Accessibility setting

Magpili sing lenguahe

Magdiretso sa segundaryo nga menu

Magdiretso sa listahan sang kaundan

Magdiretso sa kaundan

Mga Saksi ni Jehova

Hiligaynon

ANG LALANTAWAN (TULUN-AN NGA EDISYON) HULYO 2016

Ngaa Dapat Kita ‘Padayon nga Magbantay’?

Ngaa Dapat Kita ‘Padayon nga Magbantay’?

“Wala kamo makahibalo kon ano nga adlaw magaabot ang inyo Ginuo.”—MAT. 24:42.

AMBAHANON: 136, 129

1. Iilustrar kon ngaa dapat naton bantayan ang oras kag ang nagakatabo sa palibot naton. (Tan-awa ang piktyur sa umpisa sini nga artikulo.)

MALAPIT na magsugod ang sesyon sang kombension. Makita naton sa relo sa video nga dapat na kita magpungko para pamatian ang matahom nga musika sang orkestra sang Watchtower. Labaw sa tanan, tion na ini para ihanda ang aton hunahuna kag tagipusuon para sa mga pamulongpulong. Pero basi may pila nga nagalakatlakat pa ukon nagaistorya sa ila mga abyan, nga daw wala nakatalupangod nga nagasugod na ang programa. Wala gid sila nagabantay sa oras kag sa nagakatabo sa palibot nila kay ara na sa entablado ang tsirman, nagatokar na ang musika, kag nagapungko na ang mga tagpalamati. Ginatudlo sini sa aton nga dapat kita mangin alisto sa mas importante nga hitabo nga malapit na mag-abot, kag dapat kita mangin handa sa sini. Ano ini?

2. Ngaa ginsilingan ni Jesus ang iya mga disipulo nga ‘padayon nga magbantay’?

2 Sang ginsambit ni Jesucristo ang “hingapusan sang sistema sang mga butang,” ginpalig-on niya ang iya mga disipulo: “Magpadayon kamo sa pagbantay, magpadayon kamo nga nagamata, kay wala kamo makahibalo kon san-o ang gintalana nga tion.”  Dayon, sulitsulit nga ginsilingan sila ni Jesus: “Padayon kamo nga magbantay.” (Mat. 24:3; basaha ang Marcos 13:32-37.) Makita sa rekord ni Mateo sa sini man nga hambalanay nga ginpaandaman ni Jesus ang iya mga sumulunod nga mangin alisto: “Gani, padayon kamo nga magbantay, kay wala kamo makahibalo kon ano nga adlaw magaabot ang inyo Ginuo. . . . Maghanda man kamo, kay sa oras nga wala ninyo ginapaabot, ang Anak sang tawo magaabot.” Nagsiling sia liwat: “Gani, magpadayon kamo sa pagbantay, bangod wala kamo makahibalo sang adlaw ukon sang oras.”—Mat. 24:42-44; 25:13.

3. Ngaa ginapamatian naton ang paandam ni Jesus?

3 Bilang mga Saksi ni Jehova, ginapamatian naton ang paandam ni Jesus. Nahibaluan naton nga nagakabuhi na kita sa “tion sang katapusan” kag malapit na gid magsugod ang “dakung kapipit-an”! (Dan. 12:4; Mat. 24:21) Makita naton ang grabe nga mga inaway, nagalala nga imoralidad kag kalautan, kagumon sa relihion, kakulang sa pagkaon, balatian, kag linog sa bilog nga kalibutan. Nahibaluan naton nga lapnag na nga ginabantala sang katawhan ni Jehova ang Ginharian bisan diin. (Mat. 24:7, 11, 12, 14; Luc. 21:11) Nalangkag gid kita sa pag-abot sang Ginuo kag sa katumanan sang katuyuan sang Dios.—Mar. 13:26, 27.

MALAPIT NA GID ANG TION

4. (a) Ngaa makapati kita nga nahibaluan na ni Jesus kon san-o magaabot ang Armageddon? (b) Bisan pa wala kita makahibalo kon san-o magasugod ang dakung kapipit-an, ano ang masiguro naton?

4 Nahibaluan naton ang espesipiko nga oras sang pagsugod sang sesyon sang kombension. Pero imposible naton mahibaluan ang eksakto nga tuig, adlaw kag oras sang pagsugod sang dakung kapipit-an. Sang diri pa sa duta si Jesus, nagsiling sia: “Tuhoy sina nga adlaw kag oras, wala gid sing nakahibalo bisan pa ang mga anghel sa langit ukon ang Anak, kundi ang Amay lamang.” (Mat. 24:36) Pero gintangdo na ang Cristo sa langit nga manguna sa pagpakig-away sa kalibutan ni Satanas. (Bug. 19:11-16) Gani, makasiling kita nga nahibaluan na ni Jesus kon san-o magaabot ang Armageddon. Pero wala kita makahibalo sini. Dapat kita padayon nga magbantay asta mag-abot ang dakung kapipit-an. May napat-od na nga tion si Jehova para sa sini. Gintalana niya kon san-o gid magaabot ang katapusan. Malapit na magsugod ang dakung kapipit-an, kag “indi ini maulihi!” (Basaha ang Habacuc 2:1-3.) Ngaa sigurado kita sa sini?

5. Maghatag sing halimbawa nga nagapamatuod nga nagakatuman gid suno sa tion ang mga tagna ni Jehova.

5 Nagakatuman gid suno sa tion ang mga tagna ni Jehova! Binagbinaga ang eksakto nga tion sang pagluwas niya sa mga Israelinhon sa Egipto. Parte sa Nisan 14, 1513 B.C.E., nagsiling si Moises: “Sa katapusan sang 430 ka tuig, sa sini gid nga adlaw, ang tanan nga katawhan ni Jehova naggua sa duta sang Egipto.” (Ex. 12:40-42) Nagsugod ining “430 ka tuig” sang gintuman ni Jehova ang iya katipan kay Abraham sang 1943 B.C.E. (Gal. 3:17, 18) Sang ulihi, nagsiling si Jehova kay Abraham: “Dapat mo mahibaluan nga ang imo kaliwat mangin mga dumuluong sa duta nga indi ila kag ulipunon sila sang mga tawo didto kag paantuson sila sa sulod sang 400 ka tuig.” (Gen. 15:13; Binu. 7:6) Nagsugod ining “400 ka tuig” nga pagpaantos sang 1913 B.C.E. sang gin-uligyat ni Ismael si Isaac sang tion nga ginalutas sia, kag natapos ini sang naggua sa Egipto ang mga Israelinhon sang 1513 B.C.E. (Gen. 21:8-10; Gal. 4:22-29) Abanse sing 400 ka tuig nga gintalana ni Jehova ang eksakto nga tion sang pagluwas niya sa iya katawhan!

6. Ngaa makasiguro kita nga luwason ni Jehova ang iya katawhan?

 6 Isa si Josue sa mga ginluwas sa Egipto, kag ginpahanumdom niya ang bug-os nga Israel: “Nahibaluan gid ninyo sa bug-os ninyo nga tagipusuon kag sa bug-os ninyo nga kalag nga wala sing bisan isa sa tanan nga ginsaad sa inyo ni Jehova nga inyo Dios ang napaslawan. Natuman ini tanan sa inyo. Wala sing bisan isa sa sini ang napaslawan.” (Jos. 23:2, 14) Makasiguro kita nga ang ginsaad ni Jehova nga kaluwasan sa dakung kapipit-an indi man mapaslawan. Pero kon gusto naton maluwas kon laglagon na ini nga sistema, dapat kita padayon nga magbantay.

PADAYON NGA MAGBANTAY PARA MALUWAS

7, 8. (a) Ano ang ginahimo sang bantay sang una, kag ano ang matun-an naton sa sini? (b) Maghatag sing halimbawa sang mahimo matabo kon matulugan ang mga bantay sa ila puesto.

7 Matun-an naton nga importante ang padayon nga pagbantay kon binagbinagon naton ang mga kahimtangan sang una. Madamo sadto sang dalagku nga siudad, pareho sang Jerusalem, ang may matag-as nga mga pader. Proteksion ini para indi makasulod ang mga kaaway, kag bangod mataas ini, mabantayan ang palibot nga lugar. Adlaw kag gab-i nga nagapuesto ang mga bantay sa mga pader kag sa mga gawang. Sila ang nagapahibalo sa mga pumuluyo sang siudad kon may katalagman. (Isa. 62:6) Nagapabilin gid nga nagamata ang mga bantay kag alisto sila, kay kon indi, mahimo mapatay ang madamo nga tawo.—Ezeq. 33:6.

8 Suno sa manunulat sang kasaysayan sang mga Judiyo nga si Josephus, nasakop sang 70 C.E. sang mga soldado sang Roma ang Torre sang Antonia, nga tupad sang pader sang Jerusalem, bangod natulugan ang mga bantay sa mga gawang! Didto nag-agi ang mga Romano nga nagsulod sa templo kag ginsunog nila ini. Sa sini natapos ang pinakadaku nga kapipit-an nga naeksperiensiahan sang Jerusalem kag sang pungsod sang mga Judiyo.

9. Ano ang wala mahibaluan sang kalabanan nga tawo subong?

9 Ang “mga bantay” nga ginagamit sang kalabanan nga pungsod subong amo ang mga patrolya sa mga dulunan kag high-tech nga mga surveillance camera. Ginabantayan nila ang ila mga kaaway nga mahimo mangespiya sa ila teritoryo kag mangin katalagman sa seguridad sang pungsod. Pero makita lamang sini nga “mga bantay” ang mga katalagman nga naghalin sa mga tawo ukon sa mga gobierno sang tawo. Wala nila mahibaluan ang ginahimo sang gobierno sang Ginharian sang Dios sa langit nga ginagamhan sang Cristo, kag malapit na sini hukman ang tanan nga pungsod. (Isa. 9:6, 7, footnote; 56:10; Dan. 2:44) Pero mangin handa kita sa sina nga tion kon alisto kita kag nagabantay sa espirituwal.—Sal. 130:6.

INDI MAGPATUBLAG SA IMO PAGBANTAY

10, 11. (a) Ano ang dapat naton likawan, kag ngaa? (b) Ngaa nagapati ka nga naimpluwensiahan na sang Yawa ang mga tawo nga indi magsapak sa mga tagna sang Biblia?

10 Imadyina ang isa ka bantay nga nagamata sa bilog nga gab-i. Natuyo na gid sia kag daw matulugan na kon manugtapos na ang iya pagbantay. Sing kaanggid, samtang nagapalapit kita sa katapusan sini nga sistema sang mga butang, mas mabudlay magpabilin nga nagamata. Makatalagam gid kon indi kita padayon nga magbantay! Binagbinagon naton ang tatlo ka malain nga impluwensia nga makapatuyo sa aton amo nga indi na kita mangin handa.

11 Ginatinguhaan sang Yawa nga tuyhon ang mga tawo sa espirituwal. Antes mapatay si Jesus, tatlo ka beses sia nga  nagpaandam sa iya mga disipulo parte sa “manuggahom sini nga kalibutan.” (Juan 12:31; 14:30; 16:11) Nahibaluan ni Jesus nga tinguhaan sang Yawa nga padulmon ang hunahuna sang mga tawo para indi sila magsapak sa mga tagna sang Dios parte sa palaabuton. (Sof. 1:14) Ginahimo ini ni Satanas paagi sa butig nga relihion. Ano ang natalupangdan mo kon ginaistorya mo ang iban? Indi bala nga ‘ginbulag na sang Yawa ang mga hunahuna sang mga indi tumuluo’ parte sa katapusan sini nga sistema kag sa pamatuod nga nagagahom na ang Cristo sa Ginharian sang Dios? (2 Cor. 4:3-6) Indi bala nga pirme nagasiling ang mga tawo, “Indi ako interesado”? Indi gusto mamati sang kalabanan kon sugiran naton sila sang matabo sa sini nga kalibutan.

12. Ngaa indi kita dapat magpadaya sa Yawa?

12 Indi pagtuguti nga paluyahon ka sang panimuot sang iban. Nahibaluan mo kon ngaa dapat padayon ka nga magbantay. Nagsulat si Pablo sa iya mga kauturan: “Kamo mismo nakahibalo gid nga ang adlaw ni Jehova magaabot,” kag ginsugpon niya ini, “subong sang kawatan sa kagab-ihon.” (Basaha ang 1 Tesalonica 5:1-6.) Nagpaandam si Jesus sa aton: “Maghanda . . . kamo, bangod sa oras nga wala ninyo ginapaabot, ang Anak sang tawo magaabot.” (Luc. 12:39, 40) Sa indi madugay, papatihon ni Satanas ang mga tawo sa indi matuod nga “paghidait kag kalig-unan.” Magahunahuna sila nga maayo ang kahimtangan sang kalibutan. Kamusta kita? Indi kita makibot sa pag-abot sini nga adlaw sang paghukom kon “magpabilin kita nga nagamata kag huptan ang aton ikasarang sa paghunahuna sing maayo.” Gani dapat naton basahon ang Pulong sang Dios adlaw-adlaw kag pamalandungan ang ginasiling ni Jehova sa aton.

13. Ano ang epekto sang espiritu sang kalibutan sa mga tawo, kag paano naton malikawan ining makatalagam nga impluwensia?

13 Ang espiritu sang kalibutan makapatuyo sa espirituwal. Masako gid ang madamo sa ila pagkabuhi adlaw-adlaw amo nga wala na sila ‘nagahunahuna sang ila espirituwal nga kinahanglanon.’ (Mat. 5:3) Nawili sila sa materyal nga mga butang sa kalibutan nga nagapukaw sang ‘kailigbon sang unod kag kailigbon sang mga mata.’ (1 Juan 2:16) Bangod man sang mga kalingawan, nangin “mahigugmaon sa kinasadya” ang mga  tawo, kag nagabaskog pa gid ang mga pagsulay kada tuig. (2 Tim. 3:4) Gani ginsilingan ni Pablo ang mga Cristiano nga ‘indi sila magplano para sa mga kailigbon sang unod,’ nga makapatuyo sa espirituwal.—Roma 13:11-14.

14. Ano ang ginpaandam sa aton sa Lucas 21:34, 35?

14 Sa baylo sang espiritu sang kalibutan, gusto naton nga mag-impluwensia sa aton kabuhi ang espiritu sang Dios. Paagi sa sini, gin-athag sa aton ni Jehova ang malapit na lang matabo sa palaabuton. [1] (1 Cor. 2:12) Pero nahibaluan naton nga mahapos lang tuyhon sa espirituwal, kay mahimo ini matabo kon tugutan naton ang kinaandan nga mga butang sa kabuhi nga magtublag sa aton espirituwal nga mga hilikuton. (Basaha ang Lucas 21:34, 35.) Mahimo kita yagutaon sang iban kay padayon kita nga nagabantay, pero indi ini rason nga mag-untat kita. (2 Ped. 3:3-7) Sa baylo, dapat kita pirme makig-upod sa aton mga kauturan sa mga miting sang kongregasyon, kay ari diri ang espiritu sang Dios.

Ginapanikasugan mo bala nga mangin alisto sa espirituwal (Tan-awa ang parapo 11-16)

15. Ano ang natabo kanday Pedro, Santiago, kag Juan, kag paano nga puede man ini matabo sa aton?

15 Ang aton pagkadihimpit makapaluya sa aton determinasyon nga mangin alisto. Nahibaluan ni Jesus nga madali madala sang mga kaluyahon ang indi himpit nga mga tawo. Binagbinaga ang natabo sang gab-i antes ginpatay si Jesus. Para makapabilin nga matutom, dapat sia mangayo sing kusog sa iya Amay sa langit. Ginpangabay ni Jesus sanday Pedro, Santiago, kag Juan nga “padayon nga magbantay” samtang nagapangamuyo sia. Pero wala nila marealisar nga serioso ang sitwasyon. Sa baylo nga bantayan ang ila Agalon, gintuyo sila bangod sang kakapoy kag natulugan. Bisan pa kapoy man si Jesus, nagpabilin sia nga nagamata kag nagpangamuyo sa iya Amay. Amo man sini kuntani ang dapat himuon sang iya mga kaupod.—Mar. 14:32-41.

16. Suno sa Lucas 21:36, ano ang ginsiling ni Jesus para ‘makapadayon kita nga nagamata’?

16 Para ‘makapadayon kita nga nagamata’ sa espirituwal, kinahanglan naton ang mabaskog nga handum nga himuon ang husto. Pero indi lang amo sini ang kinahanglan. Pila ka adlaw antes sang natabo sa hardin sang Getsemane, ginsilingan ni Jesus ang iya mga disipulo nga mangamuyo sila kay Jehova. (Basaha ang Lucas 21:36.) Gani para makabantay kita sa espirituwal, dapat man kita mangin alisto sa pagpangamuyo.—1 Ped. 4:7, footnote.

PADAYON NGA MAGBANTAY

17. Paano kita mangin handa kon mag-abot ang katapusan?

17 Ginsiling ni Jesus nga ang katapusan magaabot “sa oras nga wala [naton] ginapaabot.” Gani indi kita dapat matulugan sa espirituwal ukon maghingamo sang ginatanyag ni Satanas kag sang iya kalibutan nga makahatag kuno sang kalipay kag ginahandum man naton, pero indi gali matuod. (Mat. 24:44) Paagi sa Biblia, ginsugiran kita sang Dios kag sang Cristo kon ano ang ginatigana nila sa aton sa palaabuton kag kon paano kita padayon nga magbantay. Dapat kita magpokus sa aton espirituwalidad, sa aton kaangtanan kay Jehova, kag sa Ginharian. Dapat kita magbantay sa tion kag sa mga nagakatabo para mangin handa kita kon mag-abot ang katapusan. (Bug. 22:20) Nagakahulugan ini sang aton kabuhi!

^ [1] (parapo 14) Tan-awa ang kapitulo 21 sang libro nga Nagagahom ang Ginharian sang Dios!