Kami ang Sahi nga may Pagtuo

Paghatag sing Makalulugpay nga Mensahe sa Italya

SI Jehova amo “ang Dios sang tanan nga paglugpay.” Paagi sa pagtuon nga ilugon sia, ang iya mga alagad ‘makalugpay sa mga yara sa bisan anong kapipit-an.’ (2 Corinto 1:​3, 4; Efeso 5:1) Amo ini ang isa sang panguna nga mga tulumuron sang pagbantala nga hilikuton nga ginahimo sang mga Saksi ni Jehova.

Pagbulig sa Isa ka Babayi nga Nagakinahanglan

Ilabi na sining karon lang nga tinuig nga bangod sang kaimulon, inaway, kag sang handum nga makasapo sing mas maayo nga kabuhi, madamo ang nagsaylo sa mas madawadawa nga mga pungsod. Apang indi mahapos ang pagpasibu sa bag-o nga palibot. Si Manjola nagapuyo upod sa iya mga kasimanwa nga taga-Albania sa Borgomanero. Bangod ilegal ang pagpuyo niya sa Italya, nangalag-ag sia sa pagpakighambal kay Wanda, nga isa sang mga Saksi ni Jehova. Apang, sang ulihi, nakahimo sing kahimusan si Wanda sa pagpakigkita kay Manjola, nga gilayon nagpakita sing daku nga interes sa pagtuon sa Pulong sang Dios, bisan pa mabudlay ini bangod sang kasablagan sa hambal. Apang, pagkatapos sang pila ka pagduaw wala na sing maabtan si Wanda sa puluy-an. Ano ang natabo? Natukiban ni Wanda nga ang mga nagapuyo sa sadtong balay nagpalalagyo bangod ang isa sa ila​—⁠ang nobyo ni Manjola​—⁠ginapangita (sang mga pulis) bangod sang pagpatay!

Apat ka bulan sang ulihi, nagkitaay liwat sanday Wanda kag Manjola. “Malapsi kag maniwang, makita sa iya dagway nga mabudlay gid ang iya kahimtangan,” hinumdom ni Wanda. Ginpaathag ni Manjola nga ang iya anay nobyo nabilanggo kag ang ginpangayuan niya sing bulig nga mga abyan wala gid magbulig sa iya. Nadulaan sing paglaum, nangayo sia sing bulig sa Dios sa pangamuyo. Pagkatapos sina nadumduman niya si Wanda, nga naghambal tuhoy sa Biblia. Nalipay gid si Manjola nga makita sia liwat!

Ginpadayon ang pagtuon sa Biblia, kag wala magdugay ginsugdan ni Manjola ang pagtambong sa Cristianong mga miting. Nagmadinalag-on sia sa pagkuha sing legal nga permiso nga magpabilin sa Italya. Pagligad sang isa ka tuig, nangin bawtismado nga Saksi si Manjola. Nalugpayan sang mga saad sang Dios, nagbalik sia sa Albania agod ipaambit ang makalulugpay nga mensahe sang Biblia sa iya mga kasimanwa.

Pagpanaksi sa Kampo Sang mga Imigrante

Madamo nga Italyano nga kongregasyon ang naghimo sing kahimusan sa pagpanaksi sa mga imigrante kaangay ni Manjola. Halimbawa, naghimo sing kahimusan ang isa ka kongregasyon sa Florence nga duawon sing tayuyon ang isa ka kampo sang mga imigrante. Ang mga pumuluyo sang kampo​—⁠madamo ang  gikan sa Nasidlangan nga Europa, Macedonia, kag Kosovo​​—⁠nagaeksperiensia sing nanuhaytuhay nga kabudlayan. Ang iban may problema sa droga ukon alkohol. Ginasakdag sang madamo ang ila kaugalingon paagi sa pagpangawti.

Ang pagbantala sa sining komunidad isa ka hangkat. Apang, ang isa ka bug-os tion nga ebanghelisador nga si Paola nakapakig-angot sang ulihi kay Jaklina, isa ka taga-Macedonia nga lin-ay. Pagkatapos sang pila ka paghambalanay ginpalig-on ni Jaklina ang iya abyan nga si Susanna nga usisaon ang Biblia. Subong man, nakigsugilanon si Susanna sa iban pa nga mga paryente. Wala magdugay, lima ka katapo sang pamilya ang tayuyon nga nagatuon sing Biblia, nagatambong sa Cristianong mga miting, kag nagaaplikar sang ila natun-an. Walay sapayan sang ginaatubang nila nga mga problema, nakakuha sila sing lugpay gikan kay Jehova kag sa iya Pulong.

Isa ka Madre ang Nagbaton Sing Paglugpay Gikan kay Jehova

Sa banwa sang Formia, nasugilanon sang isa ka bug-os tion nga ebanghelisador nga si Assunta ang isa ka babayi nga nabudlayan sa paglakat. Ang babayi isa ka madre nga katapo sang isa ka relihioso nga grupo nga nagahatag sing bulig sa mga masakiton kag maluya sa mga ospital kag sa pribado nga mga puluy-an.

Ginsilingan ni Assunta ang madre: “Nagaantos ka man, indi bala? Makapasubo nga kita tanan may mga problema nga dapat batason.” Bangod sina naghilibion ang madre kag nagpaathag nga may malubha sia nga balatian. Ginpalig-on sia ni Assunta, nagasiling nga ang Dios sang Biblia makalugpay sa iya. Ginbaton sang madre ang pasad-sa-Biblia nga mga magasin nga gintanyag ni Assunta sa iya.

Sang masunod nila nga pagsugilanon, gin-ako sang madre nga si Palmira nga daku gid ang iya pag-antos. Madugay sia nga nag-istar sa isa ka institusyon nga ginapalakat sang mga madre. Sang kinahanglan sia magbiya sing makadali bangod sang balatian, wala sia gintugutan nga magbalik. Apang, ginbatyag ni Palmira nga may salabton sia sa Dios bangod sang iya mga panaad subong isa ka madre. Nagdangop sia sa mga manugbulong agod “magpabulong” apang nag-antos sia sa hunahuna bangod sang iya inagihan. Nagpasugot si Palmira nga magtuon sa Biblia, kag nagtambong sia sa Cristianong mga miting sa sulod sang isa ka tuig. Pagkatapos nagsaylo sia sa lain nga lugar, kag wala na makapakig-angot ang Saksi sa iya. Pagligad sang duha ka tuig nagkitaay sila liwat ni Assunta. Mabaskog nga ginpamatukan si Palmira sang iya pamilya kag sang klero. Walay sapayan sini, ginpadayon niya ang iya pagtuon sa Biblia, nag-uswag sa espirituwal, kag nagpabawtismo subong isa sang mga Saksi ni Jehova.

Huo, madamo ang napalig-on sang mensahe ‘sang Dios nga nagahatag sing paglugpay.’ (Roma 15:​4, 5) Busa, ang Italyano nga mga Saksi ni Jehova determinado nga magpadayon sa pag-ilog sa Dios paagi sa paghatag sa iban sang iya makalilipay nga mensahe sang paglugpay.