Accessibility setting

Magpili sing lenguahe

Magdiretso sa segundaryo nga menu

Magdiretso sa listahan sang kaundan

Magdiretso sa kaundan

Mga Saksi ni Jehova

Hiligaynon

ANG LALANTAWAN (TULUN-AN NGA EDISYON) DISIEMBRE 2016

Madumduman Mo Bala?

Madumduman Mo Bala?

Nabasa mo na bala sing maayo ang ulihi nga mga gua sang Ang Lalantawan? Kon amo, tilawi kon masabat mo ang masunod nga mga pamangkot:

Ano nga sahi sang sala ang ginpatuhuyan ni Jesus sa laygay nga makita sa Mateo 18:15-17?

Ang ginapatuhuyan niya amo ang mga sala nga mahimo mahusay sang mga may labot lang sa sini. Pero ang sala serioso man nga mahimo ma-disfellowship ang isa kon indi mahusay. Halimbawa, ang sala mahimo amo ang pagpasipala, ukon pagpanunto.—w16.05, p. 7.

Ano ang himuon mo para mangin mapuslanon pa gid ang imo pagbasa sing Biblia?

Himua ang masunod: Magbasa nga may bukas nga hunahuna, nga nagapangita sang mga leksion nga puede mo iaplikar; pamangkuta ang imo kaugalingon sing, ‘Paano ko ini magamit sa pagbulig sa iban?’; kag mag-research paagi sa mga gamit sa pagtuon parte sa imo bag-o lang nabasa.—w16.05, p. 24-26.

Sala bala para sa isa ka Cristiano nga magpangasubo bisan nagapati sia sa pagkabanhaw?

Indi madula sang pagtuo sa pagkabanhaw ang kasubo nga nabatyagan sang isa ka Cristiano. Naglalaw si Abraham pagkapatay ni Sara. (Gen. 23:2) Sa pagligad sang tion, magahaganhagan ang kasubo.—wp16.3, p. 4.

Sin-o ang ginasimbulo sang lalaki nga may suludlan sang tinta nga ginagamit sang sekretaryo, nga ginsambit sa Ezequiel kapitulo 9, kag sang anom ka lalaki nga may inuglampos?

Nahangpan naton nga nagarepresentar sila sa mga kasuldadusan sa langit nga gingamit sa paglaglag sa Jerusalem kag pagagamiton sa paglaglag nga matabo sa Armageddon. Sa modernong katumanan, ang lalaki nga may suludlan sang tinta nagapatuhoy kay Jesucristo, nga nagatanda sa mga pagaluwason.—w16.06, p. 16-17.

Ano nga mga katalagman ang nalampuwasan sang Biblia?

Nakalampuwas ini sa (1) nagakadunot nga sululatan, pareho sang papiro kag pergamino; (2) pagpamatok sang mga lider sang pulitika kag relihion nga nagtinguha nga dulaon ini; kag (3) mga nagtinguha nga islan ang mensahe sini.—wp16.4, p. 4-7.

Ano ang pila ka paagi nga mahimo mapasimple sang isa ka Cristiano ang iya kabuhi?

Ilista ang imo mga kinahanglanon, kag indi maggasto sa mga butang nga indi mo kinahanglanon. Maghimo sing badyet. Ibaligya, ipanghatag, ukon ihaboy ang mga butang nga wala na ginagamit, kag bayari ang imo utang. Buhini ang imo tion sa trabaho, kag magplano kon paano mo madugangan ang imo tion sa pag-alagad.—w16.07, p. 10.

Ano ang ginasiling sang Biblia nga mas maayo sangsa bulawan ukon pilak?

Ginapakita sang Job 28:12, 15 nga ang kaalam halin sa Dios mas maayo sangsa bulawan ukon pilak. Samtang ginatinguhaan mo ini, panikasugi nga mangin mapainubuson kag mangin mabakod ang imo pagtuo.—w16.08, p. 18-19.

Nagakaigo bala nga may bigote ang utod?

Sa pila ka kultura, ang nakortehan sing maayo nga bigote mahimo talahuron, kag mahimo indi ini makapugong sa mga tawo sa pagpamati sang mensahe sang Ginharian. Pero ginpakamaayo sang pila ka utod nga indi magbigote. (1 Cor. 8:9) Sa iban nga kultura kag lugar, ginakabig ang bigote nga indi nagakaigo sa Cristiano nga mga ministro.—w16.09, p. 21.

Ngaa makasalig kita sa rekord sang Biblia parte sa pagpakig-away ni David kay Goliat?

Mas mataas si Goliat sing anom lang ka pulgada sangsa pinakamataas nga tawo nga narekord sa aton panahon. Si David matuod nga tawo kay ginpamatud-an ini sang ginsiling ni Jesus kag sang dumaan nga tinigib nga nagasambit sang panimalay ni David. Ang ginrekord nga mga detalye sang lugar nagasibu sa mga katunayan.—wp16.5, p. 13.

Ano ang kinatuhayan sang ihibalo, paghangop, kag kaalam?

Ang tawo nga may ihibalo nakabaton sing impormasyon. Makita sang isa nga may paghangop kon ano ang kaangtanan sang isa ka impormasyon sa isa pa. Pero magamit sang tawo nga may kaalam ang ihibalo kag paghangop sa praktikal nga paagi.—w16.10, p. 18.