Magdiretso sa kaundan

Magdiretso sa secondary menu

Magdiretso sa listahan sang kaundan

Mga Saksi ni Jehova

Hiligaynon

Ang Lalantawan—Tulun-an nga Edisyon  |  Oktubre 2016

Pabakura ang Imo Pagtuo sa Imo Ginalauman

Pabakura ang Imo Pagtuo sa Imo Ginalauman

“Ang pagtuo amo ang masaligan nga pagpaabot sa kon ano ang ginalauman.”—HEB. 11:1.

AMBAHANON: 81, 134

1, 2. (a) Ngaa tuhay ang ginalauman sang matuod nga mga Cristiano sa ginalauman sang yara sa kalibutan ni Satanas? (b) Ano nga mga pamangkot ang binagbinagon naton?

MATAHOM gid ang paglaum sang matuod nga mga Cristiano! Ginalauman naton tanan, hinaplas man kita ukon bahin sang “iban nga mga karnero,” nga matuman ang katuyuan sang Dios kag pakabalaanon ang ngalan ni Jehova. (Juan 10:16; Mat. 6:9, 10) Amo ini ang pinakaimportante nga malauman naton. Ginalauman man naton ang padya nga kabuhi nga wala sing katapusan kag mangin bahin sang “bag-o nga langit” sang Dios ukon sang iya “bag-o nga duta.” (2 Ped. 3:13) Kag ginalauman man naton nga padayon nga mag-uswag sa espirituwal ang katawhan sang Dios.

2 Madamo man subong sa kalibutan ni Satanas ang may ginalauman, pero mahimo nga nagaduhaduha sila kon matabo gid ini. Halimbawa, minilyon nga nagasugal ang nagalaum nga magdaug, pero indi sila sigurado. Tuhay ang matuod nga pagtuo, kay amo ini “ang masaligan nga pagpaabot” sang aton ginalauman bilang mga Cristiano. (Heb. 11:1) Paano ka mangin sigurado sa imo ginapaabot? Kag ano ang mga benepisyo kon mabakod ang imo pagtuo sa imo ginalauman?

3. Ano ang ginatuuhan sang matuod nga Cristiano?

3 Wala mabun-ag nga may pagtuo ang makasasala nga mga  tawo; kag indi ini basta nagabakod lang. Matigayon sang Cristiano ang pagtuo kon tugutan niya nga manghikot ang balaan nga espiritu sang Dios sa iya tagipusuon. (Gal. 5:22) Wala nagasiling ang Biblia nga si Jehova may pagtuo ukon kinahanglan niya ini. Bangod labing gamhanan si Jehova kag labing maalam, tumanon gid niya ang iya katuyuan. Sigurado gid ang aton Amay sa langit nga matuman ang ginpromisa niya nga mga pagpakamaayo kay para sa iya daw natabo na ini. Nagsiling sia: “Natuman na ini!” (Basaha ang Bugna 21:3-6.) Nagatuo ang isa ka Cristiano nga si Jehova “matutom nga Dios,” nga pirme nagatuman sang iya ginapromisa.—Deut. 7:9.

MGA ALAGAD SANG DIOS SANG UNA NGA MAY MABAKOD NGA PAGTUO

4. Ano ang ginlauman sang mga lalaki kag babayi nga may mabakod nga pagtuo antes sang panahon sang mga Cristiano?

4 Makita sa Hebreo kapitulo 11 ang mga ngalan sang 16 ka lalaki kag babayi nga may mabakod nga pagtuo. Ginsambit diri nga sila kag ang iban pa “nakabaton sang pamatuod nga ginkahamut-an sila sang Dios bangod sa ila pagtuo.” (Heb. 11:39) Tanan sila ‘nagsalig kag nagpaabot’ sa ginsaad sang Dios nga “kaliwat” nga magatapos sa pagrebelde ni Satanas kag magatuman sa katuyuan ni Jehova. (Gen. 3:15) Napatay sila antes nangin posible ang paglaum nga kabuhi sa langit paagi sa ginsaad nga “kaliwat,” si Jesucristo. (Gal. 3:16) Pero bangod matuman gid ang mga promisa ni Jehova, banhawon sila nga may himpit nga kabuhi sa paraiso sa duta.—Sal. 37:11; Isa. 26:19; Os. 13:14.

5, 6. Ano ang ginlauman ni Abraham kag sang iya pamilya, kag paano nila ginpabakod ang ila pagtuo? (Tan-awa ang piktyur sa umpisa sini nga artikulo.)

5 Ang Hebreo 11:13 nagsiling parte sa pila nga nagkabuhi antes sang panahon sang mga Cristiano: “Sila tanan napatay nga may pagtuo, bisan pa wala nila mabaton ang katumanan sang mga saad; apang nakita nila ini sa malayo kag malipayon nga ginbaton ini.” Isa sa ila amo si Abraham. Ginhanduraw gid bala niya ang ginalauman niya nga malipayon nga kabuhi kon maggahom na ang ginsaad nga “kaliwat”? Maathag ang sabat sa sini nga pamangkot sang nagsiling si Jesus sa mga nagapamatok sa iya: “Si Abraham nga inyo amay nagkasadya gid sa paglaum nga makita ang akon adlaw, kag nakita niya ini kag nagkasadya sia.” (Juan 8:56) Amo man sini ang masiling parte kanday Sara, Isaac, kag Jacob, kag madamo pa nga naglaum sa Ginharian, “nga ang nagdesinyo kag manunukod amo ang Dios.”—Heb. 11:8-11.

6 Paano ginpabakod ni Abraham kag sang iya pamilya ang ila pagtuo? Mahimo nga nakilala nila ang Dios paagi sa pagpamati sa mga tigulang na nga may pagtuo ukon pagbasa sa dumaan na nga mga sinulatan. Kon kaisa, nakighambal sa ila ang Dios paagi sa mga anghel, palanan-awon, ukon damgo. Wala gid nila ginkalipatan ang ila natun-an, kag ginpabaloran nila ang mga ginpromisa kag ginpatuman sang Dios sa ila kag ginpamalandungan ini. Bangod sigurado gid ang ila paglaum, handa sila nga mangin matutom sa Dios bisan pa mag-antos sila.

7. Ano ang ginhatag ni Jehova para mapabakod ang aton pagtuo, kag ano ang himuon naton sa sini?

7 Para magbakod ang aton pagtuo, ginhatag ni Jehova sa aton ang iya Pulong, ang Biblia. Dapat naton ini basahon kada adlaw kon posible para mangin “malipayon” kita kag ‘magmadinalag-on.’ (Sal. 1:1-3; basaha ang Binuhatan 17:11.) Dapat man naton pamalandungan ang mga promisa ni Jehova nga Dios kag tumanon ang ginapatuman niya sa aton, pareho sang iya mga alagad sang una. Ginpakamaayo man kita ni Jehova sang madamo nga espirituwal nga pagkaon paagi sa “matutom kag mainandamon nga ulipon.” (Mat. 24:45) Gani kon pabaloran naton ang espirituwal nga mga aman ni Jehova, mangin  pareho kita sa mga alagad sang Dios sang una nga may mabakod nga pagtuo nga ‘nagsalig kag nagpaabot’ sa paggahom sang Ginharian.

8. Paano mapabakod ang aton pagtuo paagi sa pagpangamuyo?

8 Napabakod man ang pagtuo sang mga alagad sang Dios sang una paagi sa pagpangamuyo. Nagbakod ang ila pagtuo sang nakita nila nga ginsabat sang Dios ang ila pangamuyo. (Neh. 1:4, 11; Sal. 34:4, 15, 17; Dan. 9:19-21) Masugid man naton kay Jehova ang aton ginakabalak-an, kag nakahibalo kita nga pamatian niya kita kag pabakuron agod makabatas kita kag mangin malipayon. Kag kon masabat ang aton pangamuyo, nagabakod ang aton pagtuo. (Basaha ang 1 Juan 5:14, 15.) Ang pagtuo isa ka kinaiya nga ginapatubas sang espiritu, gani ‘padayon naton nga pangayuon’ ang espiritu sang Dios, kag amo ini ang ginpalig-on sa aton ni Jesus.—Luc. 11:9, 13.

9. Sin-o pa ang dapat naton ipangamuyo?

9 Dapat kita mangamuyo indi lamang para mangayo sing bulig sa Dios. Mapasalamatan kag madayaw naton si Jehova kada adlaw tungod sang iya “makatilingala nga binuhatan” nga ‘madamo pa sa sarang naton masugid’! (Sal. 40:5) Dumdumon man naton sa aton pangamuyo “ang mga yara sa bilangguan, nga daw subong nga nabilanggo man [kita] upod sa ila.” Ipangamuyo man naton ang aton mga kauturan sa bilog nga kalibutan, ilabi na “ang mga nagapanguna sa [aton].” Kon makita naton kon paano ginasabat ni Jehova ang aton pangamuyo, magabakod ang aton pagtuo kag magasuod pa gid kita sa iya!—Heb. 13:3, 7.

WALA SILA MAGKOMPROMISO

10. Sin-o nga mga alagad sang Dios ang wala magkompromiso, kag ano ang nakabulig sa ila?

10 Sa Hebreo kapitulo 11, ginlaragway ni apostol Pablo ang mga pagtilaw nga ginbatas sang wala mahingadli nga mga alagad sang Dios. Halimbawa, ginsambit sang apostol ang mga babayi nga may pagtuo nga napatyan sang mga anak pero ginbanhaw. Ginsambit man niya ang iban pa nga ‘indi magsikway sang ila pagtuo kabaylo sang ila kahilwayan, agod maagom ang mas maayo nga pagkabanhaw.’ (Heb. 11:35) Indi kita sigurado kon sin-o ang ginapatuhuyan ni Pablo, pero nahibaluan naton nga ang iban, pareho nanday Nabot kag Zacarias, ginbato tubtob napatay bangod gintuman nila ang Dios kag ginhimo ang iya kabubut-on. (1 Hari 21:3, 15; 2 Cron. 24:20, 21) Puede kuntani ‘mahilway’ si Daniel kag ang iya mga kaupod kon magkompromiso sila. Sa baylo, bangod sang ila pagtuo sa gahom sang Dios, “nakapakium [sila] sang baba sang mga leon” kag “nakapalong sa gahom sang kalayo.”—Heb. 11:33, 34; Dan. 3:16-18, 20, 28; 6:13, 16, 21-23.

11. Ano nga mga pagtilaw ang ginbatas sang pila ka manalagna bangod sang ila pagtuo?

11 Bangod sang pagtuo sang mga manalagna nga sanday Micaya kag Jeremias, “ginyaguta . . . kag ginpangbilanggo” sila. Ang iban, pareho ni Elias, “nagdalangdalang . . . sa mga desyerto, sa mga bukid, sa mga kueba, kag sa mga gikab sa duta.” Ginbatas nila ini bangod ‘nagsalig sila kag nagpaabot sa ila ginalauman.’—Heb. 11:1, 36-38; 1 Hari 18:13; 22:24-27; Jer. 20:1, 2; 28:10, 11; 32:2.

12. Kay sin-o halimbawa ang pinakadalayawon kon parte sa pagbatas sang pagtilaw, kag ano ang nakabulig sa iya?

12 Pagkatapos masambit ni Pablo ang mga lalaki kag babayi nga may mabakod nga pagtuo, ginsiling niya nga ang pinakadalayawon nga halimbawa amo si Ginuong Jesucristo. “Tungod sa kalipay nga ginbutang sa iya atubangan,” siling sang Hebreo 12:2, “ginbatas niya ang usok sang pag-antos, ginbalewala ang kahuluy-an, kag nagpungko sa tuo sang trono sang Dios.” Dapat naton ‘binagbinagon sing maayo’ ang mabakod nga pagtuo ni Jesus sang ginbatas niya ang  pinakamabudlay nga pagtilaw. (Basaha ang Hebreo 12:3.) Pareho kay Jesus, wala man magkompromiso ang mga Cristiano sang una bisan pa mapatay sila, kag isa sa ila si disipulo Antipas. (Bug. 2:13) Ang ila padya amo ang pagbanhaw sa ila para mabuhi sa langit kag labaw pa ini sa “mas maayo nga pagkabanhaw” nga ginlauman sang mga alagad sang Dios sang una. (Heb. 11:35) Pagkatapos magsugod sa paggahom ang Ginharian sang 1914, ang tanan nga matutom nga mga hinaplas nga napatay ginbanhaw nga may espiritu nga kabuhi sa langit kag mangin kaupod ni Jesus sa paggahom sa katawhan.—Bug. 20:4.

MGA ALAGAD SANG DIOS SUBONG NGA MAY MABAKOD NGA PAGTUO

13, 14. Ano nga mga pagtilaw ang ginbatas ni Rudolf Graichen, kag ano ang nakabulig sa iya?

13 Minilyon ka alagad sang Dios subong ang nagasunod sa halimbawa ni Jesus. Ginapamalandungan nila ang ila paglaum kag mabakod gihapon ang ila pagtuo wala sapayan sang mga pagtilaw. Binagbinaga ang halimbawa ni Rudolf Graichen, nga natawo sa Germany sang 1925. Nadumduman niya ang mga laragway base sa Biblia nga ginpakabit sa dingding sang ila balay. “Ang isa ka laragway,” siling niya, “may lobo kag karnero, tinday  nga kanding kag leopardo, tinday nga baka kag leon, nga mag-ululupod kag ginatuytuyan sang isa ka bata. . . . Nagtudok gid ini nga mga laragway sa akon hunahuna.” (Isa. 11:6-9) Nangin mabakod ang pagtuo ni Rudolf kag ang paglaum niya sa paraiso sa duta bisan pa tinuig sia nga ginhingabot, una sang Gestapo sang Nazi kag sang ulihi sang Komunista nga Stasi sa East Germany.

14 Natilawan man ang pagtuo ni Rudolf sang napatay ang iya iloy bangod sang tipos sa concentration camp sa Ravensbrück kag sang nagluya ang pagtuo sang iya amay amo nga nagpirma ini sang dokumento nga indi na sia Saksi ni Jehova. Sang ginpagua na si Rudolf sa prisuhan, nag-alagad sia bilang manugtatap sang sirkito kag dayon gin-agda sia sa Gilead School. Gin-asayn sia nga misyonero sa Chile kag nag-alagad liwat bilang manugtatap sang sirkito. May mga pagtilaw sia gihapon nga ginbatas. Pagligad sang isa ka tuig nga pag-asawahay nila ni Patsy, nga isa man ka misyonera, napatay ang ila bata nga babayi. Sang ulihi, napatay man ang iya pinalangga nga asawa nga 43 anyos pa lang sadto. Ginbatas ini tanan ni Rudolf kag nag-alagad sia bilang regular payunir kag gulang, bisan pa tigulang na sia kag may masakit. Mabasa ang sugilanon sang iya kabuhi sa Agosto 1, 1997, nga isyu sang Ang Lalantawan, pahina 20-25. [1]

15. Maghatag sing mga halimbawa sang mga Saksi ni Jehova nga malipayon bisan pa nagabatas sang paghingabot.

15 Malipayon gihapon kag nagalaum ang mga Saksi ni Jehova bisan pa mapintas sila nga ginahingabot. Halimbawa, madamo naton nga kauturan ang napriso sa Eritrea, Singapore, kag South Korea, bangod gintuman nila ang ginsiling ni Jesus nga indi dapat maggamit sang espada. (Mat. 26:52) Lakip sa ila sanday Isaac, Negede, kag Paulos nga sobra na 20 ka tuig nga napriso sa Eritrea! Bisan pa wala sila sing kahilwayan para atipanon ang ila tigulang na nga mga ginikanan kag indi sila makapangasawa, nagpabilin sila nga matutom wala sapayan sang pagpintas sa ila. May piktyur sila sa aton website nga jw.org, kag ang ila yuhum nagapakita nga mabakod gid ang ila pagtuo. Bisan ang mga guardia sa prisuhan nagarespeto sa ila.

Makatuon ka bala sa halimbawa sang mga kauturan sa inyo kongregasyon nga may mabakod nga pagtuo? (Tan-awa ang parapo 15, kag 16)

16. Paano ka maamligan sang mabakod nga pagtuo?

16 Ang kalabanan sa katawhan ni Jehova indi man mapintas nga ginahingabot. Tuhay ang mga pagtilaw sa ila pagtuo. Madamo ang nagaantos bangod sang kapigaduhon ukon sang inaway sa ila pungsod ukon sang mga kalamidad. May pila nga pareho kay Moises kag sang mga patriarka nga nagtalikod sa manggad ukon kabantugan sang kalibutan. Nagapanikasog gid sila nga indi masulay sang materyalismo kag sang pagkabuhi nga nasentro sa kaugalingon. Ano ang nakabulig sa ila? Ang ila gugma kay Jehova kag mabakod nga pagtuo sa iya promisa nga dulaon niya ang tanan nga kalautan kag padyaan ang matutom niya nga mga alagad sing kabuhi nga wala sing katapusan sa matarong nga bag-ong kalibutan.—Basaha ang Salmo 37:5, 7, 9, 29.

17. Ano ang determinado mo nga himuon, kag ano ang binagbinagon sa masunod nga artikulo?

17 Natun-an naton sa sini nga artikulo nga mapabakod naton ang aton pagtuo kon magpamalandong kita sa mga promisa sang Dios kag pirme mangamuyo. Magabulig ini sa aton nga mabatas ang mga pagtilaw sa aton pagtuo kag magpokus sa aton paglaum nga ‘nagasalig kag nagapaabot.’ Pero may dugang pa nga ginasiling ang Biblia parte sa pagtuo, kag binagbinagon ini sa masunod nga artikulo.

^ [1] (parapo 14) Tan-awa man ang artikulo nga “Walay Sapayan sang mga Pagtilaw, ang Akon Paglaum Masanag Gihapon” sa Mayo 8, 2002, nga isyu sang Magmata!, parte sa sugilanon sang kabuhi ni Andrej Hanák nga taga-Slovakia.