Accessibility setting

Magpili sing lenguahe

Magdiretso sa segundaryo nga menu

Magdiretso sa listahan sang kaundan

Magdiretso sa kaundan

Mga Saksi ni Jehova

Hiligaynon

ANG LALANTAWAN (TULUN-AN NGA EDISYON) NOBIEMBRE 2016

 HALIN SA AMON ARCHIVE

“Mga Manugbantala sang Ginharian sa Britanya—Magbugtaw Kamo!!”

“Mga Manugbantala sang Ginharian sa Britanya—Magbugtaw Kamo!!”

ISA ini ka importante nga panawagan: “Mga Manugbantala sang Ginharian sa Britanya—Magbugtaw Kamo!!” (Informant, * Disiembre 1937, edisyon sa London) Ang makapasubo nga subtitulo nagdugang: “Wala sing Tumalagsahon nga Pag-uswag sa Sulod sang Napulo ka Tuig.” Ginpamatud-an ini sang report sa napulo ka tuig nga pag-alagad sugod sang 1928 asta 1937 nga makita sa kober.

TUMAN KADAMO NGA PAYUNIR?

Ngaa wala sing tumalagsahon nga pag-uswag sa Britanya? Ang mga kongregasyon “nagpatawhay” sa ila pag-alagad. Dugang pa, nagdesisyon ang sanga nga bastante na ang mga 200 ka payunir sa teritoryo sini, kag gin-asayn sila sa malayo nga mga teritoryo sa baylo nga sa mga kongregasyon. Gani, ginsilingan sang sanga ang mga luyag magpayunir nga wala na sing teritoryo para sa ila sa Britanya kag ginpalig-on sila nga mag-alagad sa iban nga pungsod sa Europa. Makalilipay nga madamo nga payunir nga halin sa Britanya ang nagsaylo sa iban nga pungsod pareho sang France, bisan pa diutay lang ang ila nahibaluan sa lenguahe didto kag ang iban gani indi gid makahibalo.

“PANAWAGAN”

Suno sa isa ka artikulo sa Informant sang 1937, amo ini ang tulumuron para sa 1938: Isa ka milyon nga oras! Mahapos ini malab-ot kon ang kada manugbantala magreport sing 15 ka oras kada bulan kag ang mga payunir sing 110 ka oras. May mga panugda nga mag-iskedyul sing mga adlaw nga makabantala sing lima ka oras ang mga grupo sa pag-alagad kag magkonsentrar sa mga pagduaw liwat, ilabi na sa gab-i sa tungatunga sang semana.

Ang mapisan kag makugi nga mga payunir nagkonsentrar sa ila ministeryo

Madamo ang napalig-on sa sini. “Panawagan ini halin sa ulong-talatapan, nga madugay na nga ginahulat sang kalabanan sa amon kag maayo gid ang resulta sini,” hinumdom ni Hilda Padgett. * Si Sister E. F. Wallis nagsiling: “Gusto ko gid ang panugda nga mag-iskedyul sing mga adlaw nga makabantala sing lima ka oras! May makalabaw pa bala sa kalipay sa pag-alagad sa Ginuo sa bilog nga adlaw? . . . Kapoy kami pagpauli, pero malipayon bala kami? Siempre!” Napalig-on ang pamatan-on nga si Stephen Miller sa panawagan. Indi niya luyag mawasi ang kahigayunan sa pag-alagad! Nadumduman niya ang mga grupo nga nagabisikleta nga nagabantala sa bilog nga adlaw, kag sa tion sang tig-ilinit nagapatokar sang narekord nga mga pamulongpulong kon gab-i. Makugi sila sa pagbantala nga ginagamit ang mga plakard kag sa pagpanagtag sing mga magasin sa dalan.

Ang Informant nagpanawagan man: “Kinahanglan ang 1,000 ka payunir.” May bag-o nga kahimusan para sa mga payunir kag ginpabalik sila sa mga kongregasyon para palig-unon ini. “Madamo nga kauturan ang napalig-on nga magpayunir,” hinumdom ni Joyce Ellis (Barber sang dalaga). “Bisan pa  13 anyos lang ako sadto,” siling niya, “amo ini ang handum ko; gusto ko magpayunir.” Nagpayunir sia sang Hulyo 1940, sa edad nga 15. Napalig-on si Peter, nga napamana ni Joyce, sa panawagan nga “Magbugtaw,” kag ginhunahuna niya nga magpayunir. Sang Hunyo 1940, sa edad nga 17, nagbisikleta sia sing 105 ka kilometro pakadto sa Scarborough para magpayunir didto.

Sanday Cyril kag Kitty Johnson nga bag-o nga mga payunir mga halimbawa sa ila pagsakripisyo. Ginbaligya nila ang ila balay kag mga pagkabutang para suportahan ang ila bug-os tion nga pag-alagad. Nag-untat si Cyril sa iya obra, kag nagpayunir sila pagligad sang isa ka bulan. Nagsiling sia: “Desidido gid kami nga magpayunir. Kinabubut-on namon ini nga ginhimo kag malipayon kami sa sini.”

PULUY-AN SANG MGA PAYUNIR

Bangod sang madasig nga pagdamo sang mga payunir, ang mga kauturan nga nagapanguna sa hilikuton nangita sing mga paagi nga mabuligan sila. Ginsunod ni Jim Carr, nga isa ka zone servant (manugtatap sang sirkito subong) sang 1938, ang panugda nga mangita sing mga puluy-an para sa mga payunir sa mga siudad. Ang pila ka payunir ginpalig-on nga mag-istar sa isa ka balay kag mag-alagad nga magkaupod para makakinot. Nag-arkila sila sing isa ka daku nga balay sa Sheffield nga dumalahan sang isa ka utod. Ang lokal nga kongregasyon nag-amot sing kuarta kag mga gamit. “Nagbuligay ang tanan para magmadinalag-on ini,” hinumdom ni Jim. Napulo ka makugi nga payunir ang nag-istar diri, kag ginasunod gid nila ang ila iskedyul sang espirituwal nga mga hilikuton. “Ginabinagbinag ang teksto [kada adlaw] sa tion sang pamahaw,” kag “ang mga payunir adlaw-adlaw nga nagakadto sa ila teritoryo sa bilog nga siudad.”

Nagdamo ang bag-o nga mga payunir sa teritoryo sang Britanya

Ang mga manugbantala kag mga payunir napalig-on sa panawagan, kag nalab-ot ang tulumuron nga isa ka milyon nga oras sang 1938. Ang matuod, ginapakita sang mga report nga nag-uswag ang tanan nga hilikuton sa pag-alagad. Sa sulod sang lima ka tuig, ang mga manugbantala sa Britanya halos nagtriple. Ang pagbalik sang kakugi sang katawhan ni Jehova sa pag-alagad para sa Ginharian nagpabakod sa ila nga maatubang ang mga kabudlayan sa tion sang inaway nga naeksperiensiahan nila sang ulihi.

Subong, nagadamo liwat ang mga payunir sa Britanya samtang nagahilapit ang Armageddon nga inaway sang Dios. Sang nagligad nga napulo ka tuig, ang kadamuon sang mga payunir kapila magdugang, nga naglab-ot sa 13,224 sang Oktubre 2015. Masiling naton nga nagabugtaw gid ini nga mga payunir kay gingamit nila ang ila kabuhi sa pinakamaayo nga paagi nga amo ang pag-alagad sing bug-os tion.

^ par. 3 Gintawag sang ulihi nga Ang Aton Ministeryo sa Ginharian.

^ par. 8 Mabasa sa Oktubre 1, 1995, nga Ang Lalantawan, p. 19-24, ang sugilanon sang kabuhi ni Sister Padgett.