Puede bala gamiton sang mga mag-asawa nga Cristiano bilang birth control ang IUD (intrauterine device)?

Dapat binagbinagon sang tagsa ka Cristianong mag-asawa ang mga impormasyon parte sa sini kag ang mga prinsipio sa Biblia. Dapat indi matublag ang ila konsiensia sa ila desisyon.

Ginsugo ni Jehova sanday Adan kag Eva, kag sang ulihi, si Noe kag ang iya pamilya: “Magpanganak kamo kag magdamo.” (Gen. 1:28; 9:1) Wala magsiling ang Biblia nga ini nga sugo para sa mga Cristiano. Gani depende na sa mag-asawa kon bala magamit sila sing birth control para indi magdamo ang miembro sang ila pamilya ukon kon san-o nila luyag nga magbata. Ano ang dapat nila binagbinagon?

Dapat ibase sang mga Cristiano sa mga prinsipio sa Biblia ang ila desisyon parte sa birth control. Gani wala nagapahulog sang bata ang mga Cristiano. Ang hungod nga aborsion supak sa ginasiling sang Biblia parte sa pagtahod sa kabuhi. Ang mga Cristiano wala nagabalabag nga mabun-ag ang isa ka bata. (Ex. 20:13; 21:22, 23; Sal. 139:16; Jer. 1:5) Ano ang matabo kon gamiton ang IUD?

Ginbinagbinag ini sang Mayo 15, 1979, nga The Watchtower, pahina 30-31. Ang kalabanan nga ginagamit sadto nga IUD human sa plastik kag ginasulod sa matris para punggan ang pagbusong. Ang artikulo nagasiling nga wala mahibaluan kon ano ang ginahimo sang IUD. Madamo nga espesyalista ang nagasiling nga ang IUD nagabalabag kuno para indi magtabuay ang semilya sang lalaki kag ang itlog sang babayi kag maporma ang kabuhi.

Pero may pila ka kahimtangan nga mahimo magtabuay ang semilya kag ang itlog.  Ang bag-o naporma nga kabuhi mahimo magdaku sa Fallopian tube (ectopic pregnancy) ukon mahimo magsulod ini sa matris. Kon sa matris na ini, mahimo indi ini magtapik kay may IUD kag mangin indi normal ang pagbusong. Kon mapatay ang lapsag sa matris, pareho lang ini sa pagpahulog sang bata. Ang artikulo nagsiling: “Ang sinsero nga Cristiano nga gusto maggamit sang IUD dapat magbinagbinag sing maayo sini nga punto kag ikumparar niya ini sa panudlo sang Biblia parte sa pagpabalor sa kabuhi.”—Sal. 36:9.

Pero sugod sang 1979, sang ginbalhag ini nga artikulo, madamo na sing mga pag-uswag sa siensia kag medisina.

May duha pa ka sahi sang IUD nga matigayon subong. Ang isa may saway kag lapnag nga ginagamit sa Estados Unidos sugod sang 1988. Ang isa pa may ginapagua nga hormone kag ginbaligya sugod sang 2001. Paano nagapanghikot ining duha ka sahi sang IUD?

Saway: Sa nasambit na, ginapunggan sang IUD nga indi magtabuay ang semilya kag itlog sa matris. May ginapagua nga saway ang IUD, amo nga ginapatay sang saway ang semilya, gani nangin spermicide ini. * Dugang pa, ang IUD nga may saway nagapabag-o sang kahimtangan sang matris.

Hormone: May pila ka sahi sang IUD nga may hormone nga pareho sa makita sa pills. Ini nga mga IUD nagapagua sang hormone sa matris. Daw ginakontrol sini nga mga IUD nga indi magpatubas sing itlog ang mga babayi. Kag kon wala sing itlog, indi puede nga magbusong ang isa. Magluwas sa sini, ang hormone kuno sini nga mga IUD nagapanipis sang lining sang matris. * Ginapadamol man sini ang danlakdanlak sa puerta para punggan sini ang pag-agi sang semilya halin sa kinatawo pakadto sa matris. Pila ini ka epekto sang IUD.

Sa nasambit na, ang duha ka sahi sang IUD nagapabag-o sang sulod sang matris. Pero ano abi kon nagpagua ang babayi sing itlog kag napertilisar ini? Mahimo ini magsulod sa matris pero indi ini magtapik sa lining. Kon matabo ini, mahulugan dayon ang babayi. Pero, nagapati ang mga sientipiko nga talagsa lang ini nagakatabo, kag mahimo man ini matabo bisan sa mga nagagamit sang pills.

Gani indi gid masigurado nga indi magbusong ang isa kon maggamit sang IUD nga may saway ukon may hormone. Pero ginapakita sang pag-research sang mga sientipiko nga bangod sang pagpanghikot sang IUD pareho sang nasambit na, talagsa lang nagabusong ang babayi nga nagagamit sini.

Ang Cristianong mag-asawa nga gusto maggamit sang IUD dapat magbinagbinag sini upod sa ila doktor kag hibaluon nila kon ano ang mga benepisyo kag mga risgo sini. Kon parte sa paggamit sini, indi dapat iban ukon bisan gani ang doktor, ang magadesisyon para sa mag-asawa. (Roma 14:12; Gal. 6:4, 5) Dapat sila lang ang magadesisyon. Kag dapat ang ila desisyon nahamut-an sang Dios kag para makatigayon sila sang matinlo nga konsiensia.—Ipaanggid ang 1 Timoteo 1:18, 19; 2 Timoteo 1:3.

^ par. 4 Ang isa ka balasahon sa National Health Service sang England nagreport: “Ang IUD nga may saway epektibo gid sing masobra sa 99 porsiento. Buot silingon nga sa 100 ka babayi nga nagagamit sang IUD, talagsa lang nga may isa sa ila nga magabusong sa isa ka tuig. Pero samtang nagadiutay ang saway sa IUD, nagadaku ang tsansa nga magbusong.”

^ par. 5 Bangod ginapanipis sini ang lining sang matris, ang IUD nga may hormone ginareseta kon kaisa sa minyo ukon indi minyo nga mga babayi para makontrol ang ila masulog nga pamulanon.