“Takus ka, Jehova, nga amon Dios, nga magbaton sang himaya kag dungog kag gahom, bangod gintuga mo ang tanan nga butang.”—BUG. 4:11.

AMBAHANON: 112, 133

1, 2. Sa ano dapat mangin kumbinsido ang kada isa sa aton? (Tan-awa ang piktyur sa umpisa sini nga artikulo.)

GINBINAGBINAG sa nagligad nga artikulo ang panumbungon sang Yawa nga wala sing kinamatarong si Jehova sa paggahom. Nagsiling man sia nga mas maayo kon ang mga tawo ang maggahom sa ila kaugalingon. Husto bala si Satanas? Ibutang ta nga ang mga tawo amo ang nagagahom sa ila kaugalingon kag nagakabuhi sila sing wala sing katapusan. Mas maayo ayhan ang ila kahimtangan kay indi ang Dios ang nagagahom sa ila? Kon may kabuhi ka nga wala sing katapusan kag pabay-an ka lang sang Dios, mas mangin malipayon ka bala?

2 Wala sing makasabat sini para sa imo. Dapat hunahunaon ini sing maayo sang kada isa. Kon himuon naton ini, mangin kumbinsido kita nga may kinamatarong ang Dios bilang Soberano, nga ang iya paggahom ang pinakamaayo, kag dapat naton ini sakdagon sing bug-os tagipusuon. Ginapamatud-an ini sang Biblia. Halimbawa, binagbinaga ang ginasiling sa aton sang Kasulatan parte sa kinamatarong ni Jehova bilang Soberano.

SI JEHOVA MAY KINAMATARONG SA PAGGAHOM

3. Ngaa si Jehova lang ang may kinamatarong bilang Soberano?

3 May kinamatarong si Jehova bilang Soberano sang uniberso bangod sia ang labing gamhanan nga Dios kag ang Manunuga. (1 Cron. 29:11; Binu. 4:24) Sa Bugna 4:11, ginlaragway ang 144,000 nga kaupod nga mga manuggahom sang Cristo sa langit nga nagasiling:  “Takus ka, Jehova, nga amon Dios, nga magbaton sang himaya kag dungog kag gahom, bangod gintuga mo ang tanan nga butang, kag bangod sang imo kabubut-on nagluntad sila kag natuga.” Huo, bangod gintuga ni Jehova ang tanan nga butang, sia lang ang may kinamatarong nga gamhan ang mga tawo kag ang mga anghel.

4. Ngaa ang pagpamatok sa pagkasoberano sang Dios isa ka indi husto nga paggamit sang kahilwayan sa pagpili?

4 Wala gid sing gintuga si Satanas. Gani, wala sia sing kinamatarong nga gamhan ang uniberso. Bangod sia kag ang una nga mag-asawa nagrebelde kay Jehova, ginbalewala nila ang iya pagkasoberano. (Jer. 10:23) Matuod, gintuga sila nga may kahilwayan sa pagpili, gani puede sila makadesisyon nga indi magpatuytoy sa Dios. Pero ang ila bala kahilwayan nagahatag sa ila sang kinamatarong nga himuon ini? Wala. Ang kahilwayan sa pagpili nagabulig sa mga tawo nga makahimo sing nagakaigo nga mga desisyon. Pero, wala ini nagahatag sa ila sang kinamatarong nga magrebelde sa ila Manunuga kag Manughatag sing Kabuhi. Gani, maathag nga ang pagrebelde kay Jehova isa ka indi husto nga paggamit sang kahilwayan sa pagpili. Bilang mga tawo, kinahanglan naton ang matarong nga paggahom ni Jehova.

5. Ngaa makasalig kita nga matarong ang mga desisyon sang Dios?

5 May isa pa ka rason kon ngaa may kinamatarong si Jehova bilang Soberano. Ginagamit niya ang iya awtoridad sa husto kag matarong nga paagi. Nagsiling sia: “Ako amo si Jehova nga nagapakita sing mainunungon nga gugma, hustisya, kag pagkamatarong sa duta, kay nahamuot ako sa sini.” (Jer. 9:24) Indi niya kinahanglan ang nasulat nga mga kasuguan nga ginhimo sang indi himpit nga mga tawo agod basihan niya kon ano ang husto kag matarong. Sa baylo, sia ang naghatag sang mga kasuguan sa katawhan kay sia ang naghimo sang talaksan kon ano ang husto, kag makatarunganon gid sia. Ang “pagkamatarong kag hustisya ang pundasyon sang [iya] trono,” gani makasalig kita nga matarong ang tanan niya nga kasuguan, prinsipio, kag desisyon. (Sal. 89:14; 119:128) Sa kabaliskaran, nagsiling si Satanas nga indi maayo ang paggahom ni Jehova, pero napaslawan si Satanas nga paluntaron ang matarong nga paggahom sa kalibutan.

6. Ngaa may kinamatarong si Jehova nga gamhan ang kalibutan?

6 Dugang pa, may kinamatarong si Jehova bilang Soberano bangod sang iya ihibalo kag kaalam nga maatipan ang uniberso. Halimbawa, ginhatagan sang Dios ang iya Anak sing ikasarang nga ayuhon ang mga balatian nga indi mabulong sang mga doktor. (Mat. 4:23, 24; Mar. 5:25-29) Para kay Jehova, indi ini milagro. Nahibaluan niya kon paano nagapanghikot ang lawas sang tawo kag masarangan niya nga ayuhon ini. Masarangan man niya nga banhawon ang mga patay kag punggan ang mga kalamidad.

7. Ngaa mas superyor ang kaalam ni Jehova sangsa kalibutan nga ginagamhan ni Satanas?

7 Ang kalibutan nga ginagamhan ni Satanas nagapangita gihapon sing solusyon sa inaway sang mga pungsod kag sa mga inaway sa sulod sang pungsod. Si Jehova lang ang may kaalam nga magpaluntad sang paghidait sa kalibutan. (Isa. 2:3, 4; 54:13) Samtang ginatun-an naton ang ihibalo kag kaalam ni Jehova, masiling man naton ang ginsiling ni apostol Pablo: “Tuman kadamo sang pagpakamaayo sang Dios! Indi gid matungkad ang iya kaalam kag ihibalo! Indi gid mahangpan sing bug-os ang iya mga paghukom kag indi mausoy sing bug-os ang iya mga dalanon!”—Roma 11:33.

ANG PAGGAHOM NI JEHOVA ANG PINAKAMAAYO

8. Ano ang imo ginabatyag sa paagi ni Jehova sa paggahom?

8 Ginapamatud-an sang Biblia ang kinamatarong ni Jehova sa paggahom. Ginapakita  man sini kon ngaa ang iya pagkasoberano mas superyor sangsa iban. Ang isa ka rason amo nga ang iya paggahom nabase sa gugma. Nalipay gid kita kon paano niya ginapakita ang iya pagkasoberano. “Maluluy-on [sia] kag mainawaon, indi dali maakig kag bugana sa mainunungon nga gugma kag kamatuoran.” (Ex. 34:6) Ginapabatyag sang Dios sa iya mga alagad nga ginapabaloran niya sila. Ang iya pag-ulikid sa aton mas sobra pa sangsa pag-ulikid naton sa aton kaugalingon. Kabaliskaran sa panumbungon sang Yawa, wala ginadingutan ni Jehova ang iya matutom nga mga sumilimba. Ginhatag pa gani niya ang iya pinalangga nga Anak para may paglaum kita nga mabuhi sing dayon!—Basaha ang Salmo 84:11; Roma 8:32.

9. Paano naton nahibaluan nga ginaulikdan sang Dios ang kada isa?

9 Ginapalangga ni Jehova ang tanan niya nga katawhan, kag ginaulikdan niya ang kada isa. Halimbawa, sa sulod sang mga tatlo ka gatos ka tuig, nagtangdo si Jehova sing mga hukom para luwason ang pungsod sang Israel sa ila mga kaaway. Bisan pa sa sining mabudlay nga tion, nakita niya gihapon si Rut nga indi Israelinhon. Daku ang ginsakripisyo sini nga babayi para mangin bahin sang matuod nga pagsimba. Ginpakamaayo ni Jehova si Rut kag ginhatagan sia sing bana kag anak nga lalaki. Pero indi lang amo sina. Sa pagkabanhaw, mahibaluan ni Rut nga ang iya anak nangin katigulangan sang Mesias. Kag imadyina ang iya kalipay kon mahibaluan niya nga ang iya kabuhi ginsulat sa libro sa Biblia nga gintawag sa iya ngalan!—Rut 4:13; Mat. 1:5, 16.

10. Ngaa masiling naton nga indi mapintas ang paagi ni Jehova sa paggahom?

10 Indi mapintas ang paagi ni Jehova sa paggahom kag wala sia nagapamigos. Ang mga nagatuman sa iya may kahilwayan kag malipayon. (2 Cor. 3:17) Nagsiling si David: “Yara sa [presensia sang Dios] ang pagkahalangdon kag ang himaya; yara sa iya ginapuy-an ang kusog kag ang kalipay.” (1 Cron. 16:7, 27) Ang salmista nga si Etan nagsulat man: “Malipayon ang mga tawo nga nagahugyaw. O Jehova, nagalakat sila nga nahamut-an mo. Bangod sa imo ngalan nagakalipay sila sa bug-os nga adlaw, kag bangod sa imo pagkamatarong ginbayaw sila.”—Sal. 89:15, 16.

11. Paano kita mangin kumbinsido pa gid nga ang paggahom ni Jehova ang pinakamaayo?

11 Kon pirme naton pamalandungan ang kaayo ni Jehova, mangin kumbinsido pa gid kita nga ang iya paggahom ang pinakamaayo. Mabatyagan man naton ang ginsiling sang salmista: “Ang isa ka adlaw sa imo luwang mas maayo pa sangsa isa ka libo sa bisan diin!” (Sal. 84:10) Matuod gid ini! Bilang aton mahigugmaon nga Desinyador kag Manunuga, nahibaluan ni Jehova ang aton kinahanglan para mangin malipayon, kag bugana niya ini nga ginahatag sa aton. Para sa aton kaayuhan ang bisan ano nga ginapatuman niya sa aton kag makapahalipay gid ini sa aton, bisan pa nga kinahanglan naton magsakripisyo.—Basaha ang Isaias 48:17.

12. Ano ang aton panguna nga motibo sa pagsakdag sang pagkasoberano ni Jehova?

12 Ginapakita sang Biblia nga sa tapos sang Isa ka Libo ka Tuig nga Paggahom sang Cristo, ang pila ka tawo magarebelde sa pagkasoberano ni Jehova. (Bug. 20:7, 8) Ngaa? Sina nga tion, pagabuy-an ang Yawa kag patalangon niya ang katawhan paagi sa pagsulay sa ila nga magpati nga indi nila kinahanglan ang Dios. Ginahimo na niya ini halin pa sang una. Mahimo nga tinguhaan niya nga kumbinsihon ang mga tawo nga puede sila mabuhi sing wala sing katapusan bisan pa indi nila pagtumanon si Jehova. Siempre, indi gid ina matuod. Pamangkuton naton ang aton kaugalingon: Mapati bala ako sa sini nga binutig? Kon ginahigugma naton si Jehova kag ginaalagad naton sia bangod sang iya kaayo kag bangod sia ang Soberano sang uniberso, indi gid naton pagsapakon ang ginasiling sang Yawa. Indi gid naton paghandumon ang kabuhi nga indi si Jehova ang nagagahom sa aton.

 MATUTOM NGA SAKDAGA ANG PAGKASOBERANO SANG DIOS

13. Paano naton masakdag ang pagkasoberano sang Dios?

13 Dapat gid naton sakdagon sing bug-os tagipusuon ang pagkasoberano ni Jehova. Natun-an naton nga may kinamatarong sia sa paggahom kag amo ini ang pinakamaayo nga paggahom. Masakdag naton ang pagkasoberano ni Jehova paagi sa pagpabilin nga mainunungon kag pag-alagad sa Dios sing matutom. Paano pa gid naton ini masakdag? Ilugon naton ang mga pamaagi ni Jehova. Kon himuon naton ini, ginapakita naton nga ginapabaloran kag ginasakdag naton ang iya paggahom.—Basaha ang Efeso 5:1, 2.

14. Paano mailog sang mga gulang kag mga ulo sang pamilya si Jehova?

14 Natun-an naton sa Biblia nga nagagahom si Jehova sa mahigugmaon nga paagi. Base sa sini, ang mga ulo sang mga pamilya kag ang mga gulang nga nagapabalor sa iya pagkasoberano indi dapat magpamilit nga himuon sang iban ang ila gusto. Sa baylo, dapat nila ilugon si Jehova. Maayo nga halimbawa si Pablo sa pag-ilog sa Dios kag sa Iya Anak. (1 Cor. 11:1) Wala ginpakahuy-an ni Pablo ang iban ukon ginpilit sila nga himuon ang isa ka butang. Sa baylo, nagpangabay sia sa ila. (Roma 12:1; Efe. 4:1; Filem. 8-10) Amo ini ang pamaagi ni Jehova. Gani, dapat amo man sini ang himuon sang tanan nga nagapabalor kag nagasakdag sa iya paggahom.

15. Kon tahuron naton ang mga ginhatagan sang Dios sing awtoridad, paano sini ginapakita nga ginapabaloran naton ang paggahom ni Jehova?

15 Paano naton dapat tamdon ang mga ginhatagan sang Dios sing awtoridad? Kon ginatahod naton sila kag nagakooperar kita sa ila, ginasakdag naton ang pagkasoberano ni Jehova. Bisan pa wala naton nahangpan sing bug-os ang ila desisyon ukon indi kita ugyon sa sini, dapat naton gihapon sakdagon ang pamaagi ni Jehova. Lain gid ini sa pamaagi sang kalibutan, pero amo ini ang panimuot nga dapat ipakita sang mga nagasakdag sa paggahom ni Jehova. (Efe. 5:22, 23; 6:1-3; Heb.  13:17) Kon himuon naton ini, magabenepisyo kita kay gusto sang Dios ang pinakamaayo para sa aton.

16. Paano nagahimo sing desisyon ang mga nagasakdag sa pagkasoberano sang Dios?

16 Mapakita man naton ang pagsakdag sa pagkasoberano sang Dios kon nagahimo kita sing desisyon. Wala naghatag si Jehova sing espesipiko nga sugo sa kada sitwasyon. Sa baylo, ginpahibalo niya sa aton ang iya panghunahuna para giyahan kita. Halimbawa, wala sia naghatag sing detalyado nga sugo parte sa pamayo sang mga Cristiano. Sa baylo, ginpahibalo niya nga gusto niya nga ang aton pamayo kag pamustura dapat maugdang kag nagakaigo para sa mga Cristianong ministro. (1 Tim. 2:9, 10) Gusto man niya nga ang aton desisyon indi dapat makapasandad ukon makatublag sa iban. (1 Cor. 10:31-33) Kon ginabase naton ang aton desisyon, indi sa kon ano lang ang aton gusto, kundi sa kon ano ang panghunahuna ni Jehova kag kon ano ang importante sa iya, ginapakita naton nga ginapabaloran kag ginasakdag naton ang iya paggahom.

Sakdaga ang pagkasoberano sang Dios kon nagahimo sing desisyon kag sa sulod sang pamilya (Tan-awa ang parapo 16-18)

17, 18. Ano ang pila ka paagi nga mapakita sang mag-asawa nga ginasakdag nila ang pagkasoberano ni Jehova?

17 Binagbinaga ang isa ka paagi nga mapakita sang Cristianong mag-asawa ang ila pagsakdag sa mga pamaagi ni Jehova kag sa iya pagkasoberano. Ano abi kon may problema ang mag-asawa nga wala nila ginapaabot? Ukon ano abi kon daw indi na sila malipayon? Mahimo nila pamalandungan kon paano ginpakig-angutan ni Jehova ang pungsod sang Israel sadto. Ginlaragway niya ang iya kaugalingon nga daw bana sini nga pungsod. (Isa. 54:5; 62:4) Madamo gid sang problema ini nga “pag-asawahay”! Mabudlay gid ini kay Jehova, pero wala sia dayon nangampo. Madamo nga beses nga ginkaluuyan niya ang pungsod kag gintuman niya ang katipan niya sa ila. (Basaha ang Salmo 106:43-45.) Indi bala nga gusto naton mangin suod pa gid kay Jehova bangod sang iya mainunungon nga gugma?

18 Ang mga mag-asawa nga nagapabalor sa mga pamaagi ni Jehova dapat mag-ilog sa iya. Kon may problema sa ila pag-asawahay, wala sila nagapangita sang indi Makasulatanhon nga paagi para makabulag. Nahibaluan nila nga gintingob sila ni Jehova kag gusto niya nga ‘maghiusa’ sila. Suno sa Kasulatan, ang seksuwal nga imoralidad amo lang ang rason nga puede makadiborsio ang isa kag hilway sia nga magminyo liwat. (Mat. 19:5, 6, 9) Kon himuon sang mag-asawa ang ila bug-os nga masarangan para mangin madinalag-on ang ila pag-asawahay, ginasakdag nila ang matarong nga paggahom ni Jehova.

19. Ano ang dapat naton himuon kon nakasala kita?

19 Bangod indi kita himpit, may mahimo kita kon kaisa nga nagapasubo kay Jehova. Nahibaluan niya ini, amo kon ngaa gin-aman niya ang gawad sang Cristo. Gani, kon makasala kita, dapat kita mangayo sing pasaylo kay Jehova. (1 Juan 2:1, 2) Sa baylo nga pirme basulon ang aton kaugalingon, dapat ini mangin leksion sa aton. Kon magpalapit kita kay Jehova, patawaron niya kita kag buligan niya kita nga maglig-on kag maatubang sing madinalag-on ang pareho nga mga sitwasyon sa palaabuton.—Sal. 103:3.

20. Ngaa dapat naton sakdagon ang pagkasoberano ni Jehova subong?

20 Sa bag-ong kalibutan, ang tanan pagagamhan na ni Jehova kag tun-an nila ang iya matarong nga mga pamaagi. (Isa. 11:9) Pero subong pa lang, madamo na kita sang matun-an parte sa sini. Sa indi madugay, wala na sing makakuestyon sa kinamatarong sang Dios sa paggahom. Gani, subong na ang tion nga sakdagon ang pagkasoberano sang Dios paagi sa aton katutom, pag-alagad, kag panikasog nga ilugon sia sa tanan naton nga ginahimo.