Accessibility setting

Magpili sing lenguahe

Magdiretso sa segundaryo nga menu

Magdiretso sa listahan sang kaundan

Magdiretso sa kaundan

Mga Saksi ni Jehova

Hiligaynon

MAGMATA! NUM. 5 2016

 PAGBANTAY SA KALIBUTAN

Pagtalupangod sa Kadutaan sa Amerika

Pagtalupangod sa Kadutaan sa Amerika

Ang mga report halin sa Kadutaan sa Amerika nagapakita nga mapuslanon gihapon ang wala nagalubad nga kaalam sang Biblia.

Indi Pirme Pagbukas sang E-mail—Makabuhin Bala sang Stress?

Mahimo nga mas haganhagan ang stress sang mga tawo nga nagabukas sang ila e-mail sing tatlo lang ka beses kada adlaw imbes nga pirme, suno sa research sa Vancouver, Canada. Si Kostadin Kushlev, nga nanguna sa pagtuon, nagsiling parte sa iya natukiban: “Nabudlayan ang mga tawo sa pagbato sa pagsulay nga buksan ang ila e-mail, pero ang pagbato sa sini nga pagsulay makapahaganhagan sang ila stress.”

BINAGBINAGA INI: Nagakabuhi kita sa “makahalanguyos nga mga tion nga mabudlay atubangon,” gani indi bala dapat mangita kita sing paagi para mabuhinan ang stress?—2 Timoteo 3:1.

Pagpadamo Liwat sang mga Isda

“May mga rekord nga nagapakita nga nagdamo liwat ang dalagku nga mga pakinhason, banagan, kag isda sa mga lugar nga ginadumilian ang pagpangisda” sa Belize kag sa iban nga lugar sa Caribbean, suno sa report sang Wildlife Conservation Society (WCS). Nagsiling pa gid ini: “Ang pagdamo liwat sini sa mga lugar nga ginadumilian ang pagpangisda mahimo magdugay lamang sing 1-6 ka tuig kon ipaanggid sa mga lugar nga ginapangisdaan, pero maulian gid ini sing bug-os . . . sa sulod sang mga dekada.” Si Janet Gibson, ang program director sang WCS, nagsiling parte sa Belize: “Maathag nga ang pagdumili sa pagpangisda makabulig agod magdamo liwat ang mga isda kag iban pa nga buhi nga tinuga sa kadagatan.”

BINAGBINAGA INI: Ang ikasarang bala sang kinaugali sa pagpadamo liwat nagapamatuod nga may maalam nga Manunuga?—Salmo 104:24, 25.

Pagkabayolente sa Brazil

Nagalala na gid kag nagalapnag ang pagkabayolente sa Brazil, suno sa balita sang Agência Brasil. Ang kadamuon sang ginpamatay sang 2012 nagsobra sa 56,000—ang pinakamataas nga narekord sang Ministry of Health. Ang eksperto sa seguridad sang publiko nga si Luís Sapori nagapati nga ina nga pagtaas nagapakita sang grabe nga pagnubo sa moral. Kon wala na sing respeto ang mga tawo sa mga kasuguan sang isa ka sibilisado nga komunidad, “nagahimo na sila sing kapintas para makuha ang ila gusto,” siling niya.

NAHIBALUAN MO BALA? Gintagna sang Biblia nga maabot ang tion nga ang gugma “magabugnaw” kag magadamo ang kalautan.—Mateo 24:3, 12.