1:​14-18.

Agod ipakita kon paano, si Sofonias nagsiling: “Sa wala pa mag-abot sa inyo ang mapintas nga kaakig ni Jehova, sa wala pa mag-abot sa inyo ang adlaw sang kaakig ni Jehova, pangitaa ninyo si Jehova, kamo tanan nga mga mahagop sang duta . . . Pangitaa ang pagkamatarong, pangitaa ang pagkahagop. Ayhan malipdan kamo sa adlaw sang kaakig ni Jehova.” (Sofonias 2:​2, 3) Makadangop kita paagi sa ‘pagpangita kay Jehova, pagpangita sing pagkamatarong, kag pagpangita sing pagkahagop.’ Sin-o karon ang nagapangita kay Jehova?

Wala sing duhaduha nga iangot mo ang tinaga nga “Jehova” sa mga Saksi ni Jehova bangod sang ila pagbantala nga hilikuton. Mahimo nga nabaton mo ini nga magasin gikan sa isa sa ila. Kilala sila subong maayo nga mga pumuluyo nga nagakabuhi sing matadlong. Nagapanikasog sila sa pagsul-ob sang “bag-ong personalidad,” nga nagalakip sang pagpalambo sing pagkahagop. (Colosas 3:​8-10) Ginabaton nila nga resulta ini sang pagtudlo sa ila sang kitaon nga organisasyon ni Jehova, nga ginarepresentar sa bug-os nga duta sang lokal nga mga kongregasyon sang mga Saksi ni Jehova. Huo, makadangop ka kaupod sang “bug-os nga paghiliutod” sa tunga sang mga Saksi ni Jehova sa bug-os nga kalibutan.​—⁠1 Pedro 5:⁠9.

Magdangop Karon

Sa pagdangop paagi sa pagpangita kay Jehova, kinahanglan nga mangin mga abyan niya kita. Ano ang nadalahig sa sina? Ang Biblia nagasabat: “Wala bala kamo makahibalo nga ang pagpakig-abyan sa kalibutan pagpakig-away sa Dios? Busa, ang bisan sin-o nga luyag mangin abyan sang kalibutan nagahimo sang iya kaugalingon nga kaaway sang Dios.” (Santiago 4:4) Agod mangin mga abyan sang Dios, dapat naton dulaon ang bisan ano nga kaluyag sa karon nga malaut nga kalibutan, nga nagapakita sing rebelyuso nga panimuot sa Dios.

Ang Biblia nagalaygay sa aton: “Indi ninyo paghigugmaon ang kalibutan ukon ang mga butang man sa kalibutan. Kon ang bisan sin-o nagahigugma sang kalibutan, ang gugma sa Amay wala sa iya; bangod ang tanan nga butang sa kalibutan​—⁠ang kailigbon sang unod kag ang kailigbon sang mga mata kag ang pagpadayawdayaw sang palangabuhian sang isa​—⁠wala maghalin sa Amay, kundi naghalin sa kalibutan. Dugang pa, ang kalibutan nagataliwan kag amo man ang kailigbon sini, apang sia nga nagahimo sang kabubut-on sang Dios nagapabilin sing dayon.” (1 Juan 2:​15-17) Ang kalabanan nga tawo karon ginapahulag sang undanon nga mga kailigbon​—⁠di-makontrol nga kaluyag sa sekso, makagod nga pagtinguha sa kuwarta, kag pag-abuso sa gahom. Apang agod nga mangin dampig kay Jehova, dapat dulaon sang isa ini nga mga kailigbon.​—⁠Colosas 3:​5-8.

Mahimo nga nagabasa ka sini nga magasin sa pulupanag-on, kag ayhan nagaugyon ka sa pag-aplikar sini sang mga tagna sang Biblia. Apang, mahimo nga nagapangalag-ag ikaw sa paghimo sang dugang pa nga tikang nga makig-upod sa mga Saksi ni Jehova. Apang, kon nagaatubang kita sing  kalamidad, bastante na bala nga mabatian lamang ang paandam? Subong sang nakita naton sa paglupok sang Mount Fugen, dapat kita maghulag sa paandam. Dumduma, indi magkubos sa 15 ka reporter kag cameraman nga tuyo makakuha sing una nga impormasyon ang napatay. Ang matuod, isa ka retratista ang napatay nga ang iya tudlo yara sa buton sang shutter sang iya kamera. Ang isa ka volcanologist​—⁠nga nagsiling, “Kon mapatay ako sa pila ka adlaw, luyag ko nga didto ako sa kilid sang bulkan”​—⁠napatay subong sang handum niya. Dedikado sila tanan sa ila trabaho kag mga buluhaton. Apang, ginbayad nila ang ila kabuhi​—⁠ang bili sang indi pagsapak sa paandam.

Madamo karon ang nakabati sang mensahe tuhoy sa pamat-od sang Dios nga laglagon ining malaut nga sistema sang mga butang kag nakahantop, sa pila ka kasangkaron, sang pagkamakatarunganon sang paandam. ‘Maabot gid man ina sa ulihi,’ mahimo nga mangatarungan sila, ‘apang indi subong.’ Ginapaisol nila ang adlaw ni Jehova suno sa ila kasulhay sa mas naulihi nga tion agod nga indi sila mapahilayo sa kon ano ang daw mas importante para sa ila mga mata sa sini nga tion.

May amo sini nga problema si Baruc. Subong sekretaryo ni manalagna Jeremias sang una, maisugon nga ginpaandaman ni Baruc ang mga Israelinhon tuhoy sa nagahilapit nga kalaglagan sang Jerusalem. Apang, kinapoy sia sang isa ka bes sa iya tulumanon. Bangod sina, gintadlong sia ni Jehova: “Tuhoy sa imo, padayon ka nga nagapangita sing dalagku nga mga butang para sa imo kaugalingon. Indi magpadayon sa pagpangita.” Manggad man ini, kabantugan, ukon materyal nga seguridad, si Baruc indi dapat ‘magpangita sing dalagku nga mga butang para sa iya kaugalingon.’ Dapat sia mangin interesado sa isa lamang ka butang, ang paghimo sang kabubut-on sang Dios sa pagbulig sa mga tawo nga magtindog sa Iya kiliran. Subong resulta, mabaton niya ang ‘iya kalag subong nga inagaw.’ (Jeremias 45:​1-5) Sing kaanggid, sa baylo nga ‘magpangita sing dalagku nga mga butang para sa aton kaugalingon,’ dapat naton pangitaon si Jehova, nga magadul-ong sa pagsalbar sang aton kabuhi.

Sa Mount Fugen, kapin sa napulog-duha ka pulis kag boluntaryo nga bombero ang nagatrabaho sang mailigan sila sang tuman ka init nga lava gikan sa bulkan. Ginatabangan kag ginaamligan nila ang yara sa katalagman nga mga tawo. Kaangay sila sa maayo-sing-tinutuyo nga mga lalaki kag babayi nga nagatinguha sa pagpauswag sining kalibutan. Bisan pa dungganon ang ila mga motibo, “ang ginpatiko indi mapatadlong.” (Manugwali 1:15) Indi na matadlong ining tiko nga sistema sang mga butang. Makatarunganon bala nga himuon sang isa ang iya kaugalingon nga “abyan sang kalibutan” paagi sa pagtinguha nga luwason ang bug-os kalibutan nga sistema nga ginpat-od na sang Dios nga dulaon?

Kon Nakapalagyo Ka Na, Indi Na Magpalapit

Isa ka butang ang magpalagyo gikan sa sistema nga yara sa katalagman, apang tuhay naman ang magpabilin sa nagaamlig nga pag-atipan sang “bug-os nga katilingban sang mga kauturan.” (1 Pedro 2:17) Indi naton pagkalimtan ang mga mangunguma nga, sa tapos maghalin, nagbalik agod tan-awon ang ila kaumhan malapit sa Mount Fugen. Ayhan, luyag nila magbalik sa ila anay “normal” nga kabuhi. Apang nakita mo nga indi maalamon ang ila desisyon sa pagbalik. Ayhan indi yadto ang una nga pagtinguha nila sa pagkadto sa makatalagam nga duog. Mahimo nga nagsulod sila sa makatalagam nga duog sing makadali lamang kag wala sing bisan ano man nga natabo. Sa masunod nga tion, mahimo nga nagpabilin sila sing madugaydugay, kag sa gihapon wala sing natabo. Mahimo nga sang ulihi naanad na sila nga magtulutabok sa dulunan kag wala na nahadlok nga magpadugaydugay sa makatalagam nga duog.

Ginpatuhuyan ni Jesucristo ang kaanggid nga kahimtangan nga mahanabo sa “katapusan sang sistema sang mga butang.” Nagsiling sia: “Subong nila sa sadtong mga adlaw sa wala pa ang anaw, nga nagakaon kag nagainom, ang mga lalaki nagapangasawa kag ang mga babayi ginahatag sa pag-asawahay, tubtob sa adlaw nga nagsulod si Noe sa arka; kag wala sila magsapak tubtob nga nag-abot ang anaw kag nag-anod sa ila nga tanan, amo man ang presensia sang Anak sang tawo.”​—⁠Mateo 24:​3, 38, 39.

Talupangda nga ginsambit ni Jesus ang pagkaon, pag-inom, kag pagminyo. Wala sing isa sining mga butang ang sa ila kaugalingon malain sa mga mata ni Jehova. Ano kon amo ang malain? Ang mga tawo sang adlaw ni Noe ‘wala magsapak,’ kay ang ila kabuhi nasentro sa ila kinaandan nga pagsinalayo. Sa tion sang emerhensia, indi mahimo magkabuhi ang isa sing “normal.” Sa tion nga nakapalagyo ka na, ukon napain mo  na ang imo kaugalingon, gikan sa karon nahukman na nga kalibutan, dapat mo batuan ang bisan ano nga huyog nga magbalik agod himuslan ang bisan ano nga masipot sa sini. (1 Corinto 7:31) Mahimo ka maglagawlagaw sa guwa sang espirituwal nga hilway-sa-katalagman nga duog kag magbalik nga wala mahalitan kag wala gani sing bisan sin-o nga nakamutik sini. Apang, mahimo ina magpaisog sa imo kag magdul-ong sa imo pagbalik liwat sa kalibutan, nga nagapabuyanbuyan sa sini sing madugay pa. Sa ulihi magalambo ang panimuot nga: “Ang katapusan indi magaabot karon nga adlaw.”

Subong man, hunahunaa ang tatlo ka drayber sang salakyan nga napatay samtang nagahulat sa mga reporter kag mga cameraman sang nag-ilig sa banglid ang lava gikan sa bulkan. Ang pila sa karon mahimo mag-upod-upod sa iban nga nangahas sa pagbalik sa kalibutan. Ano man ang rason, maathag nga indi takus ang magpabuyok nga magbalik sa makatalagam nga duog.

Ang tanan nga biktima sang paglupok sang Mount Fugen nagtabok sa hilway-sa-peligro nga dulunan kag nagsulod sa makatalagam nga duog. Bisan pa nga ginpaabot nila nga magalupok ang bulkan sa pila ka adlaw, wala sing isa ang naghunahuna nga malupok ini sadto nga adlaw. Bangod nakita nila ang tanda sang katapusan sang sistema sang mga butang, madamo ang nagapaabot nga maabot ang adlaw ni Jehova sa pila ka adlaw apang mahimo nga malayo pa. Ang iban nagabatyag pa gani nga ina nga adlaw indi gid mahimo nga “subong.” Makatalagam gid ina nga panimuot.

“Ang adlaw ni Jehova magaabot subong sang makawat,” paandam ni apostol Pedro. Dapat kita mangin handa, “nga nagahulat kag nagahupot sing suod sa hunahuna sang presensia sang adlaw ni Jehova,” ginahimo ang aton ‘labing masarangan agod nga sa katapusan masapwan niya kita nga walay dagta kag walay kasawayan kag sa paghidait.’ (2 Pedro 3:​10-14) Sa tapos malaglag ang malaut nga sistema sang mga butang karon, ang paraiso nga duta sa idalom sang Ginharian sang Dios nagahulat. Kabay nga indi gid kita masulay nga magpasimpalad sa makatalagam nga duog bisan ano man nga balibad ang magasulod sa aton hunahuna, kay ang adlaw nga magtabok kita pabalik sa kalibutan basi mangin adlaw ni Jehova.

Magdangop upod sa katawhan ni Jehova kag magpabilin kaupod nila.

[Mga retrato sa pahina 7]

Magdangop upod sa katawhan ni Jehova kag magpabilin kaupod nila

[Picture Credit Line sa pahina 4]

Iwasa/Sipa Press