Accessibility setting

Magpili sing lenguahe

Magdiretso sa segundaryo nga menu

Magdiretso sa listahan sang kaundan

Magdiretso sa kaundan

Mga Saksi ni Jehova

Hiligaynon

ANG LALANTAWAN (TULUN-AN NGA EDISYON) NOBIEMBRE 2016

“Padayon Kamo nga Magpalig-unay Kada Adlaw”

“Padayon Kamo nga Magpalig-unay Kada Adlaw”

“Kon may pulong kamo nga makapalig-on sa katawhan, ihambal ninyo.”—BINU. 13:15.

AMBAHANON: 121, 45

1, 2. Ngaa importante ang pagpalig-on?

“WALA gid ako ginapalig-on sang akon mga ginikanan, pero pirme nila ako ginapakalain. Kag masakit sila maghambal,” siling sang 18 anyos nga si Cristina. [1] “Wala kuno ako sing buot, indi na gid kuno ako manuto, kag katambok kuno sa akon. Gani pirme lang ako nagahibi kag mas gusto ko nga indi na lang mag-istorya sa ila. Pamatyag ko wala ako sing pulos.” Masubo gid ang kabuhi nga wala sing may nagapalig-on!

2 Sa pihak nga bahin, ang paghatag sing pagpalig-on makapaayo. “Madamo nga tinuig nga nagbatyag ako nga wala sing pulos,” siling ni Rubén. “Pero isa ka adlaw, samtang nagabantala ako upod ang isa ka gulang, natalupangdan niya nga masubo ako. Ginsugid ko sa iya ang akon ginabatyag kag namati sia sing maayo. Dayon ginpahanumdom niya sa akon ang mga maayo nga nahimo ko. Ginpahanumdom man niya ang ginsiling ni Jesus nga ang kada isa sa aton mas importante pa sangsa madamo nga maya. Pirme ko ginadumdom ini nga teksto, kag nagapalig-on gihapon ini sa akon. Nakabulig gid sa akon ang ginsiling sang gulang.”—Mat. 10:31.

3. (a) Ano ang ginsiling ni apostol Pablo parte sa pagpalig-on? (b) Ano ang binagbinagon naton sa sini nga artikulo?

3 Indi kita matingala nga ginhatagan sang Biblia sing importansia  ang regular nga pagpalig-on. Nagsulat si apostol Pablo sa Hebreo nga mga Cristiano: “Mga kauturan, mag-andam kamo kay basi may isa sa inyo nga tubuan sang malaut nga tagipusuon nga wala sing pagtuo bangod sa pagpalayo sa buhi nga Dios; apang padayon kamo nga magpalig-unay kada adlaw, . . . agod wala sing isa sa inyo nga magtig-a bangod sa madaya nga gahom sang sala.” (Heb. 3:12, 13) Marealisar mo kon daw ano ka importante ang laygay nga palig-unon ang kada isa kon dumdumon mo ang tion nga ginpalig-on ka sang iban. Gani binagbinagon naton ini nga mga pamangkot: Ngaa importante ang pagpalig-on? Ano ang matun-an naton sa paagi nanday Jehova, Jesus, kag Pablo sa pagpalig-on sa iban? Kag paano kita makahatag sing epektibo nga pagpalig-on?

KINAHANGLAN NATON ANG PAGPALIG-ON

4. Sin-o ang nagakinahanglan sing pagpalig-on, pero ngaa daw wala na ini ginahimo subong?

4 Kinahanglan naton tanan ang pagpalig-on, ilabi na ang mga bata. “Ang mga kabataan . . . nagakinahanglan sing pagpalig-on pareho sang tanom nga nagakinahanglan sing tubig,” paathag sang isa ka manunudlo nga si Timothy Evans. “Kon ginapalig-on ang bata, mabatyagan niya nga ginapabaloran sia kag ginapalangga.” Pero nagakabuhi kita sa makahalanguyos nga mga tion. Ang mga tawo maiyaiyahon, indi mapinalanggaon, kag daw wala na nagapalig-unay. (2 Tim. 3:1-5) Ang pila ka ginikanan wala nagahatag sing komendasyon sa ila kabataan kay wala man sila ginpalig-on sang ila mga ginikanan sang una. Madamo nga empleyado ang wala ginakomendahan, gani nagareklamo sila nga kulang gid sing pagpalig-on sa ulubrahan.

5. Ano ang nalakip sa pagpalig-on?

5 Masami nga nalakip sa pagpalig-on ang paghatag sing komendasyon sa isa tungod sang iya maayo nga ginhimo. Mapalig-on man naton ang iban paagi sa pagsiling sa ila nga may maayo sila nga mga kinaiya ukon paagi sa ‘paglugpay sa mga ginaluyahan sing buot.’ (1 Tes. 5:14, footnote) Ang Griegong tinaga para sa “pagpalig-on” literal nga nagakahulugan sing “pagpanawag sang isa nga tuparan sia.” Samtang nagaalagad kita upod ang aton mga kauturan, may mga kahigayunan kita nga maghambal sing makapalig-on. (Basaha ang Manugwali 4:9, 10.) Ginakalitan bala naton ang nagakaigo nga mga kahimtangan para isugid sa iban nga palangga naton sila? Antes naton sabton ini nga pamangkot, maayo nga pamalandungan naton ini nga hulubaton: “Ang tinaga nga ginhambal sa husto nga tion—tuman gid kaayo!”—Hulu. 15:23.

6. Ngaa gusto sang Yawa nga paluyahon ang aton buot? Maghatag sing halimbawa.

6 Gusto ni Satanas nga Yawa nga paluyahon ang aton buot bangod nahibaluan niya nga makapaluya ini sa aton, ilabi na sang aton espirituwalidad. “Kon maluya ang imo buot sa tion sang kalisdanan,” siling sang Hulubaton 24:10, “magaluya man ang imo kusog.” Gingamit ni Satanas ang mga kalamidad kag panumbungon para paluyahon ang matarong nga si Job, pero napaslawan ang iya mapintas nga plano. (Job 2:3; 22:3; 27:5) Madaug naton ang ginahimo sang Yawa para paluyahon kita paagi sa pagpalig-on sa mga miembro sang aton pamilya kag kongregasyon. Paagi sini, makabatyag kita sing kalipay kag kalinong sa aton mga puluy-an kag mga Kingdom Hall.

MGA HALIMBAWA SA BIBLIA SANG MGA NAGPALIG-ON

7, 8. (a) Ano nga mga halimbawa sa Biblia ang nagapakita nga importante kay Jehova ang paghatag sing pagpalig-on? (b) Paano mailog sang mga ginikanan ang halimbawa ni Jehova? (Tan-awa ang piktyur sa umpisa sini nga artikulo.)

7 Si Jehova. Ang salmista nag-amba: “Malapit si Jehova sa mga nagaantos; ginaluwas niya ang mga naluyahan sing buot.” (Sal. 34:18, footnote) Sang hinadlukan si Jeremias kag naluyahan sing buot, ginpabakod ni  Jehova ang kompiansa sining matutom nga manalagna. (Jer. 1:6-10) Kag imadyina kon paano napalig-on ang tigulang nga si manalagna Daniel sang nagpadala ang Dios sing anghel para pabakuron sia kag gintawag sia sang anghel nga “hamili gid,” ukon “ginatahod gid,” nga tawo! (Dan. 10:8, 11, 18, 19; footnote) Mailog mo man bala ini paagi sa pagpalig-on sa mga manugbantala, mga payunir, kag tigulang nga mga kauturan nga maluya na?

8 Bisan pa madugay nga nakaupod sang Dios ang iya pinalangga nga Anak, wala sia naghunahuna nga indi na kinahanglan ni Jesus ang komendasyon sang ari sia sa duta. Sa baylo, duha ka higayon nga nabatian ni Jesus nga naghambal ang iya Amay halin sa langit: “Ini ang akon Anak, ang hinigugma, nga ginakahamut-an ko.” (Mat. 3:17; 17:5) Gani ginkomendahan sang Dios si Jesus kag ginpasalig sia nga maayo ang iya ginahimo. Napalig-on gid si Jesus sang mabatian niya ini nga mga pinamulong sa duha ka higayon—sang pagsugod niya sang iya ministeryo kag sang katapusan nga tuig sang iya kabuhi sa duta. Sang gab-i antes sang kamatayon ni Jesus, nabalaka gid sia, gani nagpadala si Jehova sing anghel para pabakuron sia. (Luc. 22:43) Mga ginikanan, iluga ninyo ang halimbawa ni Jehova sa paghatag sing regular nga pagpalig-on sa inyo kabataan kag hatagi sila sing komendasyon kon may maayo sila nga ginhimo. Hatagi pa gid sila sing dugang nga pagpalig-on kon ginatilawan sila sa eskwelahan.

9. Ano ang matun-an naton sa pagpakig-angot ni Jesus sa iya mga apostoles?

9 Si Jesus. Sang gab-i nga ginsugdan ni Jesus ang Memoryal, nakita niya sa iya mga apostoles ang indi maayo nga kinaiya nga bugal. Mapainubuson nga ginhinawan ni Jesus ang ila mga tiil, pero nagbaisay sila gihapon kon sin-o ang pinakamataas sa ila; kag sobra ang pagsalig ni Pedro sa iya kaugalingon. (Luc. 22:24, 33, 34) Pero, ginkomendahan ni Jesus ang iya matutom nga mga apostoles kay gin-unungan nila sia sa iya mga pagtilaw. Gintagna niya nga magahimo sila sang mga buhat nga labaw pa sa ginhimo niya, kag ginpasalig niya sila nga ginahigugma sila sang Dios. (Luc. 22:28; Juan 14:12; 16:27) Pamangkuton naton ang aton kaugalingon, ‘Indi bala nga dapat ko ilugon si Jesus paagi sa paghatag sing komendasyon sa akon kabataan kag sa iban bangod sang ila maayo nga ginhimo sa baylo nga bantayan ang ila mga kakulangan?’

10, 11. Paano ginpakita ni apostol Pablo nga importante sa iya ang pagpalig-on sa iban?

10 Si apostol Pablo. Sa mga sulat ni Pablo, gindayaw niya ang iya mga masigka-Cristiano. Ang iban sa ila nakaupod niya sing madamo nga tinuig sa mga paglakbay gani nahibaluan niya ang ila mga kakulangan, pero mga maayo ang iya ginhambal parte sa ila. Halimbawa, gintawag ni Pablo si Timoteo nga iya “hinigugma kag matutom nga anak sa Ginuo,” ang isa nga magaulikid gid sa iban. (1 Cor. 4:17; Fil. 2:19, 20) Ginkomendahan sang apostol si Tito sa kongregasyon sa Corinto bilang ‘kaupod niya kag masigkamanugpangabudlay para sa ila kaayuhan.’ (2 Cor. 8:23) Pat-od nga napalig-on gid sanday Timoteo kag Tito sang mahibaluan nila ang ginhambal ni Pablo parte sa ila!

11 Ginrisgo nanday Pablo kag Bernabe ang ila kabuhi sang magbalik sila sa mga lugar nga mapintas sila nga ginsakit sang una. Halimbawa, nagbalik sila sa Listra wala sapayan sang pagpamatok sang mga panatiko sa ila sadto para palig-unon ang bag-o nga mga disipulo nga magpabilin nga matutom. (Binu. 14:19-22) Sa Efeso, gingamo si Pablo sang akig nga mga tawo. Ang Binuhatan 20:1, 2 nagsiling: “Sang nagpuas na ang kinagamo, ginpatawag ni Pablo ang mga disipulo. Pagkatapos niya sila mapalig-on kag makapaalam sa ila, nagkadto sia sa Macedonia. Pagkatapos niya makadtuan ang pila ka lugar didto kag mapalig-on ang mga disipulo paagi sa madamo nga laygay, nagkadto sia sa Gresya.” Importante gid kay Pablo ang paghatag sing pagpalig-on.

 MGA PAGPALIG-ON NGA GINAHIMO SUBONG

12. Paano kita makahatag kag makabaton sing pagpalig-on sa aton mga miting?

12 Ang aton Amay sa langit mainayuhon nga naghimo sing kahimusan para sa aton regular nga mga miting. Ginhimo niya ini para makahatag kita kag makabaton sing pagpalig-on. (Basaha ang Hebreo 10:24, 25.) Pareho sa mga sumulunod ni Jesus sang una, nagatipon kita para makatuon kag mapalig-on. (1 Cor. 14:31) Si Cristina nga ginsambit sa umpisa sini nga artikulo nagsiling: “Ang nanamian ko gid sa mga miting amo ang ginapakita sa akon nga gugma kag ginabaton ko nga pagpalig-on. Kon kaisa, naluyahan ako kon mag-abot sa Kingdom Hall. Pero ginapalapitan ako sang mga utod nga babayi, ginahakos, kag ginasilingan nga kaguapa kuno sa akon. Nagasiling sila nga palangga nila ako kag nalipay sila sa akon pag-uswag. Ang ila pagpalig-on nagapaumpaw gid sa akon!” Indi bala makalilipay gid kon kita tanan ‘magpalig-unay’?—Roma 1:11, 12.

13. Ngaa kinahanglan sang madugay na nga mga alagad sang Dios ang pagpalig-on?

13 Bisan ang madugay na nga mga alagad sang Dios nagakinahanglan sing pagpalig-on. Binagbinaga si Josue. Matutom sia nga nag-alagad sa Dios sing madamo nga tinuig. Pero, ginsilingan ni Jehova si Moises nga palig-unon si Josue. Nagsiling sia: “Itangdo mo si Josue bilang lider kag palig-una sia kag pabakura, bangod sia ang manguna sa sini nga katawhan sa pagtabok agod panublion ang duta nga makita mo.” (Deut. 3:27, 28) Tungdan ni Josue ang mabug-at nga responsibilidad nga pangunahan ang mga Israelinhon sa pagsakop sang Ginsaad nga Duta. Makaeksperiensia sia sing mga kapaslawan kag mapierde sia sa isa ka inaway. (Jos. 7:1-9) Gani kinahanglan gid ni Josue ang pagpalig-on kag pagpabakod! Sa aton bahin, palig-unon man naton ang mga gulang, lakip ang mga manugtatap sang sirkito, nga nagapangabudlay para atipanon ang panong sang Dios. (Basaha ang 1 Tesalonica 5:12, 13.) “Kon kaisa, ginahatagan kami sang mga utod sing sulat nga nagapasalamat kay napalig-on sila sa amon pagduaw,” siling sang isa ka manugtatap sang sirkito. “Ginatago namon ini nga mga sulat kag ginabasa kon naluyahan kami. Nagapalig-on gid ini sa amon.”

Nagauswag ang aton kabataan kon ginapalig-on naton sila kag ginapalangga (Tan-awa ang parapo 14)

14. Ano ang epekto kon nagalaygay nga may komendasyon kag pagpalig-on?

14 Natalupangdan sang Cristianong mga gulang kag mga ginikanan nga ang komendasyon kag pagpalig-on epektibo sa pagpatudok sang laygay sang Biblia. Sang ginkomendahan ni Pablo ang mga taga-Corinto sa ila pagsunod sa iya laygay, mahimo gid nga napalig-on sila nga padayon nga himuon ang husto. (2 Cor. 7:8-11) Si Andreas nga may duha ka bata nagsiling: “Ang pagpalig-on nagabulig sa espirituwal kag emosyonal nga  pag-uswag sang kabataan. Nagatudok ang laygay kon updan ini sing komendasyon. Bisan pa nahibaluan sang aton kabataan kon ano ang husto, himuon gid nila ini kon pirme naton sila ginapalig-on.”

KON PAANO MAKAHATAG SING EPEKTIBO NGA PAGPALIG-ON

15. Ano ang isa ka paagi nga mapalig-on naton ang iban?

15 Apresyaha ang mga pagpanikasog kag maayo nga mga kinaiya sang mga kauturan. (2 Cron. 16:9; Job 1:8) Ginapabaloran gid ni Jehova kag ni Jesus ang ginahimo naton tanan para sakdagon ang intereses sang Ginharian, bisan pa nalimitehan ang aton masarangan bangod sang aton kahimtangan. (Basaha ang Lucas 21:1-4; 2 Corinto 8:12.) Halimbawa, ang pila sang aton pinalangga nga mga tigulang nagapanikasog gid para regular nga makatambong sa mga miting kag makabantala. Indi bala nga dapat naton sila komendahan kag palig-unon?

16. Ngaa indi naton pagpunggan ang aton kaugalingon nga palig-unon ang iban?

16 Panginpusli ang mga kahigayunan nga palig-unon ang iban. Kon may nakita kita nga dapat komendahan, indi naton pagpunggan ang aton kaugalingon. Binagbinaga ang natabo kanday Pablo kag Bernabe sa Antioquia sa Pisidia. Ang nagadumala nga mga opisyal sang sinagoga nagsiling sa ila: “Mga kauturan, kon may pulong kamo nga makapalig-on sa katawhan, ihambal ninyo.” Gani nagpamulongpulong si Pablo sing makapalig-on. (Binu. 13:13-16, 42-44) Kon may kahigayunan kita nga palig-unon ang iban, ngaa abi indi naton ini pag-ihambal? Kon mangin batasan naton ang pagpalig-on sa iban, mahimo gid nga palig-unon man nila kita.—Luc. 6:38.

17. Ano ang aton himuon para mas epektibo ang aton komendasyon?

17 Mangin sinsero kag espesipiko. Maayo ang pagpalig-on kag komendasyon, pero ang mensahe ni Jesus sa mga Cristiano sa Tiatira nagapakita nga mas maayo pa gid kon espesipiko ini. (Basaha ang Bugna 2:18, 19.) Halimbawa, mga ginikanan, isiling sa inyo kabataan kon ano nga pag-uswag sa espirituwal ang nakita ninyo sa ila. Mahimo naton isiling sa nagasolo nga iloy kon ano ang ginahimo niya nga maayo sa pagpadaku sang iya kabataan bisan pa mabudlay ang iya kahimtangan, kag nagadayaw kita sa iya. Daku gid ang epekto sini nga sahi sang komendasyon kag pagpalig-on!

18, 19. Paano naton mapalig-on ang iban?

18 Indi kita personal nga silingan ni Jehova nga palig-unon ang isa ka tawo pareho sang ginsilingan niya si Moises nga palig-unon kag pabakuron si Josue. Pero, nahamuot ang Dios kon ginapalig-on naton ang mga kauturan kag ang iban. (Hulu. 19:17; Heb. 12:12) Halimbawa, mahimo naton isiling sa humalambal kon paano ang iya pamulongpulong amo gid ang ginakinahanglan naton nga laygay ukon nakabulig ini nga mahangpan naton ang isa ka teksto. “Bisan pa dali lang ang aton pag-istoryahanay,” sulat sang isa ka utod nga babayi sa nagaduaw nga humalambal, “narealisar mo nga may problema ako, kag ginlugpayan mo ako kag ginpalig-on. Luyag ko mahibaluan mo nga para sa akon, regalo ni Jehova ang imo mainayuhon nga paagi sa paghambal, nagapamulongpulong ka man ukon nagaistorya sing personal.”

19 Madamo kita sing makita nga paagi para mapalig-on sa espirituwal ang iban kon determinado kita nga sundon ang laygay ni Pablo: “Padayon nga palig-una kag pabaskuga ang isa kag isa, subong sang ginahimo na ninyo.” (1 Tes. 5:11) Pat-od gid nga mapahamut-an naton tanan si Jehova kon “padayon [kita] nga magpalig-unay kada adlaw.”

^ [1] (parapo 1) Gin-islan ang pila ka ngalan.