Accessibility setting

Magpili sing lenguahe

Magdiretso sa segundaryo nga menu

Magdiretso sa listahan sang kaundan

Magdiretso sa kaundan

Mga Saksi ni Jehova

Hiligaynon

ANG LALANTAWAN (TULUN-AN NGA EDISYON) ENERO 2017

Naghalad sang Ila Kaugalingon sing Kinabubut-on

Naghalad sang Ila Kaugalingon sing Kinabubut-on

LAKIP sa makugi nga mga Saksi nga nagaalagad sa mga lugar diin kinahanglan ang dugang nga mga manugbantala sang Ginharian ang madamo nga utod nga dalaga. Ang iban sa ila madugay na nga nagaalagad sa iban nga pungsod. Ano ang nagpalig-on sa ila nga magsaylo sa iban nga pungsod? Ano ang natun-an nila bangod sang ila pag-alagad didto? Kamusta na ang ila kabuhi subong? Gin-interbyu namon ang pila sa ila. Kon isa ikaw ka dalaga kag gusto mo mangin malipayon sa imo pag-alagad, makabulig sa imo ang ila mga komento. Ang matuod, maayo gid nga binagbinagon sang tanan nga alagad sang Dios ang ila halimbawa.

PAGDULA SANG PANGDUHADUHA

Anita

Ginapamensaran mo bala kon masarangan mo gid magpayunir sa iban nga pungsod bisan wala ka bana? Si Anita, nga mga 75 anyos subong, nagduhaduha anay kon masarangan niya ini. Sa England sia nagdaku kag nagpayunir sang mag-18 anyos sia. “Gusto ko gid tudluan ang mga tawo parte kay Jehova,” siling niya, “pero wala gid ako magpensar nga makaalagad ako sa iban nga pungsod. Wala gid ako makaagi tuon sang iban nga lenguahe kag daw indi gid ako makatuon. Gani nakibot gid ako sang gin-agda ako sa Gilead School. Daw indi ako makapati nga agdahon ang kubos nga pareho ko. Pero napensaran ko, ‘Kon sa banta ni Jehova masarangan ko ini, tilawan ko na lang.’ Sobra 50 ka tuig na ang nagligad. Sugod sadto, nagaalagad ako bilang misyonera sa Japan.” Nagsiling pa si Anita: “Kon kaisa, may kakunyag nga ginasilingan ko ang mga utod nga dalaga, ‘Tilawi man ninyo ang kalipay sa pagpayunir sa iban nga pungsod!’ Nalipay ako nga madamo ang naghimo sini.”

PAGTIGAYON SING KAISOG

Madamo nga utod nga babayi nga nagaalagad sa iban nga pungsod ang nag-alang-alang sang primero sa pagsaylo. Paano nila natigayon ang kaisog?

Maureen

“Halin sang bata pa ako, gusto ko gid ang kabuhi nga may direksion kag magbulig sa iban,” siling ni Maureen, nga mga 65 anyos subong. Sang mag-20 anyos sia, nagsaylo sia sa Quebec, Canada, diin kinahanglan ang dugang nga payunir. “Sang ulihi, gin-agda ako sa Gilead School, pero nakulbaan ako magkadto sa lugar nga indi pamilyar sa akon kag indi ko kaupod ang akon mga abyan.” Nagsiling pa sia: “Nabalaka man ako nga indi mabuligan ang akon iloy sa pag-atipan sa akon amay nga nagamasakit. Pila ka gab-i nga ginpangamuyo ko ini kay Jehova nga nagahibi. Sang ginsugid ko ini sa akon mga ginikanan, ginpalig-on nila ako nga batunon  ang pangagda sa akon. Nakita ko man ang pag-atipan kag pagbulig sang mga kauturan sa akon mga ginikanan. Bangod sining pag-ulikid ni Jehova, nagsalig ako nga atipanon man niya ako. Gani handa na ako sa pagsaylo!” Sugod sang 1979, sobra 30 ka tuig nga nag-alagad si Maureen bilang misyonera sa West Africa. Subong, espesyal payunir gihapon si Maureen samtang ginaatipan ang iya iloy sa Canada. Parte sa iya pag-alagad sa iban nga pungsod sa madamo nga tinuig, nagsiling sia: “Pirme ginahatag ni Jehova ang kinahanglanon ko sa tion nga kinahanglan ko ini.”

Wendy

Si Wendy, nga mga 65 anyos subong, nagpayunir sa Australia sang tin-edyer pa sia. Nadumduman pa niya: “Mahuluy-on gid ako kag nabudlayan ako mag-istorya sa mga indi ko kilala. Pero paagi sa pagpayunir, natun-an ko kon paano makig-istorya sa tanan nga sahi sang tawo, gani may kompiansa na ako. Sang ulihi, narealisar ko nga indi ko na ini problema. Paagi sa pagpayunir, natun-an ko nga magsalig kay Jehova, kag daw nanamian na ako mag-alagad sa iban nga pungsod. Ginhagad man ako sang isa ka utod nga dalaga nga misyonera anay sa Japan sing sobra 30 ka tuig nga magkadto didto para magbantala sa sulod sang tatlo ka bulan. Ang pag-alagad upod sa iya nagpalig-on pa gid sa akon nga magsaylo sa iban nga pungsod.” Sang mga 1985, nagsaylo si Wendy sa Vanuatu, isa ka pungsod nga may madamo nga isla nga mga 1,770 ka kilometro ang kalayuon sa sidlangan sang Australia.

Ara gihapon si Wendy sa Vanuatu, kag nagaalagad sia sa remote translation office. “Nalipay gid ako nga nagadamo ang mga grupo kag mga kongregasyon sa malayo nga mga lugar,” siling niya. “Indi gid malaragway ang ginabatyag ko sa ginhatag sa akon nga kahigayunan nga makabulig sa hilikuton ni Jehova sa sini nga mga isla.”

Kumiko (sa tunga)

Si Kumiko, nga mga 65 anyos subong, regular payunir anay sa Japan sang ginpanugda sang iya partner nga payunir nga magsaylo sila sa Nepal. “Sulitsulit niya ini nga ginasiling, pero pirme ako nagapangindi,” siling ni Kumiko. “Nabalaka ako kay dapat ako magtuon sing bag-o nga lenguahe kag mag-adjust sa bag-o nga lugar. Dapat man kami magsupot para sa amon galastuhon kon magsaylo kami sa iban nga pungsod. Ginpaligban ko gid ini, pero naaksidente ako sa motorsiklo kag naospital. Dayon napensaran ko: ‘Ano ayhan ang sunod nga matabo sa akon? Basi magmasakit ako sing grabe kag indi na gid ako makapayunir sa iban nga pungsod. Indi ko gid bala masarangan mag-alagad sa iban nga pungsod bisan isa lang ka tuig?’ Nangamuyo gid ako kay Jehova nga buligan ako nga magdesisyon.” Sang makagua si Kumiko sa ospital, nagkadto sia sa Nepal, kag sang ulihi nagsaylo sila sang iya partner nga payunir didto.

 Parte sa halos napulo ka tuig nga pag-alagad ni Kumiko sa Nepal, nagsiling sia: “Ang mga problema nga ginkabalak-an ko nadula pareho sang paghawa sang tubig sa Pula nga Dagat. Nalipay gid ako nga nag-alagad ako sa lugar nga mas daku ang kinahanglanon. Kon nagapanaksi ako sa isa ka pamilya sa ila balay, masami nga nagakadto man ang lima ukon anom nila ka kaingod para mamati. Nagapangayo sang tract parte sa Biblia bisan ang gagmay nga mga bata. Makalilipay gid magbantala sa sini nga lugar nga madamo sing interesado.”

PAG-ATUBANG SA MGA KABUDLAYAN

May mga kabudlayan man ang maisog nga mga utod nga gin-interbyu namon. Ano ang ila ginhimo?

Diane

“Sang primero, kabudlay gid nga malayo ako sa akon pamilya,” siling ni Diane, nga taga-Canada. Mga 60 anyos sia subong kag 20 ka tuig sia nga nangin misyonera sa Ivory Coast (Côte d’Ivoire subong). “Ginpangamuyo ko kay Jehova nga buligan niya ako nga palanggaon ang mga tawo sa lugar nga gin-asayn sa akon. Ginpaathag sa amon sang isa namon ka instruktor sa Gilead, si Utod Jack Redford, nga sa primero basi mamag-uhan kami ukon makibot pa gani sa kahimtangan sa lugar nga gin-asayn sa amon, ilabi na kon makita namon ang grabe gid nga kaimulon. Pero nagsiling sia: ‘Indi pagpaligbi ang kaimulon. Hatagi sing atension ang mga tawo, ang ila pangguyahon kag ang ila mga mata. Tan-awa ang ila reaksion samtang nagapamati sila sa mga kamatuoran sa Biblia.’ Amo sini ang ginhimo ko, kag ginpakamaayo gid ako! Samtang ginasugid ko sa mga tawo ang makapalipay nga mensahe sang Ginharian, nakita ko sa ila mga mata nga nalipay sila!” Ano pa ang nakabulig kay Diane nga maka-adjust sa iban nga pungsod? “Nangin suod ako sa mga ginatudluan ko sing Biblia kag nalipay gid ako sang nangin matutom sila nga mga alagad ni Jehova. Nangin pamilya ko na sila. Nangin mga iloy kag amay ko sila, mga utod nga lalaki kag babayi, pareho gid sa ginpromisa ni Jesus.”—Mar. 10:29, 30.

Si Anne, nga mga 45 anyos subong, nagaalagad sa isa ka pungsod sa Asia diin ginadumilian ang aton hilikuton. Nagsiling sia: “Sang nag-alagad ako sing tinuig sa lainlain nga lugar, nakaupod ko ang mga utod nga babayi nga tuhay gid sing gindak-an kag personalidad. Kon kaisa, nagresulta ini sa indi paghangpanay kag paglainay sing buot. Sang natabo ini, gintinguhaan ko nga mangin suod pa gid sa ila kag intiendihon sila bangod sang ila kultura. Ginpanikasugan ko man nga mangin mas mapinalanggaon kag mahinangpanon sa ila. Nalipay ako nga bangod sini, madamo ang nangin suod ko nga mga  abyan nga nagbulig sa akon nga makapadayon sa akon asaynment.”

Ute

Sang 1993, si Ute, nga taga-Germany kag mga 50 anyos subong, gin-asayn bilang misyonera sa Madagascar. Nagsiling sia: “Sang primero, nabudlayan gid ako sa lenguahe kag sa klima, kag nagmasakit ako sing malaria, amoeba, kag lugay. Pero madamo gid ang nagbulig sa akon. Ang mga utod nga babayi, ang ila kabataan, kag ang mga ginatudluan ko sing Biblia nagbulig sa akon nga matun-an ang lenguahe nila. Gin-atipan ako sang akon partner nga misyonera sang nagmasakit ako. Pero labaw gid ang bulig ni Jehova sa akon. Pirme ko ginpangamuyo sa iya ang akon ginakabalak-an. Kag ginhulat ko gid ang sabat sa akon mga pangamuyo, kon kaisa pila ka adlaw kag kon kaisa pila ka bulan. Nasolbar ni Jehova ang tanan nga problema.” Nakaalagad na si Ute sing 23 ka tuig sa Madagascar.

GINPAKAMAAYO GID SILA

Pareho sa iban pa nga nagaalagad kon diin mas daku ang kinahanglanon, ang mga utod nga dalaga nga nagaalagad sa iban nga pungsod pirme nagasiling nga ginpakamaayo gid sila. Ano ang pila sa sini?

Heidi

Si Heidi, nga taga-Germany kag mga 70 anyos subong, nagaalagad bilang misyonera sa Ivory Coast (Côte d’Ivoire subong) sugod sang 1968. Nagsiling sia: “Nalipay gid ako nga ang akon mga gintudluan sa Biblia ‘nagalakat sa kamatuoran.’ Ang pila sa ila mga payunir na kag mga gulang sa kongregasyon subong. Madamo sa ila ang nagatawag sa akon nga Nanay ukon Lola. Para sa isa sini nga mga gulang kag sa iya asawa kag kabataan, miembro na ako sang ila pamilya. Ginhatagan ako ni Jehova sing bata nga lalaki, umagad, kag tatlo ka apo.”—3 Juan 4.

Karen (sa tunga)

Si Karen nga taga-Canada kag mga 70 anyos subong, nag-alagad sing sobra 20 ka tuig sa West Africa. Nagsiling sia: “Bilang misyonera, natun-an ko nga mangin mas masinakripisyuhon, mapinalanggaon, kag mapinasensiahon. Bangod nakaupod ko ang madamo nga halin sa iban nga pungsod, nangin mas makatarunganon man ako. Natun-an ko nga puede himuon ang isa ka butang sa nanuhaytuhay nga paagi. Pagpakamaayo gid nga may mga abyan ako sa bilog nga kalibutan! Bisan pa nagbag-o na ang amon mga asaynment, mag-abyan kami gihapon.”

Si Margaret, nga taga-England kag manug-80 anyos subong, nag-alagad bilang misyonera sa Laos. Nagsiling sia: “Sang nag-alagad ako sa iban nga pungsod, nakita ko gid kon paano gintipon ni Jehova sa iya organisasyon ang mga tawo halin sa tanan nga pungsod kag gindak-an. Ginpabakod sini ang akon pagtuo. Ginpalig-on ako sini nga magsalig gid nga si Jehova ang nagatuytoy sa iya organisasyon kag matuman gid ang iya mga katuyuan.”

Daku gid ang nahimo sang mga utod nga dalaga nga nagaalagad sa iban nga pungsod sa pagbantala. Dapat gid sila komendahan. (Huk. 11:40) Kag madamo pa ang nagailog sa ila. (Sal. 68:11) Puede mo bala mabag-o ang imo kahimtangan para masunod ining mapisan nga mga utod nga gin-interbyu sa sini nga artikulo? Kon himuon mo ini, sigurado nga ‘matilawan mo kag makita nga si Jehova maayo.’—Sal. 34:8.