Accessibility setting

Magpili sing lenguahe

Magdiretso sa segundaryo nga menu

Magdiretso sa listahan sang kaundan

Magdiretso sa kaundan

Mga Saksi ni Jehova

Hiligaynon

ANG LALANTAWAN (TULUN-AN NGA EDISYON) DISIEMBRE 2016

 SUGILANON SANG KABUHI

Nakigbagay Ako sa Tanan nga Sahi sang Tawo

Nakigbagay Ako sa Tanan nga Sahi sang Tawo

“Kon magpabawtismo ka, bayaan ta ka!” Amo sini ang ginpahog ni Tatay kay Nanay sang 1941. Bisan pa ginapahog, nagpabawtismo si Nanay bilang simbulo sang iya dedikasyon kay Jehova nga Dios. Gani ginbiyaan sia ni Tatay. Walo ka tuig pa lang ako sadto.

BATA pa ako sang nangin interesado ako sa kamatuoran sang Biblia. May nakuha nga mga publikasyon sang Biblia si Nanay, kag nanamian ako sa mga kaundan sini, ilabi na sa mga piktyur. Indi gusto ni Tatay nga istoryahan ako ni Nanay sang iya natun-an. Pero nangusisa ako, gani ginatun-an niya ako kon wala sa balay si Tatay. Bangod sini, namat-od man ako nga idedikar ang akon kabuhi kay Jehova. Ginbawtismuhan ako sa Blackpool, England, sang 1943 sang napulo ako ka tuig.

PAG-ALAGAD KAY JEHOVA

Sugod sadto, regular na kami ni Nanay nga nagabantala. Ginagamit namon ang mga radyo pono sa pagpahibalo sang mensahe sang Biblia. Kadaku sini kag nagabug-at sing mga lima ka kilo. Imadyina kon daw ano kabudlay ini para sa isa ka bata!

Gusto ko magpayunir sang 14 anyos ako. Nagsiling si Nanay nga mamangkot ako anay sa manugtatap sang sirkito. Nanugda ang manugtatap sang sirkito nga mangita anay ako sing obra para sakdagon ang akon  pagpayunir. Gani nangita ako sing obra. Pagkatapos sang duha ka tuig nga pag-obra, ginpamangkot ko ang isa pa ka manugtatap sang sirkito parte sa pagpayunir. Nagsiling sia, “Magpayunir ka!”

Gani sang Abril 1949, ginpanghatag namon ni Nanay ang pila ka kagamitan sa ginaarkilahan namon nga balay kag ang iban ginpamaligya. Nagsaylo dayon kami sa Middleton, malapit sa Manchester, kag nagpayunir kami didto. Pagligad sang apat ka bulan, nangin partner ko ang isa ka brother sa pagpayunir. Ginpanugda sang sanga talatapan nga masaylo kami sa bag-o nga kongregasyon sa Irlam. Nagpayunir si Nanay kag ang isa ka sister sa iban nga kongregasyon.

Bisan 17 anyos pa lang ako, ginpadumala kami sang akon partner sang mga miting kay pila lang ang kalipikado nga mga brother sa bag-o nga kongregasyon. Sang ulihi, gin-agda ako nga masaylo sa kongregasyon sa Buxton, kay bululigan ini kag pila lang ang manugbantala. Ginkabig ko ini nga mga eksperiensia nga paghanas sa akon para sa mga asaynment sa ulihi.

Nagapahibalo sang pamulongpulong publiko upod sa iban sa Rochester, New York, 1953

Sang 1951, ginpadala ko ang akon aplikasyon para sa Watchtower Bible School of Gilead. Pero sang Disiembre 1952, ginpareport ako sa militar. Nangabay ako nga indi pag-ilakip sa militar kay bug-os tion ako nga ministro, pero wala ini ginbaton sang korte kag ginpamatbatan ako sing anom ka  bulan nga pagkabilanggo. Didto ko nabaton ang akon imbitasyon para sa ika-22 nga klase sang Gilead. Gani sang Hulyo 1953, nagsakay ako sa barko nga Georgic pakadto sa New York.

Nakatambong ako sa 1953 New World Society Assembly sang pag-abot ko. Nagsakay dayon ako sa tren pakadto sa South Lansing, New York, kay didto ang eskwelahan. Wala ako sing kuarta kay halin ako sa prisuhan. Pagpanaug ko sa tren, masakay pa ako sa isa ka bus pakadto sa South Lansing. Wala na ako sing inugplete, amo nga nanghulam na lang ako sa upod ko nga pasahero.

GIN-ASAYN SA IBAN NGA PUNGSOD

Ang Gilead School naghanas sa amon sing maayo para buligan kami nga ‘makigbagay sa tanan nga sahi sang tawo’ sa misyonero nga hilikuton. (1 Cor. 9:22) Tatlo kami ang gin-asayn sa Pilipinas, si Paul Bruun, si Raymond Leach, kag ako. Pila ka bulan nga naghulat kami sang amon visa; nagsakay dayon kami sa barko nga nag-agi sa Rotterdam, Mediterranean Sea, Suez Canal, Indian Ocean, Malaysia, kag Hong Kong—47 ka adlaw sa dagat! Nakalab-ot gid man kami sa Manila sang Nobiembre 19, 1954.

Nagpanakayon kami sang akon kaupod nga misyonero nga si Raymond Leach sing 47 ka adlaw pakadto sa Pilipinas

Nagsugod dayon ang pagpasibu sa bag-o nga mga tawo, bag-o nga pungsod, kag bag-o nga lenguahe. Pero sang primero, gin-asayn kami nga tatlo sa isa ka kongregasyon sa Quezon City, nga ang madamo nga pumuluyo nagahambal sing Ingles. Gani sa sulod sang anom ka bulan, pila lang ka tinaga nga Tagalog ang nahibaluan namon. Nalubad ini nga problema sang masunod namon nga asaynment.

Sang nagpauli kami ni Utod Leach halin sa paggua sa latagon, isa ka adlaw sang Mayo 1955, may mga sulat sa amon kuarto nga nagasiling nga gin-asayn kami subong manugtatap sang sirkito. Beinte dos anyos lang ako sadto, pero ginhatagan ako sini nga asaynment sing kahigayunan nga ‘makigbagay sa tanan nga sahi sang tawo’ sa paagi nga wala ko pa maeksperiensiahan.

Nagapamulongpulong sa sirkito nga asembleya sa Bicol

Halimbawa, ang una ko nga pamulongpulong publiko bilang manugtatap sang sirkito ginhiwat sa atubangan sang tiangge. Naandan gali sa Pilipinas nga ang pamulongpulong publiko dapat hiwaton sa gua! Samtang ginaduaw ko ang mga kongregasyon sa sirkito, namulongpulong ako sa plasa, sa tiendahan, sa atubangan sang munisipyo, sa basketbolan, sa parke, kag sa masami sa kalye sang siudad. Isa ka bes sa San Pablo City, wala ako makapamulongpulong sa tiendahan kay nag-ulan, gani nagpanugyan ako sa mga kauturan nga nagapanguna nga hiwaton ini sa Kingdom Hall. Ginpamangkot ako sang ulihi sang mga kauturan kon ireport bala ini nga pamulongpulong publiko, kay wala man ini ginhiwat sa publiko nga duog!

Ang dalayunan pirme sa balay sang mga kauturan. Matinlo ang ila puluy-an bisan ordinaryo lang. Nagahigda ako sa banig sa kahoy nga salog. Wala sing tabon ang mga palaliguan, gani natun-an ko nga maligo sa sini nga kahimtangan. Nagasakay ako sa dyip kag bus, kag kon kaisa sa sakayan kon magkadto sa iban nga isla. Wala gid ako makabakal sang salakyan.

Ang nakabulig sa akon nga matun-an ang Tagalog amo ang paggua sa latagon kag pagduaw sa mga kongregasyon. Wala ko ini gin-eskwelahan, pero natun-an ko ini paagi sa pagpamati sa mga kauturan samtang nagaalagad sa latagon kag sa mga miting. Ginatudluan ako sang mga kauturan, kag nalipay gid ako sang ila pasensia kag sinsero nga mga panugda.

Pagligad sang tion, nagpasibu pa gid ako bangod sang bag-o nga mga asaynment.  Sang 1956, sang nagduaw si Utod Nathan Knorr, gin-asayn ako sa pagkontak sa media para sa kombension. Wala ako sing eksperiensia sa sini, pero ginbuligan ako sang iban. Wala pa isa ka tuig ang nagligad, isa pa ka kombension ang ginhiwat kag si Utod Frederick Franz ang nagduaw halin sa ulong talatapan. Samtang nagaalagad subong manugtatap sang kombension, may natun-an ako kay Utod Franz parte sa pagpakigbagay. Nalipay ang mga kauturan sang makita nila si Utod Franz nga naga-barong samtang nagahatag sia sang pamulongpulong publiko.

Kinahanglan ko pa gid magpasibu sang gin-asayn ako nga manugtatap sang distrito. Sadto nga tion, ginpasalida namon sa publiko nga mga duog ang pelikula nga The Happiness of the New World Society. Kon kaisa, kadamo sang sapatsapat. Nagaamag sila kag nagapilit sa suga sang projector. Mabudlay gid ini tinluan pagkatapos magpasalida! Indi mahapos ang mag-organisar sini, pero makalilipay makita ang maayo sini nga epekto sa mga tawo kay nahibaluan nila ang hilikuton sang organisasyon ni Jehova sa bilog nga kalibutan.

Ang mga pari nagasugyot sa pila ka opisyal sang gobierno nga indi kami paghatagan sing mga permit para sa asembleya. Ukon ginatinguhaan nila nga indi mabatian ang amon programa paagi sa pagbagting sang mga lingganay kon may ginahiwat nga  mga pamulongpulong malapit sa ila simbahan. Pero nag-uswag gihapon ang hilikuton, kag madamo ang nangin sumilimba ni Jehova sa amo nga mga lugar.

MGA ASAYNMENT NGA DAPAT MAGPASIBU PA GID

Sang 1959, nakabaton ako sang sulat nga gin-asayn ako sa sanga talatapan. Madamo pa gid ako sing natun-an. Sang ulihi, gin-asayn ako nga magduaw sa iban nga pungsod nga gintawag anay zone visit. Sa isa ka pagduaw, nakilala ko si Janet Dumond, isa ka misyonera sa Thailand. Nagsulatay kami kag sang ulihi nagpakasal. Nalipay kami nga mag-alagad bilang mag-asawa sa sulod na sang 51 ka tuig.

Upod kay Janet sa isa sang madamo nga isla sang Pilipinas

Nalipay ako sa pagduaw sa katawhan ni Jehova sa 33 na ka pungsod. Nagapasalamat ako kay nakabulig sa akon ang akon mga asaynment sadto nga maatubang ang pila ka hangkat sa pagpakig-angot sa nanuhaytuhay nga mga tawo! Nabuligan ako sini nga mga pagduaw nga mahangpan sing maayo nga palangga ni Jehova ang tanan nga sahi sang tawo.—Binu. 10:34, 35.

Ginapanikasugan gid namon nga mangin regular sa ministeryo

NAGAPASIBU GIHAPON

Nalipay gid ako nga mag-alagad upod sa mga kauturan sa Pilipinas! Mga napulo ka pilo ang kadamuon sang mga manugbantala subong kon ikumparar sang pag-abot ko diri. Diri gihapon kami ni Janet sa sanga talatapan sa Pilipinas sa Quezon City. Bisan pa nga masobra na ako 60 ka tuig nga nagaalagad sa sini nga pungsod, handa gihapon ako nga magpasibu sa luyag ni Jehova. Ang mga pagbag-o sining karon lang sa organisasyon nagakinahanglan nga dapat pirme kita magpasibu sa aton pag-alagad sa Dios kag sa aton mga kauturan.

Nalipay gid kami sa padayon nga pagdamo sang mga Saksi

Ginatinguhaan namon nga sundon ang panuytoy ni Jehova, kag makalilipay gid ini nga pagkabuhi. Gintinguhaan man namon nga magpasibu kon kinahanglanon kag alagaron ang mga kauturan. Huo, kon kabubut-on ni Jehova, determinado kami nga ‘makigbagay sa tanan nga sahi sang tawo.’

Diri gihapon kami sa sanga talatapan sa Quezon City