Accessibility setting

Magpili sing lenguahe

Magdiretso sa segundaryo nga menu

Magdiretso sa listahan sang kaundan

Magdiretso sa kaundan

Mga Saksi ni Jehova

Hiligaynon

ANG LALANTAWAN (TULUN-AN NGA EDISYON) HULYO 2016

Pangitaa ang Ginharian, Indi ang Materyal nga mga Butang

Pangitaa ang Ginharian, Indi ang Materyal nga mga Butang

“Padayon nga pangitaa ang [Ginharian sang Dios], kag ini nga mga butang idugang sa inyo.”—LUC. 12:31.

AMBAHANON: 40, 98

1. Ano ang kinatuhayan sang aton kinahanglanon sa aton lang gusto?

DIUTAY lang ang kinahanglanon sang tawo, pero kadamo gid sang iya gusto. Daw indi maathag sa madamo ang kinatuhayan sang materyal nga kinahanglanon sa gusto lang. Ano ang kinatuhayan nila? “Kinahanglan” mo ang isa ka butang kon nagadepende sa sini ang imo kabuhi. Kinahanglan gid naton ang pagkaon, bayo, kag ilistaran. “Gusto” mo ang isa ka butang, pero indi ini importante para mabuhi.

2. Ano ang pila ka butang nga gusto sang mga tawo?

2 Nanuhaytuhay ang gusto sang mga tawo, depende sa ila lugar. Sa imol nga mga pungsod, gusto sang madamo nga makabakal sang cell phone, motorsiklo, ukon gamay nga lote. Sa manggaranon nga mga pungsod, gusto sang mga tawo ang madamo kag malahalon nga mga bayo, mas daku nga balay, ukon mas mahal nga salakyan. Bisan diin man kita nagaistar, dapat gid kita mag-andam nga masiod sang materyalismo ukon maghandum sang mas madamo nga butang, kinahanglan man naton ini ukon indi, kag masarangan man naton ini baklon ukon indi.

 MAG-ANDAM NGA MASIOD SANG MATERYALISMO

3. Ano ang materyalismo?

3 Ano ang materyalismo? Amo ini ang pagbatyag nga mas importante ang materyal nga butang sangsa espirituwal nga manggad. Resulta ini sang handum, prioridad, kag tulumuron sang isa sa kabuhi. Gusto niya ang madamo gid nga materyal nga butang. Puede mangin materyalistiko bisan ang indi manggaranon ukon ang indi palabakal sang malahalon nga mga butang kay mahimo nga indi na nila unahon ang pagpangita sa Ginharian.—Heb. 13:5.

4. Paano ginagamit ni Satanas “ang kailigbon sang mga mata”?

4 Ginagamit ni Satanas ang iya kalibutan para magpati kita nga kinahanglan naton ang mas madamo nga materyal nga butang para mangin malipayon. Ginagamit niya “ang kailigbon sang mga mata.” (1 Juan 2:15-17; Gen. 3:6; Hulu. 27:20) Ginatanyag sang kalibutan ang tanan nga klase sang materyal nga butang, mapuslanon kag indi, pero daw kanami gid. May butang bala nga indi mo man kinahanglan pero ginbakal mo kay nakita mo ini nga ginpasayod ukon nadispley sa balaligyaan? Narealisar mo bala sang ulihi nga puede ka man mabuhi bisan wala ini? Ining indi importante nga mga butang nagapabudlay lang sang aton kabuhi kag nagadugang sa aton kabalaka. Makasiod ini sa aton gani wala na kita sing tion para sa pagtuon sa Biblia, paghanda kag pagtambong sa mga miting, kag regular nga pagpakigbahin sa ministeryo. Dumduma ang paandam ni apostol Juan: “Ang kalibutan nagataliwan kag amo man ang kailigbon sini.”

5. Ano ang matabo sa mga nagaubos sang ila kusog sa pagtipon sang mas madamo nga butang?

5 Gusto ni Satanas nga magpaulipon kita sa Manggad sa baylo nga kay Jehova. (Mat. 6:24) Ang mga nagaubos sang ila kusog sa pagtipon sang materyal nga mga butang magabatyag sa ulihi nga wala pulos ang ila kabuhi bangod ginpagustuhan lang nila ang ila kaugalingon. Mas malain pa, madula nila ang maayo nga kaangtanan sa Dios kag masubuan gid sila kag mapaslawan. (1 Tim. 6:9, 10; Bug. 3:17) Pareho ini sa ginlaragway ni Jesus sa iya ilustrasyon parte sa manugsab-ug. Sang ang mensahe sang Ginharian “nagtupa sa tunga sang tunukon nga mga tanom . . . , ang iban pa nga handum nagsulod sa ila tagipusuon kag naglumos sang pulong, gani nangin indi mabungahon ini.”—Mar. 4:14, 18, 19.

6. Ano ang matun-an naton sa natabo kay Baruc?

6 Binagbinaga ang natabo kay Baruc nga sekretaryo ni manalagna Jeremias. Malapit na sadto laglagon ang Jerusalem suno sa tagna, pero si Baruc ‘nagpangita pa sing dalagku nga mga butang’ para sa iya kaugalingon, nga wala man sing dayon nga kaayuhan. Ang dapat niya kuntani nga lauman amo ang ginpromisa ni Jehova sa iya: “Makapalagyo ka nga buhi.” (Jer. 45:1-5; footnote) Indi gid pagtipigan sang Dios ang materyal nga mga butang sa siudad nga malapit na laglagon. (Jer. 20:5) Samtang nagapalapit na ang katapusan sini nga sistema, indi tion subong nga magtipon sang mas madamo nga materyal nga butang para sa aton kaugalingon. Indi kita magpaabot nga pagkatapos sang dakung kapipit-an, ara gihapon ang mga butang nga ginapanag-iyahan naton subong, bisan pa malahalon gid ini sa aton.—Hulu. 11:4, footnote; Mat. 24:21, 22; Luc. 12:15.

7. Ano ang binagbinagon naton, kag ngaa?

7 Naghatag si Jesus sang pinakamaayo nga laygay kon paano naton matigayon ang mga kinahanglanon sa kabuhi nga indi matublag, mangin materyalistiko, ukon sobra nga mabalaka. Nalakip ini sa iya Sermon sa Bukid. (Mat. 6:19-21) Basahon naton kag binagbinagon  ang Mateo 6:25-34. Magakumbinsi ini sa aton nga dapat naton ‘padayon nga pangitaon ang Ginharian,’ indi ang materyal nga mga butang.Luc. 12:31.

GINAAMAN NI JEHOVA ANG ATON MGA KINAHANGLANON

8, 9. (a) Ngaa indi kita dapat sobra nga magpalibog sa aton mga kinahanglanon? (b) Ano ang nahibaluan ni Jesus parte sa mga tawo kag sa ila mga kinahanglanon?

8 Basaha ang Mateo 6:25. Sang ginsilingan ni Jesus ang mga nagapamati sa iya nga ‘mag-untat sa pagkabalaka sa ila kabuhi,’ buot niya silingon nga indi na sila magpalibog. Nabalaka sila sa mga butang nga indi dapat kabalak-an. Nagsiling si Jesus nga untatan na nila ini bangod sa maayo nga rason. Ang sobra nga pagkabalaka ukon pagpalibog, bisan sa mga butang nga kinahanglanon, makatublag sa hunahuna sang isa amo nga malipatan na niya ang mas importante sa kabuhi, ang espirituwal nga mga butang. Nagaulikid gid si Jesus sa iya mga disipulo, gani ginpaandaman niya sila parte sa sini nga katalagman sing apat pa ka beses sa iya sermon.—Mat. 6:27, 28, 31, 34.

9 Ngaa nagsiling si Jesus nga indi kita magpalibog sa aton kaunon, ukon imnon, ukon isuksok? Indi bala nga kinahanglan gid naton ini sa kabuhi? Kinahanglan gid naton ini! Kon wala kita sing kuarta para makabakal sini, indi bala kita mabalaka? Mabalaka gid kita, kag nahibaluan ina ni Jesus. Nahibaluan niya ang mga kinahanglanon sang mga tawo kada adlaw. Nahibaluan man niya nga pagligad sang ginatos ka tuig, mangin mabudlay ang kahimtangan sang iya mga disipulo nga magakabuhi sa “katapusan nga mga adlaw” nga may “makahalanguyos nga mga tion nga mabudlay atubangon.” (2 Tim. 3:1) Nalakip sa sini ang pagkadula sang trabaho, pagmahal sang mga balaklon, kakulang sa pagkaon, kag kaimulon nga naeksperiensiahan sang madamo. Pero, nahibaluan man ni Jesus nga “ang kabuhi sang tawo labi pa sangsa pagkaon kag sa bayo.”

10. Sang gintudluan ni Jesus ang iya mga sumulunod kon paano mangamuyo, ano ang ginsiling niya nga mas importante sa ila kabuhi?

10 Sa una nga bahin sang sermon ni Jesus, gintudluan niya ang mga nagapamati sa iya nga ipangamuyo sa ila Amay sa langit ang ila pisikal nga mga kinahanglanon. Puede sila magpangamuyo: “Hatagi kami sang amon pagkaon para sa sini nga adlaw.” (Mat. 6:11) Sang ulihi, ginsilingan niya sila nga magpangamuyo: “Hatagi kami sang pagkaon sa tagsa ka adlaw suno sa kinahanglan namon.” (Luc. 11:3) Pero wala ini nagakahulugan nga pirme na naton hunahunaon ang aton materyal nga mga kinahanglanon. Ginsambit man ni Jesus sa sini nga modelo nga pangamuyo nga mas importante ang pagpangamuyo nga mag-abot ang Ginharian sang Dios. (Mat. 6:10; Luc 11:2) Para buligan nga indi mabalaka ang mga nagapamati sa iya, ginpahanumdom niya sila dayon nga si Jehova isa gid ka gamhanan nga Manug-aman.

11, 12. Ano ang matun-an naton sa pag-atipan ni Jehova sa mga pispis? (Tan-awa ang piktyur sa umpisa sini nga artikulo.)

11 Basaha ang Mateo 6:26. Dapat naton ‘tan-awon ang nagalupad nga mga pispis.’ Gagmay ini nga mga pispis, pero nagakaon ini sang madamo nga prutas, liso, insekto, ukon ulod. Kon pareho kadaku sa tawo ang pispis, mas madamo ang ginakaon sini sangsa tawo. Pero wala ini nagatanom sang binhi para may makaon. Ginaaman ni Jehova ang tanan sini nga kinahanglanon. (Sal. 147:9) Matuod, wala niya ini ginahungitan sing pagkaon. Ini mismo ang nagapangita sang pagkaon, kag madamo ang makita sini.

12 Sigurado si Jesus nga kon ginaaman sang iya Amay ang pagkaon sang mga pispis, iaman man niya ang kinahanglanon sang mga tawo. [1] (1 Ped. 5:6, 7) Indi niya kita  paghungiton, pero mahimo niya pakamaayuhon ang aton pagpanikasog sa pagtanom sang aton pagakaunon ukon sa pagpangita sang kuarta para mabakal ang aton kinahanglanon kada adlaw. Kon makulangan kita sini, mahimo niya pahulagon ang iban nga hatagan kita. Bisan pa wala ginsambit ni Jesus ang parte sa pugad sang mga pispis, ginhatagan sila ni Jehova sing duna nga kaalam, ikasarang, kag materyales para makahimo sang mga pugad. Mabuligan man kita ni Jehova nga makapangita sang nagakaigo nga ilistaran para sa aton pamilya.

13. Ano ang pamatuod nga mas importante pa kita sangsa mga pispis?

13 Ginpamangkot ni Jesus ang mga nagapamati sa iya: “Indi bala mas importante pa kamo sangsa [mga pispis]?” Ginahunahuna sadto ni Jesus ang paghatag niya sang iya kabuhi para sa mga tawo. (Ipaanggid ang Lucas 12:6, 7.) Ang halad-gawad sang Cristo wala gin-aman para sa iban nga tinuga. Napatay si Jesus, indi para sa mga pispis, kundi para sa aton agod mabuhi kita sing wala katapusan.—Mat. 20:28.

14. Ano ang indi gid mahimo sang nagakabalaka nga tawo?

14 Basaha ang Mateo 6:27. Ngaa nagsiling si Jesus nga ang nagakabalaka nga tawo indi makadugang sa iya kabuhi sing bisan isa lang ka maniko? Bangod ang sobra nga pagpalibog sa aton mga kinahanglanon kada adlaw indi makapalawig sang aton kabuhi. Sa baylo, ang sobra nga kabalaka makapalip-ot sang aton kabuhi.

15, 16. (a) Ano ang matun-an naton sa pag-atipan ni Jehova sa mga liryo sa latagon? (Tan-awa ang piktyur sa umpisa sini nga artikulo.) (b) Ano ang dapat naton ipamangkot sa aton kaugalingon, kag ngaa?

15 Basaha ang Mateo 6:28-30. Sin-o ang  indi gusto nga matahom ang iya bayo, ilabi na kon nagabantala ukon nagatambong sa mga miting kag mga asembleya? Pero dapat bala kita ‘mabalaka sa aton bayo’? Ginapatalupangod liwat ni Jesus ang binuhatan ni Jehova. Madamo kita sang matun-an sa “mga liryo sa latagon.” Mahimo nga ginahunahuna ni Jesus ang matahom nga mga bulak nga daw mga liryo pareho sang gladiolus, hyacinth, iris, kag tulip. Wala sila nagatahi sang ila bayo. Pero katahom gid sini nga mga bulak! “Bisan si Solomon sa bug-os niya nga pagkahalangdon wala makasuksok sing bayo nga kaangay sang isa sa ila”!

16 Pamensara ang ginsiling ni Jesus: “Kon ginapapanaptan sang Dios kaangay sini ang mga tanom sa latagon . . . , indi bala labi nga panaptan niya kamo, kamo nga diutay sing pagtuo?” Himuon gid niya ini! Pero daw kulang ang pagtuo sang mga disipulo ni Jesus. (Mat. 8:26; 14:31; 16:8; 17:20) Kinahanglan nila ang mas mabakod nga pagtuo kag pagsalig kay Jehova. Kamusta kita? Nagapati gid bala kita nga gusto kita atipanon ni Jehova kag masarangan niya ini?

17. Ano ang makaguba sang aton kaangtanan kay Jehova?

17 Basaha ang Mateo 6:31, 32. Indi naton pagsundon ang mga tawo sang “mga pungsod,” nga wala sing pagtuo sa isa ka mahigugmaon nga Amay sa langit nga nagaatipan sa mga nagauna sang intereses sang iya Ginharian sa ila kabuhi. Ang pagtinguha nga matigayon ang tanan nga “maukod nga ginahimud-usan sang mga pungsod” makaguba sang aton kaangtanan kay Jehova. Sa baylo sini, makasalig gid kita nga kon unahon naton sa aton kabuhi ang espirituwal nga mga butang, pakamaayuhon gid kita ni Jehova. Makabulig ang aton “diosnon nga debosyon” nga mangin kontento kita kon may ara  kita “pagkaon, kag panapton,” ukon “kinahanglanon agod mabuhi kag palasilungan.”—1 Tim. 6:6-8; footnote.

PINAKAIMPORTANTE BALA SA IMO KABUHI ANG GINHARIAN SANG DIOS?

18. Ano ang nahibaluan ni Jehova sa kada isa sa aton, kag ano ang iya himuon?

18 Basaha ang Mateo 6:33. Dapat gid pirme unahon sang mga disipulo sang Cristo ang Ginharian sa ila kabuhi. Kon himuon naton ina, nagsiling si Jesus nga “ini tanan [iban pa nga butang] idugang” sa aton. Ngaa nasiling niya ini? Nagpaathag sia sa nauna nga bersikulo: “Nahibaluan sang inyo langitnon nga Amay nga kinahanglan ninyo ini tanan.” Nahibaluan na ni Jehova ang aton mga kinahanglanon nga pagkaon, bayo, kag ilistaran, bisan antes pa naton ini mapensaran. (Fil. 4:19) Nahibaluan niya ang bayo naton nga dali na lang magdaan. Nahibaluan niya ang dapat naton kaunon kag ang balay nga kinahanglan sang aton pamilya. Siguraduhon ni Jehova nga matigayon naton ang kinahanglanon gid naton.

19. Ngaa indi kita dapat magpalibog sa mahimo matabo sa palaabuton?

19 Basaha ang Mateo 6:34. Talupangda nga nagsiling liwat si Jesus nga indi gid magkabalaka. Gusto niya nga atubangon naton ang mga problema sa tagsa ka adlaw, nga nagasalig gid nga buligan kita ni Jehova. Kon sobra nga mabalaka ang isa sa mahimo matabo sa palaabuton, basi magsalig sia sa iya kaugalingon sa baylo nga sa Dios, kag makaguba ini sang iya kaangtanan kay Jehova.—Hulu. 3:5, 6; Fil. 4:6, 7.

UNAHA ANG PAGPANGITA SA GINHARIAN, KAG ATIPANON KA NI JEHOVA

Mapasimple mo bala ang imo kabuhi para makapokus ka pa gid sa Ginharian? (Tan-awa ang parapo 20)

20. (a) Ano ang puede mo mangin tulumuron sa pag-alagad kay Jehova? (b) Paano mo mapasimple ang imo kabuhi?

20 Kanugon kon indi naton mauna ang intereses sang Ginharian bangod ginatinguhaan naton ang materyalistiko nga pagkabuhi. Ang dapat naton panikasugan amo ang espirituwal nga mga tulumuron. Halimbawa, makasaylo ka bala sa kongregasyon nga kinahanglan ang dugang pa nga mga manugbantala sang Ginharian? Makapayunir ka bala? Kon payunir ka na, nahunahuna mo bala nga mag-aplay sa School for Kingdom Evangelizers? Puede ka bala mangin part-time nga commuter sa Bethel ukon sa remote translation office? Makaboluntaryo ka bala sa Local Design/Construction kag part-time nga makabulig sa pagpatindog sang mga Kingdom Hall? Pamensara kon paano mo mapasimple ang imo kabuhi para may madamo ka nga tion kag kusog sa mga hilikuton sa Ginharian. Magpangamuyo kag binagbinaga ang kahon nga “ Kon Paano Pasimplehon ang Imo Kabuhi,” kag maghimo sing mga pagbag-o para malab-ot ang imo tulumuron.

21. Ano ang magapasuod pa gid sa imo kay Jehova?

21 Gintudluan kita ni Jesus nga pangitaon ang Ginharian, indi ang materyal nga mga butang. Kon ginahimo naton ini, indi kita dapat mabalaka sa aton materyal nga mga kinahanglanon. Magasuod pa gid kita kay Jehova kon nagasalig kita sa iya kag wala nagapasugot sa tanan nga gusto lang naton ukon nagabakal sang tanan nga butang nga ginatanyag sang kalibutan, bisan pa masarangan naton ini. Kon pasimplehon naton ang aton kabuhi subong, ‘makapanguyapot kita sing malig-on sa matuod nga kabuhi’ sa palaabuton.—1 Tim. 6:19.

^ [1] (parapo 12) Para mahangpan kon ngaa ginatugutan ni Jehova kon kaisa nga makulangan sing bastante nga pagkaon ang isa ka Cristiano, tan-awa ang “Mga Pamangkot Gikan sa mga Bumalasa” sa Septiembre 15, 2014, nga isyu sang Ang Lalantawan, p. 22.