Accessibility setting

Magpili sing lenguahe

Magdiretso sa segundaryo nga menu

Magdiretso sa listahan sang kaundan

Magdiretso sa kaundan

Mga Saksi ni Jehova

Hiligaynon

ANG LALANTAWAN (TULUN-AN NGA EDISYON) HULYO 2016

Ipalapnag ang Maayong Balita sang Wala Tupong nga Kaayo

Ipalapnag ang Maayong Balita sang Wala Tupong nga Kaayo

“Magpanaksi . . . sing maid-id sa maayong balita tuhoy sa wala tupong nga kaayo sang Dios.”—BINU. 20:24.

AMBAHANON: 101, 84

1, 2. Paano nagpasalamat si apostol Pablo sa wala tupong nga kaayo sang Dios?

NAKASILING si apostol Pablo: “Ang iya [sang Dios] wala tupong nga kaayo sa akon indi wala sing pulos.” (Basaha ang 1 Corinto 15:9, 10.) Nahibaluan gid ni Pablo nga indi niya matigayon ang daku nga kaluoy sang Dios bangod lang sang iya pagpangabudlay, kag indi sia nagakabagay nga pakitaan sini kay ginhingabot niya anay ang mga Cristiano.

2 Antes mapatay si Pablo, nagsulat sia sa iya masigkamanugpangabudlay nga si Timoteo: “Nagapasalamat ako kay Cristo Jesus nga aton Ginuo, nga nagpabakod sa akon, bangod ginkabig niya ako nga matutom paagi sa pagtangdo sa akon sa isa ka ministeryo.” (1 Tim. 1:12-14) Ano ini nga ministeryo? Ginsiling ni Pablo sa mga gulang sa kongregasyon sa Efeso ang nalakip sa sini: “Wala ko ginakabig nga importante ang akon kabuhi, agod lamang matapos ko ang akon dalaganon kag ang ministeryo nga akon nabaton kay Ginuong Jesus, nga magpanaksi ako sing  maid-id sa maayong balita tuhoy sa wala tupong nga kaayo sang Dios.”Binu. 20:24.

3. Ano ang pinasahi nga ministeryo nga ginhatag kay Pablo? (Tan-awa ang piktyur sa umpisa sini nga artikulo.)

3 Ano ang “maayong balita” nga ginbantala ni Pablo nga nagpakita sang wala tupong nga kaayo ni Jehova? Nagsiling sia sa mga Cristiano sa Efeso: “Nabatian gid ninyo nga ginhatagan ako sing responsibilidad nga buligan kamo nga makapanginpulos sa wala tupong nga kaayo sang Dios.” (Efe. 3:1, 2) Ginsugo si Pablo nga ipalapnag ang maayong balita sa mga indi Judiyo para malakip sila sa mangin kaupod sang Cristo nga magagahom sa Mesianiko nga Ginharian. (Basaha ang Efeso 3:5-8.) Halimbawa gid sa mga Cristiano subong ang kakugi ni Pablo sa ministeryo. Ginpakita niya nga “indi wala sing pulos” ang wala tupong nga kaayo sang Dios sa iya.

NAPALIG-ON KA BALA SANG WALA TUPONG NGA KAAYO SANG DIOS?

4, 5. Ngaa ang “maayong balita sang Ginharian” amo man ang maayong balita sang “wala tupong nga kaayo sang Dios”?

4 Sa sining tion sang katapusan, ginabantala sang katawhan ni Jehova “ining maayong balita sang Ginharian . . . sa bug-os nga duta subong panaksi sa tanan nga pungsod.” (Mat. 24:14) Ini nga mensahe amo man ang “maayong balita tuhoy sa wala tupong nga kaayo sang Dios” bangod ang tanan nga pagpakamaayo nga ginalauman naton nga mabaton kon maggahom na ang Ginharian resulta sang kaayo ni Jehova paagi sa Cristo. (Efe. 1:3) Ginailog bala naton si Pablo nga nagapasalamat sa wala tupong nga kaayo ni Jehova paagi sa makugi nga pagbantala?—Basaha ang Roma 1:14-16.

5 Sa nagligad nga artikulo, natun-an naton nga madamo kita sing nabenepisyo sa wala tupong nga kaayo ni Jehova bisan pa makasasala kita. Gani responsibilidad naton nga isugid sa tanan kon paano ginapakita ni Jehova ang iya gugma kag kon paano sila makabenepisyo sa sini. Ano ang pila ka paagi nga mabuligan naton ang iban nga maapresyar ang wala tupong nga kaayo sang Dios?

IPALAPNAG ANG MAAYONG BALITA PARTE SA HALAD-GAWAD

6, 7. Ngaa mapalapnag naton ang maayong balita sang wala tupong nga kaayo sang Dios kon ginapaathag naton sa mga tawo ang gawad?

6 Balewala na sa madamo subong ang pagpakasala, amo nga indi nila mahangpan kon ngaa kinahanglan ang gawad. Pero madamo man ang nakarealisar nga indi sila malipayon sa ila paagi sang pagkabuhi. Indi nila mahangpan kon ano ang sala, ang epekto sini sa aton, kag ang dapat naton himuon para mahilway sa pagkaulipon sa sala. Mahangpan lang nila ini kon masugilanon sila sang mga Saksi ni Jehova. Nalipay ang mga sinsero sang natun-an nila nga bangod sang daku nga gugma kag wala tupong nga kaayo ni Jehova, ginpadala niya ang iya Anak sa duta para gawaron kita sa sala kag kamatayon.—1 Juan 4:9, 10.

7 Nagsulat si Pablo parte sa hinigugma nga Anak ni Jehova: “Paagi sa paggawad sa aton paagi sa iya [ni Jesus] dugo, nahilway kita, nga buot silingon, mapatawad na ang aton mga paglapas, suno sa kabuganaan sang iya [ni Jehova] wala tupong nga kaayo.” (Efe. 1:7) Ang halad-gawad sang Cristo amo ang pinakadaku nga pamatuod sang gugma sang Dios sa aton kag ginapakita sini nga bugana ang Iya wala tupong nga kaayo. Nalipay gid kita nga mahibaluan nga kon magtuo kita sa halad ni Jesus, mapatawad kita sa aton mga sala kag may matinlo na kita nga konsiensia! (Heb. 9:14) Maayong balita gid ini nga dapat isugid sa iban!

 BULIGI ANG MGA TAWO NGA MANGIN ABYAN SANG DIOS

8. Ngaa dapat makapasag-uli sa Dios ang makasasala nga mga tawo?

8 Responsibilidad naton nga isugid sa aton mga isigkatawo nga puede sila mangin abyan sang ila Manunuga. Kon wala pa nagatuo ang mga tawo sa halad ni Jesus, kaaway pa sila sang Dios. Nagsulat si apostol Juan: “Ang isa nga nagatuo sa Anak makatigayon sang kabuhi nga wala sing katapusan; ang isa nga wala nagatuman sa Anak indi makatigayon sang kabuhi, kundi ang kasingkal sang Dios magapabilin sa iya.” (Juan 3:36) Nalipay kita nga bangod sang halad sang Cristo, posible nga makapasag-uli sa Dios. Nagsiling si Pablo: “Kamo sadto nahamulag kag mga kaaway bangod ang inyo hunahuna yara sa mga buhat nga malaut. Apang karon ginapasag-uli niya kamo paagi sa undanon nga lawas sinang isa paagi sa iya kamatayon.”—Col. 1:21, 22.

9, 10. (a) Ano nga responsibilidad ang ginhatag sang Cristo sa iya hinaplas nga mga utod? (b) Paano nagabulig ang “iban nga mga karnero” sa ila hinaplas nga mga utod?

9 Suno kay Pablo, ginhatagan sang Cristo ang iya hinaplas nga mga utod sa duta sing “ministeryo sa pagpasag-uli.” Ginpaathag ini ni Pablo sa hinaplas nga mga Cristiano sang unang siglo: “Ang tanan nga butang halin sa Dios, nga nagpasag-uli sa amon sa iya kaugalingon paagi sa Cristo kag naghatag sa amon sang ministeryo sa pagpasag-uli, nga ang Dios paagi sa Cristo nagapasag-uli sang kalibutan sa iya kaugalingon, kag wala ginaisip ang ila mga paglapas, kag gintugyan niya sa aton ang mensahe sang pagpasag-uli. Gani mga embahador kami nga salili sang Cristo, nga daw subong bala nga ang Dios nagahingyo paagi sa amon. Subong mga salili sang Cristo, nagapakiluoy kami: ‘Magpasag-uli kamo sa Dios.’”—2 Cor. 5:18-20.

10 Pribilehiyo sang “iban nga mga karnero” nga magbulig sa ila hinaplas nga mga utod sa sini nga ministeryo. (Juan 10:16) Bilang mga mensahero sang Cristo, daku gid ang ila ginahimo sa pagtudlo sa mga tawo sing espirituwal nga kamatuoran kag sa pagbulig sa ila nga mangin suod kay Jehova. Importante ini nga bahin sang pagpanaksi sing maid-id sa maayong balita sang wala tupong nga kaayo sang Dios.

ISUGID ANG MAAYONG BALITA NGA NAGAPAMATI ANG DIOS SA PANGAMUYO

11, 12. Ngaa maayong balita sa mga tawo ang mahibaluan nga makapangamuyo sila kay Jehova?

11 Madamo ang nagapangamuyo para mangin maayo ang ila pamatyag, pero wala gid sila nagapati nga ginapamatian sang Dios ang ila pangamuyo. Dapat nila mahibaluan nga si Jehova ang “Manugpamati sang pangamuyo.” Nagsulat ang salmista nga si David: “O Manugpamati sang pangamuyo, ang tanan nga sahi sang tawo magapalapit sa imo. Nadaug ako sang akon mga kasaypanan, apang ginapatawad mo ang amon mga sala.”—Sal. 65:2, 3.

12 Nagsiling si Jesus sa iya mga disipulo: “Kon magpangayo kamo sang bisan ano sa akon ngalan, ihatag ko ini.” (Juan 14:14) Buot silingon sini nga makapangamuyo kita sang “bisan ano” nga nahisuno sa kabubut-on ni Jehova. Ginapasalig kita ni Juan: “May pagsalig kita sa iya, nga bisan ano ang ipangamuyo naton suno sa iya kabubut-on, magapamati sia sa aton.” (1 Juan 5:14) Maayo gid nga itudlo sa iban nga ang pangamuyo isa ka paagi nga makapalapit sa “trono sang wala tupong nga kaayo” ni Jehova kag indi lang para mangin maayo ang ila pamatyag. (Heb. 4:16) Kon itudlo naton sa ila ang husto nga paagi sang pagpangamuyo, kon kay sin-o dapat magpangamuyo, kag ang mga butang nga dapat ipangamuyo, mabuligan  naton sila nga mangin suod kay Jehova kag malugpayan sa tion sang kalisdanan.—Sal. 4:1; 145:18.

WALA TUPONG NGA KAAYO SA BAG-ONG SISTEMA

13, 14. (a) Ano ang matahom nga mga pribilehiyo nga mabaton sang mga hinaplas sa palaabuton? (b) Ano ang pagahimuon sang mga hinaplas para sa mga tawo?

13 Magapadayon ang wala tupong nga kaayo ni Jehova bisan matapos ining malaut nga sistema. Ginhatagan sang Dios sing tumalagsahon nga pribilehiyo ang 144,000 nga magagahom kaupod sang Cristo sa iya Ginharian sa langit. Nagsulat si Pablo parte sa sini: “Ang Dios, nga bugana sa kaluoy, bangod sang iya daku nga gugma sa aton, nagbuhi sa aton upod sa Cristo bisan sang patay pa kita bangod sa aton mga paglapas—paagi sa wala tupong nga kaayo naluwas kamo. Dugang pa, ginbuhi niya kita kag ginpapungko sa langitnon nga mga lugar nga nahiusa kay Cristo Jesus, agod sa magaabot nga sistema sang mga butang mapakita niya ang labaw nga kamanggaran sang iya wala tupong nga kaayo sa iya pagkamainayuhon sa aton nga nahiusa kay Cristo Jesus.”—Efe. 2:4-7.

14 Daw indi naton maimadyin ang ginatigana ni Jehova para sa hinaplas nga mga Cristiano kon maggahom na sila kaupod sang Cristo sa langit. (Luc. 22:28-30; Fil. 3:20, 21; 1 Juan 3:2) Ipakita gid ni Jehova sa ila “ang labaw nga kamanggaran sang iya wala tupong nga kaayo.” Sila ang mangin “Bag-o nga Jerusalem,” ang nobya sang Cristo. (Bug. 3:12; 17:14; 21:2, 9, 10) Mangin kaupod sila ni Jesus sa ‘pagpang-ayo sa mga pungsod’ paagi sa pagbulig sa matinumanon nga mga tawo nga mahilway sa sala kag kamatayon kag mangin himpit.—Basaha ang Bugna 22:1, 2, 17.

15, 16. Paano ipakita ni Jehova sa palaabuton ang iya wala tupong nga kaayo sa “iban nga mga karnero”?

15 Sa Efeso 2:7, mabasa naton nga ipakita sang Dios ang iya wala tupong nga kaayo “sa magaabot nga sistema sang mga butang.” Makita gid sa bag-ong sistema ni Jehova sa duta “ang labaw nga kamanggaran sang iya wala tupong nga kaayo.” (Luc. 18:29, 30) Ang isa sa labing talalupangdon nga paagi nga ipakita ni Jehova ang iya indi matupungan nga kaayo sa duta amo ang pagbanhaw sa mga tawo nga yara sa “Lulubngan.” (Job 14:13-15; Juan 5:28, 29) Ang matutom nga mga lalaki kag babayi nga napatay antes ginhalad sang Cristo ang iya kabuhi, kag ang tanan nga “iban nga mga karnero” nga napatay nga matutom sa katapusan nga mga adlaw, pagabanhawon para padayon sila nga mag-alagad kay Jehova.

16 Banhawon man ang minilyon nga napatay nga wala makakilala sa Dios. Hatagan sila sing kahigayunan nga magpasakop sa pagkasoberano ni Jehova. Nagsulat si Juan: “Nakita ko ang mga patay, ang mga kadalagkuan kag mga kubos, nga nagatindog sa atubangan sang trono, kag ginbukad ang mga linukot. Apang may isa pa ka linukot nga ginbukad; amo ini ang linukot sang kabuhi. Ang mga patay ginhukman pasad sa mga butang nga nasulat sa mga linukot suno sa ila mga buhat. Kag ginhatag sang dagat ang patay nga yara sa sini, kag ginhatag sang kamatayon kag Lulubngan ang patay nga yara sa ila, kag ginhukman ang tagsatagsa sa ila suno sa ila mga buhat.” (Bug. 20:12, 13) Dapat tun-an sini nga mga pagabanhawon kon paano sundon ang mga prinsipio sang Dios sa Biblia. Dapat man nila sundon ang bag-o nga mga instruksion nga makita sa “mga linukot” nga ipatuman ni Jehova sa mga tawo sa bag-ong sistema.  Makita man sa mga instruksion sa sini nga mga linukot ang wala tupong nga kaayo ni Jehova.

PADAYON NGA IPALAPNAG ANG MAAYONG BALITA

17. Ano ang dapat naton dumdumon kon nagabantala kita?

17 Bangod malapit na ang katapusan, labi na gid nga dapat naton ibantala ang maayong balita sang Ginharian! (Mar. 13:10) Ginahatagan gid sing importansia sang maayong balita ang wala tupong nga kaayo ni Jehova. Dapat naton ini dumdumon kon nagabantala kita. Nagabantala kita para padunggan si Jehova. Mahimo naton ini paagi sa pagsugid sa mga tawo nga ang tanan nga pagpakamaayo sa bag-ong kalibutan resulta sang indi matupungan nga kaayo ni Jehova.

Mag-alagad sing makugi bilang “maayong mga tulugyanan sang wala tupong nga kaayo sang Dios.”—1 Ped. 4:10 (Tan-awa ang parapo 17-19)

18, 19. Paano naton mahimaya ang wala tupong nga kaayo ni Jehova?

18 Kon nagapanaksi kita sa iban, mapaathag naton nga kon maggahom na ang Ginharian sang Cristo, mabaton sang mga tawo ang tanan nga benepisyo sang halad-gawad kag amat-amat sila nga mangin himpit. Ang Biblia nagasiling: “Ang mga tinuga hilwayon man sa pagkaulipon sa lawas nga nagakadunot kag mabaton nila ang mahimayaon nga kahilwayan sang mga anak sang Dios.” (Roma 8:21) Posible lamang ini bangod sang wala tupong nga kaayo ni Jehova.

19 Pribilehiyo naton nga isugid sa tanan nga magapamati ang matahom nga ginpromisa sa Bugna 21:4, 5: “Pahiran [sang Dios] ang tagsa ka luha sa ila mga mata, kag wala na sing kamatayon, ukon paglalaw ukon paghibi ukon kasakit pa. Ang mga butang sang una nagtaliwan na.” Kag si Jehova, nga nagapungko sa trono, nagsiling: “Yari karon! Ginahimo ko nga bag-o ang tanan nga butang.” Nagsiling man sia: “Isulat mo, kay ini nga mga pulong matutom kag matuod.” Kon makugi naton nga ginabantala ining maayong balita sa iban, ginahimaya gid naton ang wala tupong nga kaayo ni Jehova!