Accessibility setting

Magpili sing lenguahe

Magdiretso sa segundaryo nga menu

Magdiretso sa listahan sang kaundan

Magdiretso sa kaundan

Mga Saksi ni Jehova

Hiligaynon

ANG LALANTAWAN (TULUN-AN NGA EDISYON) OKTUBRE 2016

 SUGILANON SANG KABUHI

Ginsunod Ko ang Maayo nga mga Halimbawa

Ginsunod Ko ang Maayo nga mga Halimbawa

“Kabalo ka bala kon pila na ang edad ko?” pamangkot ko. “Huo,” sabat ni Izak Marais. Ara sia sa Patterson, New York, sang gintawgan niya ako sa Colorado. Sugiran ko kamo sang natabo sa akon kabuhi antes sini nga paghambalanay.

NATAWO ako sa Wichita, Kansas, U.S.A., sang Disiembre 10, 1936. Ako ang kamagulangan kag apat kami nga mag-ulutod. Matutom nga mga alagad ni Jehova ang akon mga ginikanan nga sanday William kag Jean. Si Tatay ang company servant, ang pagtawag sadto sa nagapanguna sa kongregasyon. Gintudluan si Nanay sang iya iloy nga si Emma Wagner parte sa kamatuoran sa Biblia. Gintudlo ni Lola Emma ini nga kamatuoran sa madamo, pati na kay Gertrude Steele, nga nangin misyonera sa Puerto Rico sa madamo nga tinuig. * Gani madamo ako sing ginsunod nga maayo nga halimbawa.

PAGDUMDOM SA MAAYO NGA MGA HALIMBAWA

Si Tatay sa higad sang dalan, nga nagatanyag sang mga magasin sa mga nagalabay

Isa ka Sabado sang gab-i sang lima ka tuig pa lang ako, upod ko si Tatay nga nagatanyag sang Watchtower kag Consolation (Magmata! subong) nga mga magasin sa mga nagalabay sa dalan. Sadto nga tion, nag-entra sa Bug-os Kalibutan nga Inaway II ang amon pungsod. Nagpalapit ang isa ka hubog nga doktor kag ginpakalain si Tatay bangod neutral sia nga Cristiano kag ginsilingan nga talawan sia kag nahadlok magsoldado. Daw inuno niya ang iya guya kay Tatay kag nagsiling, “Sumbaga ako, talawit!” Kinulbaan ako pero nagdayaw gid ako kay Tatay. Ginpadayon lang niya ang pagtanyag sang mga magasin sa mga tawo nga nagpalapit. May naglabay nga soldado, gani nagsinggit ang doktor, “Dakpa ining talawit!” Nakita sang soldado nga hubog ang doktor, gani ginsilingan niya sia, “Puli to para maulian ka!” Dayon naghalin sila nga duha. Nagapasalamat ako nga ginhatagan ni Jehova si Tatay sing kaisog. May duha sia ka barber shop sa Wichita, kag kustomer pa niya ini nga doktor!

Upod sa akon mga ginikanan, pakadto sa kombension sa Wichita sang dekada 1940

Sang walo ka tuig na ako, ginbaligya sang akon mga ginikanan ang amon balay kag mga barber shop. Ginhimo nila nga balay ang salakyan kag nagsaylo kami sa Colorado para mag-alagad sa lugar nga kinahanglan ang dugang nga manugbantala. Nag-istar kami malapit sa Grand Junction, kag diri nagpayunir ang akon mga ginikanan kag part-time nga nagtrabaho sa uma kag rantsuhan. Ginpakamaayo sila ni  Jehova sa ila makugi nga pag-alagad, gani nahuman ang isa ka kongregasyon. Sang Hunyo 20, 1948, ginbawtismuhan ako ni Tatay sa sapa sa isa ka bukid didto, kag upod ko man ang iban pa nga nagbaton sang kamatuoran sa Biblia, pati na si Billie Nichols kag ang iya asawa. Sang ulihi, nag-alagad sila sa sirkito, kag amo man ang ila anak kag ang iya asawa.

Nangin abyan namon ang madamo nga masako sa hilikuton sa Ginharian kag nagaistoryahanay kami parte sa espirituwal nga mga butang. Lakip sa ila ilabi na ang pamilya Steele, nga sanday Don kag Earlene, Dave kag Julia, kag Si kag Martha, nga may daku gid nga impluwensia sa akon. Natun-an ko sa ila halimbawa nga makalilipay kag nagahatag sing katuyuan sa kabuhi ang pag-una sa Ginharian.

PAGSAYLOSAYLO

Sang mag-19 anyos ako, gin-agda ako sang amon abyan nga si Bud Hasty nga magpayunir upod sa iya sa nabagatnan sang Estados Unidos. Ginpangabay kami sang manugtatap sang sirkito nga magsaylo sa Ruston, Louisiana, kay madamo nga Saksi didto ang nangin indi aktibo. Ginsilingan niya kami nga hiwaton namon ang tanan nga miting kada semana, may magtambong man ukon wala. May nakita kami nga lugar para hiwatan sang mga miting kag ginhanda namon ini. Ginhiwat namon ang tanan nga miting, pero kami lang nga duha ang nagatambong sa malawig nga tion. Nagabuslanay kami sa mga bahin sa miting, kon ang isa ang may bahin, ang isa naman ang nagasabat sa tanan nga pamangkot. Kon pasundayag gani, ara kami nga duha sa entablado kag wala sang tagpalamati! Sang ulihi, nagtambong ang isa ka tigulang nga utod nga babayi. Amat-amat nga nagtambong ang pila ka estudyante sa Biblia, pati na ang pila ka indi aktibo, kag sang ulihi nangin isa kami ka kongregasyon.

Isa ka adlaw, nasugilanon namon ni Bud ang isa ka ministro sang Church of Christ nga naggamit sang mga teksto nga indi pamilyar sa akon. Daw naurungan ako kag bangod sini, ginpamalandungan ko ang akon mga ginapatihan. Isa ka semana nga nagpulaw ako sa pagtuon para masabat ang iya mga pamangkot. Nakabulig gid ini para magtudok sa akon ang kamatuoran, kag handa na ako sa pagbantala sa isa ka ministro.

Pagkatapos sini, ginpangabay ako sang manugtatap sang sirkito nga magsaylo sa El Dorado, Arkansas, para buligan ang kongregasyon didto. Nagabalikbalik ako sa Colorado para magkadto sa komite nga nagadesisyon kon sin-o ang dapat magsoldado. Isa ka bes, kaupod ko nga nagbiyahe sa akon salakyan ang pila ka payunir, pero naaksidente kami sa Texas amo nga naguba gid ang akon salakyan. Gintawgan namon ang isa ka utod kag gindala niya kami sa ila balay kag  dayon sa miting sang kongregasyon. Ginpahibalo nila sa miting nga naaksidente kami, gani naghatag sang pinansial nga bulig ang mga kauturan. Ginbaligya man sang utod ang akon salakyan sa bili nga $25.

Nagbiyahe kami pa Wichita, diin nagapayunir ang suod nga abyan sang amon pamilya nga si E. F. McCartney, nga ginatawag namon nga “Doc.” Mga amigo ko ang kapid niya nga bata nga sanday Frank kag Francis. Ginbaligya nila sa akon ang ila daan nga salakyan sing $25, pareho gid sa bili sang naguba ko nga salakyan. Amo ini ang una nga tion nga narealisar ko nga ginhatag ni Jehova ang kinahanglan ko bangod ginauna ko ang intereses sang Ginharian. Sa sini man nga tion ginpakilala sa akon sang pamilya McCartney ang matutom kag matahom nga utod nga si Bethel Crane. Mapisan gid nga Saksi ang iya iloy nga si Ruth sa Wellington, Kansas, kag padayon sia nga nagpayunir bisan pa nobentahon na sia. Ginkasal kami ni Bethel sang 1958, wala pa isa ka tuig ang nagligad, kag magkaupod kami nga nagpayunir sa El Dorado.

MATAHOM NGA MGA IMBITASYON

Gusto namon sundon ang maayo nga mga halimbawa nga nakita namon sa pagdaku namon, gani nagdesisyon kami nga batunon ang bisan ano nga pangagda sang organisasyon ni Jehova. Gin-asayn kami nga mga espesyal payunir sa Walnut Ridge, Arkansas. Sang 1962, nalipay kami kay gin-agda kami nga mag-eskwela sa ika-37 nga klase sang Gilead. Nalipay man kami nga kaupod namon si Don Steele sa sini nga klase. Pagkagradwar namon, gin-asayn kami ni Bethel sa Nairobi, Kenya. Daw mahibi kami sang biyaan namon ang New York, pero nalipay gid kami sang makita namon ang mga kauturan sa erport sa Nairobi!

Nagabantala sa Nairobi upod sanday Mary kag Chris Kanaiya

Nanamian na kami dayon sa Kenya kag sa pagbantala didto. Ang una namon nga gintudluan sing Biblia nga nangin mga Saksi amo sanday Chris kag Mary Kanaiya. Matutom gihapon sila nga nagaalagad sing bug-os tion sa Kenya. Pagkadason nga tuig, gin-asayn kami bilang una nga mga misyonero sa Kampala, Uganda. Nalipay gid kami sadto bangod madamo ang gusto magtuon sang kamatuoran sa Biblia, kag nangin mga kauturan naton sila. Pero, pagligad sang tatlo ka tuig kag tunga sa Aprika, nagbalik kami sa Estados Unidos kay gusto namon nga magpamilya. Sang biyaan na namon ang Aprika, mas masubo kami sangsa tion nga ginbiyaan namon ang New York. Palangga na namon ang mga taga-Aprika kag nagalaum kami nga makabalik sa ulihi.

BAG-O NGA ASAYNMENT

Nag-istar kami sa nakatundan sang Colorado, nga ginaistaran man sang akon mga ginikanan. Nabun-ag ang amon una nga bata, si Kimberly, kag pagligad sang 17 ka bulan, nabun-ag naman si Stephany. Gintamod namon nga importante gid ang amon bag-o nga asaynment bilang mga ginikanan, kag gintinguhaan gid namon nga itudlo ang kamatuoran sa amon matahom nga mga bata. Gusto namon sundon ang mga halimbawa nga ginpakita sa amon sang una. Nahibaluan namon nga daku ang impluwensia sang maayo nga halimbawa sa mga bata, pero wala ini nagagarantiya nga magaalagad man sila kay Jehova pagdaku nila. Ang manghod ko nga lalaki kag isa ka manghod nga babayi nagbiya sa kamatuoran. Nagalaum ako nga sa ulihi sundon nila liwat ang maayo nga mga halimbawa nga ginpakita sa ila.

Nalipay gid kami sa pagpadaku sa amon mga bata kag pirme kami magkaupod sa amon ginahimo bilang pamilya. Bangod malapit kami sa Aspen, Colorado, nagtuon kami sang pag-ski (pagpadalus-os sa snow) para updanay kami sa paglingawlingaw. Maistorya namon ang mga bata kon nagasakay kami pasaka sa  bukid. Naga-camping man kami kag masadya nga nagaistoryahanay sa palibot sang dabok. Bisan bata pa sila, nagapamangkot na sila, “Maano ako pagdaku ko?” kag “Sin-o pamanahon ko?” Gintinguhaan namon nga itudlo sa amon mga bata ang diosnon nga mga kinaiya. Pirme namon sila ginapalig-on nga himuon nga tulumuron ang bug-os tion nga pag-alagad kag pamanahon lamang ang may amo man sini nga tulumuron. Gintinguhaan man namon nga mahangpan nila nga indi maayo ang magpamana nga bata pa sila. Pirme namon ini ginasiling: “Mas maayo kon 23 ka na kag magpamana.”

Ginsunod namon ang halimbawa sang amon mga ginikanan kag ginpanikasugan namon nga magkaupod kami bilang pamilya sa pagtambong sa mga miting kag sa pag-alagad sing regular. Gin-agda namon ang pila sa mga nagaalagad sing bug-os tion nga magdayon sa amon balay. Ginaistorya man namon pirme ang kalipay namon sang mga misyonero pa kami. Naglaum kami nga sa ulihi makakadto kuntani kami nga apat sa Aprika. Gusto gid ini sang amon mga bata.

Regular gid ang amon pangpamilya nga pagtuon, kag diri namon ginapraktis ang mga sitwasyon nga mahimo matabo sa eskwelahan. Ang amon mga bata kuno abi ang Saksi nga nagasabat sang mga pamangkot. Nasadyahan sila sa sini nga paagi sang pagtuon, kag may kompiansa na sila. Samtang nagaligad ang tion, kon kaisa nagareklamo sila parte sa amon pangpamilya nga pagtuon. Isa ka bes, bangod daw indi ko na ini maagwanta, ginsilingan ko sila nga magpahimunong na lang sila sa ila mga kuarto kay indi na kami magtuon. Nakibot sila kag naghibi kag nagsiling nga gusto nila magtuon. Gani narealisar namon nga natudluan namon sila nga apresyahon ang espirituwal nga mga butang bisan bata pa. Nanamian na sila sa pagtuon, kag mahambal nila sa amon ang tanan nila nga ginahunahuna kag ginabatyag. Kon kaisa, daw indi namon mabaton kon magsiling sila nga indi sila komporme sa pila ka ginatudlo sang Biblia. Pero paagi sini, nahibaluan namon kon ano gid ang ila ginabatyag. Kon ipaathag namon ini kag mangatarungan kami sa ila, nalipay sila nga sundon ang mga talaksan ni Jehova.

PAGPASIBU SA MADAMO NGA PAGBAG-O

Kadasig gid magligad sang tion samtang ginapadaku namon ang amon mga bata. Paagi sa bulig kag panuytoy sang organisasyon sang Dios, ginhimo namon ang amon masarangan para palanggaon man nila si Jehova. Nagapasalamat gid kami kay nagpayunir sila nga duha pagkagradwar sa hayskul, kag natun-an man nila nga suportahan ang ila kaugalingon sa pinansial. Nagsaylo sila sa Cleveland, Tennessee, upod sa duha pa ka utod nga babayi para mag-alagad sa lugar nga kinahanglan ang dugang nga manugbantala. Nahidlaw gid kami sa ila, pero nalipay kami nga nagaalagad sila sing bug-os tion. Nagpayunir kami liwat ni Bethel, kag bangod sini, nabaton namon ang iban pa nga makalilipay nga mga pribilehiyo. Nangin tal-us ako nga manugtatap sang sirkito kag nag-alagad sa mga kombension.

Antes magsaylo sa Tennessee ang amon mga bata, nagkadto sila sa London, England, kag nagbisita sa sanga talatapan didto. Nakilala ni Stephany, nga 19 anyos sadto, si Paul Norton, nga isa ka pamatan-on nga Bethelite. Sang nagbalik sila didto, nakilala ni Kimberly ang kaupod ni Paul sa trabaho nga si Brian Llewellyn. Sang 23 anyos na si Stephany, nagpakasal sila ni Paul. Pagkadason nga tuig, sang 25 anyos si Kimberly, nagpakasal sila ni Brian. Gani wala sila nagpamana antes mag-23 anyos. Nalipay gid kami sa ginpili nila nga pamanahon.

Upod sanday Paul, Stephany, Kimberly, kag Brian sa sanga talatapan sa Malawi, sang 2002

Ginsugiran kami sang amon mga bata nga nakabulig sa ila ang amon halimbawa kag sang ila mga lolo kag lola para matuman nila ang sugo ni Jesus nga ‘padayon nga unahon ang pagpangita sa Ginharian,’ bisan pa kon may problema sa pinansial. (Mat. 6:33) Sang Abril 1998, gin-agda sanday Paul kag Stephany sa ika-105 nga klase sang Gilead, kag gin-asayn sila nga mag-alagad sa Malawi, Aprika, pagkagradwar nila. Sa sini man nga tion, gin-agda sanday Brian kag Kimberly nga mag-alagad sa Bethel sa London kag sang ulihi ginsaylo sila sa Bethel sa Malawi. Nalipay gid kami kay amo ini ang pinakamaayo nga kabuhi para sa mga pamatan-on.

ISA PA KA MATAHOM NGA IMBITASYON

Sang Enero 2001, gintawgan ako ni Utod Marais, nga ginsambit ko sa umpisa. Sia ang overseer sa Translation Services, kag ginpaathag niya nga may ginahanda nga klase para buligan ang mga translator sa bilog nga kalibutan nga mahangpan sing maayo ang Ingles nga lenguahe. Bisan pa 64 anyos na ako, gusto nila nga hanason ako nga mangin isa sa mga instruktor.  Ginpangamuyo namon ini ni Bethel kag ginsugid ini sa amon mga iloy para mahibaluan kon ano ang mapanugda nila. Gusto nila nga batunon namon ini, bisan pa nagakahulugan ini nga indi na namon sila maatipan. Nagtawag ako kay Utod Marais kag nagsiling nga nalipay gid kami nga batunon ining matahom nga pribilehiyo.

Natukiban dayon nga may kanser si Nanay. Ginsilingan ko sia nga indi na ako maglakat para mabuligan ko ang manghod ko nga si Linda sa pag-atipan sa iya. “Indi ina paghimua,” siling ni Nanay. “Mas magalain ang pamatyag ko kon indi ka maglakat.” Amo man sini ang ginbatyag ni Linda. Naapresyar gid namon ang ila pagsakripisyo kag ang bulig sang mga kauturan sa amon lugar! Pagkadason nga adlaw pagbiyahe namon pakadto sa Watchtower Educational Center sa Patterson, nagtawag si Linda sa pagpahibalo nga napatay na si Nanay. Nangin masako kami sa amon bag-o nga asaynment, kag amo gid ini ang gusto niya nga himuon namon.

Nalipay gid kami nga ang una namon nga asaynment amo ang sanga talatapan sa Malawi, kay diri nagaalagad ang amon mga bata kag ang ila bana. Kasadya gid sang pag-updanay namon liwat bilang pamilya! Ang masunod namon nga asaynment amo ang Zimbabwe kag dayon ang Zambia. Pagligad sang tatlo ka tuig kag tunga nga pagtudlo sa klase, ginpabalik kami sa Malawi para isulat ang mga eksperiensia sang mga Saksi nga ginhingabot didto bangod nangin neutral sila nga mga Cristiano. *

Nagabantala upod sang amon mga apo

Sang 2005, nasubuan kami liwat sang nagpauli kami sa Basalt, Colorado, pero padayon kami ni Bethel nga nagpayunir. Sang 2006, nag-istar sanday Brian kag Kimberly sa tupad namon upod sa ila duha ka bata nga babayi nga sanday Mackenzie kag Elizabeth. Sa Malawi gihapon sanday Paul kag Stephany, kag miembro sang Komite sang Sanga si Paul. Manug-80 anyos na ako, kag nalipay gid ako nga makita ang nakilala ko nga mga pamatan-on nga lalaki sa nagkalainlain nga asaynment nga nagabaton sang mga responsibilidad nga natigayon ko sang una. Malipayon gid kami, kag ang isa ka rason sa sini amo ang maayo nga mga halimbawa nga ginsunod namon nga ginsunod man sang amon mga bata kag mga apo.

^ par. 5 Tan-awa ang Watchtower nga mga magasin nga Mayo 1, 1956, p. 269-272, kag Marso 15, 1971, p. 186-190, parte sa pag-alagad bilang misyonero sang mga miembro sang pamilya Steele.