“O Dios namon, ginapasalamatan ka namon kag ginadayaw ang imo mahimayaon nga ngalan.”​—1 CRON. 29:13.

AMBAHANON: 80, 50

1, 2. Daw ano kaalwan si Jehova sa paggamit sang iya manggad?

SI Jehova maalwan nga Dios. Ang tanan nga ginapanag-iyahan naton naghalin sa iya. Si Jehova ang nagapanag-iya sang tanan nga bulawan kag pilak lakip ang tanan nga manggad sang duta, kag ginagamit niya ini para sakdagon ang kabuhi. (Sal. 104:13-15; Hag. 2:8) Madamo sing mabasa sa Biblia parte sa paggamit ni Jehova sang iya manggad para amanan ang iya katawhan paagi sa milagro.

2 Sa sulod sang 40 ka tuig, gin-amanan ni Jehova sing manna kag tubig ang pungsod sang Israel sang ara sila sa kamingawan. (Ex. 16:35) Gani, “wala sing nakulang sa ila.” (Neh. 9:20, 21) Paagi kay manalagna Eliseo, naghimo si Jehova sing milagro sang ginpadamo niya ang diutay nga lana para sa matutom nga balo nga babayi. Ining regalo sang Dios nakabulig sa balo nga mabayaran ang tanan niya nga utang kag may bastante pa nga kuarta nga nabilin para sa iya kag sa iya anak. (2 Hari 4:1-7) Paagi sa bulig ni Jehova, naghimo si Jesus sing milagro para maghatag sing pagkaon kag bisan gani sing kuarta kon kinahanglanon.—Mat. 15:35-38; 17:27.

3. Ano ang binagbinagon naton sa sini nga artikulo?

 3 Puede gamiton ni Jehova ang tanan niya nga manggad para sakdagon ang iya mga tinuga. Pero, ginapangabay niya gihapon ang iya mga alagad nga gamiton ang ila materyal nga mga butang para sakdagon ang hilikuton sang iya organisasyon. (Ex. 36:3-7; basaha ang Hulubaton 3:9.) Ngaa ginapaabot ni Jehova nga gamiton naton ang aton hamili nga mga butang para balusan ang iya kaalwan? Paano ang mga matutom sang una naghatag sing pinansial nga bulig sa mga hilikuton sang mga representante ni Jehova? Paano ginagamit sang organisasyon ang mga kuarta nga ginaamot subong? Binagbinagon sa sini nga artikulo ang mga sabat sa sini nga mga pamangkot.

NGAA NAGAHATAG KITA KAY JEHOVA?

4. Ano ang ginapakita naton kay Jehova kon ginasakdag naton ang iya hilikuton?

4 Nagahatag kita kay Jehova bangod sang aton gugma kag pagpasalamat sa iya. Kon hunahunaon naton ang tanan nga ginhimo ni Jehova para sa aton, magapasalamat gid kita. Sang ginpaathag ni Hari David ang mga kinahanglan para mapatindog ang templo, nagsiling sia nga ang tanan nga nabaton naton naghalin kay Jehova kag ang bisan ano nga ginahatag naton kay Jehova naghalin sa ginhatag niya sa aton.—Basaha ang 1 Cronica 29:11-14.

5. Paano ginapakita sang Kasulatan nga bahin sang matuod nga pagsimba ang maalwan nga paghatag?

5 Ang paghatag isa man ka paagi sang aton pagsimba kay Jehova. Sa palanan-awon ni apostol Juan, nabatian niya ang mga alagad ni Jehova sa langit nga nagasiling: “Takus ka, Jehova, nga amon Dios, nga magbaton sang himaya kag dungog kag gahom, bangod gintuga mo ang tanan nga butang, kag bangod sang imo kabubut-on nagluntad sila kag natuga.” (Bug. 4:11) Indi bala nga takus gid si Jehova sang tanan nga himaya kag dungog nga mahatag naton sa iya? Gani ihatag naton sa iya ang pinakamaayo. Paagi kay Moises, ginsugo ang pungsod sang Israel nga dapat sila mag-atubang kay Jehova sa tatlo ka kapiestahan kada tuig. Bilang bahin sang pagsimba sang mga Israelinhon sa sini nga mga kapiestahan, dapat “wala sing mag-atubang kay Jehova nga wala sing dala.” (Deut. 16:16) Amo man subong, importante nga bahin sang aton pagsimba ang maalwan nga paghatag. Paagi sini, ginapakita naton ang pagpasalamat kag pagsakdag sa dutan-on nga bahin sang organisasyon ni Jehova.

6. Ngaa makabenepisyo kita sa paghatag? (Tan-awa ang piktyur sa umpisa sini nga artikulo.)

6 Kon maalwan kita nga nagahatag, imbes nga nagabaton lang, may maayo ini nga epekto sa aton. (Basaha ang Hulubaton 29:21.) Hunahunaa ang isa ka bata nga nagahatag sing regalo sa iya mga ginikanan halin sa gamay nga balon nga ginahatag nila sa iya. Sigurado nga nalipay gid sa sini ang mga ginikanan! Ang isa ka anak nga payunir nga nagaistar sa balay sang iya mga ginikanan mahimo maghatag sing kuarta sa ila para ibulig sa mga galastuhan sang pamilya. Bisan pa wala ini ginapaabot sang mga ginikanan, mahimo nila ini batunon bangod amo ini ang paagi sang ila anak nga mapakita ang iya pagpasalamat sa tanan nga ginhimo nila para sa iya. Nahibaluan man ni Jehova nga ang paghatag sang aton hamili nga mga butang may maayo nga epekto sa aton.

ANG PAGHATAG SANG PANAHON SANG BIBLIA

7, 8. Paano ang katawhan ni Jehova sang panahon sang Biblia nagpakita sing halimbawa sa paghatag (a) para sa espesipiko nga mga proyekto? (b) para sakdagon ang hilikuton?

7 Ginapakita sang Kasulatan nga ang katawhan ni Jehova nagaamot para sakdagon ang iya hilikuton. May mga tion nga nagaamot  sila para sa espesipiko nga mga proyekto. Halimbawa, ginpalig-on ni Moises ang mga Israelinhon nga mag-amot para sa pagpatindog sang tabernakulo. Sang ulihi, amo man sini ang ginhimo ni Hari David para sa pagpatindog sang templo. (Ex. 35:5; 1 Cron. 29:5-9) Sang tion ni Hari Jehoas, gingamit sang mga saserdote ang natipon nga kuarta sa pagpakay-o sang balay ni Jehova. (2 Hari 12:4, 5) Sang unang siglo, sang nahibaluan sang mga Cristiano nga naapektuhan sang tiggulutom ang ila mga kauturan sa Judea, “namat-od [sila] nga magpadala sing bulig . . . Naghatag ang kada isa sa ila suno sa ila masarangan.”—Binu. 11:27-30.

8 Naghatag man ang katawhan ni Jehova sing pinansial nga bulig sa mga nagapanguna sa hilikuton. Sa Mosaikong Kasuguan, ang mga Levinhon wala sing palanublion indi pareho sa iban nga tribo. Gani, ginahatagan sila sang mga Israelinhon sing diesmos, ukon ikanapulo nga bahin. Nakabulig ini sa mga Levinhon nga magpokus sa ila hilikuton sa tabernakulo. (Num. 18:21) Sang ulihi, ang maalwan nga mga babayi “nag-alagad [kay Jesus] kag sa [iya] mga apostoles paagi sa paggamit sang ila mga pagkabutang.”—Luc. 8:1-3.

9. Diin naghalin ang mga ginaamot sang una?

9 Lainlain ang ginhalinan sini nga mga amot. Ang gin-amot sang mga Israelinhon para sa pagpatindog sang tabernakulo sa kamingawan mahimo naghalin sa ila mga dala halin sa Egipto. (Ex. 3:21, 22; 35:22-24) Sang unang siglo, ang pila ka Cristiano nagbaligya sang ila mga ginapanag-iyahan, pareho sang duta ukon balay, kag ginhatag nila ang kuarta sa mga apostoles. Dayon ginpanagtag ini sang mga apostoles sa mga nagakinahanglan. (Binu. 4:34, 35) Ang iban nagapain sing kuarta kag regular nga nagaamot para sakdagon ang hilikuton. (1 Cor. 16:2) Gani ang tanan, manggaranon man ukon imol, sarang makahatag.—Luc. 21:1-4.

ANG PAGHATAG SUBONG

10, 11. (a) Paano naton mailog ang maalwan nga mga alagad ni Jehova sang panahon sang Biblia? (b) Paano mo ginatamod ang imo pribilehiyo nga sakdagon ang hilikuton sang Ginharian?

10 Subong, mahimo pangabayon man kita nga mag-amot para sa espesipiko nga katuyuan. Halimbawa, patindugan bala sang bag-o nga Kingdom Hall ang inyo kongregasyon? Ukon ginakay-o bala ang inyo Kingdom Hall? Mahimo pahibaluon kita nga nagakinahanglan sang pinansial nga bulig ang pagpakay-o sang aton sanga talatapan, ang kombension nga aton ginatambungan, ukon ang aton mga kauturan nga nahalitan sang kalamidad. Nagaamot man kita para sakdagon ang hilikuton sa ulong-talatapan kag sa mga sanga talatapan sa bilog nga kalibutan. Ang aton amot nagasakdag sa mga misyonero, espesyal payunir, kag manugtatap sang sirkito. Ang inyo kongregasyon mahimo nga regular man nga nagapadala sing amot para sa pagpatindog sing mga Assembly Hall kag Kingdom Hall sa bilog nga kalibutan, kag nakabenepisyo gid sa sini ang mga kauturan.

11 Tanan kita makasakdag sa hilikuton sang organisasyon ni Jehova sa sining katapusan nga mga adlaw. Ang kalabanan nga amot wala mahibaluan kon kay sin-o naghalin. Wala naton ginapahibalo kon nagahulog kita sing amot sa mga kahon-alamutan sa mga Kingdom Hall, ukon kon nagaamot kita paagi sa Internet sa jw.org. Mahimo maghunahuna kita nga gamay man lang ang aton ginaamot. Pero, ang kalabanan nga amot naghalin sa madamo nga gamay nga mga donasyon imbes nga sa pila lang ka dalagku nga mga donasyon. Ginailog sang aton mga kauturan, bisan sang mga pigado, ang mga Cristiano sa Macedonia sang una. ‘Tuman sila kaimol’ pero nagpangabay gihapon sila nga maghatag, kag maalwan nila nga ginhimo ini.—2 Cor. 8:1-4.

12. Paano ginasigurado sang organisasyon nga magamit sing maayo ang mga amot?

12 Gusto sang Nagadumala nga Hubon nga  mangin matutom kag mainandamon sila sa paggamit sang pondo sang organisasyon, gani nagapangamuyo sila para makadesisyon sing maayo. (Mat. 24:45) Ang mabaton nga amot ginabahinbahin sa mga galastuhan. (Luc. 14:28) Sang panahon sang Biblia, ang mga gintugyanan sang pondo nagasunod gid sa mga pagsulundan para masigurado nga ang mga amot magamit lang sa katuyuan sini. Halimbawa, naglakbay si Esdras pabalik sa Jerusalem dala ang ginhatag sang hari sang Persia nga mga bulawan, pilak, kag mga kagamitan nga nagabalor subong sing sobra 100 ka milyon ka dolyar. Para kay Esdras, ini nga mga amot regalo para kay Jehova, gani naghatag sia sing espesipiko nga mga sugo para maamligan ini sa ila delikado nga paglakbay. (Esd. 8:24-34) Si apostol Pablo nagtipon sing mga amot para buligan ang mga kauturan sa Judea. Ginsigurado niya nga ang mga magadala sang amot “bunayag nga nagatatap sa tanan, indi lamang sa panulok ni Jehova, kundi sa panulok man sang mga tawo.” (Basaha ang 2 Corinto 8:18-21.) Bilang pag-ilog kanday Esdras kag Pablo, ang aton organisasyon subong may ginasunod man nga maathag nga mga pagsulundan kon paano gastuhon ang mga amot.

13. Paano naton dapat tamdon ang mga pagpasimple nga ginhimo sang organisasyon sining karon lang?

13 Ang isa ka pamilya posible maghimo sing mga pagbag-o para mag-igo ang ila kita sa ila ginagasto. Ukon posible nila binagbinagon kon paano pasimplehon ang ila kabuhi kag magkinot para mas madamo sila sing mahimo para kay Jehova. Amo man sini ang ginahimo sang organisasyon ni Jehova. Sining nagligad nga mga tinuig, madamo sing bag-o nga ginhimo ang organisasyon. Kon kaisa, mas madamo nga kuarta ang ginagasto sangsa ginabaton. Gani, nagapangita sing paagi ang organisasyon kon paano makakinot kag mapasimple ang mga hilikuton para magamit sing maayo ang inyo maalwan nga mga amot.

ANG MGA BENEPISYO SANG IMO PAGHATAG

Ang inyo mga amot nagabulig sa aton bug-os kalibutan nga hilikuton (Tan-awa ang parapo 14-16)

14-16. (a) Ano ang mga nahimo bangod sang inyo mga amot? (b) Paano ka nakabenepisyo sa sini nga mga aman?

14 Madamo nga madugay na nga matutom nga alagad ni Jehova ang nagsiling nga amo ini ang tion nga madamo gid nga espirituwal nga aman ang aton ginabaton. Dalayawon gid ini! Sining nagligad nga mga tinuig, nagsugod ang jw.org kag JW Broadcasting. Ang New World Translation of the Holy Scriptures ginbalhag sa madamo pa nga lenguahe. Sang 2014/2015, ang pila ka dalagku nga mga istadyum sa 14 ka siudad sa bilog nga kalibutan ginhiwatan sang tatlo ka adlaw nga internasyonal nga kombension nga “Padayon nga Pangitaa Anay ang Ginharian sang Dios!” Nalipay gid ang mga nakatambong sa sini.

 15 Madamo ang nagpasalamat sa dalayawon nga mga aman sang organisasyon ni Jehova. Halimbawa, parte sa JW Broadcasting, ang mag-asawa nga nagaalagad sa isa ka pungsod sa Asia nagsulat: “Naasayn kami sa isa ka gamay nga siudad. Gani kon kaisa, namingawan kami kag nagakalipatan namon kon daw ano kasangkad ang hilikuton ni Jehova. Pero kon malantaw namon ang mga programa sa JW Broadcasting, madumduman namon nga bahin kami sang bug-os kalibutan nga paghiliutod. Ang aton pinalangga nga mga kauturan diri nalipay gid sa JW Broadcasting. Pagkatapos malantaw ang mga programa kada bulan, masami namon sila mabatian nga nagasiling nga nagasuod sila sa mga miembro sang Nagadumala nga Hubon. Mas ginapabugal pa gid nila subong nga bahin sila sang organisasyon sang Dios.”

16 Sa bilog nga kalibutan, halos 2,500 ka Kingdom Hall ang ginapatindog ukon ginakay-o. Pagkatapos magamit sang isa ka kongregasyon sa Honduras ang ila bag-o nga Kingdom Hall, nagsulat sila: “Nalipay gid kami nga mangin bahin sang bug-os uniberso nga pamilya ni Jehova kag mabatyagan ang aton dalayawon nga bug-os kalibutan nga paghiliutod, nga nagbulig para matuman ang amon handum nga makapatindog sing Kingdom Hall.” Madamo man ang nagpasalamat sang nakabaton sila sang Biblia kag iban pa nga publikasyon sa ila lenguahe, sang ginbuligan sila pagkatapos sang kalamidad, ukon sang nakita nila ang maayo nga mga resulta sang metropolitan witnessing kag pagpanaksi sa publiko sa ila lugar.

17. Ano ang pamatuod nga ginasakdag ni Jehova ang iya organisasyon subong?

17 Natingala ang iban kon paano naton ginahimo ang aton mga hilikuton paagi lang sa mga amot. Sang nag-tour sa isa naton ka imprintahan ang isa nga may mataas nga posisyon sa daku nga kompanya, nagdayaw gid sia nga ang tanan nga hilikuton ginahimo sang mga boluntaryo, nga ginasakdag ini sang mga amot, kag wala sing mga ginabaligya para makakuarta. Nagsiling sia nga imposible ang aton ginahimo. Husto sia! Nahibaluan naton nga posible lang ini bangod sang pagsakdag ni Jehova.—Job 42:2.

ANG MGA PAGPAKAMAAYO SANG PAGHATAG KAY JEHOVA

18. (a) Ano ang mga pagpakamaayo kon nagahatag kita para sakdagon ang Ginharian? (b) Paano naton mahanas ang aton kabataan kag mga bag-uhan sa paghatag?

18 Ginapadunggan kita ni Jehova paagi sa paghatag sa aton sing kahigayunan nga sakdagon ang dalayawon nga hilikuton subong. Nagpasalig sia nga pakamaayuhon niya kita kon nagahatag kita para sakdagon ang Ginharian. (Mal. 3:10) Nagpromisa si Jehova nga ang tawo nga maalwan mangin hamungaya. (Basaha ang Hulubaton 11:24, 25.) Ang paghatag nagapahalipay man sa aton, kay “mas malipayon ang nagahatag sangsa nagabaton.” (Binu. 20:35) Paagi sa aton ginahambal kag ginahimo, mahanas naton ang aton kabataan kag mga bag-uhan sa pagsakdag sang hilikuton, kag mabaton man nila ang madamo nga pagpakamaayo.

19. Paano ka napalig-on sa sini nga artikulo?

19 Ang tanan nga ginapanag-iyahan naton naghalin kay Jehova. Kon ginabalusan naton ang iya kaalwan paagi sa aton paghatag, ginapakita naton nga ginahigugma naton sia kag ginapasalamatan sia sa tanan nga ginhimo niya para sa aton. (1 Cron. 29:17) Sang nag-amot ang mga Israelinhon para sa pagpatindog sang templo, “nalipay gid [sila] sa paghatag sining kinabubut-on nga mga dulot, kay ginhatag nila ini sing bug-os tagipusuon kay Jehova.” (1 Cron. 29:9) Kabay pa nga padayon man naton nga mabatyagan ini nga kalipay paagi sa paghatag kay Jehova sang halin man sa iya.