“Handa kami nga himuon ina!” Amo ini ang sabat ko kag sang akon bana, kag sang akon utod kag sang iya asawa, sa ginhatag sa amon nga asaynment. Ngaa ginbaton namon ini, kag paano kami ginpakamaayo ni Jehova? Sugiran ko anay kamo parte sa akon pamilya.

NATAWO ako sang 1923 sa Hemsworth, isa ka banwa sa Yorkshire, England. Duha lang kami nga mag-utod, kag Bob ang ngalan sang akon magulang. Sang mga nuebe anyos ako, ang amon amay nga naugot sa pagkasalimpapaw sang relihion nakabasa sing mga libro nga nagabuyagyag sang butig nga relihion. Nagdayaw gid sia sa iya nabasa. Mga pila ka tuig pagkatapos sini, si Bob Atkinson nagkadto sa amon balay kag ginpatokar niya sa radyo pono ang isa sa mga pamulongpulong ni Utod Rutherford. Narealisar namon nga isa lang ka grupo ang ginhalinan sini nga pamulongpulong kag sang mga libro nga nabasa ni Tatay. Ginsilingan sang amon mga ginikanan si Utod Atkinson nga sa amon lang sia balay pirme manihapon para masabat niya ang madamo namon nga pamangkot sa Biblia. Gin-agda kami nga magtambong sa mga miting sa balay sang isa ka utod nga mga pila ka kilometro ang kalayuon. Pirme kami nagatambong, kag isa ka gamay nga kongregasyon ang natukod sa Hemsworth. Ginapadayon namon sa amon balay ang mga zone servant (ginatawag subong nga manugtatap sang sirkito) kag ginaagda man namon sa pagkaon upod sa amon ang mga payunir sa malapit nga mga kongregasyon. Ini nga mga pagpakig-upod nagpalig-on gid sa akon.

May negosyo sadto ang amon pamilya. Pero ginsilingan ni Tatay si Manong, “Kon gusto mo magpayunir, untaton naton ang aton negosyo.” Nagsugot si Manong, kag naghalin sia sa balay para magpayunir sang 21 anyos sia. Pagligad sang duha ka tuig, sang 16 anyos ako, nagpayunir man ako. Kon Sabado kag Domingo may upod ako sa ministeryo, pero kon iban nga adlaw, masami nga isa lang ako. Ginagamit ko ang radyo pono kag ang testimony card, nga isa ka gamay nga papel nga may malip-ot kag madali mahangpan nga mensahe halin sa Biblia. Ginpakamaayo ako ni Jehova kay nakakita ako sang interesado magtuon sa Biblia kag madasig sia nga nag-uswag. Madamo sa ila pamilya ang nangin Saksi. Pagkasunod nga tuig, gintangdo ako nga espesyal payunir upod kay Mary Henshall. Ginpadala kami sa wala maasayn nga teritoryo sa probinsia sang Cheshire.

Tion sadto sang Bug-os Kalibutan nga Inaway II, kag ginmanduan ang mga babayi nga suportahan ang inaway. Bangod bug-os tion nga ministro ang mga espesyal payunir, abi namon indi man kami pagpaentrahon sa inaway pareho sang mga ministro sang iban  nga relihion. Pero indi amo sina ang desisyon sang korte, gani ginsentensiahan ako nga mapriso sing 31 ka adlaw. Pagkasunod nga tuig sang 19 anyos ako, duha ka beses ako nga nagkadto sa korte bangod indi magtugot ang akon konsiensia nga suportahan ang inaway. Duha man ka beses nga pabor sa akon ang desisyon sang korte. Kumbinsido ako nga sa sini nga mga sitwasyon, ginbuligan ako sang balaan nga espiritu kag gin-uyatan ni Jehova ang akon kamot para palig-unon ako kag pabakuron.—Isa. 41:10, 13.

BAG-O NGA KAUPOD

Sang 1946, nagkilalahay kami ni Arthur Matthews. Napriso sia sing tatlo ka bulan kay indi sia magsoldado bangod sang iya konsiensia. Paggua niya, nag-upod sia sa iya manghod nga si Dennis, nga isa ka espesyal payunir sa Hemsworth. Bata pa sila sang gintudluan sila sang ila amay parte kay Jehova, kag nagpabawtismo sila bisan tin-edyer pa lang sila. Wala magdugay, gin-asayn si Dennis sa Ireland, gani nabilin si Arthur nga wala sing kaupod. Nanamian ang akon mga ginikanan kay Arthur, nga isa ka pamatan-on kag mapisan nga payunir, gani ginsilingan nila sia nga sa balay na lang maistar. Kon nagabisita ako sa balay, kami ni Arthur ang nagapanghugas sang pinggan pagkatapos magkaon. Sang ulihi, nagsulatay kami. Sang 1948, ginsentensiahan liwat si Arthur nga mapriso sing tatlo ka bulan. Nagpakasal kami sang Enero 1949, kag tulumuron namon nga magpabilin sa bug-os tion nga pag-alagad tubtob posible. Gani nagakinot kami, kag ginagamit namon ang amon bakasyon para magpamupo sang mga prutas agod may panggasto kami. Ginpakamaayo kami ni Jehova gani nakapadayon kami sa pagpayunir.

Sa Hemsworth wala madugay pagkatapos sang amon kasal sang 1949

Pagligad sang mga sobra isa ka tuig, gin-asayn kami sa Northern Ireland, una sa banwa sang Armagh kag dayon sa banwa sang Newry, nga mga Katoliko ang kalabanan nga pumuluyo. Debotado gid ang mga tawo sa ila relihion, gani nagahalong gid kami kon nagabantala. Ginahiwat ang mga miting sa balay sang mag-asawa nga utod nga 16 ka kilometro ang kalayuon halin sa amon ginaistaran. Mga walo ang nagatambong. Kon ginaagda kami nga magpabilin sa gab-i, sa salog kami nagatulog. Pagkaaga, busog gid kami sa ginahanda nga pamahaw. Makalilipay gid mahibaluan nga madamo na sing Saksi subong didto.

“HANDA KAMI NGA HIMUON INA!”

Si Manong kag ang iya asawa, nga si Lottie, mga espesyal payunir na nga daan sa Northern Ireland. Sang 1952, nagtambong kami nga apat sa distrito nga kombension sa Belfast. Isa ka utod nga lalaki ang maabiabihon nga nagpadayon sa amon sa iya balay, upod si Pryce Hughes nga branch servant sadto sa Britanya. Isa ka gab-i, gin-istoryahan namon ang parte sa bag-o nga bukleta nga God’s Way Is Love, nga ginhimo para gid sa mga taga-Ireland. Ginsugid ni Utod Hughes kon daw ano kabudlay panaksihan ang mga Katoliko sa Irish Republic. Ang mga kauturan ginapahalin sa ila mga ginadayunan, kag ang mga pari nagasugyot sa mga tawo nga sakiton ang mga kauturan. “Kinahanglan namon ang mga mag-asawa nga may salakyan,” siling ni Utod Hughes, “para sa pinasahi nga kampanya nga pagpanagtag sang bukleta sa bilog nga pungsod.” * Nagsabat kami dayon, “Handa  kami nga himuon ina!” Amo ini ang ginsambit ko sa umpisa sang akon sugilanon.

Nagasakay sa traysikol upod ang iban nga payunir

Ang balay ni “Ma” Rutland sa Dublin pirme ginadayunan sang mga payunir. Matutom sia nga utod sa malawig na nga tinuig. Nagdayon kami didto, kag ginbaligya namon ang pila namon ka pagkabutang. Dayon, nagsakay kami nga apat sa traysikol ni Manong kag nangita kami sang salakyan. Nakakita kami sang maayo pa nga segunda mano nga awto kag ginpangabay namon ang nagbaligya nga idul-ong ini sa amon kay indi kami kabalo magdrayb. Bilog nga gab-i nga nagapungko lang si Arthur sa katre kag kuno abi nagapraktis sia magkambiya sang awto. Pagkaaga, sang testingan na niya nga pagguaon ang awto sa garahe, nag-abot ang misyonera nga si Mildred Willett (nga napangasawa ni John Barr). Maayo lang kay kabalo sia magdrayb. Gintudluan niya kami magdrayb, gani nangin handa kami nga himuon ang amon asaynment.

Ang amon awto kag trailer

Ang masunod namon nga ginpangita amo ang dalayunan. Ginpaandaman kami nga indi mag-istar sa trailer kay basi sunugon ini sang mga nagapamatok. Gani nangita kami sang balay nga madayunan, pero wala kami sang nakita. Pagkagab-i, sa awto kami nga apat nagtulog. Pagkasunod nga adlaw, ang nakita lang namon nga puede dayunan amo ang trailer nga may gamay nga double-deck nga katre. Amo ini ang amon gin-istaran. Wala gid kami sing nangin problema sa pagbilin sang trailer sa lote sang mabuot nga mga mangunguma. Nagabantala kami sa lugar nga 16 asta 24 ka kilometro ang kalayuon halin sa trailer. Kon magsaylo na kami, ginabalikan namon ang lugar nga amon ginhalinan para didto naman magbantala.

Nakadtuan namon ang tanan nga balay sa bagatnan-sidlangan sang Irish Republic kag halos wala sing nagpamatok. Nakapanagtag kami sang sobra 20,000 ka bukleta, kag ginpadala namon sa sanga talatapan sa Britanya ang tanan nga ngalan sang mga interesado. Isa gid ka pagpakamaayo nga may ginatos na subong ka Saksi sa sini nga lugar!

NAGBALIK SA ENGLAND, DAYON NAGKADTO SA SCOTLAND

Sang ulihi, gin-asayn kami liwat sa bagatnan sang London. Pagligad sang pila ka semana, gintawgan si Arthur sang sanga talatapan sa Britanya, kag ginsilingan sia nga magaalagad sia sa sirkito pagkasunod nga adlaw! Pagkatapos sang isa ka semana nga paghanas sa amon, nagbiyahe kami pakadto sa amon sirkito sa Scotland. Wala na sing tion si Arthur para handaan ang iya mga pamulongpulong, pero handa sia pirme nga himuon ang bisan ano nga asaynment sa pag-alagad kay Jehova kag nagpalig-on gid ini sa akon. Nanamian gid kami sa amon pag-alagad sa sirkito. Pila ka tuig kami nga nag-alagad sa wala maasayn nga teritoryo. Pero subong, isa gid ka pagpakamaayo nga makaupod ang madamo nga kauturan didto.

Sang makabaton si Arthur sang imbitasyon nga mag-eskwela sa Gilead School sang 1962, kinahanglan namon magdesisyon. Ang klase magalawig sing napulo ka bulan. Nagdesisyon kami nga bisan pa mabilin ako, dapat batunon ni Arthur ini nga pribilehiyo. Bangod wala na ako sing kaupod, ginpabalik ako sa Hemsworth bilang espesyal payunir. Pagbalik ni Arthur pagligad sang isa ka tuig, gin-asayn sia nga mangin manugtatap sang distrito. Ang amon teritoryo amo ang Scotland, naaminhan nga England, kag Northern Ireland.

 BAG-O NGA ASAYNMENT SA IRELAND

Sang 1964, nakabaton si Arthur sang bag-o nga asaynment nga mangin branch servant sa Irish Republic. Nanamian gid ako nga updan si Arthur nga isa ka nagalakbay nga manugtatap, gani sang primero, daw indi ko pagbatunon ang bag-o nga asaynment. Pero subong, nalipay gid ako sa pribilehiyo nga mag-alagad sa Bethel. Kumbinsido ako nga kon batunon mo ang asaynment bisan pa daw indi mo ini gusto, pakamaayuhon ka gid pirme ni Jehova. Masako ang akon adlaw sa pag-obra sa opisina, paghanda sang inugpadala nga mga literatura, pagluto, kag pagpaninlo. Pila ka beses man nga gingamit gihapon si Arthur nga manugtatap sang distrito, gani nakilala namon ang madamo nga kauturan sa bilog nga pungsod. Bangod sini, nakita namon ang pag-uswag sang amon mga gintudluan sa Biblia kag nangin suod kami sa amon espirituwal nga pamilya sa Ireland. Dalayawon gid ini nga pagpakamaayo!

ISA KA IMPORTANTE NGA HITABO PARA SA MGA SAKSI NI JEHOVA SA IRELAND

Ang una nga internasyonal nga kombension sa Ireland ginhiwat sa Dublin sang 1965. * Bisan pa grabe ang pagpamatok, nagmadinalag-on ang kombension. Ang nagtambong nagdamo sing 3,948, kag 65 ang nabawtismuhan. Ang 3,500 ka delegado halin sa iban nga pungsod nagdayon sa balay sang mga taga-Dublin. Ang tanan nga nagpadayon sa ila balay nakabaton sing sulat nga nagapasalamat sa ila. Nagdayaw gid sila sa maayo nga pamatasan sang mga delegado. Isa gid ini ka importante nga hitabo para sa mga Saksi ni Jehova sa Ireland.

Gin-abiabi ni Arthur si Nathan Knorr pag-abot niya para sa kombension sang 1965

Ginpahibalo ni Arthur nga matigayon na ang publikasyon nga Ang Akon Libro sang mga Sugilanon sa Biblia sa Gaelic nga lenguahe sang 1983

Sang 1966, gintingob sa sanga talatapan sa Dublin ang pagtatap sa aminhan kag bagatnan nga Ireland. Tuhay gid ini sa nagakatabo sa pungsod nga nabahinbahin bangod sa pulitika kag relihion. Nalipay gid kami nga madamo nga Katoliko ang nagbaton sang kamatuoran kag nagaalagad kaupod sang mga kauturan nga mga Protestante sang una.

ISA KA BAG-O GID NGA ASAYNMENT

Sang 2011, isa ka daku nga pagbag-o ang natabo sa amon kabuhi sang gintingob ang mga sanga talatapan sa Britanya kag Ireland, kag gin-asayn kami sa Bethel sa London. Sadto nga tion, nabalaka ako kay Arthur bangod may balatian sia nga Parkinson’s. Sang Mayo 20, 2015, napatay ang akon bana nga nakaupod ko sing 66 ka tuig.

Sining nagligad nga tinuig, nagbatyag ako sing grabe nga kasubo kag depresyon. Naanad abi ako nga ara pirme si Arthur sa tupad ko. Nahidlaw gid ako sa iya! Pero kon maeksperiensiahan mo gali ini nga mga sitwasyon, nagasuod ka pa gid kay Jehova. Makalilipay man mahibaluan nga palangga gid sang mga kauturan si Arthur. Nakabaton ako sing sulat halin sa mga kauturan sa Ireland, Britanya, kag bisan gani sa Estados Unidos. Ini nga mga sulat, lakip ang mga pagpalig-on sang utod ni Arthur nga si Dennis kag sang iya asawa nga si Mavis, kag sang akon mga hinablos nga sanday Ruth kag Judy, nakabulig gid sing daku sa akon.

Ang teksto nga nakabulig gid sa akon amo ang Isaias 30:18. Ini nagasiling: “Si Jehova nagahulat sing mapailubon agod pakitaan kamo sing kahamuot, kag magatindog sia agod pakitaan kamo sing kaluoy. Kay si Jehova Dios sang hustisya. Malipayon ang tanan nga padayon nga nagalaum sa iya.” Makalulugpay gid mahibaluan nga mapailubon nga nagahulat si Jehova para solusyonan ang tanan naton nga problema kag hatagan kita sing makaalayaw nga mga asaynment sa iya bag-o nga kalibutan.

Kon hinumdumon ko ang amon kabuhi, makita ko kon paano gintuytuyan kag ginpakamaayo ni Jehova ang hilikuton sa Ireland! Isa gid ka pribilehiyo nga makabulig bisan gamay lang sa sining espirituwal nga pag-uswag. Matuod gid nga pakamaayuhon kita ni Jehova kon tumanon naton sia.

^ par. 12 Tan-awa ang 1988 Yearbook of Jehovah’s Witnesses, p. 101-102.

^ par. 22 Tan-awa ang 1988 Yearbook, p. 109-112.