Accessibility setting

Magpili sing lenguahe

Magdiretso sa segundaryo nga menu

Magdiretso sa listahan sang kaundan

Magdiretso sa kaundan

Mga Saksi ni Jehova

Hiligaynon

ANG LALANTAWAN (TULUN-AN NGA EDISYON) ENERO 2017

“Magsalig Ka kay Jehova kag Himua ang Maayo”

“Magsalig Ka kay Jehova kag Himua ang Maayo”

“Magsalig ka kay Jehova kag himua ang maayo . . . kag magmatutom ka.”—SAL. 37:3.

AMBAHANON: 133, 63

1. Ano nga pinasahi nga mga ikasarang ang ginhatag ni Jehova sa mga tawo sang gintuga niya sila?

GINTUGA ni Jehova ang mga tawo nga may pinasahi nga mga ikasarang. Ginhatagan niya kita sing ikasarang sa paghunahuna sing maayo para masolbar ang mga problema kag makaplano para sa palaabuton. (Hulu. 2:11) Ginhatagan niya kita sing kusog para mahimo ang ginplano naton kag malab-ot ang aton mga tulumuron. (Fil. 2:13) Ginhatagan man niya kita sing konsiensia, ang pagbatyag sang husto kag sala, kag paagi sini malikawan naton ang pagpakasala kag matadlong ang aton nahimo nga sala.—Roma 2:15.

2. Ano ang gusto ni Jehova nga paggamit naton sang aton mga ikasarang?

2 Gusto ni Jehova nga gamiton naton sa maayo ang aton mga ikasarang. Ngaa? Bangod palangga niya kita, kag nahibaluan niya nga malipay kita kon gamiton naton ini nga mga regalo. Pirme kita ginapalig-on ni Jehova paagi sa iya Pulong nga gamiton sa  maayo ang aton mga ikasarang. Halimbawa, mabasa naton sa Hebreong Kasulatan: “Ang mga plano sang mapisan pat-od nga magamadinalag-on”; kag “himua ang tanan nga luyag mo himuon sa bug-os mo nga ikasarang.” (Hulu. 21:5; Man. 9:10) Mabasa naton sa Cristianong Griegong Kasulatan: “Samtang may kahigayunan kita, himuon naton ang maayo sa tanan”; kag “suno sa dulot nga nabaton sang kada isa sa inyo, gamita ninyo ini sa pag-alagad sa isa kag isa.” (Gal. 6:10; 1 Ped. 4:10) Gani gusto ni Jehova nga himuon naton ang maayo para sa aton kag sa iban.

3. Ano ang mga limitasyon naton?

3 Pero nahibaluan man ni Jehova nga may mga limitasyon kita. Indi naton madula ang pagkadihimpit, sala, kag kamatayon; indi man naton madiktahan ang iban, kay tanan kita may kahilwayan sa pagdesisyon. (1 Hari 8:46) Kag bisan pa madamo na kita sing nabal-an ukon naagihan sa kabuhi, pareho lang kita gihapon sa bata kon ipaanggid kay Jehova.—Isa. 55:9.

Kon may mga problema ka, “magsalig ka kay Jehova kag himua ang maayo”

4. Ano ang binagbinagon naton sa sini nga artikulo?

4 Sa tanan nga sitwasyon, dapat kita magsalig kay Jehova nga tuytuyan niya kita kag buligan, kag himuon niya ang indi naton mahimo. Pero himuon man naton ang aton masarangan para masolbar ang mga problema kag mabuligan ang iban. (Basaha ang Salmo 37:3.) Buot silingon, dapat kita ‘magsalig kay Jehova kag himuon naton ang maayo’; dapat kita “magmatutom.” Binagbinagon naton ang halimbawa ni Noe, ni David, kag sang iban pa matutom nga mga alagad sang Dios nga nagsalig kay Jehova kag naghimo sang ila masarangan. Nahibaluan nila ang ila indi mahimo kag ang ila mahimo kag dayon ginhimo ini.

SA MALAUT NGA KALIBUTAN

5. Ilaragway ang sitwasyon ni Noe.

5 Nagkabuhi si Noe sa kalibutan nga ‘puno sang kasingki’ kag imoralidad. (Gen. 6:4, 9-13) Nahibaluan niya nga laglagon ni Jehova sa ulihi ang malaut nga kalibutan. Pero nasubuan man si Noe bangod sang kalautan sang mga tawo. Narealisar niya nga may mga butang nga indi niya mahimo pero may ara man sia sing mahimo.

Pagpamatok sa aton pagbantala (Tan-awa ang parapo 6-9)

6, 7. (a) Ano ang indi mahimo ni Noe? (b) Ngaa pareho ang sitwasyon naton kay Noe?

6 Ang indi mahimo ni Noe: Matutom nga  ginbantala ni Noe ang mensahe ni Jehova, pero wala niya ini ginpilit sa mga malauton, kag indi man niya mapadali ang pag-abot sang Baha. Dapat magsalig si Noe nga tumanon ni Jehova ang Iya promisa nga dulaon ang kalautan kag himuon ini sang Dios sa husto nga tion.—Gen. 6:17.

7 Nagakabuhi man kita sa kalibutan nga puno sang kalautan, kag nahibaluan naton nga nagpromisa si Jehova nga laglagon niya ini. (1 Juan 2:17) Indi naton mapilit ang mga tawo nga batunon ang “maayong balita sang Ginharian.” Kag indi man naton mapadali ang pagsugod sang “dakung kapipit-an.” (Mat. 24:14, 21) Pareho kay Noe, kinahanglan naton ang mabakod nga pagtuo, kag magsalig nga malapit na dulaon sang Dios ang kalautan. (Sal. 37:10, 11) Kumbinsido kita nga laglagon ni Jehova ining malaut nga kalibutan sa gintalana niya nga tion kag indi ini maatrasar bisan sing isa ka adlaw.—Hab. 2:3.

8. Paano nagpokus si Noe sa iya mahimo? (Tan-awa ang piktyur sa umpisa sini nga artikulo.)

8 Ang mahimo ni Noe: Sa baylo nga mag-untat bangod sang indi niya mahimo, nagpokus si Noe sa iya mahimo. Bilang “manugbantala sang pagkamatarong,” matutom niya nga ginpahibalo ang ginhatag sa iya nga mensahe. (2 Ped. 2:5) Nagpabakod gid ini sang iya pagtuo. Wala labot sa pagbantala, gingamit man niya ang iya ikasarang sa pisikal kag panghunahuna sa pagtukod sang arka nga ginsugo sang Dios sa iya.—Basaha ang Hebreo 11:7.

9. Paano naton masunod ang halimbawa ni Noe?

9 Pareho kay Noe, ginapanikasugan naton nga “madamo pirme sing ginahimo sa hilikuton sang Ginuo.” (1 Cor. 15:58) Lakip sa sini ang pagtukod kag pagmentinar sang mga pasilidad para sa pagsimba, pagboluntaryo sa mga asembleya kag kombension, ukon pagtrabaho sa sanga talatapan ukon remote translation office. Labaw sa tanan, masako kita sa pagbantala, kay nakahibalo kita nga ginapabakod sini ang aton paglaum sa palaabuton. Nagsiling ang isa ka matutom nga utod nga babayi: “Kon ginasugiran mo ang iban parte sa mga pagpakamaayo sang Ginharian sang Dios, marealisar mo nga wala gid sing paglaum ang mga nagapamati sa imo kag para sa ila indi na gid madula ang ila mga problema.” Paagi sa pagbantala, nagabakod ang aton paglaum sa palaabuton kag ang aton  determinasyon nga magpadayon sa aton palumba padulong sa kabuhi.—1 Cor. 9:24.

KON MAKAHIMO KITA SANG SALA

10. Ilaragway ang sitwasyon ni David.

10 Gintawag ni Jehova si Hari David nga “isa ka tawo nga kalahamut-an sa [iya] tagipusuon.” (Binu. 13:22) Matutom si David sa bug-os niya nga kabuhi. Pero nakahimo man sia sang mabug-at nga sala sang nakighilahi sia kay Bat-seba. Gindugangan pa gid niya ini nga sala sang taguon niya ini kuntani paagi sa pagplano nga mapatay ang bana ni Bat-seba nga si Urias sa inaway. Ginpadala pa ni David kay Urias ang sulat parte sa iya instruksion nga magaresulta sa kamatayon ni Urias! (2 Sam. 11:1-21) Nabal-an sang ulihi ang mga sala ni David. (Mar. 4:22) Ano ang reaksion ni David sa sini?

Nahimo nga mga sala (Tan-awa ang parapo 11-14)

11, 12. (a) Sang nakasala si David, ano ang indi niya mahimo? (b) Kon maghinulsol kita sa aton sala, ano ang himuon ni Jehova sa aton?

11 Ang indi mahimo ni David: Indi mabalik ni David ang nagligad. Kag indi niya malikawan ang resulta sang iya mga sala. Ang matuod, batason niya ang pila sini sa bug-os niya nga kabuhi. (2 Sam. 12:10-12, 14) Gani kinahanglan niya ang pagtuo. Dapat sia magsalig nga bangod naghinulsol gid sia, patawaron sia ni Jehova kag buligan nga mabatas ang resulta sang iya ginhimo.

12 Tanan kita makahimo sang sala bangod indi kita himpit. Ang pila sini mas serioso. Mahimo nga indi na naton mabag-o ang resulta sang aton sala. Mahimo nga batason na lang naton ini. (Gal. 6:7) Pero nagasalig kita sa ginpromisa sang Dios nga kon maghinulsol kita, buligan kita ni Jehova sa tion sang kabudlayan, bisan pa kita man ang balasulon sa sini.—Basaha ang Isaias 1:18, 19; Binuhatan 3:19.

13. Paano napasag-uli ni David ang iya kaangtanan kay Jehova?

13 Ang mahimo ni David: Nagpabulig si David kay Jehova para mapasag-uli ang iya kaangtanan sa Iya. Una, ginbaton niya ang pagtadlong sa iya sang manalagna ni Jehova nga si Natan. (2 Sam. 12:13) Nangamuyo man si David kay Jehova, gintu-ad ang iya mga sala kag ginsugid ang iya handum nga kahamut-an sia liwat ni Jehova. (Sal. 51:1-17) Sa baylo nga magluya bangod sang iya mga sala, nakatuon sia sa sini. Wala na gid niya ginhimo ini nga mga sala. Pagligad sang mga tinuig, napatay sia nga matutom, kag amo ini ang yara sa handumanan ni Jehova.—Heb. 11:32-34.

14. Ano ang matun-an naton kay David?

14 Ano ang matun-an naton kay David? Kon makahimo kita sang serioso nga sala, dapat gid kita maghinulsol kag magpangabay nga patawaron ni Jehova. Dapat naton itu-ad sa iya ang aton mga sala. (1 Juan 1:9) Dapat man kita magpalapit sa mga gulang kay mabuligan nila kita. (Basaha ang Santiago 5:14-16.) Kon batunon naton ang bulig ni Jehova, mapakita naton nga nagasalig kita sa iya ginpromisa nga ayuhon niya kita kag patawaron. Dapat man kita makatuon sa aton mga sala, magpadayon sa pag-alagad kay Jehova, kag maglaum sa palaabuton.—Heb. 12:12, 13.

SA IBAN PA NGA SITWASYON

Balatian (Tan-awa ang parapo 15)

15. Ano ang matun-an naton kay Hana?

15 Mahimo may madumduman ka pa nga matutom nga mga alagad sang una nga nagsalig kay Jehova samtang nagahimo sang ila masarangan. Halimbawa, wala sing mahimo si Hana sa iya pagkabaw-as. Pero nagsalig sia nga lugpayan sia ni Jehova, gani padayon sia nga nagkadto sa tabernakulo para magsimba kag magpangamuyo parte sa iya ginabatyag. (1 Sam. 1:9-11) Indi bala maayo sia nga halimbawa sa aton? Kon may balatian kita ukon iban pa nga problema nga wala kita sing mahimo, ginatugyan naton kay Jehova  ang aton kabalaka kag nagasalig nga nagaulikid sia sa aton. (1 Ped. 5:6, 7) Kag ginahimo naton ang aton masarangan para makapanginpulos kita sa Cristiano nga mga miting kag sa iban pa nga aman sang Dios.—Heb. 10:24, 25.

Rebelde nga mga anak (Tan-awa ang parapo 16)

16. Ano ang matun-an sang mga ginikanan kay Samuel?

16 Kamusta naman ang matutom nga mga ginikanan nga may kabataan nga nag-untat sa pag-alagad? Indi mapilit sang tigulang na nga si Samuel ang iya mga anak nga magpabilin nga matutom sa matarong nga mga talaksan nga gintudlo niya sa ila. (1 Sam. 8:1-3) Dapat sia magsalig nga nahibaluan ini ni Jehova. Pero makapabilin sia nga matutom kag mapahalipay ang iya Amay sa langit, nga si Jehova. (Hulu. 27:11) Subong, amo man sini ang kahimtangan sang madamo nga Cristianong ginikanan. Nagasalig sila nga pareho sang amay sa ilustrasyon parte sa rebelde nga anak, pirme gid ginapaabot ni Jehova nga magbalik ang mga makasasala nga nagahinulsol. (Luc. 15:20) Samtang wala pa ina, ginatinguhaan sini nga mga ginikanan nga magpabilin nga matutom kay Jehova, kag nagalaum sila nga mapalig-on sang ila halimbawa ang ila mga anak nga magbalik sa iya.

Kapigaduhon (Tan-awa ang parapo 17)

17. Ngaa mapalig-on kita sang halimbawa sang imol nga balo nga babayi?

17 Hunahunaa man ang imol nga balo nga babayi sang tion ni Jesus. (Basaha ang Lucas 21:1-4.) Wala gid sia sing mahimo sa kalautan nga ginahimo sa templo. (Mat. 21:12, 13) Kag indi niya mabag-o ang iya imol nga kahimtangan. Pero kinabubut-on niya nga gin-amot ang “duha lang ka sensilyo,” nga amo ang “tanan niya nga palangabuhian.” Ginpakita sining matutom nga babayi nga nagasalig gid sia kay Jehova, kay nahibaluan niya nga kon unahon niya ang pag-alagad sa Iya, mabaton niya ang iya mga kinahanglanon. Bangod sang iya pagsalig, ginsuportahan niya ang matuod nga pagsimba sadto nga tion. Gani nagasalig man kita nga kon unahon naton ang pagpangita sa Ginharian, siguraduhon ni Jehova nga mabaton naton ang aton kinahanglanon.—Mat. 6:33.

18. Maghatag sing halimbawa sang isa ka utod subong nga may husto nga panimuot.

18 Madamo sa aton mga kauturan subong ang nagasalig man kay Jehova kag nagahimo sang ila masarangan. Binagbinaga ang utod nga si Malcolm, nga matutom tubtob sa iya kamatayon sang 2015. Sia kag ang iya asawa nag-alagad kay Jehova sa madamo nga tinuig, kag naeksperiensiahan nila ang maayo kag mabudlay nga mga kahimtangan. “Ang kabuhi kon kaisa indi mapaktan, wala sing kapat-uran, kag mabudlay pa,” siling niya. “Pero ginapakamaayo ni Jehova ang mga nagasalig sa iya.” Ano ang ginpanugda ni Malcolm? “Mangamuyo para mangin mabungahon kag aktibo sa pag-alagad kay Jehova suno sa imo masarangan. Magkonsentrar sa mga butang nga imo mahimo, sa baylo sang mga butang nga indi mo mahimo.” *

19. (a) Ngaa nagakaigo ang aton tuigan nga teksto sa 2017? (b) Paano mo iaplikar ang tuigan nga teksto sa 2017?

19 Samtang ‘nagalain pa gid’ ini nga sistema, magabudlay pa gid ang aton kahimtangan. (2 Tim. 3:1, 13) Gani importante gid nga indi kita magluya bangod sang aton mga problema. Sa baylo, dapat naton pabakuron ang aton pagsalig kay Jehova samtang ginahimo ang aton masarangan. Gani nagakaigo gid ang aton tuigan nga teksto sa 2017: “Magsalig ka kay Jehova kag himua ang maayo”!—Sal. 37:3.

Ang aton tuigan nga teksto sa 2017: “Magsalig ka kay Jehova kag himua ang maayo”—Salmo 37:3