Magdiretso sa kaundan

Magdiretso sa segundaryo nga menu

Magdiretso sa listahan sang kaundan

Mga Saksi ni Jehova

Hiligaynon

Ang Lalantawan—Tulun-an nga Edisyon  |  Disiembre 2016

Ang Kalulo—Pagpakita sing Kaalam

Ang Kalulo—Pagpakita sing Kaalam

Nagpanagbalay si Toñi, nga isa ka propesyonal nga caregiver, kag ginbuksan sia sang babayi nga mga 50 anyos. Ginbuyayaw si Toñi sang babayi kay wala sia mag-abot sing temprano para atipanon ang tigulang nga nanay sang babayi. Wala naulihi si Toñi. Pero kalmado sia nga nangayo sing pasensia sa babayi.

SANG masunod nga pagkadto ni Toñi, gin-akigan sia liwat sang babayi. Ano ang reaksion ni Toñi? “Kabudlay gid sadto,” baton niya. “Wala sing rason nga mangakig sia.” Pero nangayo liwat sing pasensia si Toñi kag ginsilingan niya ang babayi nga nahangpan niya ang ginabatyag sini.

Kon ikaw si Toñi, ano ayhan ang imo reaksion? Mangin malulo ka bala? Nabudlayan ka bala nga punggan ang imo kaugalingon? Mabudlay gid matuod nga indi maakig sa sitwasyon nga bag-o lang ginsambit. Kon ginabudlayan kita ukon ginapaakig, kabudlay gid nga magpabilin nga malulo.

Pero ginapalig-on sang Biblia ang mga Cristiano nga mangin malulo. Gin-angot pa gani sang Pulong sang Dios ini nga kinaiya sa kaalam. “Sin-o ang maalam kag may paghangop sa inyo?” pamangkot ni Santiago. “Ipakita niya paagi sa iya maayo nga paggawi ang iya mga buhat nga may kalulo nga nagahalin sa kaalam.” (Sant. 3:13) Paano nga ang kalulo pamatuod sang kaalam halin sa langit? Kag ano ang makabulig sa aton nga mapalambo ining diosnon nga kinaiya?

 ANG KAALAM SA PAGPAKITA SANG KALULO

Ang kalulo makadula sang kaakig. “Ang malulo nga sabat nagapatahaw sang kaakig, apang ang matigdas nga pulong nagapaibwal sang kaakig.”Hulu. 15:1.

Ang pagsabat sing matigdas magapalala pa gid sa problema kay ginadabukan pa gid sini ang sitwasyon. (Hulu. 26:21) Pero ang pagsabat sing malulo makapatawhay sang kahimtangan. Mahimo pa gani nga magkalma ang nagapangakig.

Amo gid sini ang natabo kay Toñi. Bangod sang malulo niya nga sabat, naghibi ang babayi. Ginpaathag sang babayi nga madamo sia sing problema sa personal kag sa iya pamilya. Ginpanaksihan sia ni Toñi, kag nasugdan ang pagtuon sa Biblia—resulta ini sang kalmado kag mahidaiton nga panimuot.

Ang kalulo makapahalipay sa aton. “Malipayon ang mga malulo, kay magapanubli sila sang duta.”Mat. 5:5.

Ngaa malipayon ang mga malulo? Bangod malulo sila, madamo sadto nga maakigon ang nangin malipayon na. Nangin maayo ang ila pagkabuhi, kag nakahibalo sila nga may malipayon sila nga palaabuton. (Col. 3:12) Si Adolfo, nga isa ka manugtatap sang sirkito sa Espanya, naghinumdom sang iya kabuhi antes niya nahibaluan ang kamatuoran.

“Wala pulos ang akon kabuhi,” siling ni Adolfo. “Kasingki sa akon, amo kon ngaa bisan ang pila ko ka abyan nahadlok sa akon. Sang ulihi nakamarasmas ako. Sa isa ka inaway, ginbuno ako sing anom ka beses kag diutayan lang ako mapatay.”

Pero subong, ginatudluan na ni Adolfo ang iban nga mangin malulo kag ginapakita niya ini mismo nga kinaiya. Madamo ang nanamian sa iya pagkamainabyanon. Nagsiling si Adolfo nga nalipay sia sa iya mga pagbag-o. Kag nagapasalamat sia kay Jehova kay ginbuligan niya sia nga mangin malulo.

Ang pagpakita sing kalulo nagapahalipay kay Jehova. “Magmaalam ka, anak ko, kag pasadyaha ang akon tagipusuon, agod masabat ko sia nga nagayaguta sa akon.”Hulu. 27:11.

Ginayaguta si Jehova sang iya panguna nga kaaway, ang Yawa. May rason ang Dios nga mangakig sa sining hungod nga pag-insulto sa iya pero ginalaragway sang Biblia nga si Jehova “indi dali maakig.” (Ex. 34:6) Kon tinguhaan naton nga ilugon ang Dios nga indi dali maakig kag malulo, ginapakita naton ang kaalam nga nagapahamuot gid kay Jehova.—Efe. 5:1.

Ang kalibutan subong magamo. Mahimo mapakig-angutan naton ang mga tawo nga “bugalon, matinaastaason, manugpasipala, . . . mabinutangbutangon, wala sing pagpugong sa kaugalingon, mabangis.” (2 Tim. 3:2, 3) Pero indi ini dapat magpugong sa isa ka Cristiano nga ipakita ang kalulo. Ginapahanumdom kita sang Pulong sang Dios nga “ang kaalam nga halin sa langit . . . mahidaiton, makatarunganon.” (Sant. 3:17) Kon mahidaiton kita kag makatarunganon, ginapakita naton nga may diosnon kita nga kaalam. Ini nga kaalam magapahulag sa aton nga mangin malulo kon ginapaakig kag magapasuod pa gid ini sa aton sa Tuburan sang wala tupong nga kaalam, si Jehova.