Magdiretso sa kaundan

Magdiretso sa secondary menu

Magdiretso sa listahan sang kaundan

Mga Saksi ni Jehova

Hiligaynon

Ang Lalantawan—Tulun-an nga Edisyon  |  Pebrero 2017

 SUGILANON SANG KABUHI

Madamo nga Beses nga Ginpakita sa Amon sang Dios ang Iya Wala Tupong nga Kaayo

Madamo nga Beses nga Ginpakita sa Amon sang Dios ang Iya Wala Tupong nga Kaayo

SANG pamatan-on pa ang akon amay, nga si Arthur, diosnon gid sia kag gusto niya mangin ministro sang Methodist Church. Pero sang mabasa niya ang literatura sang mga Estudyante sang Biblia kag nagpakig-upod sia sa ila, nagbag-o ang iya plano. Nabawtismuhan sia sang 1914 sang 17 anyos sia. Nag-umpisa na sadto ang Bug-os Kalibutan nga Inaway I, gani ginpatawag sia nga magsoldado. Bangod indi sia mag-uyat sang armas, ginpriso sia sing napulo ka bulan sa Kingston Penitentiary sa Ontario, Canada. Sang ginpagua si Tatay, nag-alagad sia bilang colporteur (payunir).

Sang 1926, ginpangasawa ni Tatay si Hazel Wilkinson. Ang iloy ni Nanay nakatuon sang kamatuoran sang 1908. Natawo ako sang Abril 24, 1931, kag ikaduha ako sa apat ka kabataan. Ang pagsimba kay Jehova amo ang pinakaimportante sa amon pamilya. Ginpabaloran gid ni Tatay ang Biblia, gani amo man sini ang ginhimo namon. Regular man kami nga nagapamalaybalay bilang pamilya.—Binu. 20:20.

NEUTRAL KAG PAYUNIR PAREHO SA AKON AMAY

Sang 1939, nagsugod ang Bug-os Kalibutan nga Inaway II. Pagkadason nga tuig, gindumilian ang hilikuton sang mga Saksi ni Jehova sa Canada. Ang pangpubliko nga mga eskwelahan may nasyonalistiko nga mga seremonya pareho sang pagsaludo sa bandera kag pagkanta sang pungsudnon nga ambahanon. Kon ginahimo ini, kami sang akon magulang nga si Dorothy ginapagua anay sa kuarto. Pero isa ka adlaw, nakibot gid ako kay ginpakahuy-an ako sang akon manunudlo kag nagsiling sia nga talawan ako. Pagkatapos sang klase, ginsakit ako sang pila ko ka klasmeyt asta nga natumba ako. Ini nga hitabo nagpabakod pa gid sang akon determinasyon nga “tumanon ang Dios subong manuggahom sa baylo sang mga tawo.”—Binu. 5:29.

Sang Hulyo 1942, sang 11 anyos ako, ginbawtismuhan ako sa isa ka tangke sang tubig sa uma. Kon bakasyon, nanamian gid ako mag-alagad bilang vacation pioneer (auxiliary payunir subong). Isa sadto ka tuig, nag-upod ako sa tatlo ka utod nga lalaki  sa wala mabantalaan nga teritoryo sa naaminhan sang Ontario para panaksihan ang mga manugtroso didto.

Sang Mayo 1, 1949, nangin regular payunir ako. Bangod may konstruksion sadto sa sanga talatapan, ginpangabay ako nga magbulig kag nangin miembro ako sang pamilya Bethel sa Canada sang Disiembre 1. Gin-asayn ako sa imprintahan kag natun-an ko magpaandar sang flatbed nga makina. Pila ka semana nga gab-i ang akon iskedyul sa pag-obra, nga nagaimprinta sang tract parte sa paghingabot sa katawhan ni Jehova sa Canada.

Sang ulihi, samtang nagaobra ako sa Service Department, gin-interbyu ko ang mga payunir nga nagbisita sa sanga talatapan. Magaboluntaryo sila sa Quebec, pero grabe ang pagpamatok didto. Isa sa ila amo si Mary Zazula halin sa Edmonton, Alberta. Bangod sia kag ang iya magulang nga si Joe nagpadayon sa pagtuon sa Biblia, ginpalayas sila sang ila mga ginikanan nga debotado sa Orthodox Church. Ginbawtismuhan sila sang Hunyo 1951, kag nagpayunir sila pagligad sang anom ka bulan. Samtang ginainterbyu ko si Mary, nagdayaw gid ako sa iya espirituwalidad. Naghunahuna ako, ‘Kon wala sing problema nga matabo, pangasaw-on ko gid ini nga babayi.’ Pagligad sang siam ka bulan, nagpakasal kami sang Enero 30, 1954. Pagligad sang isa ka semana, gin-agda kami nga hanason para mag-alagad sa sirkito. Sa masunod nga duha ka tuig, nag-alagad kami sa sirkito sa naaminhan sang Ontario.

Bangod nagauswag ang pagbantala nga hilikuton sa bilog nga kalibutan, kinahanglan ang madamo nga misyonero. Nasarangan namon ni Mary ang grabe nga katugnaw kon tigtulugnaw sa Canada kag ang mga lamok kon tingadlaw, gani naghunahuna kami nga masarangan namon ang bisan ano nga kabudlayan bisan diin. Gani nag-eskwela kami sa ika-27 nga klase sang Gilead School kag naggradwar sang Hulyo 1956. Pagka-Nobiembre, nag-abot kami sa Brazil nga amo ang amon bag-o nga asaynment.

PAGMISYONERO SA BRAZIL

Pag-abot namon sa sanga talatapan sa Brazil, nagtuon kami sing Portuguese. Sang makahibalo na kami sing simple nga mga panamyaw kag nasaulo ang isa ka minuto nga presentasyon sa magasin, nag-upod dayon kami sa pagbantala. Kon interesado ang tagbalay, ginpanugda nga magbasa kami sing mga teksto nga nagalaragway sang kahimtangan kon maggahom na ang Ginharian sang Dios. Sa amon una nga adlaw sa ministeryo, namati sing maayo ang isa ka babayi, gani ginbasa ko ang Bugna 21:3, 4, dayon nalipong ako! Wala pa gali ako maka-adjust sa mainit kag mapaang nga klima, kag nabudlayan gid ako sa sini.

Ang amon asaynment bilang mga misyonero amo ang siudad sang Campos, nga may 15 ka  kongregasyon subong. Pag-abot namon sa siudad, may isa lang ka grupo didto kag isa ka balay para sa mga misyonero nga ginaistaran sang apat ka utod nga babayi nga sanday Esther Tracy, Ramona Bauer, Luiza Schwarz, kag Lorraine Brookes (Wallen subong). Ang akon asaynment sa balay amo ang pagbulig sa pagpanglaba kag pagpangita sang inuggatong nga gamiton sa pagluto. Isa ka bes, Lunes sadto sang gab-i pagkatapos sang amon Pagtinuon sa Ang Lalantawan, nakibot kami sa wala ginapaabot nga bisita. Nagahigda ang akon asawa sa sofa para magpahuway kag nagaistorya kami parte sa amon adlaw. Pagbangon niya, nagua ang isa ka man-ug sa idalom sang iya ulunan. Nagkinagual kami asta nga napatay ko ang man-ug!

Pagkatapos sang isa ka tuig nga pagtuon sing Portuguese, gintangdo ako nga manugtatap sang sirkito. Simple lang ang amon kabuhi sa uma. Wala sing kuryente, nagatulog kami sa banig, kag nagasakay kami sa karo nga ginaguyod sang kabayo. Isa ka bes, ginkadtuan namon ang wala mabantalaan nga teritoryo. Nagsakay kami sa tren pakadto sa banwa nga ara sa bukid kag nag-arkila kami didto sing kuarto sa isa ka dalayunan. Ginpadalhan kami sang sanga talatapan sing 800 ka magasin para gamiton sa ministeryo. Kapila kami magbalikbalik sa post office para hakuton ang mga kahon sang magasin pakadto sa amon ginadayunan.

Sang 1962, ginhiwat ang Kingdom Ministry School sa bilog nga Brazil para sa mga utod nga lalaki kag mga misyonera. Sa sulod sang anom ka bulan, nagsaylosaylo ako sa mga ginahiwatan sang klase, pero indi ko kaupod si Mary. Nagtudlo ako sa Manaus, Belém, Fortaleza, Recife, kag Salvador. Gin-organisar ko man ang distrito nga kombension sa bantog nga opera house sa Manaus. Sang nag-ulan sing mabaskog, nahigkuan ang kalabanan sang amon tubig nga ilimnon kag wala kami sing lugar para sa kapiterya sang kombension. (May pagkaon nga ginaserbe sa mga kombension sadto.) Gani gin-istorya ko ang isa ka mabuot nga opisyal sang militar. Gin-asikaso niya nga masuplayan kami sing tubig nga mainom asta matapos ang kombension, kag nagpadala man sia sing mga soldado para patindugan kami sing duha ka dalagku nga tolda para mangin amon kusina kag kapiterya.

Samtang wala ako, nagbantala si Mary sa lugar sang mga negosyante nga Portuguese. Ang mga tawo didto interesado lang sa kuarta. Wala gid sia sing naistorya parte sa Biblia, gani ginsilingan niya ang pila ka Bethelite, “Indi gid ako mag-istar sa Portugal.” Makahalam-ot gid ang masunod nga natabo! Nakabaton kami sing sulat nga nagapangabay kon bala puede kami mag-alagad sa Portugal. Sadto nga tion, ginadumilian ang pagbantala nga hilikuton didto, pero ginbaton namon ang asaynment bisan pa nahinalian gid si Mary sang primero.

 ANG AMON ASAYNMENT SA PORTUGAL

Nag-abot kami sa Lisbon, Portugal, sang Agosto 1964. Ginahingabot sang mga sekreta nga Portuguese ang aton kauturan. Bangod sini, mas maayo nga wala sing mag-abiabi kon mag-abot kami kag indi anay kami magkontak sa mga Saksi didto. Nag-istar anay kami sa isa ka dalayunan samtang ginahulat namon ang amon visa. Sang ara na ang amon visa, nag-arkila kami sing apartment. Sang Enero 1965, ginkontak na namon ang sanga talatapan. Nalipay gid kami nga makatambong sa miting pagligad sang lima ka bulan!

Nahibaluan namon nga adlaw-adlaw nga ginasulod sang mga pulis ang mga balay sang kauturan para mangusisa. Bangod ginpasira ang mga Kingdom Hall, sa mga balay ginahiwat ang mga miting sang kongregasyon. Ginatos ka Saksi ang gindala sa mga estasyon sang pulis kag gin-interogar. Dayon ginsakit ang mga utod nga lalaki para hingalanan nila kon sin-o ang mga nagadumala sa mga miting. Para maamligan ang kada isa, ngalan na lang ang ginagamit sang mga kauturan kon magtawganay sila, pareho sang José ukon Paulo, kag wala na nila ginalakip ang apelyido. Amo man sini ang ginhimo namon.

Importante gid nga maamanan sing espirituwal nga pagkaon ang mga kauturan. Gani gina-type ni Mary sa stencil ang tulun-an nga mga artikulo sang Ang Lalantawan kag iban pa nga literatura. Dayon ginakopya ini paagi sa mimeograph.

PAGPANGAPIN SANG MAAYONG BALITA SA KORTE

Sang Hunyo 1966, isa ka importante nga kaso ang ginbista sa korte sa Lisbon. Ang tanan nga 49 ka miembro sang kongregasyon sang Feijó ginkasuhan bangod nagtambong sila sa ilegal nga miting sa isa ka balay. Gani ginhandaan namon ang pagbista sa ila. Kuno abi ako ang abogado sang nagaakusar kag ginapamangkot ko sila. Nahibaluan namon nga mapierde kami sa kaso, pero narealisar namon nga magaresulta ini sa daku nga panaksi. Sa konklusion sang amon abogado, maisog nga ginkutlo niya ang ginsiling ni Gamaliel sang unang siglo. (Binu. 5:33-39) Ginbalita sang media ang parte sa kaso. Ginpriso ang tanan nga 49 ka utod, 45 ka adlaw ang pinakamalip-ot, kag lima ka bulan kag tunga ang pinakamalawig. Nalipay gid kami nga ang amon maisog nga abogado nagtuon sing Biblia kag nagatambong na sa mga miting antes sia mapatay.

Sang Disiembre 1966, gintangdo ako nga manugtatap sang sanga kag kalabanan sang akon obra amo ang parte sa legal nga mga isyu. Ginhimo namon ang tanan para pamatud-an ang legal nga kinamatarong sang mga Saksi ni Jehova para sa kahilwayan sa pagsimba. (Fil. 1:7) Sang ulihi, sang Disiembre 18, 1974, legal gid man kami nga ginkilala. Sanday Utod Nathan Knorr kag Utod Frederick Franz, halin sa ulong-talatapan, nagbisita sa Portugal para magbuylog sa amon kalipay sa isa ka indi malipatan nga pagtilipon sa Oporto kag Lisbon, kag 46,870 ang kabug-usan nga nagtambong.

 Bangod sang pagpakamaayo ni Jehova, nabantalaan man ang pila ka isla nga ang mga pumuluyo nagahambal sing Portuguese, lakip ang Azores, Cape Verde, Madeira, kag São Tomé and Príncipe. Bangod nagadamo ang mga Saksi, kinahanglan ang mas daku nga sanga talatapan. Nahuman ini sang 1988. Sang Abril 23 sadto nga tuig, si Utod Milton Henschel amo ang nagpamulongpulong sa dedikasyon sang bag-o nga mga pasilidad. Malipayon gid ang 45,522 nga nagtambong! Makapalig-on makita ang 20 ka kauturan nga mga misyonero anay sa Portugal. Nagbalik sila para magtambong sa sining importante nga hitabo sa kasaysayan.

NAKABENEPISYO KAMI SA HALIMBAWA SANG MGA MATUTOM

Nakabulig gid sa amon ang pagpakig-upod sa matutom nga mga kauturan. Halimbawa, sang gin-updan ko si Utod Theodore Jaracz sa pagduaw sa isa ka sanga talatapan (zone visit), nakatuon ako sing importante nga leksion. Ang amon ginbisitahan may mabug-at nga problema, kag nahimo na sang Komite sang Sanga ang tanan nga puede himuon. Ginpakalma sila ni Utod Jaracz, kag nagsiling sia: “Ang balaan nga espiritu na ang bahala sa sini.” Sang nagbisita naman kami ni Mary sa Brooklyn pila ka tuig na ang nagligad, nakaupod namon si Utod Franz upod ang iban pa. Sang ginpamangkot sia kon ano ang masiling niya parte sa iya madamo nga tinuig nga pag-alagad kay Jehova, nagsiling sia: “Amo ini ang akon panugda: Magpabilin sa kitaon nga organisasyon ni Jehova bisan ano pa ang matabo. Amo lamang ini ang nagahimo sang hilikuton nga ginsugo ni Jesus sa iya mga disipulo, ang pagbantala sang maayong balita sang Ginharian sang Dios!”

Nalipay gid kami ni Mary sa paghimo sini. Ginapakabahandi gid namon ang mga pagduaw sa mga sanga talatapan. Ini nga mga pagduaw naghatag sa amon sing kahigayunan nga ipakita ang amon apresasyon sa mga tigulang kag mga bataon nga matutom nga nagaalagad kay Jehova, kag palig-unon sila nga magpadayon sa ila pinasahi nga pribilehiyo.

Mga 80 anyos na kami subong, kag madamo na sing ginabatyag si Mary. (2 Cor. 12:9) Ang mga pagtilaw nagpalig-on sang amon pagtuo kag nagpabakod sang amon determinasyon nga padayon nga mangin matutom. Kon balikan namon ang amon ginpili nga kabuhi, makasiling gid kami nga madamo nga beses nga ginpakita sa amon ni Jehova ang iya wala tupong nga kaayo. *

^ par. 29 Samtang ginahanda ini nga artikulo, si Douglas Guest napatay nga matutom kay Jehova sang Oktubre 25, 2015.