“Magkalipay ka kay Jehova, kag ihatag niya ang mga handum sang imo tagipusuon.”—SAL. 37:4.

AMBAHANON: 89, 140

1. Ano nga desisyon ang dapat himuon sang mga pamatan-on parte sa ila palaabuton, pero ngaa indi sila dapat sobra nga mabalaka sa sini? (Tan-awa ang piktyur sa umpisa sini nga artikulo.)

MGA pamatan-on, mahimo nga nagapati man kamo nga antes magbiyahe, mas maayo kon magplano anay kamo kon diin kamo makadto. Ang kabuhi daw pareho sa pagbiyahe, kag samtang bata pa, dapat magplano na kamo kon diin ninyo gusto magkadto. Matuod, indi mahapos magplano. Nagsiling ang dalagita nga si Heather: “Kululbaan ini. Madesisyon ka na kon ano ang himuon mo sa bilog mo nga kabuhi.” Pero magpakaisog. Ginsilingan ni Jehova ang iya katawhan: “Indi ka magkabalaka, kay ako imo Dios. Pabaskugon ko ikaw, huo, buligan ko ikaw.”—Isa. 41:10.

2. Ngaa masiling mo nga gusto ni Jehova nga mangin malipayon ka sa imo plano para sa palaabuton?

2 Ginapalig-on ka ni Jehova nga mangin maalamon sa pagplano para sa imo palaabuton. (Man. 12:1; Mat. 6:20) Gusto niya nga mangin malipayon ka. Matuod ini bangod sang mga gintuga niya nga aton makita, mabatian, kag matilawan. Pamensara man kon paano niya kita ginaatipan kag ginatudluan sang pinakamaayo nga pagkabuhi. Ginsilingan ni Jehova ang wala nagapamati sa iya laygay: “Ginpili ninyo ang mga butang nga wala ko ginkahamut-an. . . . Tan-awa! Ang akon mga alagad magakasadya, apang kamo mahuy-an. Tan-awa!  Ang akon mga alagad magasinggit sa kalipay bangod sang maayo nga kahimtangan sang tagipusuon.” (Isa. 65:12-14) Mahimaya si Jehova kon mangin maalamon ang iya katawhan sa pagdesisyon.—Hulu. 27:11.

MGA PLANO NGA MAGAPAHALIPAY SA IMO

3. Ano ang gusto ni Jehova para sa imo?

3 Ano ang gusto ni Jehova para sa imo? Gusto ni Jehova nga mangin malipayon ang mga tawo nga gintuga niya. Pero dapat nila sia kilalahon kag alagdon sing matutom. (Sal. 128:1; Mat. 5:3) Tuhay gid ini sa mga sapat, nga nagakaon lang, nagainom, kag nagapadamo. Gusto sang Dios nga mangin malipayon ka paagi sa pagplano sang mga hilikuton nga wala ginahimo sang mga sapat. Ang imo Manunuga amo “ang Dios sang gugma” kag “malipayon nga Dios,” nga naghimo sa tawo “suno sa larawan niya.” (2 Cor. 13:11; 1 Tim. 1:11; Gen. 1:27) Mangin malipayon ka kon ilugon mo ang aton mahigugmaon nga Dios. Nangin matuod na bala sa imo ang ginasiling sini nga teksto: “Mas malipayon ang nagahatag sangsa nagabaton”? (Binu. 20:35) Matuod gid ini nga nagakatabo sa mga tawo. Gani gusto ni Jehova nga unahon mo sa imo mga plano ang pagpakita sang gugma sa iban kag sa iya.—Basaha ang Mateo 22:36-39.

4, 5. Ngaa malipayon si Jesus?

4 Nagpakita si Jesucristo sang himpit nga halimbawa para sa inyo nga mga pamatan-on. Sang bata pa sia, mahimo gid nga nanamian man sia maghampang. Ang Pulong sang Dios nagsiling nga may “tion sa pagkadlaw . . . kag tion sa pagsaot.” (Man. 3:4) Nangin suod man si Jesus kay Jehova paagi sa pagtuon sa Kasulatan. Sang 12 anyos sia, ang mga manunudlo sa templo nagdayaw gid sa “iya paghangop kag sa iya mga sabat.”—Luc. 2:42, 46, 47.

5 Sang adulto na si Jesus, malipayon man sia. Ngaa? Nahibaluan niya nga gusto sang Dios nga ‘ipahayag niya ang maayong balita sa mga imol kag ipasag-uli ang panan-aw sang mga bulag.’ (Luc. 4:18) Malipayon si Jesus bangod ginhimo niya ang ginsugo sang Dios sa iya. Ginalaragway sang Salmo 40:8 ang iya ginbatyag: “Ang paghimo sang imo kabubut-on, O Dios ko, amo ang akon kalipay.” Nalipay si Jesus sa pagtudlo sa mga tawo parte sa iya Amay sa langit. (Basaha ang Lucas 10:21.) Sa tapos ni Jesus matudluan ang isa ka babayi parte sa matuod nga pagsimba, nagsiling sia sa iya mga disipulo: “Ang akon pagkaon amo ang paghimo sang kabubut-on sang nagpadala sa akon kag ang pagtapos sang iya buluhaton.” (Juan 4:31-34) Malipayon si Jesus bangod ginhigugma niya ang Dios kag ang iban. Malipay ka man sa sini.

6. Ngaa maayo kon isugid mo sa eksperiensiado nga mga Cristiano ang imo mga plano?

6 Madamo nga Cristiano ang nagsugod sa pagpayunir sang pamatan-on pa sila, kag malipayon sila. Puede mo bala masugid sa ila ang imo mga plano? “Mapaslawan ang mga plano kon wala sing paghambalanay, apang magamadinalag-on ini kon may madamo nga manuglaygay.” (Hulu. 15:22) Mahimo isugid sa imo sini nga mga utod nga ang pag-alagad sing bug-os tion may matudlo sa imo nga mapuslanon sa imo pagkabuhi. Sang didto si Jesus sa langit, gintudluan sia sang iya Amay, kag padayon si Jesus nga nagtuon sang nag-alagad sia diri sa duta. Naeksperiensiahan niya ang kalipay sa pagsugid sang maayong balita kag sa pagpabilin nga matutom sang gintilawan sia. (Basaha ang Isaias 50:4; Heb. 5:8; 12:2) Binagbinagon naton kon ngaa makapahalipay gid sa imo ang pag-alagad sing bug-os tion.

KON NGAA MALIPAYON ANG MGA NAGATUDLO SA IBAN

7. Ngaa madamo nga pamatan-on ang nanamian magtudlo sa iban?

7 Nagsiling si Jesus: “Kadtui ninyo ang mga tawo . . . kag tudlui ninyo sila agod mangin disipulo ko.” (Mat. 28:19, 20) Kon amo ini ang plano mo sa kabuhi, mangin  malipayon gid ikaw kag mahimaya mo ang Dios. Pareho sa iban nga propesyon, kinahanglan ang tion para mahanas ka kag mangin eksperto. Halimbawa, nagsugod sa pagpayunir si Timothy sang tin-edyer pa sia. Nagsiling sia: “Gusto ko alagdon si Jehova sing bug-os tion kay paagi sa sini mapakita ko nga palangga ko sia. Sang primero, wala ako sing makita nga gusto magtuon sa Biblia, pero sang nagsaylo ako sa iban nga teritoryo, nasugdan ko ang pila ka pagtuon pagligad lang sang isa ka bulan. Ang isa sa ginatudluan ko nagtambong na sa Kingdom Hall. Sa tapos sang duha ka bulan nga pag-eskwela ko sa Bible School for Single Brothers, * gin-asayn ako sa bag-o nga teritoryo kag nasugdan ko diri ang apat ka pagtuon. Nanamian ako magtudlo sa mga tawo, kay nakita ko nga ginabag-o sang balaan nga espiritu ang ila kabuhi.”—1 Tes. 2:19.

8. Ano ang ginhimo sang iban nga pamatan-on para madamo pa ang ila matudluan?

8 Ang pila ka pamatan-on nagtuon sang iban nga lenguahe. Halimbawa, si Jacob nga taga-North America nagsulat: “Sang siete anyos ako, madamo sa klasmeyt ko ang Vietnamese. Gusto ko sila sugiran parte kay Jehova, gani nagplano ako nga tun-an ang ila lenguahe. Nakatuon ako sang ginkomparar ko ang English kag Vietnamese nga Lalantawan. Nangin abyan ko man ang mga kauturan sa malapit lang nga Vietnamese nga kongregasyon. Nagpayunir ako sang 18 anyos ako. Sang ulihi, nag-eskwela ako sa Bible School for Single Brothers. Nakabulig ini sa akon subong kay gin-asayn ako bilang payunir sa isa ka Vietnamese nga grupo kag ako lang ang gulang diri. Natingala gid ang madamo nga Vietnamese kay nakahibalo ako sang ila lenguahe. Ginapasulod nila ako sa ila balay, kag sa masami makatuon kami sang Biblia. Ang pila sa ila nag-uswag kag nagpabawtismo.”—Ipaanggid ang Binuhatan 2:7, 8.

9. Ano ang matun-an naton paagi sa pagtudlo sa iban?

9 Paagi sa pagtudlo sa iban, makatuon ka sang maayo nga mga batasan sa pagtrabaho, kon paano mag-istorya sa iban, kon paano madugangan ang kompiansa kag mangin mataktikanhon. (Hulu. 21:5; 2 Tim. 2:24, footnote) Pero labaw sa sini, makalilipay magtudlo sa iban bangod mabuligan ka sini nga mangin pamilyar pa gid sa Kasulatan nga nagapalig-on sang imo pagtuo. Matun-an mo man kon paano magpangabudlay kaupod ni Jehova.—1 Cor. 3:9.

10. Paano ka malipay sa pagbantala bisan pa diutay lang ang nagapamati sa inyo teritoryo?

10 Malipay ka gihapon sa pagbantala bisan pa diutay lang ang nagapamati sa maayong balita sa inyo teritoryo. Ang pagtudlo sa iban para mangin disipulo resulta sang pagbuligay. Ang bug-os nga kongregasyon nagabuligay sa pagpangita sang mga interesado. Bisan pa isa lang ka utod ang nakakita sang isa ka tawo nga nangin disipulo sang ulihi, may bahin ang tanan sa pagpangita kag sa pagkalipay. Halimbawa, siam ka tuig nga nagpayunir si Brandon sa lugar nga diutay lang ang nagapamati. Nagsiling sia: “Gusto ko ibantala ang maayong balita bangod ginsugo ini ni Jehova sa aton. Nagpayunir ako dayon pagkagradwar sa hayskul. Ginapalig-on ko ang mga pamatan-on sa amon kongregasyon kag nalipay ako nga nagauswag sila sa espirituwal. Sa tapos ako makaeskwela sa Bible School for Single Brothers, nakabaton ako sang bag-o nga asaynment bilang payunir. Matuod, wala gid sing nagpabawtismo sa akon nabantalaan sa teritoryo, pero may mga nabawtismuhan nga nabuligan sang iban. Nalipay ako nga nagplano ako nga makigbahin sing bug-os sa pagtudlo sa iban.”—Man. 11:6.

POSIBLE NGA RESULTA SANG IMO MGA PLANO

11. Sa ano nga sahi sang sagrado nga pag-alagad nakigbahin ang madamo nga pamatan-on?

11 May madamo nga kahigayunan nga maalagad si Jehova. Halimbawa, madamo nga  pamatan-on ang nagaboluntaryo sa konstruksion kay kinahanglan ang ginatos ka bag-o nga Kingdom Hall. Ang pagpatindog sini isa ka sahi sang sagrado nga pag-alagad nga nagahimaya sa Dios kag makapahalipay sa imo. Pareho sa iban nga sahi sang sagrado nga pag-alagad, makalilipay magpangabudlay upod sa mga kauturan. Paagi sa pagpakigbahin sa konstruksion, matun-an mo nga mangin mahalungon, mapisan, kag magkooperar sa mga nagatatap sa sini.

Ginapakamaayo gid ang mga nagaalagad sing bug-os tion (Tan-awa ang parapo 11-13)

12. Paano makabulig ang pagpayunir nga malab-ot ang iban pa nga pribilehiyo?

12 Nagsiling ang utod nga si Kevin: “Halin pa sang bata ako, handum ko na nga alagdon si Jehova sing bug-os tion. Nagsugod ako sa pagpayunir sang 19 anyos ako. Part-time ako nga nag-obra sa isa ka utod nga kontraktor. Natun-an ko kon paano magtakod sang atop, bintana, kag puertahan. Sang ulihi, duha ka tuig ako nga nagboluntaryo sa pagbulig sa mga nahalitan sang bagyo paagi sa pagpatindog sang mga Kingdom Hall kag mga balay sang mga kauturan. Sang mabal-an ko nga may himuon nga konstruksion sa South Africa, nag-aplay ako kag ginpatawag ako. Diri sa Africa, sunodsunod ang pagpatindog sang mga Kingdom Hall, gani nagasaylosaylo ako pagligad lang sang pila ka semana. Ang amon grupo sa konstruksion daw isa ka pamilya. Ululupod kami sa amon ginaistaran, sa pagtuon sang Biblia, kag sa pag-obra. Nanamian man ako magbantala upod sa mga kauturan kada semana. Ang ginplano ko sang bata pa ako nagresulta sa kalipay nga wala ko ginpaabot.”

13. Ngaa nalipay ang mga pamatan-on sa pag-alagad sa Bethel?

13 Ang iban nga mga payunir anay nagaalagad na subong sa Bethel. Makalilipay ang pag-alagad sa Bethel bangod para kay Jehova ang tanan nga ginahimo diri. Nagabulig ang pamilya Bethel sa pag-aman sang espirituwal nga pagkaon. Ang Bethelite nga si  Dustin nagsiling: “Sang nuebe anyos ako, tulumuron ko na nga mag-alagad sing bug-os tion, kag nagpayunir ako pagkagradwar sa hayskul. Pagligad sang isa ka tuig kag tunga, ginpatawag ako sa Bethel, kag natun-an ko ang pag-opereyt sang imprintahan kag sang ulihi ang computer programming. Sa Bethel, personal ko nga mabatian ang mga report parte sa pag-uswag sang pagbantala sa bilog nga kalibutan. Nalipay ako mag-alagad diri bangod ang ginahimo namon nagabulig sa mga tawo nga mangin suod kay Jehova.”

ANO ANG IMO MGA PLANO PARA SA PALAABUTON?

14. Paano ka magahanda para makaalagad sing bug-os tion?

14 Paano ka magahanda para makaalagad sing bug-os tion? Una sa tanan, makabulig ang Cristiano nga mga kinaiya para maalagad mo si Jehova sing bug-os tion. Gani mangin mapisan sa pagtuon sang Pulong sang Dios, pamalandungi ini sing maayo, kag tinguhai nga makakomento sing makapalig-on sa mga miting sang kongregasyon. Samtang nagaeskwela ka pa, mapauswag mo ang imo ikasarang sa pagbantala sang maayong balita. Mangin interesado sa mga tawo paagi sa mataktikanhon nga pagpamangkot sang ila opinyon kag pagpamati sa ila sabat. Makabulig ka man sa kongregasyon, halimbawa, sa pagpaninlo kag pagmentinar sa Kingdom Hall. Nahamuot si Jehova sa mga mapainubuson kag handa sa pagbulig. (Basaha ang Salmo 110:3; Binu. 6:1-3) Gin-agda ni apostol Pablo si Timoteo nga mag-alagad bilang misyonero bangod “maayo ang ginasugid tuhoy sa iya sang mga kauturan.”—Binu. 16:1-5.

15. Paano ka makaplano para sa imo mangin obra?

15 Ang kalabanan sang mga nagaalagad sing bug-os tion nagaobra para masuportahan ang ila kaugalingon. (Binu. 18:2, 3) Puede mo planuhon nga mag-eskwela sa malip-ot lang nga kurso nga makabulig sa imo nga makakita sang part-time nga obra sa inyo lugar. Mangayo sing panugda sa inyo manugtatap sang sirkito kag sa mga payunir sa inyo sirkito. Pamangkuta sila kon ano nga obra ang bagay sa mga payunir. Dayon, “itugyan kay Jehova ang bisan ano nga imo ginahimo, kag mangin madinalag-on ang imo mga plano,” siling sang Biblia.—Hulu. 16:3; 20:18.

16. Paano makabulig ang pag-alagad kay Jehova sing bug-os tion samtang pamatan-on ka pa para mangin handa ka sa iban pa nga responsibilidad sa ulihi?

16 Makasalig ka nga gusto ni Jehova nga ‘makapanguyapot ka sing malig-on’ sa makalilipay nga palaabuton. (Basaha ang 1 Timoteo 6:18, 19.) Paagi sa pag-alagad sing bug-os tion, makaupod mo ang iban nga nagaalagad man sing bug-os tion kag makabulig ini sa imo nga mangin hamtong bilang Cristiano. Nakabulig man sa madamo ang pag-alagad nila sing bug-os tion sang pamatan-on pa sila nga magmadinalag-on ang ila pag-asawahay sang ulihi. Sa masami, ang mga nagpayunir antes sila mangasawa ukon mamana nakapadayon sa pagpayunir bilang mag-asawa.—Roma 16:3, 4.

17, 18. Paano nadalahig ang imo tagipusuon kon nagaplano ka?

17 Nadalahig ang imo tagipusuon kon nagaplano ka. Ang Salmo 20:4 nagsiling parte kay Jehova: “Kabay nga ihatag niya ang handum sang imo tagipusuon kag hatagan sing kadalag-an ang tanan mo nga plano.” Gani pamensara kon ano ang gusto mo himuon sa imo kabuhi. Hunahunaa ang ginahimo ni Jehova subong kag ang mahimo mo sa pag-alagad sa iya. Dayon, magplano nga himuon ang makapahalipay sa iya.

18 Ang pag-alagad kay Jehova sing bug-os tion makapahalipay gid sa imo bangod nagapadungog ini sa iya. Gani “magkalipay ka kay Jehova, kag ihatag niya ang mga handum sang imo tagipusuon.”—Sal. 37:4.

^ par. 7 Ginbuslan na ini sang School for Kingdom Evangelizers.