Isuklob ang kompleto nga hinganib halin sa Dios agod makatindog kamo sing malig-on batok sa tuso nga mga pahito sang Yawa.”—EFE. 6:11.

AMBAHANON: 79, 140

1, 2. (a) Ngaa nagadaug ang mga pamatan-on sa pagbato sa malaut nga mga espiritu? (Tan-awa ang piktyur sa umpisa sini nga artikulo.) (b) Ano ang binagbinagon naton?

GINPAANGGID ni apostol Pablo ang mga Cristiano sa mga soldado. Indi literal ang aton pagpakig-away, kundi espirituwal. Pero matuod ang aton mga kaaway. Eksperto sa pagpakig-away si Satanas kag ang mga demonyo kag madugay na nila ini nga ginahimo. Daw wala kita padaug sa ila, ilabi na ang mga pamatan-on. Mahimo bala sila magdaug sa sining gamhanan nga mga kaaway? Huo, kag nagadaug na ang mga pamatan-on! Ngaa? Bangod ‘padayon sila nga nagabakod paagi sa Ginuo.’ Ginahatagan sila sang Dios sing kusog, kag handa sila sa pagpakig-away. Pareho sang mga soldado nga ginhanas sing maayo, ‘ginsuklob nila ang kompleto nga hinganib halin sa Dios.’—Basaha ang Efeso 6:10-12.

2 Sang gingamit ni Pablo ini nga ilustrasyon, mahimo nga ginapensar niya ang hinganib ukon mga gamit sang mga soldado sang Roma. (Binu. 28:16) Binagbinagon naton kon ngaa bagay gid ini nga ilustrasyon. Talupangda man ang ginsiling sang pila  ka pamatan-on parte sa ginaatubang nila nga mga kabudlayan, kag ang mga benepisyo kon kompleto ang ila mga gamit sa espirituwal nga pagpakig-away.

Kompleto Bala ang Imo Gamit sa Pagpakig-away?

‘ANG PAHA SANG KAMATUORAN’

3, 4. Ngaa pareho sa paha sang soldado sang Roma ang kamatuoran sa Biblia?

3 Basaha ang Efeso 6:14. Ang paha sang soldado sang Roma human sa metal nga nagaamlig sa iya hawak. Amo ini ang nagasuporta sa iya mabug-at nga panaming sa dughan. Ang iban nga paha may mabakod man nga alangtan sang espada kag sundang. May kompiansa ang isa ka soldado sa pagpakig-away kon natakod sing maayo ang iya paha.

4 Pareho sa paha, nagaamlig man sa aton ang kamatuoran nga natun-an naton sa Pulong sang Dios para indi kita maimpluwensiahan sang butig nga mga panudlo. (Juan 8:31, 32; 1 Juan 4:1) Kon ginapabaloran naton ang kamatuoran, indi man kita mabudlayan sa pagsuksok sang aton ‘panaming sa dughan,’ ukon sa pagkabuhi suno sa matarong nga mga talaksan sang Dios. (Sal. 111:7, 8; 1 Juan 5:3) Isa pa, kon nahangpan gid naton ang kamatuoran sa Pulong sang Dios, may kompiansa kita sa pagpaathag sini sa mga nagapamatok.—1 Ped. 3:15.

5. Ngaa dapat naton pirme isugid ang matuod?

5 Kon ginapabaloran naton ang kamatuoran sa Biblia nga daw pareho sang paha nga natakod sa aton sing maayo, magakabuhi kita suno sa sini kag pirme naton isugid ang matuod. Ngaa indi kita dapat magbutig? Bangod ang pagbutig isa sa mga paagi nga ginagamit ni Satanas kag nagamadinalag-on gid sia. Nagahalit ini sa nagabutig kag sa nagapati sa iya. (Juan 8:44) Gani bisan pa indi kita perpekto, ginatinguhaan gid naton nga indi magbutig. (Efe. 4:25) Mahimo nga mabudlay ini. Ang 18 anyos nga si Abigail nagsiling: “Kon kaisa, daw pamensaron mo nga indi mo na lang pag-isugid ang matuod, ilabi na kon malikawan mo ang mabudlay nga sitwasyon paagi sa pagbutig.” Pero ngaa ginatinguhaan gid niya nga isugid ang matuod? “Kon ginasugid ko ang matuod,” siling niya, “matinlo ang akon konsiensia kay Jehova. Kag masaligan ako sang akon mga ginikanan kag mga abyan.” Si Victoria, nga 23 anyos, nagsiling: “Mahimo nga yagutaon ka sang iban kon ginasugid mo ang matuod kag kon sigurado ka sa imo ginapatihan. Pero maayo gid pirme ang resulta sini: May kompiansa ka, nagasuod ka pa gid kay Jehova, kag respetuhon ka sang mga nagapalangga sa imo.” Gani maayo gid kon pirme ikaw “may paha sing kamatuoran sa [imo] hawak.”

Ang paha sang kamatuoran (Tan-awa ang parapo 3-5)

ANG “PANAMING SANG PAGKAMATARONG SA DUGHAN”

6, 7. Ngaa pareho sa panaming sa dughan ang pagkamatarong?

6 Ang panaming sa dughan sang soldado sang Roma sang unang siglo mahimo nga human sa nagatabuay nga mga salsalon nga ginpasigo sa iya lawas. Ini nga mga salsalon ginapatapik sa panit sang sapat kag may mga kaw-it kag bilya nga ginahigtan sang panit nga mga higot. Ang abaga sang soldado natakpan man sang mga salsalon nga ginapatapik sa panit sang sapat. Ginalimitehan sang panaming sa dughan ang paghulag sang soldado, kag dapat niya pirme siguraduhon nga naplastar sing maayo ang mga salsalon. Pero ginaamligan sini ang iya tagipusuon kag ang iban pa nga bahin sang iya lawas para indi maigo sang espada ukon baslay.

7 Nagakaigo gid ini nga paglaragway kon paano ginaamligan sang matarong nga mga talaksan ni Jehova ang aton malaragwayon nga tagipusuon! (Hulu. 4:23) Indi gid pagbayluhan sang isa ka soldado ang iya panaming sa dughan nga human sa salsalon sing pigaw nga metal. Gani indi man naton dapat pagbayluhan ang talaksan ni Jehova sang aton talaksan sa kon ano ang husto. Indi naton  masarangan nga amligan ang aton tagipusuon sa aton lang kaugalingon nga paghangop. (Hulu. 3:5, 6) Dapat naton pirme siguraduhon nga naamligan ang aton tagipusuon sang ‘panaming sa dughan’ nga ginhatag ni Jehova.

8. Ngaa dapat naton sundon ang mga talaksan ni Jehova?

8 Nabatyagan mo bala kon kaisa nga daw wala ka sing kahilwayan ukon indi mo mahimo ang gusto mo bangod sang mga talaksan ni Jehova? Si Daniel, nga 21 anyos, nagsiling: “Ginakadlawan anay ako sang akon mga manunudlo kag mga kaeskwela kay ginasunod ko ang mga talaksan sang Biblia. Bangod sini, naluyahan ako sing buot sadto kag nasubuan.” Ano ang nakabulig sa iya? Nagsiling sia: “Sang ulihi, nakita ko ang kaayuhan sang pagsunod sa mga talaksan ni Jehova. Ang pila ko ka ‘abyan’ nagdroga; ang iban nag-untat sa pag-eskwela. Masubo gid ang natabo sa ila. Ginaamligan gid kita ni Jehova.” Ang 15 anyos nga si Madison nagsiling: “Daw nabudlayan ako nga sundon ang mga talaksan ni Jehova kag indi pagsundon ang gusto himuon sang iban nga pamatan-on.” Ano ang iya ginhimo? “Ginadumdom ko nga ginadala ko ang ngalan ni Jehova kag ginagamit ni Satanas ang pagsulay para mapierde ako. Kon mabatuan ko ang pagsulay, nalipay gid ako.”

Ang panaming sang pagkamatarong (Tan-awa ang parapo 6-8)

‘ANG KAHANDA SA PAGBANTALA SING MAAYONG BALITA SANG PAGHIDAIT NGA NASUKSOK SA MGA TIIL’

9-11. (a) Ano ang malaragwayon nga ginasuksok sang mga Cristiano sa ila tiil? (b) Ano ang makabulig sa aton para madali naton masugid ang maayong balita?

9 Basaha ang Efeso 6:15. Indi gid magkadto sa patag-awayan ang isa ka soldado sang Roma nga wala sing ginasuksok nga sandalyas. Human ini sa panit nga tatlo ka sampaw. Gani mabakod gid ini kag komportable.

10 Pareho sang mga sandalyas nga ginasuksok sang mga soldado sa patag-awayan, ang malaragwayon nga ginasuksok sang mga Cristiano sa ila tiil nagabulig sa ila nga mabantala ang mensahe sang paghidait. (Isa. 52:7; Roma 10:15) Pero kinahanglan gihapon ang kaisog sa pagbantala. Ang 20 anyos nga si Bo nagsiling: “Nakulbaan anay ako magpanaksi sa akon mga klasmeyt. Daw nahuya ako. Ambot kon ngaa nag-amo ako sadto. Subong, nalipay na ako magpanaksi sa akon mga kaedad.”

11 Nakita sang mga pamatan-on nga madali nila masugid ang maayong balita kon nakahanda sila. Paano ka makahanda? “Nagadala ako sang mga publikasyon sa akon bag sa eskwelahan,” siling ni Julia, nga 16 anyos, “kag ginapamatian ko ang mga opinyon kag ginapatihan sang akon mga klasmeyt. Dayon ginapensar ko kon ano ang makabulig sa ila. Kon nakahanda ako, masugid ko sa ila kon ano gid ang kinahanglan nila.” Si Makenzie, nga 23 anyos, nagsiling: “Kon may simpatiya ka kag handa mamati sa imo mga kaupod, mabal-an mo kon ano ang ila mga problema. Ginabasa ko gid ang tanan naton nga publikasyon, artikulo, kag video para sa mga pamatan-on. Gani may mapakita ako sa ila sa Biblia ukon sa jw.org nga makabulig sa ila.” Ginapakita sang ila ginsiling nga kon handa ikaw sa pagbantala, daw pareho lang nga ginasuksok mo ang mga “sandalyas” nga eksakto gid sa imo.

Ang kahanda nga nasuksok sa tiil (Tan-awa ang parapo 9-11)

“ANG DAKU NGA TAMING SANG PAGTUO”

12, 13. Ano ang nalakip sa “nagadabadaba nga baslay” ni Satanas?

12 Basaha ang Efeso 6:16. “Ang daku nga taming” nga ginadala sang soldado sang Roma rektanggulo kag nagatabon sang iya lawas halin sa abaga asta sa tuhod. Nagaamlig ini sa iya para indi sia maigo sang espada, bangkaw, kag baslay sang kontra.

13 Lakip sa “nagadabadaba nga baslay” ni Satanas ang ginapalapnag niya nga wala  kuno nagaulikid si Jehova sa imo kag indi ka Niya palangga. Indi ini matuod. Ang 19 anyos nga si Ida nagabatyag nga wala sia sing pulos. Nagsiling sia, “Nagapamensar ako pirme nga indi malapit sa akon si Jehova kag indi niya gusto nga mangin Abyan ko sia.” Ano ang ginhimo ni Ida? Nagsiling sia, “Ginapabakod sang mga miting ang akon pagtuo. Sang una, nagapungko lang ako kag wala gid nagakomento, kay ginapamensar ko nga wala sang gusto mamati sa akon. Pero subong, nagahanda na ako para sa mga miting kag ginatinguhaan ko nga magkomento sing duha ukon tatlo ka beses. Mabudlay ini himuon, pero kanami sang pamatyag ko kon makakomento ako. Kag makapalig-on gid ang mga kauturan. Kada tapos sang miting, mabatyagan ko gid nga palangga ako ni Jehova.”

14. Ano ang matun-an naton sa eksperiensia ni Ida?

14 May matun-an kita sa eksperiensia ni Ida: May eksakto nga kadakuon ang taming sang isa ka soldado, pero ang kadakuon sang taming sang aton pagtuo mahimo maggamay ukon magdaku, kay ang aton pagtuo mahimo magluya ukon magbakod. Depende ini sa aton. (Mat. 14:31; 2 Tes. 1:3) Gani dapat gid naton pabakuron ang aton pagtuo!

Ang daku nga taming sang pagtuo (Tan-awa ang parapo 12-14)

“ANG HELMET SANG KALUWASAN”

15, 16. Ngaa pareho sa helmet ang paglaum?

15 Basaha ang Efeso 6:17. Ang helmet nga ginasuksok sang soldado sang Roma nagaamlig sang iya ulo, liog, kag guya. Ang iban nga helmet may uluyatan para puede ini mabitbit sang soldado.

16 Pareho sang helmet nga nagaamlig sa  utok sang soldado, ang “paglaum nga kaluwasan” nagaamlig man sang aton hunahuna, ang aton ikasarang sa paghunahuna sing maayo. (1 Tes. 5:8; Hulu. 3:21) Bangod sang aton paglaum, makapokus kita sa mga promisa sang Dios kag indi kita maluyahan sing buot bisan pa may mga problema kita. (Sal. 27:1, 14; Binu. 24:15) Pero para maamligan kita sang aton “helmet,” dapat naton ini isuksok, kag indi lang ini bitbiton.

17, 18. (a) Paano kita masulay ni Satanas nga hukson ang aton helmet? (b) Paano naton mapakita nga wala kita madaya ni Satanas?

17 Paano kita masulay ni Satanas nga hukson ang aton helmet? Binagbinaga ang ginhimo niya kay Jesus. Nabal-an ni Satanas nga si Jesus ang magagahom sa katawhan sa ulihi. Pero hulaton pa ni Jesus ang gintalana nga tion ni Jehova. Kag dapat sia anay mag-antos kag mapatay. Gani gintanyagan ni Satanas si Jesus sing tsansa nga maggahom na dayon. Nagsiling si Satanas nga kon maghimo si Jesus sing isa ka buhat sang pagsimba, insigida nga mangin manuggahom sia sang kalibutan. (Luc. 4:5-7) Nabal-an man ni Satanas nga nagpromisa si Jehova nga ihatag niya sa aton ang matahom nga mga butang sa bag-ong kalibutan. Pero hulaton pa naton ini, kag mahimo nga magaantos pa kita subong. Gani ginatanyagan kita ni Satanas sing tsansa nga mangin masulhay ang kabuhi naton subong. Gusto niya nga unahon naton ang materyal nga mga butang insigida subong, kag ikaduha lang ang Ginharian.—Mat. 6:31-33.

18 Madamo nga pamatan-on ang wala madaya ni Satanas, pareho kay Kiana nga 20 anyos. “Kabalo ako nga ang Ginharian sang Dios amo lamang ang paglaum para masolbar ang tanan naton nga problema,” siling niya. Ano ang epekto sini nga paglaum sa iya ginahunahuna kag ginahimo subong? Nakabulig ini sa iya nga dumdumon nga temporaryo lang ang mga butang sa sini nga kalibutan. Sa baylo nga unahon ang propesyon sa sini nga sistema, ginagamit ni Kiana ang iya tion kag kusog sa pag-alagad kay Jehova.

Ang helmet sang kaluwasan (Tan-awa ang parapo 15-18)

“ANG ESPADA SANG ESPIRITU,” ANG PULONG SANG DIOS

19, 20. Paano kita mangin eksperto sa paggamit sa Pulong sang Dios?

19 Sang panahon ni Pablo, ang espada nga ginagamit sang mga soldado sang Roma may kalabaon nga mga 50 ka sentimetro. Eksperto gid sila sa paggamit sini bangod nagahanas sila adlaw-adlaw.

20 Ginsiling ni Pablo nga pareho sa espada ang Pulong sang Dios. Ginhatag ini ni Jehova sa aton. Pero dapat naton tun-an kon paano ini gamiton sing maayo para mapaathag ang aton mga ginapatihan ukon para tadlungon ang aton panghunahuna. (2 Cor. 10:4, 5; 2 Tim. 2:15) Paano ka mangin eksperto sa paggamit sini? Si Sebastian, nga 21 anyos, nagsiling: “Ginasulat ko ang isa ka bersikulo sa kada kapitulo nga ginabasa ko sa Biblia. Ginasulat ko ang paborito ko nga mga teksto. Gani mas mahangpan ko ang panghunahuna ni Jehova.” Si Daniel, nga ginsambit kaina, nagsiling: “Kon nagabasa ako sang Biblia, ginatandaan ko ang mga bersikulo nga mahimo makabulig sa mga tawo nga masugilanon ko kon nagabantala. Natalupangdan ko nga nagapamati ang mga tawo kon makita nila nga nagapati ka gid sa Biblia kag gusto mo gid sila buligan.”

Ang espada sang espiritu (Tan-awa ang parapo 19-20)

21. Ngaa indi kita dapat mahadlok kay Satanas kag sa mga demonyo?

21 Pareho sang natun-an naton sa mga pamatan-on sa sini nga artikulo, indi kita dapat mahadlok kay Satanas kag sa mga demonyo. Gamhanan sila, pero mapierde naton sila. Kag indi sila mabuhi sing dayon. Sa Isa ka Libo ka Tuig nga Paggahom sang Cristo, wala na sila sing mahimo, kag pagkatapos sini laglagon sila. (Bug. 20:1-3, 7-10) Kilala naton ang aton kaaway, kag nabal-an naton ang iya mga pamaagi kag intension. Paagi sa bulig ni Jehova, mabatuan naton sia!