“Indi kamo maghunahuna nga nagkari ako sa pagdala sing paghidait sa duta; wala ako magkari sa pagdala sing paghidait, kundi sing espada.”—MAT. 10:34.

AMBAHANON: 125, 135

1, 2. (a) Ano nga paghidait ang nabaton naton? (b) Ngaa indi bug-os ang aton paghidait subong? (Tan-awa ang piktyur sa umpisa sini nga artikulo.)

GUSTO naton tanan ang malinong nga kabuhi kag wala sing ginakabalak-an. Nagapasalamat gid kita kay Jehova kay ginhatagan niya kita sang “paghidait sang Dios,” ukon ang kalinong nga nagaamlig sa aton sa makapaluya nga panghunahuna kag balatyagon! (Fil. 4:6, 7) Kag bangod nagdedikar kita kay Jehova, may ara man kita “paghidait sa Dios,” ukon maayo nga kaangtanan sa iya.—Roma 5:1.

2 Pero, wala pa nag-abot ang tion para paluntaron sang Dios ang bug-os nga paghidait. Ang katapusan nga mga adlaw puno sang kagamo, kag madamo nga tawo ang bayolente. (2 Tim. 3:1-4) Bilang mga Cristiano, nagapakig-away kita kay Satanas kag sa butig nga mga panudlo nga iya ginapalapnag. (2 Cor. 10:4, 5) Pero ang aton indi tumuluo nga mga paryente amo ang mahimo mangin panguna nga rason nga madula ang aton paghidait. Ang iban mahimo magyaguta sa aton mga ginapatihan, magsumbong nga ginaguba naton ang aton pamilya, ukon magpamahog nga isikway nila kita kon indi kita mag-untat  sa pag-alagad kay Jehova. Paano naton dapat tamdon ang pagpamatok sang pamilya? Ano ang dapat naton himuon para malampuwasan naton ini nga kabudlayan?

KON PAANO NATON DAPAT TAMDON ANG PAGPAMATOK SANG PAMILYA

3, 4. (a) Ano ang resulta sang mga panudlo ni Jesus? (b) Ano ang rason nga mahimo mangin mabudlay ang pagsunod kay Jesus?

3 Nahibaluan ni Jesus nga ang iya mga panudlo magabahinbahin sa mga tawo, kag ang mga nagasunod sa iya nagakinahanglan sang kaisog kay pamatukan sila. Ini nga pagpamatok mahimo magdula sang paghidait sa pamilya. Si Jesus nagsiling: “Indi kamo maghunahuna nga nagkari ako sa pagdala sing paghidait sa duta; wala ako magkari sa pagdala sing paghidait, kundi sing espada. Kay nagkari ako sa pagbahinbahin; ang anak nga lalaki batok sa iya amay, ang anak nga babayi batok sa iya iloy, kag ang umagad nga babayi batok sa iya ugangan nga babayi. Sa pagkamatuod, ang kaaway sang tawo amo mismo ang mga katapo sang iya panimalay.”—Mat. 10:34-36.

4 Sang nagsiling si Jesus nga “Indi kamo maghunahuna nga nagkari ako sa pagdala sing paghidait,” ginpadaku niya nga dapat pamensaron sang iya mga tagpalamati ang mangin resulta sang pagsunod sa iya. Ang iya mensahe mahimo magbahinbahin sa mga tawo. Siempre, ang katuyuan ni Jesus amo ang pagbantala sang kamatuoran parte sa Dios, indi ang pagguba sang pamilya. (Juan 18:37) Pero, mabudlayan ang isa sa pagsunod sa mga panudlo ni Jesus kon ang iya suod nga mga abyan ukon miembro sang pamilya indi magbaton sang kamatuoran.

5. Ano ang naeksperiensiahan sang mga sumulunod ni Jesus?

5 Ang mga sumulunod ni Jesus dapat mangin handa nga batason ang mga kabudlayan. Nagsiling si Jesus nga nalakip sa sini ang pagpamatok sang pamilya. (Mat. 10:38) Para mapamatud-an sang mga disipulo nga takus sila sang kahamuot sang Cristo, ginbatas nila ang pagyaguta ukon ang pagsikway sang ila pamilya. Pero, mas madamo ang ila natigayon sangsa ila nadula.—Basaha ang Marcos 10:29, 30.

6. Ano ang dapat naton tandaan kon pamatukan kita sang aton mga paryente sa pagsimba kay Jehova?

6 Bisan pa pamatukan kita sang aton mga paryente sa aton pagsimba kay Jehova, palangga gihapon naton sila. Pero dapat naton tandaan nga ang aton gugma sa Dios kag sa Cristo amo ang pinakaimportante. (Mat. 10:37) Dapat man naton tandaan nga mahimo gamiton ni Satanas ang aton gugma sa pamilya para gub-on ang aton integridad. Binagbinagon naton ang pila ka mabudlay nga sitwasyon sa pamilya kag kon ano ang dapat naton himuon para mabatas ini.

INDI TUMULUO NGA TIAYON

7. Kon indi tumuluo ang tiayon sang isa, paano niya dapat tamdon ang iya sitwasyon?

7 Ang Biblia nagpaandam nga ang mga nagaminyo “may kapipit-an sa unod.” (1 Cor. 7:28) Kon ang imo tiayon indi tumuluo, mahimo nga madugangan pa gid ang imo stress kag kabalaka sa inyo pag-asawahay. Pero, importante nga tamdon mo ang imo sitwasyon suno sa pagtamod ni Jehova. Bisan pa indi luyag sang imo tiayon nga sundon ang Cristo, indi ini rason para bulagan ukon diborsiohan sia. (1 Cor. 7:12-16) Kon ang imo bana indi tumuluo kag wala niya ginapangunahan ang pag-aman sang espirituwal nga kinahanglanon sang inyo pamilya, dapat mo gihapon sia respetuhon bangod sia ang ulo sang inyo pamilya. Kag kon ang imo asawa indi tumuluo, dapat mo gihapon sia higugmaon kag palanggaon.—Efe. 5:22, 23, 28, 29.

8. Ano ang mahimo mo ipamangkot kon limitahan sang imo tiayon ang imo pagsimba?

8 Ano abi kon limitahan sang imo tiayon ang imo pagsimba? Halimbawa, isa ka utod ang ginsilingan sang iya bana nga may mga adlaw lang kada semana nga puede sia magbantala. Kon amo man sini ang imo sitwasyon, pamangkuta ang imo kaugalingon: ‘Buot bala niya silingon nga indi na gid ako  magsimba sa akon Dios? Kon indi man amo sini ang buot niya silingon, puede bala ako magpasugot sa iya ginapangabay?’ Kon mangin makatarunganon ka, malikawan mo ang mga problema sa pag-asawahay.—Fil. 4:5.

9. Paano matudluan sang mga Cristiano ang ila kabataan nga padunggan ang ila indi tumuluo nga ginikanan?

9 Ang paghanas sa kabataan mas mabudlay kon indi tumuluo ang imo tiayon. Halimbawa, dapat mo tudluan ang inyo kabataan nga tumanon ini nga sugo sang Biblia: “Padunggi ang imo amay kag ang imo iloy.” (Efe. 6:1-3) Pero ano abi kon ang imo tiayon wala nagasunod sa mataas nga mga talaksan sang Biblia parte sa paggawi? Magpakita sing maayo nga halimbawa sa pagpadungog sa imo tiayon. Magpokus sa iya maayo nga mga kinaiya, kag pasalamati sia. Likawi nga maghambal sing negatibo parte sa imo tiayon kon ara ang inyo kabataan. Sa baylo, ipaathag sa inyo kabataan nga ang kada isa amo ang dapat magdesisyon kon bala alagaron niya si Jehova. Ang maayo nga paggawi sang kabataan mahimo magganyat sa indi tumuluo nga tiayon sa matuod nga pagsimba.

Kon may kahigayunan, tudlui dayon ang imo kabataan sang kamatuoran sa Biblia (Tan-awa ang parapo 10)

10. Kon ang isa ka ginikanan indi tumuluo, paano matudluan sang Cristianong ginikanan ang ila kabataan sang kamatuoran sa Biblia?

10 Kon kaisa, mahimo magpamilit ang indi tumuluo nga tiayon nga updon ang kabataan sa pagselebrar sang pagano nga mga selebrasyon ukon tudluan sila sang butig nga mga panudlo. Mahimo dumilian sang pila ka bana ang ila Cristianong asawa sa pagtudlo sa ila kabataan sang Biblia. Pero bisan pa amo sini ang sitwasyon, himuon sang asawa ang iya bug-os nga masarangan para tudluan ang iya kabataan sang kamatuoran. (Binu. 16:1; 2 Tim. 3:14, 15) Halimbawa, ang bana mahimo indi magtugot sa iya Saksi nga asawa nga tudluan sang Biblia ang ila menor-de-edad  nga kabataan ukon dalhon sila sa Cristianong mga miting. Dapat niya tahuron ang desisyon sang iya bana, pero may mga kahigayunan nga masugid niya gihapon sa iya kabataan ang parte sa iya mga ginapatihan, gani makatuon sila parte kay Jehova kag sa iya mga talaksan sang husto kag sala. (Binu. 4:19, 20) Siempre, ang kabataan amo ang magadesisyon kon bala simbahon nila si Jehova.—Deut. 30:19, 20. *

MGA PARYENTE NGA NAGAPAMATOK SA MATUOD NGA PAGSIMBA

11. Ano ang posible nga himuon sang imo mga paryente nga indi Saksi?

11 Mahimo nga sang primero wala naton ginsugiran ang aton pamilya nga nagatuon kita sang Biblia upod sa mga Saksi ni Jehova. Pero samtang nagabakod ang aton pagtuo, narealisar naton nga kinahanglan naton ini isugid. (Mar. 8:38) Bangod sang imo malig-on nga panindugan, mahimo ginpamatukan ka sang imo mga paryente nga indi Saksi. Binagbinagon naton ang mga puede mo himuon para malikawan ang problema kag padayon ka nga mangin mainunungon.

12. Ngaa mahimo kita pamatukan sang aton mga paryente nga indi tumuluo, pero paano kita makapakita sing empatiya sa ila?

12 Magpakita sing empatiya sa imo mga paryente nga indi tumuluo. Nalipay gid kita sa aton natun-an nga mga kamatuoran sa Biblia. Pero, mahimo nga abi sang aton mga paryente nalimbungan kita ukon nag-entra kita sa kulto. Mahimo nga ginahunahuna nila nga indi na naton sila palangga kay wala na kita nagaupod sa mga kapiestahan kag iban pa nga selebrasyon. Mahimo nga nabalaka sila sa aton paglaum sa palaabuton. Dapat kita magpakita sing empatiya paagi sa pag-intiende sa ila mga ginahunahuna kag pagpamati sing maayo para mahangpan ang ila mga ginakabalak-an. (Hulu. 20:5) Gintinguhaan ni apostol Pablo nga hangpon ang “tanan nga sahi sang tawo” para mapaambit niya ang maayong balita sa ila. Kon himuon man naton ini, makabulig ini sa aton.—1 Cor. 9:19-23.

13. Paano kita dapat magpakighambal sa aton mga paryente nga indi tumuluo?

13 Maghambal sing mainayuhon. “Maghambal kamo pirme sing mainayuhon,” siling sang Biblia. (Col. 4:6) Pangabayon naton kay Jehova ang iya balaan nga espiritu para mapakita naton ang mga kinaiya nga ginapatubas sini kon nagapakighambal kita sa aton mga paryente. Indi kita dapat makigbais sa tanan nga butig nga panudlo nga ila ginapatihan. Kon nasakitan kita sa ila ginhambal ukon ginhimo, ilugon naton ang halimbawa sang mga apostoles. Nagsulat si Pablo: “Kon ginatamay, nagapakamaayo kami; kon ginahingabot, nagabatas kami; kon ginapasipalahan, nagasabat kami sing malulo.”—1 Cor. 4:12, 13.

14. Ano ang maayo nga mga resulta sang maayo nga paggawi?

14 Ipakita pirme ang maayo nga paggawi. Ang paghambal sing mainayuhon makabulig sa aton pagpakig-angot sa aton nagapamatok nga mga paryente, pero mas makabulig ang aton maayo nga paggawi. (Basaha ang 1 Pedro 3:1, 2, 16.) Paagi sa imo halimbawa, ipakita sa imo mga paryente nga ang mga Saksi ni Jehova malipayon sa ila pag-asawahay, nagaatipan sang ila kabataan, nagasunod sang talaksan sang Dios, kay may katuyuan ang ila kabuhi. Bisan pa indi pagbatunon sang aton mga paryente ang kamatuoran, malipayon gihapon kita bangod ang aton maayo nga paggawi nagapahamuot kay Jehova.

15. Paano kita makaplano sing abanse para malikawan naton nga maakig ang aton mga paryente?

15 Magplano sing abanse. Hunahunaa ang mga sitwasyon nga mahimo maakig ang imo mga paryente, kag handai kon ano ang dapat mo himuon. (Hulu. 12:16, 23) Ang isa ka utod sa Australia nagsiling: “Grabe gid ang pagpamatok sang akon ugangan nga lalaki sa kamatuoran. Gani, antes namon sia tawgan sang akon bana, nagapangamuyo kami kay Jehova nga buligan kami nga mangin kalmado bisan  pa maakig sia sa amon. Nagahanda kami sang mga topiko nga nanamian niya istoryahan. Para malikawan ang malawig nga istoryahanay nga masami nagaresulta sa pagbaisay parte sa relihion, wala kami nagapadugay sa pagtawag.”

16. Ano ang himuon mo kon nasubuan ka bangod naakig ang imo mga paryente?

16 Indi mo malikawan ang tanan nga sitwasyon nga mahimo maakig ang imo mga paryente nga indi tumuluo. Kon matabo ini, mahimo nga masubuan ka bangod palangga mo sila kag gusto mo nga pahamut-an sila. Kon amo sini ang imo ginabatyag, dumduma nga dapat mo unahon ang imo pagkamainunungon kay Jehova sangsa imo gugma sa pamilya. Kon himuon mo ini, posible nga makita sang imo mga paryente nga ang pag-aplikar sang kamatuoran sa Biblia nagadalahig sang aton kabuhi. Tandai nga indi mo mapilit ang iban nga batunon ang kamatuoran. Pero, puede mo ipakita sa ila kon paano ka nakabenepisyo sa pagsunod sa mga pamaagi ni Jehova. Ginatanyag man sa ila sang aton mahigugmaon nga Dios ang gintanyag niya sa aton nga kahigayunan nga alagaron sia.—Isa. 48:17, 18.

KON ANG MIEMBRO SANG PAMILYA NAGBIYA KAY JEHOVA

17, 18. Ano ang makabulig sa imo kon ang miembro sang inyo pamilya nagbiya kay Jehova?

17 Kon ang miembro sang pamilya na-disfellowship ukon nag-disassociate sa kongregasyon, daw pareho ini kasakit sang buno sang espada. Paano mo mapahaganhagan ini nga kasakit?

18 Padayuna ang imo espirituwal nga rutina. Pabakura ang imo kaugalingon paagi sa regular nga pagbasa sang Biblia, paghanda para sa Cristianong mga miting kag pagtambong sa sini, pagbantala, kag pagpangamuyo nga hatagan ka sing kusog nga makabatas. (Jud. 20, 21) Ano abi kon ginahimo mo man ini tanan pero nasakitan ka gihapon? Indi mag-untat! Ang maayo nga espirituwal nga rutina makabulig sa imo nga mangin positibo liwat ang imo ginahunahuna kag ginabatyag. Binagbinaga ang eksperiensia sang manunulat sang Salmo 73. May tion nga indi husto ang iya pagtamod kag grabe gid ang iya kabalaka, pero natadlong niya ang iya panghunahuna sang nagsulod sia sa santuaryo sang Dios. (Sal. 73:16, 17) Ang imo katutom sa pag-alagad kay Jehova makabulig man sa imo nga mahimo ini.

19. Paano mo mapakita ang pagrespeto sa kahimusan ni Jehova sa pagdisiplina?

19 Respetuha ang disiplina ni Jehova. Ang iya disiplina para sa kaayuhan sang tanan, lakip sa nakasala, bisan pa masakit ini sa umpisa. (Basaha ang Hebreo 12:11.) Halimbawa, ginsugo kita ni Jehova nga ‘untatan ang pagpakig-upod’ sa indi mahinulsulon nga mga makasasala. (1 Cor. 5:11-13) Bisan pa masakit ini sa aton, likawan naton ang indi kinahanglanon nga pagkontak sa ila paagi sa telepono, text, sulat, e-mail, ukon social media.

20. Ano ang ginalauman naton?

20 Indi madulaan sing paglaum. Ang gugma “nagalaum sang tanan nga butang,” lakip ang paglaum nga magabalik kay Jehova ang mga nagbiya sa iya. (1 Cor. 13:7) Kon makita mo ang positibo nga pagbag-o sang miembro sang inyo pamilya nga nagbiya kay Jehova, mahimo ka mangamuyo nga kuntani mapabakod sia sang Kasulatan kag batunon niya ini nga pangabay ni Jehova: “Magbalik ka sa akon.”—Isa. 44:22.

21. Ano ang dapat mo himuon kon nabahinbahin ang inyo pamilya bangod ginsunod mo si Jesus?

21 Nagsiling si Jesus nga kon unahon naton ang bisan sin-o nga tawo sangsa iya, indi kita takus sa iya. Pero, sigurado si Jesus nga ang iya mga disipulo may kaisog nga mangin mainunungon sa iya bisan pa pamatukan sila sang ila pamilya. Kon ang pagsunod mo kay Jesus nagdala sing “espada” sa inyo pamilya, magsalig kay Jehova nga buligan ka niya nga maatubang ini nga kabudlayan. (Isa. 41:10, 13) Dapat ka malipay bangod nahamuot sa imo si Jehova kag si Jesus kag padyaan nila ang imo katutom.

^ par. 10 Para sa dugang nga impormasyon parte sa paghanas sa kabataan kon ang isa ka ginikanan indi Saksi, tan-awa ang “Mga Pamangkot Gikan sa mga Bumalasa” sa Agosto 15, 2002, nga Ang Lalantawan.