Accessibility setting

Magpili sing lenguahe

Magdiretso sa segundaryo nga menu

Magdiretso sa listahan sang kaundan

Magdiretso sa kaundan

Mga Saksi ni Jehova

Hiligaynon

MAGMATA! NUM. 6 2016

 BULIG PARA SA PAMILYA | PAG-ASAWAHAY

Kon Paano Ipakita ang Pagrespeto

Kon Paano Ipakita ang Pagrespeto

NGAA ISA KA HANGKAT?

Ang bana nagasiling: “Sang nag-asawahay kami sang akon asawa, lainlain ang amon pagtamod parte sa pagpakita sing respeto. Indi man buot silingon nga sala ukon eksakto ang isa sa amon—lainlain lang. Pirme ako nagabatyag nga dapat mas respetuhon pa gid ako sang akon asawa kon nagahambal sia sa akon.”

Ang asawa nagasiling: “Nagdaku ako sa kultura nga matunog ang pag-istoryahanay, grabe ang ekspresyon sang guya, kag nagasabat dayon bisan may nagahambal pa. Para sa amon, normal lang ini. Lain gid ina sa gindak-an sang akon bana.”

Ang pagrespeto sa pag-asawahay dapat pirme ipakita, kag importante gid ini. Paano mo mapakita nga ginarespeto mo ang imo tiayon?

ANO ANG DAPAT MO MAHIBALUAN?

Gusto gid sang mga lalaki nga respetuhon sila. Ginsilingan sang Biblia ang mga bana: “Ang kada isa sa inyo dapat maghigugma sang iya asawa kaangay sang paghigugma niya sang iya kaugalingon.” Pero nagsiling man ini: “Ang asawa dapat may tudok nga pagtahod sa iya bana.” (Efeso 5:33) Kinahanglan sang asawa kag bana ang paghigugma kag pagrespeto, pero mas gusto gid sang mga bana nga respetuhon sila. “Gusto sang mga lalaki mabatyagan nga makontrol nila ang mga sitwasyon, masolbar ang mga problema, kag maatipan ang ila pamilya,” siling sang bana nga si Carlos. * Kon respetuhon sang asawa ang iya bana sa sini nga bahin, indi lang ang iya bana ang makabenepisyo kundi sia man. “Mas palangga ako sang akon bana kon ginarespeto ko sia,” siling sang asawa nga si Corrine.

Siempre, gusto man sang mga asawa nga respetuhon sila. Husto ina, kay indi gid mahigugma sang bana ang iya asawa kon wala niya ini ginarespeto. “Kinahanglan ko respetuhon ang mga opinyon kag suhestyon sang akon asawa,” siling ni Daniel. “Dapat ko man respetuhon ang iya ginabatyag. Indi buot silingon nga balewalaon ko na lang ini bangod indi ko maintiendihan kon ngaa amo sina ang iya ginabatyag.”

Lainlain ang pagtamod parte sa pagrespeto. Ang importante, indi ang imo pagpati nga ginarespeto mo ang imo tiayon, kundi kon bala nagabatyag sia nga ginarespeto mo sia. Amo ini ang natun-an sang asawa nga ginsambit kaina sa subtitulo nga, “Ngaa Isa ka Hangkat?” “Bisan pa nagapati ako nga ginarespeto ko ang akon bana, kon indi amo sina ang iya ginabatyag, dapat ako magbag-o.”

 ANO ANG MAHIMO MO?

  • Isulat ang tatlo ka kinaiya nga nanamian mo sa imo asawa ukon bana. Inang maayo nga mga batasan mahimo mangin rason sa pagpakita sing respeto.

  • Sa sulod sang isa ka semana, bantayi ang imo paggawi (indi ang iya sang imo tiayon) sa masunod nga mga bahin.

Sa imo panghambal. Ginapakita sang isa ka pagtuon parte sa mga mag-asawa nga “ang mga mag-asawa nga malipayon kag may mabakod nga relasyon may lima ka positibo nga ginahambal sa kada isa ka negatibo nga ginahambal kon ginaistoryahan nila ang problema. Sa kabaliskaran, ang mga mag-asawa nga wala pa sing isa (0.8) ka positibo nga ginahambal sa kada isa ka negatibo nga ginahambal nagaresulta sa pagdiborsio.” *Prinsipio sa Biblia: Hulubaton 12:18.

Pamangkuta ang imo kaugalingon: ‘Ginapakita ko bala ang pagrespeto kon nagapakig-istorya ako sa akon tiayon? Pirme ko bala sia ginapakanubo ukon pirme ginahatagan sing komendasyon? Ano ang tono sang akon tingog kon may ginapatalupangod ako sa iya ukon ginareklamo?’ Ugyon bala ang imo tiayon sa imo mga sabat?—Prinsipio sa Biblia: Colosas 3:13.

Tilawi ini: Himua nga tulumuron nga mahatagan sing bisan isa lang ka komendasyon kada adlaw ang imo bana ukon asawa. Panugda: Dumduma ang manami nga mga kinaiya nga imo ginsulat kaina. Pirme ihambal sa imo tiayon kon ano ang imo nanamian sa iya.—Prinsipio sa Biblia: 1 Corinto 8:1.

Sa imo mga ginahimo. Ang asawa nga si Alicia nagsiling: “Madamo ako sing ginahimo sa balay, kag kon ginarespeto sang akon bana ang akon pagpangabudlay paagi sa paghimos sang iya mga gamit ukon paghugas sang mga pinggan, nagabatyag ako nga may pulos ang akon ginahimo kag importante ako sa amon pag-asawahay.”

Pamangkuta ang imo kaugalingon: ‘Ang akon bala pagtratar sa akon tiayon nagapakita nga ginarespeto ko sia? Ginahatagan ko bala sang nagakaigo nga tion kag atension ang akon tiayon?’ Ugyon bala ang imo tiayon sa imo mga sabat?

Tilawi ini: Isulat ang tatlo ka kahimtangan nga gusto mo pakitaan ka sing pagrespeto. Ipahimo man ina sa imo tiayon. Dayon magbayluhanay kamo sang listahan para mapanikasugan ninyo nga mapakita ang respeto sa mga kahimtangan nga ginlista sang inyo tiayon. Magpokus sa imo palauswagon sa pagpakita sing respeto. Kon may manguna sa pagpakita sing respeto, sa masami masunod man ang isa.

^ par. 8 Gin-islan ang pila ka ngalan sa sini nga artikulo.

^ par. 14 Ginkuha sa libro nga Ten Lessons to Transform Your Marriage.

Magtuon sing Dugang Pa

Magpagiya sa Dios Para Mangin Malipayon ang Pag-asawahay

Ang paggamit sing duha ka simple nga pamangkot makabulig sa inyo nga mangin malipayon ang inyo pag-asawahay.