Accessibility setting

Magpili sing lenguahe

Magdiretso sa segundaryo nga menu

Magdiretso sa listahan sang kaundan

Magdiretso sa kaundan

Mga Saksi ni Jehova

Hiligaynon

ANG LALANTAWAN (TULUN-AN NGA EDISYON) HULYO 2016

Mga Pamangkot Gikan sa mga Bumalasa

Mga Pamangkot Gikan sa mga Bumalasa

Ano ang kahulugan sang pagtingob sang duha ka lipak nga ginlaragway sa Ezequiel kapitulo 37?

Ginhatagan ni Jehova si Ezequiel sing mensahe nga nagahatag sang paglaum nga mahiusa ang pungsod sang Israel sa tapos nga makabalik sila sa Ginsaad nga Duta. Gintagna man sa sini nga mensahe ang paghiusa sang katawhan sang Dios sa katapusan nga mga adlaw.

Ginsugo ni Jehova ang iya manalagna nga si Ezequiel nga sulatan ang duha ka lipak. Isulat niya sa isa ka lipak, “Para kay Juda kag para sa katawhan sang Israel nga kaupod niya,” kag sa isa naman, “Para kay Jose, ang lipak ni Efraim, kag sa bug-os nga panimalay sang Israel nga kaupod niya.” “Mangin isa na lang sila ka lipak” sa kamot ni Ezequiel.—Ezeq. 37:15-17.

Ano ang ginapatuhuyan sang “Efraim”? Ang una nga hari sang naaminhan nga napulo ka tribo nga ginharian amo si  Jeroboam, kag naghalin sia sa tribo ni Efraim, ang nagapanguna nga tribo. (Deut. 33:13, 17; 1 Hari 11:26) Naghalin ini nga tribo sa anak ni Jose nga si Efraim. (Num. 1:32, 33) Pinasahi nga ginpakamaayo si Jose sang iya amay nga si Jacob. Gani nagakaigo nga ang lipak nga nagapatuhoy sa napulo ka tribo nga ginharian tawgon nga “lipak ni Efraim.” Sang ginsulat ni Ezequiel ang tagna parte sa duha ka lipak, madugay na nga ginbihag sang mga taga-Asiria ang naaminhan nga ginharian sang Israel sang 740 B.C.E. (2 Hari 17:6) Gani ang kalabanan nga Israelinhon sadto naglapta sa Emperyo sang Babilonia, nga nagbulos sa Emperyo sang Asiria.

Sang 607 B.C.E., gindala nga bihag sa Babilonia ang nabagatnan nga duha ka tribo nga ginharian kag ayhan ang nabilin sa naaminhan nga ginharian. Ang mga hari nga mga kaliwat ni Juda ang naggahom sa sining duha ka tribo, kag sa Juda man nag-istar ang mga saserdote, kay nag-alagad sila sa templo sa Jerusalem. (2 Cron. 11:13, 14; 34:30) Gani nagakaigo nga ang duha ka tribo nga ginharian amo ang ginapatuhuyan sang lipak nga “para kay Juda.”

San-o gintingob ining duha ka malaragwayon nga lipak? Natabo ini sang nagbalik sa Jerusalem ang mga Israelinhon para patindugon liwat ang templo sang 537 B.C.E. Tingob nga nagbalik ang mga tiglawas sang duha ka tribo nga ginharian kag sang napulo ka tribo nga ginharian. Wala na nabahinbahin ang mga anak ni Israel. (Ezeq. 37:21, 22) Nahiusa liwat ang mga Israelinhon sa pagsimba kay Jehova. Gintagna ni Isaias kag ni Jeremias ini nga paghiusa.—Isa. 11:12, 13; Jer. 31:1, 6, 31.

Ano ang ginatagna sini parte sa matuod nga pagsimba? Amo ini: Himuon ni Jehova nga mangin “isa” ang iya mga sumilimba. (Ezeq. 37:18, 19) Natuman bala ining ginsaad nga paghiusa subong? Huo. Una nga natuman ini nga tagna sang 1919 sang amat-amat nga gin-organisar liwat kag nahiusa ang katawhan sang Dios. Wala nagmadinalag-on si Satanas nga gub-on sing permanente ang ila paghiusa.

Sadto nga tion, ang kalabanan sa katawhan sang Dios nagalaum nga mangin hari kag saserdote kaupod ni Jesus sa langit. (Bug. 20:6) Daw pareho sila sa malaragwayon nga lipak para kay Juda. Pero pagligad sang tion, nag-upod sa sining espirituwal nga mga Judiyo ang madamo nga may paglaum nga mabuhi sing dayon sa duta. (Zac. 8:23) Daw pareho sila sa lipak para kay Jose, kag wala sila nagalaum nga maggahom upod sa Cristo.

Nahiusa ining duha ka grupo subong sa pag-alagad kay Jehova kag ginagamhan sila sang isa ka Hari, si Jesucristo. Suno sa tagna, gintawag sia nga “David nga akon alagad.” (Ezeq. 37:24, 25) Nangamuyo si Jesus nga ang tanan niya nga sumulunod ‘mangin isa, subong nga ang iya Amay nahiusa sa iya kag sia nahiusa sa iya Amay.’ * (Juan 17:20, 21) Gintagna man ni Jesus nga ang diutay nga panong sang iya hinaplas nga mga sumulunod kag ang iya “iban nga mga karnero” “mangin isa ka panong.” Sila tanan “may isa ka manugbantay.” (Juan 10:16) Ginalaragway gid ni Jesus ang espirituwal nga paghiusa sang katawhan ni Jehova subong bisan indi pareho ang ila paglaum sa palaabuton!

^ par. 6 Talalupangdon ang pagpasunod sang mga ilustrasyon ni Jesus nga nangin bahin sang tanda sang iya presensia. Una, ginpatuhuyan niya “ang matutom kag mainandamon nga ulipon,” ang gamay nga grupo sang mga hinaplas nga magapanguna sa katawhan sang Dios. (Mat. 24:45-47) Dayon, ginsugid niya ang mga ilustrasyon nga nagapatuhoy sa tanan nga may paglaum sa langit. (Mat. 25:1-30) Sa katapusan, ginsugid niya ang parte sa mga magasuportar sa mga utod sang Cristo kag may paglaum nga mabuhi sing dayon sa duta. (Mat. 25:31-46) Sing kaanggid, sang natuman ang tagna ni Ezequiel sa katapusan nga mga adlaw, una sini nga ginpatuhuyan ang mga may paglaum sa langit. Bisan pa wala gid man nagapatuhoy ang napulo ka tribo nga ginharian sa mga may paglaum nga mabuhi sing dayon sa duta, ang paghiusa nga ginlaragway sa sini nga tagna nagapahanumdom sa aton sang ila paghiusa upod sa mga may paglaum sa langit.