Accessibility setting

Magpili sing lenguahe

Magdiretso sa segundaryo nga menu

Magdiretso sa listahan sang kaundan

Magdiretso sa kaundan

Mga Saksi ni Jehova

Hiligaynon

ANG LALANTAWAN (TULUN-AN NGA EDISYON) NOBIEMBRE 2016

Ginapabaloran Mo Gid Bala ang Libro Halin kay Jehova?

Ginapabaloran Mo Gid Bala ang Libro Halin kay Jehova?

“Sang nabatian ninyo ang pulong sang Dios . . . , ginbaton ninyo ini . . . kon ano gid ini, subong pulong sang Dios.”—1 TES. 2:13.

AMBAHANON: 114, 113

1-3. Ano ang posible nga rason sang paglainay sing buot nanday Eudias kag Sintique, kag paano ini malikawan? (Tan-awa ang piktyur sa umpisa sini nga artikulo.)

GINAPABALORAN gid sang mga alagad ni Jehova ang balaan nga libro halin sa Dios, ang Biblia. Bangod indi kita himpit, kinahanglan naton ang laygay sang Kasulatan. Ano ang aton reaksion sa sini? Binagbinaga ang mga Cristiano sang unang siglo nga sanday Eudias kag Sintique. Naglainay sing buot ining hinaplas nga mga babayi kag serioso ini. Ngaa? Wala ginsiling sang Biblia ang rason. Pero ibutang ta nga amo sini ang natabo.

2 Gin-agda ni Eudias ang pila ka kauturan sa iya balay para magkaon kag magpalig-unay. Wala gin-agda si Sintique, pero nabalitaan niya kon daw ano kasadya ang mga nakakadto. Mahimo nga nakasiling si Sintique: ‘Daw indi ako makapati nga wala ako gin-agda ni Eudias! Abi ko suod gid kami.’ Nasakitan gid si Sintique, gani wala na sia salig kay Eudias kag ginaduhaduhaan na niya sia. Naghiwat man sing sinalusalo si Sintique kag gin-agda niya ang amo gihapon nga mga kauturan luwas lang kay Eudias! Ini nga problema sa tunga nanday Eudias kag Sintique mahimo nagguba sang paghidait sang kongregasyon. Wala ginasiling sang Biblia kon ano  ang natabo sa ulihi, pero mahimo gid nga ginpamatian sining mga utod ang mahigugmaon nga laygay ni apostol Pablo.—Fil. 4:2, 3.

3 Kon kaisa, ang pareho sini nga mga sitwasyon nagatuga man sing problema sa mga kongregasyon sang katawhan ni Jehova subong. Pero, ini nga mga problema mahimo masolbar ukon malikawan kon sundon naton ang laygay sang Pulong sang Dios, ang Biblia. Kag kon ginapabaloran gid naton ang Libro halin kay Jehova, iaplikar naton sa aton kabuhi ang mga instruksion sini.—Sal. 27:11.

ANG LIBRO HALIN SA DIOS KAG ANG ATON EMOSYON

4, 5. Ano ang laygay sang Pulong sang Dios parte sa pagkontrol sang aton emosyon?

4 Indi mahapos ang pagkontrol sang aton emosyon kon pamatyag naton ginpakanubo kita ukon indi husto ang pagtratar sa aton. Masakit gid kon ginapakalain kita bangod sang aton rasa, kolor, ukon iban pa nga kinatuhayan sa pisikal. Mas masakit pa gid kon aton utod ang naghimo sini! Ano ang laygay sang Pulong sang Dios para mabuligan kita kon matabo ini sa aton?

5 Napanilagan ni Jehova kon paano makig-angot ang mga tawo sugod pa sang gintuga niya sila. Nahibaluan niya ang aton mga reaksion kag mga ginabuhat. Ang aton ginahunahuna, lakip na kon akig kita, posible magresulta sa hambal kag buhat nga mahimo hinulsulan naton sa ulihi. Gani maalamon gid nga sundon naton ang laygay sang Biblia nga kontrolon ang aton emosyon kag indi mangakig dayon! (Basaha ang Hulubaton 16:32; Manugwali 7:9.) Tanan kita dapat magpanikasog nga mangin indi tuman ka sensitibo kag mangin mas mapinatawaron. Importante gid kay Jehova kag kay Jesus ang pagpatawad. (Mat. 6:14, 15) Dapat mo bala pauswagon ang pagkamapinatawaron ukon ang pagkontrol sang imo emosyon?

6. Ngaa indi kita dapat magdumot?

6 Ang mga tawo nga indi makakontrol sang ila emosyon masami nga nagadumot. Bangod sini, ginalikawan sila sang iban. Ang nagadumot nga utod indi maayo nga impluwensia sa kongregasyon. Mahimo niya taguon ang iya dumot ukon kaakig, pero ang negatibo nga balatyagon sa iya tagipusuon “mabuyagyag sa kongregasyon.” (Hulu. 26:24-26) Mahimo sia buligan sang mga gulang nga marealisar nga ang dumot, kaakig, kag paghinakit indi dapat makita sa organisasyon sang Dios. Maathag ini nga ginasiling sang hamili nga Libro halin kay Jehova. (Lev. 19:17, 18; Roma 3:11-18) Nagaugyon ka bala sa sini?

DUMDUMA KON PAANO KITA GINATUYTUYAN

7, 8. (a) Paano ginatuytuyan ni Jehova ang dutan-on nga bahin sang iya organisasyon? (b) Ano ang pila ka panuytoy sang Pulong sang Dios, kag ngaa dapat naton ini sundon?

7 Ginatuytuyan kag ginapakaon ni Jehova ang mga miembro sang dutan-on nga bahin sang iya organisasyon paagi sa “matutom kag mainandamon nga ulipon” nga ginapangunahan sang Cristo, ang “ulo sang kongregasyon.” (Mat. 24:45-47; Efe. 5:23) Pareho sa nagadumala nga hubon sang unang siglo, ginabaton sini nga ulipon ang gintuytuyan nga pulong, ukon mensahe, sang Dios kag ginapabaloran gid nila ini. (Basaha ang 1 Tesalonica 2:13.) Ano ang pila ka panuytoy, ukon instruksion, sang Biblia para sa aton kaayuhan?

8 Ginasugo kita sang Biblia nga regular nga magtambong sa mga miting. (Heb. 10:24, 25) Ginapalig-on kita sini nga maghiusa sa aton panudlo. (1 Cor. 1:10) Ginasilingan kita sang Pulong sang Dios nga unahon ang Ginharian sa aton kabuhi. (Mat. 6:33) Ginapadaku man sang Kasulatan ang aton obligasyon kag pribilehiyo nga magbantala sa mga balay, sa pangpubliko nga mga lugar,  kag sing di-pormal. (Mat. 28:19, 20; Binu. 5:42; 17:17; 20:20) Ang Libro halin sa Dios nagasugo sa Cristianong mga gulang nga huptan nga matinlo ang iya organisasyon. (1 Cor. 5:1-5, 13; 1 Tim. 5:19-21) Kag nagmando si Jehova nga ang tanan nga ara sa iya organisasyon dapat matinlo sa pisikal kag espirituwal.—2 Cor. 7:1.

9. Ano lang ang ginagamit nga alagyan para mabuligan kita nga mahangpan ang Pulong sang Dios?

9 Ang iban nagapati nga mahangpan nila ang Biblia bisan sila lang. Pero, gintangdo ni Jesus ang ‘matutom nga ulipon’ nga mangin amo lang ang alagyan sa pagpalapnag sang espirituwal nga pagkaon. Sugod sang 1919, ginagamit sang ginhimaya nga si Jesucristo ining ulipon sa pagbulig sa iya mga sumulunod nga mahangpan ang Libro halin sa Dios kag sundon ang mga panuytoy sini. Paagi sa pagtuman sa mga instruksion sang Biblia, nagabulig kita sa katinlo, paghidait, kag paghiusa sang kongregasyon. Pamangkuton naton ang aton kaugalingon, ‘Mainunungon bala ako sa alagyan nga ginagamit ni Jesus subong?’

ANG KANGGA NI JEHOVA MADASIG NGA NAGADALAGAN!

10. Paano ginlaragway sa libro sang Ezequiel ang langitnon nga bahin sang organisasyon ni Jehova?

10 Ang Pulong ni Jehova may ginasiling parte sa langitnon nga bahin sang iya organisasyon. Halimbawa, nakita ni manalagna Ezequiel sa palanan-awon ang langitnon nga kangga nga nagalaragway sa langitnon nga bahin sang organisasyon sang Dios. (Ezeq. 1:4-28) Nagasakay si Jehova sa sini nga kangga, kag kon diin ini pakadtuon sang iya espiritu, didto ini nagakadto. Ining langitnon nga bahin sang iya organisasyon nagatuytoy sa dutan-on nga bahin. Huo, madasig gid nga nagadalagan ang kangga! Hunahunaa ang mga pagbag-o sa organisasyon nga ginhimo sang nagligad nga dekada, kag tandai nga si Jehova ang nagatuytoy sa sini nga mga pag-uswag. Subong nga malapit na lang laglagon sang Cristo kag sang balaan nga mga anghel ining malaut nga kalibutan, madasig nga nagadalagan ang kangga ni Jehova para mabindikar ang iya pagkasoberano kag mapakabalaan ang iya ngalan!

Nagapasalamat gid kita sa mapisan nga mga boluntaryo sa konstruksion! (Tan-awa ang parapo 11)

11, 12. Ano ang mga nahimo na sang organisasyon ni Jehova?

11 Binagbinaga ang mga nahimo sang dutan-on nga bahin sang organisasyon sang Dios sa sining katapusan nga mga adlaw. Konstruksion. Ginatos ka boluntaryo ang masako sa paghimo sang bag-o nga ulong talatapan sang mga Saksi ni Jehova sa Warwick, New York, U.S.A. Ang Worldwide Design/Construction Department amo ang nagatatap sa linibo ka boluntaryo sa bilog nga kalibutan nga mapisan nga nagahimo sing bag-o nga mga Kingdom Hall kag mga proyekto sa mga sanga talatapan. Nagapasalamat gid kita sa madamo kag mapisan nga mga boluntaryo! Dumduma nga ginapakamaayo ni Jehova ang mapainubuson kag mainunungon nga mga manugbantala sang Ginharian sa bilog nga kalibutan nga nagaamot  para sa kagastuhanan sini nga mga proyekto.—Luc. 21:1-4.

12 Edukasyon. Binagbinaga ang mga eskwelahan parte sa mga panudlo sang Dios. (Isa. 2:2, 3) May ara kita Pioneer Service School, School for Kingdom Evangelizers, Gilead School, Bethel Entrants’ School, School for Circuit Overseers and Their Wives, School for Congregation Elders, Kingdom Ministry School, kag School for Branch Committee Members and Their Wives. Gusto gid ni Jehova nga tudluan ang iya katawhan! Ang edukasyon parte sa Biblia ginatudlo man sa aton website nga jw.org, kag mabasa sa sini ang mga literatura sa ginatos ka lenguahe. May seksion man ini para sa mga kabataan kag pamilya, kag mabasa man diri ang pila ka balita. Ginagamit mo bala ang jw.org sa ministeryo kag sa inyo pangpamilya nga pagsimba?

MAG-UNONG KAY JEHOVA KAG SAKDAGA ANG IYA ORGANISASYON

13. Ano ang responsibilidad naton bilang mainunungon nga mga sumilimba ni Jehova?

13 Pribilehiyo gid naton nga mangin bahin sang organisasyon ni Jehova! Bangod nahibaluan naton ang mga ginapatuman kag talaksan sang Dios, responsibilidad naton nga himuon ang husto kag sakdagon ang iya pagkasoberano. Samtang nagalain ang moralidad sining kalibutan, dapat naton ‘dumtan ang malaut,’ pareho sa pagdumot ni Jehova. (Sal. 97:10) Wala naton ginaugyunan ang mga malauton kag wala kita nagasiling: “Ang maayo malain kag ang malain maayo.” (Isa. 5:20) Bangod luyag naton pahamut-an ang Dios, nagapanikasog kita nga mangin matinlo sa pisikal, moral, kag espirituwal. (1 Cor. 6:9-11) Ginahigugma naton si Jehova kag sa iya kita nagasalig. Ginapakita naton nga mainunungon kita sa iya paagi sa pagkabuhi suno sa mga talaksan nga makita sa iya hamili nga Libro. Kag ginapanikasugan gid naton nga sundon ini sa aton puluy-an, kongregasyon, ulubrahan, eskwelahan, kag bisan diin. (Hulu. 15:3) Binagbinaga ang pila pa ka paagi nga mapakita naton nga mainunungon kita sa Dios.

14. Paano mapakita sang Cristianong mga ginikanan nga mainunungon sila sa Dios?

14 Pagpadaku sang kabataan. Kon ginahanas sang Cristianong mga ginikanan ang ila kabataan suno sa Pulong ni Jehova, ginapakita nila nga mainunungon sila sa iya. Ang diosnon nga mga ginikanan wala nagapaimpluwensia sa mga kustombre parte sa pagpadaku sang kabataan. Ang espiritu sang kalibutan indi dapat makita sa Cristianong puluy-an. (Efe. 2:2) Ang bawtismado nga amay indi maghunahuna, ‘Sa amon lugar, ang babayi amo ang nagatudlo sa kabataan.’ Maathag ang ginasiling sang Biblia parte sa sini: “Mga amay, . . . padayon [nga padakua ang inyo mga anak] sa disiplina kag laygay [instruksion; panuytoy] ni Jehova.” (Efe. 6:4; footnote) Gusto sang mahinadlukon sa Dios nga mga ginikanan nga ang ila kabataan mangin pareho ni Samuel, nga gin-updan ni Jehova samtang nagadaku.—1 Sam. 3:19.

15. Paano naton mapakita nga mainunungon kita kay Jehova kon nagahimo sing mabug-at nga desisyon?

15 Paghimo sing desisyon. Kon nagahimo sing mabug-at nga desisyon, ang isa ka paagi nga mapakita naton nga mainunungon kita sa Dios amo ang pagpangayo sing bulig sa iya Pulong kag organisasyon. Para makita ang importansia sini, binagbinaga ang isa ka importante nga desisyon nga nagaapektar sa madamo nga ginikanan. Kustombre sang pila ka imigrante nga ipaatipan ang ila bag-ong bun-ag nga bata sa ila paryente para padayon sila nga makaobra kag makasueldo sa iban nga pungsod. Personal ini nga desisyon, pero dapat naton dumdumon nga manabat kita sa Dios sa aton mga desisyon. (Basaha ang Roma 14:12.) Maalamon bala nga maghimo sing mga desisyon nga daku ang epekto sa aton pamilya kag palangabuhian nga wala  anay ginahibalo ang ginasiling sang Biblia? Siempre indi! Kinahanglan naton ang bulig sang aton Amay sa langit kay indi kita makatuytoy sang aton mga tikang.—Jer. 10:23.

16. Sang magbata ang isa ka iloy, ano nga desisyon ang dapat niya himuon, kag ano ang nakabulig sa iya nga magdesisyon sing husto?

16 Isa ka babayi ang nagbata samtang ara sia sa iban nga pungsod, kag plano niya nga ipaatipan ang bata sa lolo kag lola sini sa iya ginhalinan nga pungsod. Pero sa amo man nga tion, isa ka Saksi ni Jehova ang nagtudlo sa iya sang Biblia. Nag-uswag sia kag natun-an niya nga ginhatagan sia sang Dios sing responsibilidad nga padakuon ang iya bata nga mangin sumilimba ni Jehova. (Sal. 127:3; Hulu. 22:6) Tinagipusuon nga ginpangamuyo niya kay Jehova ang tanan niya nga kabalaka, kag amo gid sini ang ginalaygay sang Kasulatan. (Sal. 62:7, 8) Ginsugid man niya ini sa nagatudlo sa iya sang Biblia kag sa iban pa sa kongregasyon. Wala sapayan sang pagpamilit sang iya mga paryente kag mga abyan nga ipaatipan ang iya bata sa lolo kag lola sini, nagdesisyon sia nga indi ini paghimuon. Nagbulig ang kongregasyon sa iya kag sa iya bata, kag nagdayaw gid sa sini ang iya bana. Gani nagtuon man ang bana sang Biblia kag nagtambong sa mga miting upod sa iya asawa kag bata. Ginsabat bala ni Jehova ang tinagipusuon nga pangamuyo sini nga iloy? Huo, kag nagapati gid sia sa sini.

17. Ano nga mga panuytoy ang nabaton naton parte sa mga estudyante sa Biblia?

17 Pagsunod sa mga panuytoy. Ang isa ka importante nga paagi nga mapakita naton nga mainunungon kita sa Dios amo ang pagsunod sa mga panuytoy sang iya organisasyon. Halimbawa, binagbinaga ang mga panugda nga nabaton naton parte sa aton mga estudyante sa Biblia. Ginpanugda nga indi madugay pagkatapos masugdan ang pagtuon sa libro nga Ano Gid ang Ginatudlo sang Biblia? sa isa ka interesado, maghinguyang kita sing pila ka minuto pagkatapos sang kada pagtuon para tudluan sia parte sa aton organisasyon. Puede naton gamiton ang video nga Ano ang Ginahimo sa Kingdom Hall? kag ang brosyur nga Sin-o ang Nagahimo sang Kabubut-on ni Jehova Subong? Kon natapos na sang nagauswag nga estudyante ang pagtuon sa libro nga Ginatudlo sang Biblia, ginpanugda nga padayunon naton ang pagtuon sa iya nga ginagamit ang libro nga Magpabilin Kamo sa Gugma sang Dios, bisan pa bawtismado na sia. Ginhatag sang organisasyon ini nga panuytoy para ‘pabakuron ang pagtuo’ sang bag-o nga mga disipulo. (Col. 2:7) Ginasunod mo bala ini nga mga panugda sang organisasyon ni Jehova?

18, 19. Ano ang mga rason para pasalamatan naton si Jehova?

18 Madamo kita sing rason para pasalamatan si Jehova! Utang naton sa iya ang aton kabuhi, kay wala kita kuntani nagahulag ukon nagaluntad kon wala sia. (Binu. 17:27, 28) Ginhatagan niya kita sing hamili gid nga regalo, nga isa ka libro, ang Biblia. Nagapasalamat gid kita sa sini kag ginabaton naton ini subong mensahe sang Dios, pareho sang pagbaton sang mga Cristiano sa Tesalonica sa Pulong sang Dios.—1 Tes. 2:13.

19 Ginbuligan kita sang Pulong sang Dios nga magpalapit kay Jehova kag nagpalapit man sia sa aton. (Sant. 4:8) Ginhatagan kita sang aton Amay sa langit sing dalayawon nga pribilehiyo nga mangin bahin sang iya organisasyon. Daku gid ang aton pagpasalamat sa sini nga mga pagpakamaayo! Katahom sang ambahanon sang salmista parte sa sini: “Magpasalamat kamo kay Jehova, kay maayo sia; ang iya mainunungon nga gugma wala sing katapusan.” (Sal. 136:1) Mabasa naton sing 26 ka beses sa Salmo 136 ang pinamulong nga “ang iya mainunungon nga gugma wala sing katapusan.” Kon mainunungon kita kay Jehova kag sa iya organisasyon, mangin matuod sa aton ining makatalandog nga pinamulong bangod magakabuhi kita sing wala sing katapusan!