Magdiretso sa kaundan

Magdiretso sa segundaryo nga menu

Magdiretso sa listahan sang kaundan

Mga Saksi ni Jehova

Hiligaynon

Ang Lalantawan—Tulun-an nga Edisyon  |  Pebrero 2017

Sin-o ang Nagapanguna sa Katawhan sang Dios Subong?

Sin-o ang Nagapanguna sa Katawhan sang Dios Subong?

“Dumduma ang mga nagapanguna sa inyo.”HEB. 13:7.

AMBAHANON: 125, 43

1, 2. Sang makakayab na si Jesus sa langit, ano ang mahimo ginhunahuna sang iya mga apostoles?

ANG mga apostoles ni Jesus ara sa Bukid sang mga Olibo kag nagatangla sila sa langit. Nakita nila nga nagkayab ang ila agalon kag abyan, nga si Jesus, kag ginlipdan sang panganod. (Binu. 1:9, 10) Mga duha ka tuig nga gintudluan, ginpalig-on, kag ginpangunahan sila ni Jesus. Pero wala na sia subong. Ano ang himuon nila?

2 Ginsilingan ni Jesus ang iya mga sumulunod: “Mangin saksi ko kamo sa Jerusalem, sa bug-os nga Judea kag Samaria, kag tubtob sa pinakamalayo nga bahin sang duta.” (Binu. 1:8) Paano nila mahimo ini? Ginpasalig sila ni Jesus nga mabaton nila ang balaan nga espiritu. (Binu. 1:5) Pero, kinahanglan ang panuytoy kag pag-organisar para mabantalaan ang bilog nga kalibutan. Sang una, naggamit si Jehova sing mga tawo para tuytuyan kag organisahon ang iya katawhan. Gani, mahimo nga naghunahuna ang mga apostoles, ‘Magatangdo ayhan si Jehova sing bag-o nga lider?’

3. (a) Sang makakayab na si Jesus sa langit, ano nga importante nga desisyon ang ginhimo sang matutom nga mga apostoles? (b) Ano ang binagbinagon naton sa sini nga artikulo?

3 Pagligad sang mga duha ka semana, gin-usisa sang mga disipulo  ni Jesus ang Kasulatan, nagpangamuyo sila para sa panuytoy sang Dios, kag ginpili nila si Matias nga magbulos kay Judas Iscariote bilang ika-12 nga apostol. (Binu. 1:15-26) Ngaa ini nga pagpili importante gid para sa ila kag para kay Jehova? Ang papel ni Matias importante sa organisasyon. * Nagpili si Jesus sing mga apostoles indi lang para updan sia sa iya ministeryo, kundi para tungdan nila ang importante nga responsibilidad para sa katawhan sang Dios. Ano ini nga responsibilidad, kag paano sila ginhanas ni Jehova paagi kay Jesus? Ano ang ginahimo sang katawhan sang Dios subong nga kaanggid man sa sini? Kag paano naton ‘dumdumon ang mga nagapanguna’ sa aton, ilabi na “ang matutom kag mainandamon nga ulipon”?—Heb. 13:7; Mat. 24:45.

MAKITA NGA HUBON NGA GINATUYTUYAN SANG INDI MAKITA NGA LIDER

4. Ano ang responsibilidad sang mga apostoles kag iban nga gulang sa Jerusalem sang unang siglo?

4 Sugod sang Pentecostes 33 C.E., ang mga apostoles ang nagpanguna sa Cristianong kongregasyon. Sa sina nga tion, “nagtindog si Pedro upod sa 11 ka apostoles” kag ginpaambit nila sa madamo nga Judiyo kag proselita ang mga kamatuoran nga makaluwas sing kabuhi. (Binu. 2:14, 15) Madamo ang nangin tumuluo. Ining bag-o nga mga Cristiano ‘padayon nga nag-ukod sa pagtuon sang mga ginatudlo sang mga apostoles.’ (Binu. 2:42) Ang mga apostoles amo ang nag-asikaso sang kuarta sang kongregasyon. (Binu. 4:34, 35) Ginsigurado nila nga maamanan ang katawhan sang Dios sang ila espirituwal nga mga kinahanglanon. Nagsiling sila: “Ihugod namon ang amon kaugalingon sa pagpangamuyo kag sa pagpanudlo sang pulong sang Dios.” (Binu. 6:4) Kag nagpadala sila sing eksperiensiado nga mga Cristiano sa bag-o nga mga teritoryo para magbantala didto. (Binu. 8:14, 15) Sang ulihi, nangin kaupod sang mga apostoles ang iban nga hinaplas nga mga gulang sa pagdumala sang mga kongregasyon. Sila ang nagadumala nga hubon nga nagahatag sing panuytoy sa tanan nga kongregasyon.—Binu. 15:2.

5, 6. (a) Paano ginhatagan sing gahom sang balaan nga espiritu ang nagadumala nga hubon? (Tan-awa ang piktyur sa umpisa sini nga artikulo.) (b) Paano ginbuligan sang mga anghel ang nagadumala nga hubon? (c) Paano gintuytuyan sang Pulong sang Dios ang nagadumala nga hubon?

5 Nahibaluan sang mga Cristiano sang unang siglo nga ginatuytuyan ni Jehova nga Dios ang nagadumala nga hubon paagi sa ila Lider, si Jesus. Paano nila nasigurado ini? Una, ginhatagan sing gahom sang balaan nga espiritu ang nagadumala nga hubon. (Juan 16:13) Ang balaan nga espiritu ginbubo sa tanan nga hinaplas nga Cristiano, pero sa bahin sang mga apostoles kag iban nga gulang sa Jerusalem, nagbulig ini sa ila nga matungdan ang ila responsibilidad bilang mga manugtatap. Halimbawa, sang 49 C.E., ang balaan nga espiritu nagtuytoy sa nagadumala nga hubon nga makahimo sing desisyon parte sa pagtuli. Ginsunod sang mga kongregasyon ang ila panuytoy kag “padayon nga naglig-on sa pagtuo ang mga kongregasyon kag nagdugang ang ila kadamuon adlaw-adlaw.” (Binu. 16:4, 5) Kon binagbinagon naton ang sulat nga nagaunod sang ila desisyon, maathag nga ginapakita sang nagadumala nga hubon ang mga kinaiya nga ginapatubas sang espiritu sang Dios, lakip ang gugma kag pagtuo.—Binu. 15:11, 25-29; Gal. 5:22, 23.

6 Ikaduha, ginbuligan sang mga anghel ang nagadumala nga hubon. Binagbinaga ang natabo kay Cornelio, nga amo ang pinakauna nga wala matuli nga Gentil nga nangin Cristiano. Antes sia ginbawtismuhan, ginsugo sia sang anghel nga ipatawag si apostol Pedro.  Pagkatapos mabantalaan ni Pedro si Cornelio kag ang iya mga paryente, ginbubo sa ila ang balaan nga espiritu, bisan wala matuli ang mga lalaki. Nagbulig ini sa mga apostoles kag iban pa nga utod nga magpasakop sa kabubut-on sang Dios kag batunon ang wala matuli nga mga Gentil sa Cristianong kongregasyon. (Binu. 11:13-18) Dugang pa, aktibo nga ginsakdag kag ginpadasig sang mga anghel ang pagbantala nga ginatatap sang nagadumala nga hubon. (Binu. 5:19, 20) Ikatlo, gintuytuyan sang Pulong sang Dios ang nagadumala nga hubon. Kon ang mga gulang nga ginhaplasan sang espiritu may ginapaathag nga mga pamangkot parte sa mga panudlo ukon nagahatag sing panuytoy sa mga kongregasyon, ginabase nila ang ila mga desisyon sa Kasulatan.—Binu. 1:20-22; 15:15-20.

7. Ngaa makasiling kita nga si Jesus ang nagpanguna sa mga Cristiano sang una?

7 Bisan pa nga ang nagadumala nga hubon may awtoridad sa kongregasyon sang una, ginkilala nila nga ang ila Lider amo si Jesus. “Ginhatag niya [Cristo] ang iban subong mga apostoles,” sulat ni apostol Pablo. “Magpakita [kita] sing gugma, agod mangin hamtong kita sa tanan nga paagi bilang pag-ilog sa ulo, ang Cristo.” (Efe. 4:11, 15) Sa baylo nga gamiton ang ngalan sang isa ka kilala nga apostol para itawag sa mga disipulo, “gintawag nga mga Cristiano ang mga disipulo paagi sa pagtuytoy sang Dios.” (Binu. 11:26) Ginbaton ni Pablo nga importante ang ‘pagsunod sa mga tradisyon,’ ukon mga hilikuton nga nabase sa Kasulatan, nga ginsugo sang mga apostoles kag sang iban pa nga lalaki nga nagapanguna. Pero, nagdugang sia: “Apang luyag ko nga mahibaluan ninyo nga ang Cristo amo ang ulo sang tagsa ka lalaki [lakip ang kada miembro sang nagadumala nga hubon]; . . . ang Dios amo ang ulo sang Cristo.” (1 Cor. 11:2, 3) Huo, ang indi makita kag ginhimaya nga si Cristo Jesus amo ang nagapanguna sa kongregasyon kag ginatuytuyan sia sang iya Ulo, si Jehova nga Dios.

“INDI INI HILIKUTON SANG TAWO”

8, 9. Sugod sang talipuspusan sang ika-19 nga siglo, ano nga importante nga responsibilidad ang gintungdan ni Utod Russell?

8 Sang talipuspusan sang ika-19 nga siglo, ginpanikasugan ni Charles Taze Russell kag sang pila niya ka upod nga mapasag-uli ang matuod nga Cristianong pagsimba. Para mabuligan sila nga mapalapnag ang kamatuoran sa Biblia sa lainlain nga lenguahe, ang Zion’s Watch Tower Tract Society legal nga nangin korporasyon sang 1884, kag si Utod Russell ang presidente. * Gintun-an gid niya sing maayo ang Biblia, kag maisog nga ginbuyagyag niya ang butig nga mga doktrina pareho sang Trinidad kag sang kalag nga indi mapatay. Nahangpan niya nga indi makita ang pagbalik sang Cristo, kag “ang gintalana nga mga tion sang mga pungsod” matapos sa 1914. (Luc. 21:24) Gingamit ni Utod Russell ang iya tion, kusog, kag kuarta para ipaambit ini nga mga kamatuoran sa iban. Maathag nga sa sining importante nga tion, si Utod Russell gingamit ni Jehova kag sang ulo sang kongregasyon.

9 Indi luyag ni Utod Russell nga dayawon sia sang mga tawo. Sang 1896, nagsulat sia: “Indi namon luyag nga dayawon kami ukon ang amon mga sinulatan; indi man namon luyag nga tawgon nga Reverend ukon Rabbi. Indi man namon luyag nga tawgon ang bisan sin-o paagi sa amon ngalan.” Nagsiling sia sang ulihi: “Indi ini hilikuton sang tawo.”

10. (a) San-o gintangdo ni Jesus “ang matutom kag mainandamon nga ulipon”? (b) Isaysay kon paano nahangpan ang kinatuhayan sang Nagadumala nga Hubon kag sang Watch Tower Society.

10 Sang 1919, pagligad sang tatlo ka tuig nga napatay si Utod Russell, gintangdo ni Jesus “ang matutom kag mainandamon nga ulipon.” Ngaa? Para hatagan ang iya panimalay sing “pagkaon sa nagakaigo nga tion.” (Mat. 24:45) Ang isa ka gamay nga grupo sadto sang hinaplas nga mga utod nga lalaki nga  nag-alagad sa ulong-talatapan sa Brooklyn, New York, naghanda kag nagpanagtag sing espirituwal nga pagkaon sa mga sumulunod ni Jesus. Ang ekspresyon nga “nagadumala nga hubon” gingamit sa aton mga publikasyon sang dekada ’40. Sadto nga tion, ginhangop nga nagapatuhoy ini sa kalabanan nga direktor sang Watch Tower Bible and Tract Society. Pero, sang 1971, nahangpan nga ang Nagadumala nga Hubon tuhay sa Watch Tower Society kag sa mga direktor sini. Ang Watch Tower Society ginhimo para sa legal nga mga hilikuton, indi bangod ginapatuman ini sang Kasulatan. Gani, ang Nagadumala nga Hubon ginahuman sang hinaplas nga mga utod nga lalaki nga indi mga direktor sang Watch Tower Society. Sining nagligad nga mga tinuig, ang mga direktor sini kag sang iban pa nga korporasyon nga ginagamit sang katawhan sang Dios amo ang responsable nga mga utod nga lalaki nga bahin sang “iban nga mga karnero.” Bangod sini, makakonsentrar ang Nagadumala nga Hubon sa pag-aman sing espirituwal nga mga instruksion kag panuytoy. (Juan 10:16; Binu. 6:4) Ang Hulyo 15, 2013, nga isyu sang Ang Lalantawan nagpaathag nga “ang matutom kag mainandamon nga ulipon” amo ang isa ka gamay nga grupo sang hinaplas nga mga utod nga lalaki nga nagahuman sang Nagadumala nga Hubon.

Ang nagadumala nga hubon sang dekada ’50

11. Paano nagapanghikot ang Nagadumala nga Hubon?

11 Ang Nagadumala nga Hubon nagadesisyon subong isa ka grupo. Paano? Nagamiting sila kada semana, kag nagabulig ini sa ila maayo nga komunikasyon kag paghiusa. (Hulu. 20:18) Kada tuig, nagabuslanay sila tsirman sa sini nga mga miting, kay wala sing miembro ang Nagadumala nga Hubon nga mas importante sangsa iban. (1 Ped. 5:1) Ang Nagadumala nga Hubon may anom ka komite. Nagabulosbulos man ang tsirman sa kada komite kada tuig. Ang kada miembro sini nga hubon nagakabig sang iya kaugalingon, indi bilang lider sang iya mga utod, kundi bilang miembro man sang “panimalay,” nga ginapakaon sang matutom nga ulipon kag dapat magpasakop sa sini.

Sugod sang gintangdo ang matutom nga ulipon sang 1919, nag-aman ini sang espirituwal nga pagkaon sa katawhan sang Dios (Tan-awa ang parapo 10 kag 11)

“SIN-O GID BALA ANG MATUTOM KAG MAINANDAMON NGA ULIPON?”

12. Bangod ang Nagadumala nga Hubon wala gin-inspirar kag indi man sila himpit, ano ang mahimo naton ipamangkot?

12 Ang Nagadumala nga Hubon wala gin-inspirar kag indi man sila himpit. Gani, posible nga magsala man sila kon nagapaathag sang mga panudlo ukon nagahatag sing panuytoy. Ang matuod, ang Watch Tower Publications Index may topiko parte sa “Beliefs Clarified,” nga nagapakita sang mga pagbag-o sa aton paghangop sa Kasulatan sugod sang 1870. * Wala nagsiling si Jesus nga ang espirituwal nga pagkaon nga iaman sang iya matutom nga ulipon wala sing sala. Gani paano naton masabat ang pamangkot ni Jesus: “Sin-o gid bala ang matutom kag mainandamon nga ulipon?” (Mat. 24:45) Ano ang pamatuod nga ang Nagadumala nga Hubon amo ang matutom nga ulipon? Binagbinagon naton ang tatlo ka paagi nga ginatuytuyan sila subong pareho sa pagtuytoy sa nagadumala nga hubon sang unang siglo.

13. Paano ginbuligan sang balaan nga espiritu ang Nagadumala nga Hubon?

13 Pamatuod nga ginatuytuyan sang balaan nga espiritu. Ang balaan nga espiritu nagbulig sa Nagadumala nga Hubon nga mahangpan ang mga kamatuoran sa Kasulatan nga wala sadto nahangpan. Halimbawa, binagbinaga ang ara sa listahan sang mga gin-athag nga pagpati nga ginsambit sa nagligad nga parapo. Wala sing tawo nga makasiling nga nahangpan niya ining “madalom nga mga butang sang Dios” sa iya lang kaugalingon! (Basaha ang 1 Corinto 2:10.) Nagaugyon ang Nagadumala nga Hubon sa ginsiling ni apostol Pablo: “Ginahambal man naton ini  nga mga butang, indi paagi sa mga pulong nga gintudlo sang kaalam sang tawo, kundi paagi sa gintudlo sang espiritu.” (1 Cor. 2:13) Pagkatapos sang pila ka gatos ka tuig nga apostasya kag espirituwal nga kadulom, madamo gid ang aton nahangpan nga mga kamatuoran sa Biblia sugod sang 1919. Indi bala nga balaan nga espiritu lang ang makahimo sini?

14. Suno sa Bugna 14:6, 7, paano ginabuligan sang mga anghel ang katawhan sang Dios subong?

14 Pamatuod nga ginabuligan sang mga anghel. Ang Nagadumala nga Hubon subong may mabug-at nga responsibilidad nga pangunahan ang sobra walo ka milyon nga manugbantala sa pagbantala sa bilog nga kalibutan. Ngaa nangin madinalag-on sila sa sini? Ang isa ka rason amo ang bulig sang mga anghel. (Basaha ang Bugna 14:6, 7.) Madamo nga manugbantala ang may eksperiensia nga nakabantala sa mga tawo nga bag-o lang nakatapos pangamuyo para buligan sang Dios! * Ang pag-uswag sang pagbantala kag pagtudlo sa mga tawo nga mangin disipulo bisan pa sang grabe nga pagpamatok sa pila ka kadutaan pamatuod sang bulig sang mga anghel.

15. Ano ang kinatuhayan sang Nagadumala nga Hubon kag sang mga lider sang Cristiandad? Maghatag sing halimbawa.

15 Nagapatuytoy sa Pulong sang Dios. (Basaha ang Juan 17:17.) Binagbinaga ang natabo sang 1973. Ang Hunyo 1 nga isyu sang The Watchtower namangkot: “Ang mga indibiduwal bala nga wala nag-untat sa pagpanabako puede bawtismuhan?” Ang sabat: “Ginapakita sang Kasulatan nga indi.” Pagkatapos  makutlo ang pila ka nagasakdag nga teksto, ang The Watchtower nagpaathag nga ang nagapanabako kag wala nagahinulsol dapat i-disfellowship. (1 Cor. 5:7; 2 Cor. 7:1) Nagsiling ini nga ining estrikto nga pagsulundan wala naghalin sa tawo kundi “naghalin sa Dios, nga nagapahayag sang iya kaugalingon paagi sa iya nasulat nga Pulong.” May iban pa bala nga relihioso nga organisasyon nga nagapatuytoy sing bug-os sa Pulong sang Dios, bisan pa mahimo mabudlayan ang pila nila ka miembro? Ang isa ka bag-o nga libro sa Estados Unidos parte sa relihion nagsiling: “Ang mga lider sang Cristiano pirme nagabag-o sang ila mga panudlo para sakdagon ang mga pagpati kag opinyon nga ginasuportahan sang ila mga miembro kag sang kalabanan nga tawo.” Indi bala nga ang Nagadumala nga Hubon amo gid ang nagapanguna sa katawhan sang Dios subong kay ginabase nila sa Pulong sang Dios ang ila desisyon imbes nga sa popular nga opinyon?

“DUMDUMA ANG MGA NAGAPANGUNA”

16. Ano ang isa ka paagi nga madumdom ang Nagadumala nga Hubon?

16 Basaha ang Hebreo 13:7. Ang tinaga para sa “dumduma” mahimo man i-translate nga “sambita.” Gani, ang isa ka paagi nga ‘madumdom naton ang mga nagapanguna’ amo ang pagsambit sa Nagadumala nga Hubon sa aton mga pangamuyo. (Efe. 6:18) Binagbinaga ang ila responsibilidad sa pag-aman sang espirituwal nga pagkaon, pagpanguna sa pagbantala sa bilog nga kalibutan, kag pag-asikaso sang mga donasyon. Indi bala nga kinahanglan gid naton sila pirme ipangamuyo?

17, 18. (a) Paano naton mapakita nga ginasunod naton ang panuytoy sang Nagadumala nga Hubon? (b) Paano nagasakdag sa matutom nga ulipon kag kay Jesus ang aton pagbantala?

17 Ang pagdumdom sa Nagadumala nga Hubon indi lang sa hambal, dapat man naton sundon ang ila panuytoy. Nagahatag sila sing panuytoy paagi sa aton mga publikasyon, miting, asembleya, kag kombension. Nagatangdo man sila sang mga manugtatap sang sirkito. Ang mga manugtatap naman sang sirkito amo ang nagatangdo sang mga gulang sa kongregasyon. Ginadumdom sang mga manugtatap sang sirkito kag sang mga gulang ang Nagadumala nga Hubon paagi sa pagsunod sing maayo sa mga panuytoy nga ginahatag sa ila. Kon nagatuman kita kag nagapasakop sa mga lalaki nga ginagamit ni Jesus para tuytuyan kita, mapakita naton tanan nga ginatahod naton ang aton Lider, si Jesus.—Heb. 13:17.

18 Ang isa pa ka paagi nga madumdom naton ang Nagadumala nga Hubon amo ang paghimo sang aton bug-os nga masarangan sa pagbantala. Indi bala nga ginpalig-on ni Pablo ang mga Cristiano nga ilugon ang pagtuo sang mga nagapanguna sa ila? Tumalagsahon gid ang pagtuo sang matutom nga ulipon kay makugi sila sa pagpalapnag sang maayong balita sang Ginharian. Isa ka bala sa iban nga mga karnero nga nagasakdag sa mga hinaplas sa sining importante nga hilikuton? Pat-od gid nga malipay ka kon ang imo Lider, si Jesus, magasiling: “Sang ginhimo ninyo ini sa isa sining akon labing kubos nga mga utod, ginhimo ninyo ini sa akon.”—Mat. 25:34-40.

19. Ngaa gusto mo sundon ang aton Lider, si Jesus?

19 Pagbalik ni Jesus sa langit, wala niya ginpabay-an ang iya mga sumulunod. (Mat. 28:20) Sang ari sia sa duta, ginbuligan sia sang balaan nga espiritu, mga anghel, kag Pulong sang Dios sa iya pagpanguna. Gani, ginagamit man niya ini subong para buligan ang matutom nga ulipon. Bilang hinaplas nga mga Cristiano, ang mga miembro sini nga ulipon ‘padayon nga nagasunod sa Kordero bisan diin sia magkadto.’ (Bug. 14:4) Kon ginasunod naton ang ila panuytoy, ginasunod man naton ang aton Lider, si Jesus. Sa indi madugay, tuytuyan niya kita sa kabuhi nga wala sing katapusan. (Bug. 7:14-17) Wala sing lider nga tawo ang makapromisa sini!

^ par. 3 Mahimo gid nga katuyuan ni Jehova nga may 12 ka apostoles para mangin ‘12 ka sadsaran nga bato’ sang Bag-o nga Jerusalem sa palaabuton. (Bug. 21:14) Indi na kinahanglan nga buslan ang bisan sin-o nga matutom nga apostol nga napatay sang ulihi.

^ par. 8 Sugod sang 1955, ini nga korporasyon gintawag nga Watch Tower Bible and Tract Society of Pennsylvania.

^ par. 12 Tan-awa man ang topiko nga “Ginaathag ang Aton Pagpati” sa Giya sa Pagtuon Para sa mga Saksi ni Jehova.

^ par. 14 Tan-awa ang “Pagpanaksi sing Maid-id Tuhoy sa Ginharian sang Dios,” p. 58-59.